العنوان : تقدير الذات

القسم: #النفسي

الرقم: 01

السؤال:

 

ازاى أقدر قيمه نفسى وقيمه اللى بعمله مش حاسه انى اللى بعمله له قيمه على الرغم من ان رأى اللى حوليا بيقول غير كده .

 

يمكن عشان مش بشتغل وانا كنت شايفه ان قيمتى هتبقى فى شعار بعد التخرج وده محصلش مع ان ديه مشكلة بنات كتير زى وطبعا شباب برضوا بسبب البطاله

 

وعلى الرغم من إنهم مش بيلاقوه وظيفه الا انهم مش بيحسوا بتفاهة وجودهم

 

يمكن عشان كنت راسمه لنفسى أحلام كثيره وكبيره ومحققتهاش مع أول فشل ليا فى اول تجربه وبقيت حاسه انى مش بعمل حاجه غير انى مستنيا نصيبى

 

 وده لوحده مسبب لى ألم لانى مش انا ده وفى نفس الوقت خايفه انوا يكون قنوط منى وشكرا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

من القصص اللي بيقولوها للأطفال , كنوع من تعليم نواحي الحياة المختلفة , إن الديك كل يوم لما كان بيطلع علي سطح البيت ,  ويطلق صياحة المستمر قبل الشروق , هو بيعمل كدة لأنه مؤمن ومقتنع بأن الشمس مش بتطلع الا لما هو ينادي عليها , فلازم ينادي عليها كل يوم و الا مش هتطلع أبدا , والناس هتعيش في ظلام مستمر . .

 

فالديك كان مستمر كل يوم في إطلاق الصياح قبل الشروق , عشان الشمس تطلع , وحتي لو هو تعبان كان بيغصب علي نفسه لإطلاق الصياح , عشان الناس متبقاش عايشة في الظلام , كان حاسس بالمسؤولية الكاملة عن الناس  ومتقبلها عن طيب خاطر . .

 

في يوم صحي لقي نفسه تعبان جدا و معندوش اي صوت , حاول بكل جهده انه يطلق الصياح اليومي عشان الشمس تطلع , فمقدرش خالص , واتضايق جدا , و عرف ان الشمس مش هتطلع و وان الناس هتعيش في ظلام مستمر بسببه . .

 

لكن فوجئ بعد شوية ان الشمس طلعت عادي , ومكانتش منتظره صياحه . .

 

هنا الديك اتصدم , وحس انه كان مخدوع فترة طويلة , وان هو بلا فائدة , وان كل اللي كان بيعمله ملوش اي لازمة , لان الشمس هتطلع سواء هو عمل الصياح او لا . .

 

الديك قعد مكتئب فترة طويلة , ومعملش اي صياح تاني لما عرف انه خلاص ملوش اي فايدة , و فضل كام يوم في حالة احباط مستمر . .

 

لغاية لما لاحظ ان الأرض الزراعية حواليه بدأت تبور  , وان المدارس بقت فاضية مفيهاش اطفال , وان المصانع بقت واقفة مفيهاش حد بيشتغل , وان المشاكل بين الناس بدات تزيد بشكل كبير . .

 

بدأ يسئل يا جماعة هو فيه ايه , قالوله ان من يوم ما الديك بطـّل  يصيح كل يوم , والفلاحين مبقوش يصحو من النوم عشان يروحو يزرعو , والاطفال مبقتش تصحي تروح المدارس , والعمال مبقتش تصحي تروح المصانع , والناس بدأت تعمل مشاكل مع بعضها بسبب الحاجات ديه كلها . .

 

هنا أدرك الديك إن دوره كان أهم بكتير من الشئ اللي كان بيحسب انه بيعمله , وانه بالفعل ليه دور في المجتمع من غير ما ياخد باله , ورجع يصيح كل يوم تاني قبل الشروق . .

 

القصة ديه بيعملوها للاطفال , وعلي الرغم من كدة احنا ناسينها ومش عارفينها , ومحتاجين نتعلمها من الاول تاني  . .

 

---------------------------------------------------------------------------

 

نيجي للتساؤل اللي عندك . .

 

لازم يتم تحليله لتلات نقط عشان نتكلم عن كل واحد بالتفصيل :

 

• احساسك بعدم أهمية او قيمة اللي بتعمليه

• بناء الامل بعد التخرج

• الخطط الكبيرة و امكانية التنفيذ والاحباط بسبب الفشل

 

 

 

أولا إحساسك بعدم أهمية  أو قيمة ما تقومين بيه . .

 

بشكل عام الإحساس ده مشكلة كبيرة , و استمراره يخالف الطبيعة البشرية اللي بتحتم علي الإنسان التفاعل مع من حوله , والمشاركة في الانشطة المختلفة , كمان الغريزة الخاصة بمساعدة الناس و التخفيف عنهم بكل الطرق , فالإحساس باختفاء قيمة ما تقومين بيه مشكلة لازم تتحل . .

 

و استمرارها هيؤدي إلي الشعور بتدني قيمتك كفرد في المجتمع , مما يصنع فورا ما يسمي (عقدة النقص)  , لما تحسي ان كل اللي حواليكي حتي بياع الفول ليه لازمة في المجتمع , وانتي ملكيش اي فائدة . .

 

كمان هيدخلك في دائرة الإهمال الذاتي , مهو طالما انا مليش لازمة خلاص بقي آكل براحتي لما اتخن و ابقي برميل  ,او اشرب سجاير , او اصاحب ناس زبالة  ,او حتي اشوف ايه المخدرات ديه , مهو انا مليش اي فايدة اساسا . .

 

و الاسوء إنها بتخلي فكرة الانتحار مش بعيدة  , في الإحصائيات الأمريكية  ,وجدو ان نسبة النساء المنتحرات , اللي عندهم اطفال , اقل بكتير من النساء اللي معندهومش اطفال , وجود الأطفال عند الست المحبطة حتي لو بتفكر في الانتحار بيمنعها انها تتجنن و تقتل نفسها ,لعملها ان ليها دور كبير , بينما اللي معندهاش اطفال احتمالية انتحارها اكبر طالما هي عارفة ان ملهاش اي لازمة  . .

 

فده شعور خبيث لابد من مقاومته , وان كنتي انتي حاليا مش شايفة ضرر منه , فثقي ان ليه تأثيرات تراكمية مفزعة علي المدي الطويل . .

 

---------------------------------------------------------------------------

 

وسبب الشعور ده حاجة من اتنين , وارد يكون فعلا مفيش شئ مهم بيملي حياتك , وبالتالي الشعور ده ليه اساس سليم , أو وارد تكوني بتعملي اشياء مهمة بس انتي مش عارفة انها مهمة , وحاسة انه شئ هايف, علي الرغم من انه شئ حيوي . .

 

و هنتكلم الاول علي النقطة التانية , وهي المتعلقة بالتقييم الخاطئ للأمر . .

 

لو شفتي قصة الديك , ازاي انه لما عرف ان الصياح ملوش فايدة والشمس بتطلع بالفعل من غيره , احبط و توقف عنه فورا . .

 

بعدها فوجئ ان المجتمع بالفعل بيعتمد علي صياحه يوميا , وان الفلاحين و الطلاب و العمال , مش بيعرفو يقومو من النوم الا لما يسمعوه . .

 

و بمجرد توقفه عن صياحه كام يوم , القرية خربت بالفعل  . .

 

نفس الموضوع  عندك , مين قالك انك لما بتذاكري ايلتس , او بتشاركي في جمعية خيرية , او بتخيطي اراجوز عشان الايتام هيلعبو بيه , او بتنفخي بلالين و توزعيها علي الفقرا ,  مين  قالك انه شئ ثانوي او يمكن الاستغناء عنه  ؟ ؟

 

افتحي ضهر التليفزيون بالمفك , اقطعي اي سلك صغير  , او شيلي اي "مكثف" الكتروني منه , وقوليلي هيشتغل ازاي  ؟ ؟   

 

السلك الصغير اللي قطعتيه عمل شلل كامل للجهاز الكبير ده  . .

 

المجتمع بالكامل قائم علي ان فيه اختلاف و تنوع بين افراده , ومهامه , ولو انتي حاسة بإن الطبيب دوره أهم من عامل النضافة , فتخيلي لو لغينا مهنة عامل النضافة البلد هتبقي عاملة ازاي . .

 

مشكلة النظام التعليمي المتأخر في بلادنا , انه بيعمل قناعة عند الطلاب و اولياء الأمر ان فيه حاجة اسمها كليات قمة و كليات قاع , فالاطباء و المهندسين حاجة كويسة , والمحامين و المحاسبين حاجة مش حلوة , وتسمعي بتعجب من واحدة تقولك  "تخيلي البت هيام مهندسة و تتجوز مدرس  ؟ ؟  تخيلي "  . .

 

النظرة العنصرية الغبية  ديه هي اللي صنعت حالة من الضغط علي اعصاب كل البيوت المصرية , واللي لما تطلع نتيجة الثانوي , تلاقي 10 % بيحمدو ربنا انهم دخلو كليات القمة , وباقي الـ 90 % بيلطمو , بسبب التقييم المتخلف للأمور . .

 

عامل الديليفري اللي بيجيبلك البيتزا للبيت راسه براس اتخن وزير في مصر ,  الرسول صلي الله عليه و سلم علمنا ان عامل المفاضلة عند رب العالمين هو الدين و الخلق والتقوي , مش المؤهل ولا العمل , يكفيكي شرفا إن افضل خلق الله صلي الله عليه و سلم , كان راعي غنم  لمدة 8 سنين , ثم تاجر لمدة 25 سنة . .

 

الإحساس بدونية اللي بتعمليه جاية من نظرة المجتمع الغبية اللي بتفرق بين الطبيب و المحامي , بين البحري و الصعيدي , بين القاهري و النوبي , بين الابيض و الاسود , بين الفقير و الغني , ولو انتي رميتي ودنك للمجتمع هتتعقدي . .

 

لو انتي بالفعل بتعملي حاجة مفيدة ليكي او للناس , كملي فيها فورا , وطوري نفسك , لا بأس تنتقلي لمستوي اعلي , او عمل اكثر فائدة , او تعملي حاجة تاني بالتوازي , لكن التوقف تماما  , هو الشئ اللي الشيطان عايزه منك , عشان تدخلي في فخ المشاكل النفسية المعقدة . .

 

---------------------------------------------------------------------------

 

الاحتمال التاني  تكوني بالفعل مش بتعملي حاجة مهمة , ويكون وقتك ضايع في حاجات هايفة , او الانيل تكوني بتعملي عمل فيه شئ من المحرمات و الذنوب , كفاية بس كتر الكلام اللي احيانا بيخرب البيوت  . .

 

وقتها المشكلة عندك انتي بالفعل , و لازم تاخدي خطوة لاصلاحها . .

 

شوفي الرسول صلي الله عليه و سلم لما نصح أحد الصحابة , في الحديث اللي اخرجه الحاكم  (اغتنم خمسا قبل خمس  , شبابك قبل هرمك  , وصحتك قبل سقمك  , وغناءك قبل فقرك  , وفراغك قبل شغلك  , وحياتك قبل موتك )

 

الحديث بيشدد علي ان الشخص يلحق يستغل شبابه , وصحته , وغناه , وفراغه  , و حياته , عشان يصنع شئ يفيد نفسه و يفيد المجتمع , شئ يقابل بيه رب العالمين ويقول يا رب انا افدت نفسي بكذا , وتعبدت ليك بكذا , وافدت الناس بكذا كذا . .

 

انتي حاليا عندك اغلب النقاط الخمسة في الحديث , ومين عالم قدام ,  انهي عوامل من ديه هتختفي او تقل جدا , لغاية لما ييجي اليوم اللي جاي علي كل الناس , ويدخل الإنسان القبر , ومش هيدخل معاه الا عمله الصالح . .

 

عندك حاليا وقت تتعلمي انجليزي , تتعلمي فوتوشوب , لغة برمجة , تريكوه , تسويق الكتروني . .

 

عندك وقت تحفظي القرآن بالكامل , وتقرأي في كتب السيرة و الحديث و الفقه , تشوفي الشيخ الشعراي و غيره من الشيوخ  . .

 

عندك وقت تزوري عمتك و تساعديها في امور البيت , تتصلي ببنت خالتك و تتطمني عليها , تشوفي جدتك العيانة اللي محدش بيسال عنها  . .

 

عندك وقت تروحي جمعية خيرية و تساعدي باللي تقدري عليه , تروحي ملجأ ايتام و تفرحي اطفال نادرا ما بيضحكو , حتي لو انك تعملي في البيت اطباق رز بلبن , وتنزلي توزعيها علي الناس الفقرا في الشارع او عمال النضافة , هيكلف كام فلوس او وقت ؟ ؟

 

عندك وقت تشوفي افلام وثائقية فيها معلومات هايلة , تقري كتب في السياسة و الاقتصاد و التاريخ , حتي لو روايات هتفيدك

 

عندك حاليا الوقت و المجهود و الذهن الصافي انك تعملي كل اللي عايزاه , وقدام هتتمني ربع الوقت او روقان البال ده , او الصحة ديه ,  و مش هتلاقيها . .

 

---------------------------------------------------------------------------

 

نوصل للنقطة اللي بعدها وهي  بناء الامل بعد التخرج . .

 

وده بيكون خطأ ناس كتير تقع فيه , بيسموه "تسويف الخطط للمحطة التالية"

 

ان الواحد ببساطة , يأجل خططه و انجازاته و حياته غالبا للمحطة القادمة , هنمي نفسي لما ادخل الجامعة , همتحن ايلتس لما اتخرج , هبقي اشوف الشغل لما اخلص ورق الجيش , هبدأ أخس لما اتجوز , وكل ما الشخص يوصل لمحطة , غالبا بيأجل اللي كان عايز يعمله للمحطة اللي بعدها . .

 

وهكذا تنقضي حياة الشخص وسط عدد لا تنهي من التأجيلات لمحطات مستقبلية لن تنهي , حتي يفاجئ انه بقي عمره 53  سنة , و بنفس الفشل السابق اللي عنده , ومش لاقي اي محطة تانية يأجل بعدها الا القبر . .

 

ده خطأ كلنا بنقع فيه , والشاطر اللي بيقدر يعمل لنفسه خطط مستمرة , بيمشي فيها لقدام حتي لو بخطوة بطيئة , لكن مش بيقف عشان حياته نفسها مش هتنتظره . . .

 

---------------------------------------------------------------------------

نوصل للنقطة الأخيرة , والمتعلقة بالخطط المستمرة اللي انتي بترسميها , وتفاجئي بعدم امكانية تنفيذها , واللي فورا بتصنع حالة من الإحباط نتيجة الفشل . .

 

حاليا هيكون صعب في المساحة ديه اننا نتكلم عن مهارة وضع الخطط الذاتية , وآلية تنفيذها , لأنها محتاجة وقت و كلام كتير , بس ممكن نقول مجموعة من النصايح السريعة , واللي لو نفذتيها هتلاقي اغلب المشاكل اختفت . .

 

• لازم في البداية تعملي لنفسك مجموعة من الاهداف البسيطة , ارجوكي متكبريش الدنيا او تعقديها , اعملي مجموعة بسيطة من الاهداف الممكنة , اللي محتاجة توصليلها مثلا لغاية اول سنة 2019 , يعني قدامنا تقريبا 3 شهور

 

• الاهداف تكون بسيطة و سهلة و ممكنة , متقوليش هقرا 5 كتب , قولي هقرا كتاب واحد في ال3 شهور , و هزور عمتي مرتين , وهتصل بجدتي مرة في الاسبوع  , وهعمل عمل خيري مرة كل اسبوعين , وهحافظ علي صلاة الفجر في معادها , و هقرا صفحة من القران يوميا  , و هذاكر انجليزي ساعتين في الاسبوع  ,و هعمل تمرينات رياضية في البيت 5 دقايق يوميا , كفاية متزوديش علي نفسك عشان متفشليش فيهم

 

• حاولي تخلي الاهداف تغطي اغلب المجالات اللي انتي عايزاها (ديني , اجتماعي , تتعلمي حاجة , ثقافي , رياضة ) , وحطي من ضمنها الحاجات اللي بتخليكي تستمتعي بادائها حتي لو بتضيع وقت (طالما مش حرام) زي انك تشوفي فيلم لاسماعيل ياسين لو تقرئي روايات او تتفسحي مع صاحبتك , مفيش مشاكل , ومتخططيش انك هتعيشي حياتك كلها في حاجات مهمة

 

• اصنعي مجموعة من الوسائل لتحقيق الاهداف ديه , يعني جدول زمني خفيف و مرن , وان مكنتيش هتعرفي تلتزمي بيه , يبقي علي الاقل تحطي في بالك اني هذاكر الانجليزي ايام اتنين و خميس , وهروح لعمتي كل يوم جمعة بعد الصلاة , وهقرا القران قبل ما انام  , حاجات كدة عامة عشان الحاجات متتداخلش مع بعض

 

• لو لقيتي نفسك مش بتنفذي اللي كتبتيه , عادي متضايقيش ولا حاجة , خففي الجدول او غيري اللي فيه , وهتلاقي الدنيا بقت سهلة . .

 

• لو فيه يوم صحيتي قرفانة و مش عايزة تعملي اي حاجة متعمليش اي حاجة فيهم (باستثناء الفرائض زي الصلاة) , مش مشكلة يوم يقع منك . .

 

• حاولي تربطي نفسك مع بنات محترمة , عندهم نفس الفكر و الاهداف , عشان تشجعو بعض , اما تقابلو و تعملو الشئ مع بعض (تزوريها و كل واحدة تقرأ كتاب معين , تعملو رياضة مع بعض) , او حتي بالتليفون

 

• بالتوازي ابعدي عن كل انواع البنات اللي من صنف (المحبطات , الكدابات , اللي لسانها طويل , الهايفات , المستهترات , اللي بتساعدك علي الذنب) مفيش اي خطط هتنجح الا لما تقطعي كل علاقتك بيهم  . .

 

• حاولي تلتزمي مع اماكن تشجعك علي الحاجات ديه , تشتركي في جيم عشان الرياضة  ,تعملي اشتراك في مكتبة  عشان تقري , تتفقي مع دار ايتام عشان تجيبيلهم رز بلبن مرة في الاسبوع , تدفعي فلوس كورس انجليزي عشان "تتدبسي" و تكملي معاهم , الحاجات زي كدة بتعملك حافز حتي لو كسلانة. .

 

• اول ما يقرب معاد انتهاء الخطة (اول 2019) شوفي انتي عملتي ايه من اللي خططتيه من ساعتها , واشطبي علي اللي تم , و هاتي اللي لسة متنفذش كويس , وضيفيه علي نقط جديدة , واعملي خطة جديدة لمدة 3 شهور (من اول يناير لاول ابريل 2019 ) , بحيث يكون فيه نقط اضافية جديدة و هكذا

 

• هتلاقي نفسك شهر بعد شهر , بقي فيه تطور  , هو ايوة بطئ بس ملحوظ , جسمك بقي بصحة اكتر من الرياضة , الانجليزي بتاعك بقي كويس , قرايبك بيحبوكي لانك اكتر واحدة مهتمة بيهم , بقي عندك 50 ابن صغير في دار الايتام منتظرين يشوفوكي كل اسبوع , بقيتي حافظة كذا سورة من القرآن , بقيتي مثقفة جدا من كتر الكتب والافلام الوثائقية اللي شفتيها . .

 

• اول ما يصيبك الاحباط , اوعي تستسلمي , اقفي لحظة  , وتجاهلي الخطة يوم او اتنين لو زهقتي , واخرجي اي مكان يفرحك عشان ترجعي بنشاط و حماس

 

 

متسيبيش نفسك للزهق و الاكتئاب , لانه بالفعل مش هيرحمك , وهتلاقي نفسك بعد كام سنة بقيتي شخص مختلف تماما عن اللي انتي كنتي متخيلاه