الإعداد الُمختلف
الرسالة السابقة
العنوان : الإعداد الُمختلف
القسم: #الديني
الرقم: 18
السؤال:
سلام عليكم
انا كل سنة آجي في شهر رمضان و احاول أبدأ بداية مختلفة و اعمل جدول بالطاعات و فعلا ببقي مواظب عليه كام يوم لكن باكسل بعدها .
يا تري اازاي اقدر اواظب علي مستوي عالي من الطاعات و امشي علي جدول مناسب من غير ما اكسل السنادي
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله و بركاته . .
سؤالك مهم , و كويس إنك سألته من دلوقتي , و لسة فاضل تقريبا 3 شهور علي شهر رمضان ,واللي هيبدأ يوم 5 مايو 2019 , كل سنة وانتم طيبين .
احنا بنيجي كل سنة و نفتكر شهر رمضان قبل بداية الشهر باسبوعين ولا تلاتة , و لما بنبدأ نستعد ليه بيكون خلاص باقي أيام قليلة , وفجأة نلاقي شهر رمضان دخل بالفعل .
وبيحصل السيناريو المعتاد اللي بيتكرر كل سنة , أول ما يبدأ الشهر الكريم , يبدأ الواحد بداية سخنة مع الطاعات , يمسك المصحف و ينفض التراب من عليه , يبدأ من سورة البقرة وهو ناوي يقرأ جزء و لا جزئين كل يوم , يحافظ علي الصلاة في المسجد , يحاول ينتظم في شوية اذكار , ويصلي التراويح او جزء منها .
و بعد تلات أو أربع أيام , يبدأ الكسل في الزحف التدريجي للطاعات , نلاقي جزئين القرآن بقم 5 صفحات , النص ساعة بتاعت الذكر بقت 5 دقايق , الصلاة في المسجد بقت للعشاء بس , التراويح بقت ركعتين و خلاص .
كمان تلات او اربع ايام , نلاقي التخلي المستمر عن باقي الطاعات , مفيش قرآن , مفيش ذكر, مفيش تراويح, مفيش صلاة في المسجد , ويمكن الصلاة نفسها تقف .
و تدريجيا نلاقي الصيام نفسه بقي "حِمل تقيل" , خاصة مع الحر ولو فيه مذاكرة او شغل او مشاوير , و تلاقي نفسك من جواك بتعد الأيام امتي يخلص رمضان و ييجي العيد , بس من برة علي وجهك كل علامات الإيمان والتقوي , و انت بتردد في خشوع الحديث (لو يعلم العباد ما في رمضان لتمنت أمتي أن يكون رمضان السنة كلها) , مع إن هو حديث ضعيف في الأساس . .
و مع بداية العيد , تشعر بالإنطلاق و الحرية , و تطلق العنان مش بس في الأكل و الشرب , لكن كمان في "التحرر" من الطاعات , و "الاقتراب" من المعاصي . .
ده السيناريو المتكرر بتاع كل سنة , صح ؟ ؟
و ده اللي بنعمله بشكل مستمر مع كل رمضان , مع إن كل سنة بنحاول نتغير من جوانا , لكن مفيش فايدة . .
عشان كدة لازم نتكلم دلوقتي عن مفهوم : الإعداد المُختلف . .
---------------------------------------------------------------------------------------
من ناحية هو إعداد : يعني استعداد و تحضير و تجهيز .
و من ناحية هو مختلف , لأن طريقته لابد تكون مختلفة عن الأسلوب المعتاد في التعامل مع رمضان , لأننا لو مشينا بنفس الأسلوب بتاع كل سنة , مش هنوصل الا لنفس النتيجة السلبية . .
طب ده يتم ازاي ؟
ده هيتم عن طريق تنفيذ عشر خطوات , واللي لو انت كنت جاد بالفعل في تنفيذها من دلوقتي , فهتلاقي نتيجة مختلفة كليا أول ما يهل علينا الشهر الكريم . .
عشر خطوات , مفيهومش صعوبة , لكن محتاجين شوية صبر و اهتمام , ولو بالفعل بدأت فيهم من دلوقتي هتندهش إن رمضان السنادي بقي مختلف عن السنين اللي فاتت بالنسبة لك . .
------------------------------------------------------------------------------------
1 ) الخطوة الأولي : انتقي 3 طاعات
يعني امسك ورقة و قلم , اكتب أكتر عشر طاعات و فرائض انت مقصر فيهم , واختار منهم أهم 3 , تلاتة بس متكترش عن كدة , وابدأ درب نفسك علي الانتظام فيهم في الشهور التلاتة الجاية . .
مش هينفع تبدأ شهر رمضان و انت لسة عندك شوية تقصير في الطاعات , او ماشي علي سطر و بتسيب سطر , ومتقولش في بالك اني هنتظم في الطاعة في رمضان , هي ديه غلطة كل سنة انك بتحاول تبدأ في رمضان , وغالبا الموضوع مش بيتم . .
فاتخاذ مسار التدرج في التعود علي الطاعات , سواء الطاعات اللي الشخص مش بيعملها في الأساس , او بيعملها بشكل متقطع , هو الأسلوب السليم في محاولة التمسك بيها . .
ولما الشخص يسيب لنفسه مهلة كافية (3 شهور مثلا) , هتجد انها مناسبة عشان يتم فيها تحسن تدريجي في اسلوب و كيفية التعامل مع الطاعة , وبالتالي مع بداية الشهر المبارك يكون الشخص نفسه "مدرب" , و"جاهز" بما فيه الكفاية للتمسك بالطاعة .
------------------------------------------------------------------------------------
2 ) الخطوة الثانية : انتقي 3 معاصي
وهي نفس الفكرة اللي فاتت , لكن تتعمل في المعاصي . .
أجمل تشبيه اتقال علي المعاصي , إنها أشبه بأثقال من حديد مربوطة في رجليك بالسلاسل , فانت ممكن تتخيل تأثيرها عامل ازاي عليك لما تيجي تتحرك او تروح هنا او هناك . .
و بالتالي لما انت تعمل تقليل للمعاصي اللي معاك (خاصة اللي انت مستمر فيها) , فانت بتعمل تخفيف للاثقال اللي بتربطك , واللي بتعملك إعاقة كاملة عن التقدم و الحركة . .
نفس الفكرة , امسك ورقة و قلم , واكتب 10 معاصي انت عارف انك بتعملهم بشكل مستمر , ونقي منهم اكتر 3 معاصي انت متضايق منهم , و حاول بقدر الإمكان انك تتخلص منهم , او علي الأقل تقلل جدا من المعدل بتاعهم في الشهور الجاية , عشان لما يبدأ الشهر الفضيل , تجد نفسك متحرر منهم بشكل كبير . .
عندك بقي "النظر المحرم , الكذب , الغيبة , النميمة , فلان اللي انت مخاصمه , الأغاني , قبول المال الحرام , إغضاب الوالدين . . . "
شوف من اللستة ديه , ايه اكتر 3 حاجات مضايقينك , و حاول بقدر الإمكان تتخلص منهم في الشهور التلاتة الجاية
------------------------------------------------------------------------------------
3 ) الخطوة الثالثة : تعود علي الصيام
مش هننكر ان الصيام متعب , خاصة في الصيف, كمان لو فيه مذاكرة او امتحانات , أو شغل طويل . .
هو فعلا لازم يكون متعب , الجنة مش ببلاش , والدخول من باب الريان في الجنة هو شرف لن يناله أحد بسهولة . .
بس المشكلة ان الانتقال المفاجئ من حالة "اللا صيام" إلي حالة "الصيام يوميا" , بيتسبب في صدمة جسدية , وأحيانا بيصنع نوع من الإزعاج و الضيق , و هو اللي بلا شك بيأثر سلبا علي مقدار تعاملك مع الطاعة في نهار او ليل رمضان, بل و حتي علي تعاملك العادي في نواحي الحياة : شغل او دراسة . .
بينما اللي متعودين يصومو اتنين و خميس اسبوعيا , أو الأيام البيض من كل شهر (13 و 14 و 15 ) بيكون هو بالفعل مهيئ نفسيا و جسديا للصيام , وبيكون هو متعود عليه بالفعل , فبالنسبة له شهر رمضان ما هو الا امتداد للطاعة اللي هو متعود عليها بالفعل . .
حاول تستغل الاسابيع الجاية انك تصوم يوم واحد اسبوعيا , هو يوم بس في الاسبوع , وهتلاقي جسمك اتعود شوية شوية علي انك تسيب الاكل و الشاي و النيسكافيه و السجاير , وهتلاقي لما دخلت رمضان ان مفيش صدمة كل سنة
------------------------------------------------------------------------------------
4 ) الخطوة الرابعة : ذق حلاوة القرآن
مشكلة التعامل مع القرآن , اننا بنتعامل مع الكم و ليس الكيف . .
بيكون غرض الشخص : هختم كام مرة ؟ قريت كام جزء اليوم ؟ يا تري مين ختم و احنا في اول اسبوع ؟
لكن يا تري مين فينا مهتم بالفعل إنك يجعل آيات القرآن العظيم تتسرب داخل عقله و قلبه و كيانه , كام واحد فينا اهتم انه يجعل الكلمات تتغلغل داخل روحه ؟ ؟
يا تري قريت تفاصيل غزوة أحد اللي نزل فيها آيات سورة آل عمران ؟ ؟ تعرف أسماء الصحابة التلاتة اللي نزل فيهم آيات تكفير ذنبهم في التخلف عن غزوة العسرة في آيات سورة التوبة ؟ فاكر تفاصيل حادث الإفك اللي فيها عشر آيات من سورة النور ؟ عارف ايه اللي حصل بين سيدنا "زيد بن حارثة" و السيدة "زينب بنت جحش" لما نزلت آيات فيهم في سورة الأحزاب ؟
يعني ايه "وَهُمْ يَنْهَوْنَ عَنْهُ وَيَنْأَوْنَ عَنْهُ" في سورة الأنعام ؟ , يعني ايه "إِنَّمَا النَّسِيءُ زِيَادَةٌ فِي الْكُفْرِ" في سورة التوبة ؟ يعني ايه "كَأَنَّهُمْ خُشُبٌ مُّسَنَّدَةٌ " في سورة المنافقون ؟ ؟
يا تري هتقعد طول حياتك بتقرأ القرآن و انت مش فاهمه ؟ ومش عارف معني الآيات و أسباب نزولها ؟ ؟
و أساسا احنا عايشين في عصر , أسهل حاجة فيه الحصول علي المعلومة , و ممكن حالا تنزل تطبيق علي الموبايل فيه كل معاني القرآن الكريم و اسباب النزول . .
لازم رمضان السنادي يكون مختلف معاك , ابدأ دلوقي و قدامك 100 يوم علي بدايته , ابدأ انك تفهم القرآن و تتعرف علي خباياه , لو مسكت كل يوم صفحة واحدة منه , تتعرف علي المعاني و أسباب النزول , هتتعلم 100 صفحة منه يعني حوالي خمس أجزاء , ولما تقرأهم في رمضان , هتكون فاهم كل كلمة فيهم . .
أكيد القراءة لوحدها علي ثواب كبير , ولكن لن تقارن مع تدبر و دراسة و تعلم القرآن الكريم . .
------------------------------------------------------------------------------------
5 ) الخطوة الخامسة : لذة قيام الليل
رمضان مرتبط ذهنيا بتلات حاجات أساسية , الصيام بالنهار , والقيام بالليل , والقرآن طوال اليوم . .
طالما اتكلمنا عن الصيام و القرآن , فلابد من الكلام عن القيام . .
الصورة المثالية لقيام الليل (وهي الانتظام فيه بشكل يومي , والحرص علي القيام ساعتين مثلا كل ليلة ) , بتكون صعبة عند أغلبنا , وصعوبتها بتخلي أغلبنا يبعد عنها تماما . .
طب ماذا عن تحقيق نسبة منها , ولو كانت قليلة ؟ ؟
ماذا عن تنفيذ قيام الليل , 5 دقايق يوميا ؟ ؟
هي بس 5 دقايق , كل يوم قبل ما تنام , تطفي نور الأوضة , و تصلي ركعتين خفيفتين , بس ركعتين مش لازم تكتر عن كدة . .
ابدأ من دلوقتي اتعود عليها , خليها شئ يومي في حياتك , خليها شئ مرتبط بجدول يومك , بحيث لما تيجي في رمضان و تمسك المصحف و تصلي 8 ركعات , كل ركعة فيها ربع او ربعين , تلاقي الدنيا بقت سهلة . .
و حاول لما رمضان يخلص , انك متسيبش القيام و تنساه , ارجع تاني لركعتين قبل النوم , حتي لو 5 دقايق مش اكتر ..
ثق انك هتلاقي في قيام الليل بركة و نور هتملي عليك حياتك , هتلاقيها بتعملك دعم نفسي و روحي غير محدود , وهتلاقي الخمس دقايق اللي انت تركتها لله , ربنا هيعوضك بيها ببركة في الوقت و زيادة في الرزق .
------------------------------------------------------------------------------------
6 ) الخطوة السادسة : تعود علي الورد
المقصود بيه "وِرد المحاسبة" (بكسر الواو و سكون الدال) , يعني جدول محاسبة صغير . .
يعني ببساطة يكون معاك ورقة و قلم , و تعمل جدول فيه ايام الشهر في الصفوف , والطاعات او الاعمال في الاعمدة , وتبدأ تسجل لنفسك عملت ايه و معملتش ايه , عشان تشوف درجاتك كام . .
الأمر ده علي بساطته فهو شديد الأهمية , وبيخليك تحاسب نفسك بشكل مستمر , تتورع عن المعاصي عشان عارف ان فيه جدول بيتحسب عليك . .
الفاروق رضي الله عنه كان بيقول كلمة جميلة : حاسبوا أنفسكم قبل أن تحاسبوا، وزنوها قبل أن توزنوا، فإن أهون عليكم في الحساب غداً أن تحاسبوا أنفسكم اليوم . .
وثق انك علي قد ما تحاسب نفسك دلوقتي , هتلاقي الحساب يوم القيام اسهل إن شاء الله , لأنك بالفعل هتلاقي نفسك أكتر حرص في العمل , وهتلاقي انك بتراقب نفسك قبل كل خطوة . .
هنا فيه عدد من التطبيقات الجميلة المستخدمة لمحاسبة النفس , شوف انهي فيهم انت مستريح ليه و تعامل معاه :
https://play.google.com/store/apps/details?id=abdallahandroid.mohasba
https://play.google.com/store/apps/details?id=com.yassine.mobi.yawmmomin
https://play.google.com/store/apps/details?id=com.zaydwamr.armahamypro
https://play.google.com/store/apps/details?id=zizkuz_menu.hassebnafssak
https://play.google.com/store/apps/details?id=com.prayer.mohassabatanafs
https://play.google.com/store/apps/details?id=amrabed.android.release.evaluation
------------------------------------------------------------------------------------
7 ) الخطوة السابعة : فرغ جدول أعمالك في الشهر
معناها ببساطة ان لو فيه حاجات غير مرتبطة بزمن معين , وانت تقدر تنتهي منها قبل رمضان , او تقدر تأجلها لبعد رمضان , فياريت تعمل كدة . .
أكيد فيه حاجات غير قابلة لتغيير وقتها , سواء شغل او مذاكرة , لكن ماذا عن الحاجات العادية اللي متعطلة من شهور , حاول تنجزها سريعا في الشهور التلاتة الجاية , عشان وقتك في رمضان يكون متاح أكتر . .
حتي لو انت عندك مذاكرة و امتحانات في شهر 5 , فانت علي قد ما تقدر تذاكر دلوقتي و تقطع شوط كبير في المنهج , و تذاكر أول بأول , هتلاقي وقتها ان كمية المذاكرة المطلوبة اقل , وهتقدر بالفعل تواظب علي صلاة الفجر في المسجد + قراءة القرآن بشكل مستمر + باقي الطاعات المطلوبة , من غير ما يأثر علي المذاكرة اللي انت بالفعل انجزت منها كمية كبيرة .
------------------------------------------------------------------------------------
8 ) الخطوة الثامنة : اقفل المنافذ
و المقصود بيها منافذ المعصية او تضييع الوقت , اللي الشيطان بيجيلك منها كل سنة . .
و أهمها : الموبايل + اللاب توب + التليفيزيون + اصدقاء السوء . .
ايوة مش هتعرف تستغني عن الموبايل , بس ممكن تستغني عن الأغاني اللي فيه , ممكن تفتح الواتس او الماسنجر كل 4 ساعات مرة مثلا , ممكن تمسح الالعاب اللي فيه في رمضان , لأن كل دقيقة ليها تمنها . .
لو انت عارف ان اللاب هيضيع وقتك , فممكن اصلا تبعده خالص عن البيت لو مش محتاجه في شغل او دراسة , ولو محتاجه ضروري يبقي نظم وقتك عليه , عشان ميكونش مصدر ذنوب في الأيام المباركة ديه . .
حتي انت ممكن تمسح منه اي متصفح نت سريع (زي كروم او فايرفوكس ) و تجبر نفسك انك تستخدم internet explorer قديم شوية , عشان يكون بطئ و غلس معاك , فمتعرفش تقعد عليه كتير . .
من دلوقتي استعد لقفل منافذ الشيطان , صحيح الشيطان مش موجود في رمضان , لكن شياطين الإنس مفيش أكتر منهم .
------------------------------------------------------------------------------------
9 ) الخطوة التاسعة : البحث عن رفيق
الطاعة متعبة بطبعها , ديه حقيقة محدش هينكرها , عشان كدة شوف حد يكمل معاك المشوار , عشان لما انت تزهق هو يشجعك , ولما هو يكسل انت تزعق فيه . .
شوف حد من اصحابك اللي انت مستريح لهم , واتفق معاه علي خطة سليمة لتنفيذها في شهر رمضان , و رتب معاه انكو هتتابعو بعض كل يوم الساعة 10 بالليل مثلا ,تشوفو كل واحد وصل لفين . .
بس ياريت يكون شخص جاد , مش بيهزر و تقضوها نكت و ضحك , يكون حد جاد وعنده نفس الرغبة . .
نفس الموضوع ليكي كبنت , شوفي صديقة قريبة منك تساعدك علي تنفيذ الخطة الرمضانية , بحيث تكون جادة و عايزة تحقق نجاح حقيقي السنادي في رمضان , وتكون ايدك في ايديها طول الشهر . .
طبعا مفيش حاجة اسمها ولد يتابع مع بنت او بنت مع ولد , ده اسمه كلام فاضي و بتضحك علي نفسك . .
------------------------------------------------------------------------------------
10 ) الخطوة العاشرة : بناء خطة سليمة
آخر خطوة , إنك تعمل ترجمة للخطوات اللي فاتت في جدول بسيط . .
خطط لجدول أعمال يومي بسيط مش كبير ولا مكلكع , اكتب عدد من الطاعات اللي هتعملها , عدد من المعاصي اللي لازم تتجنبها , وتكتب ايام رمضان التلاتين . .
ممكن حتي تستعين بواحد من التطبيقات اللي علمنا روابط فيها في النقطة السادسة , او تعمل جدول جديد في ملف اكسل , او تعمل حاجة مختلفة في ورقة بيضا . .
مش هيفرق شكله , مش هيفرق محتواه , المهم الجدية و المتابعة فيه . .
يعني حاجة زي كدة :
او زي كدة :
https://drive.google.com/file/u/1/d/140BKfETOWhBgVKlOpe4F0DWNXWO5-Ykk/view?usp=sharing
------------------------------------------------------------------------------------
ديه كانت 10 خطوات ,لو بالفعل تم تنفيذهم , هتلاقي ان شهر رمضان السنادي هيكون مختلف , لسة قدامك 3 شهور من دلوقتي , وهتلحق تعمل كل حاجة لو انت عايز , ابدأ من دلوقتي و ثق ان ربنا هيتقرب اليك ذراعا , طالما انت تقربت إليه شِبرا . .
ربنا يتقبل منا و منكم