الخروج من المستنقع
الرسالة السابقة
العنوان : الخروج من المستنقع
القسم: #النفسي
الرقم: 25
السؤال:
انا بنت كبيرة ف أسرة مدمرة ، والدى كان عندة ورث يقدر يعيشنا كويس بس للاسف كان راجل بيحب الستات ضيع كل فلوسة وأدين
ماما طلبت الطلاق بعد ١٨ سنة بعد مبقينا ٥ اخوات انا أكبرهم اتبهدلنا بسبب ديون والدى
واعمامى اشفقوا علينا عيشونا فوق سطح أحد البيوت المملوكة لهم لاننا اربع بنات وولد
والدى اتجوز واحدة اكبر منى ب ٨سنين ومن هنا ابتدأ المشاكل بينا حاولت انى اهرب من الجحيم كما أطلق علية دائما للعمل بعد مسبت الدراسة لأسباب مادية
ابتديت اشتغل وانا عندى ١٧سنة حاولت أن أجرى بعض الصداقات لكننى لا احب مصادقة الفتيات ومن هنا بدائت مشاكل ف التفاقم
لأن زوجته أبى كانت تبحث دائما خلفى كى تقع بى وفعلا أوقعت بى وسجننى والدى بالبيت خوفا من أن اجلب لة العار كما قالت زوجتة
بدأ البعض ممن يترددون علينا بالمنزل من اصدقاء والدى بالتحرش بى
تحدثت احد من اقاربى كى يرقف بحالى وفعلا اخذنى عمى للعيش معة ثم تركنى ببيت حماة كنت اعمل لديهم خادمة فتركت البيت لكى اعيش بالشارع
عشت بالشارع أسواء ايام حياتى حتى ضاق بى الحال فرجعت بيت اهلى لكنهم ظلوا يفعلوا معى كما يفعلوا دوما
توقع زوجته أبى بى واسجن بالبيت
تزوجت هروبا من كل ذلك شخص لا يتحمل المسؤولية كنت اعمل وهو لا يعمل دائم تعنيفى يشك بى دائما كان بسبب لى عاهات مؤقتة
تركتة طالبة الطلاق وبعد مشاكل دامت ٣شهور تم الطلاق ولم احصل على اى حق من حقوقى حتى ملابس تركتها لة
انا حاليا مطلقة بقالى ٣اسابيع لكننى سجينة بيت أبى لتفعل بى زوجت أبى كما تفعل دائما
إن كان لازم اروح لدكتور نفسى فليس لدية ما يفعلون لى لاننى كنت أذهب لاحدهم منذ وقت عن عقدة بالكلام لم يفعل لى الكثير اعطانى مضادات اكتأب وطلب منى أن اغير اسلوب حياتى
لم أقل انتى لم افعل الخطأ بل فعلت لكننى لم اجد احد بجوارى فكنت اصدق من يقول لى أنة يحبنى وارتمى بحضنة كى انسا جحيمى
فماذا أفعل أنا لا اقدر ع العيش مع العلم أن ابى لايقوا حاليا ع أن يطعمنا فنحن اصبحنا ٩
وهو ليس لدية عمل
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
في بعض الأحيان , ولدي قرائتنا لأحداث مهولة يقشعر لها البدن , عقلنا الباطن فورا بيقتنع بعدم حقيقية الأحداث , وده لتجنب الوقوع في فخ الجنون . .
الجنون اللي يجعل الشخص مش قادر يتخيل المأساة المستمرة اللي بتحصل لناس عايشة وسطنا , وبتضحك و تهزر و تاكل و تشرب , من غير ما نعرف قد ايه جرحهم عميق , وألمهم مستمر . .
و قصتك اصابتني بنفس الشعور بالظبط , بحاول اقنع نفسي ان مفيش حاجة كدة في الدنيا ,ان الاحداث ديه مش حقيقية , عشان بس احاول احتفظ بتماسكي العصبي . .
يعني بداية من نشأتك في مستنقع من أب مجرم , وام مسكينة مكانتش لاقية حل الا انها تهرب من الجحيم ده . .
ثم زوجة اب سادية تستمتع بصراخك النفسي , و قريبك بيستعبدك , لما وصل بيكي الامر انك نمتي في الشارع . .
وكان من الطبيعي ان اي زواج نشأ في الظروف ديه محكوم عليه بالاعدام , فتم الطلاق فورا . .
وارد يكون فيه اجزاء خفية في قصتك انتي مقولتيهاش , وارد يكون فيه مساحات مظلمة في حياتك , لكن الشاهد انها كلها كانت في نفس اطار المستننقع المؤلم . .
و حاليا انتي في بيت ابوكي , مع مرات ابوكي اللي بتعاديكي , و اب غير مهتم بيكي , و ذئاب تنتظرك في الشارع لالتهام اغلي ما عندك , و لا ينتظرك الا مستقبل مجهول . .
وان متمش عمل تغيير للوضع القائم , فاخشي انه ممكن يتحول للاسوء , اما ترجعي الشارع تاني بكل ما فيه من مآسي , او تروحي في "حضن" احدهم زي ما وصفتي , او ترجعي لطليقك اللي هيسيمك سوء العذاب . .
--------------------------------------------------------------------------
تعالي بداية نسرد عناصر المستنقع اللي بيحيط بيكي , واللي هنحاول نحلها واحدة واحدة . .
-
الفقر : اللي دمر اسرتكم من البداية , واللي جعلك تترمي في الشارع و تتعرفي علي اصناف في قاع المجتمع , واللي حاليا مأثر علي معيشتك في البيت . .
-
غياب الوازع الديني : سواء عند ابوكي او مراته او عندك انتي كمان (خلينا نكون صادقين) , غيابه جعل علاقات ابوكي مع النساء امر سهل , وضرب امك امر اسهل , ومناكفة مرات ابوكي مستمرة , ولو اي شئ حدث عندك انتي . .
-
السلوك الخاص بيكي : سامحيني في الكلام بس ده واضح في الكلام , انتي قلتي ان مرات ابوكي كانت بتبحث وراكي لغاية لما اوقعت بيكي , و الإيقاع بيكون بناء علي شئ تم بالفعل , وحبس ابوكي ليكي كان لتجنب العار , فكل الكلام بيؤدي لمعني مخيف , غفر الله لنا و لكي . .
-
مكان معيشتك : حاليا انتي في البيت اللي مش طايقاه ولا هما طايقينك , سواء عشان الفقر او الخلاف المستمر . .
-
زواجك و طلاقك : وديه بعتبرها مش مشكلة حالية , باعتبار ان الموضوع انتهي , وانك مش تحت ذمته , و لا هو عمل اي شئ مجنون لاستردادك , فديه مش هنفكر فيها حاليا
-------------------------------------------------------------------
تعالي بقي نحاول نسرد عدد من الحلول و الاقتراحات , واللي ممكن يكون ليها اثر ولو بمقدار ما , في تغيير النقاط الاربعة اللي قلناهم من شوية (باعتبار النقطة الخامسة منتهية) . .
- اول شئ ترجعي لربنا , وبشكل سريع وفوري . .
احنا غالبا في مشاكل القسم النفسي و الاجتماعي , بنتجنب اننا نتكلم في الشق الديني , عشان منعملش نوع من التزايد , او الاتجار بالجانب الديني اللي هو متماس بالفعل مع كل جوانب حياتنا . .
بس هنا في مشكتلك , الرجوع لربنا هي خطوة لابد منها , لأن الابتعاد عنه للأسف كان من أهم اسباب صناعة مشكلتك . .
لأنك لما تقعدي مع نفسك , وتتذكري كل اللي حصل السنين اللي فاتت من "تجرؤ" علي حرمات رب العالمين , ولو كان حصل نوع من الكبائر , وفي النهاية ربنا امهلك السنين ديه كلها من غير ما اجلك يحين , عشان يكون عندك فرصة للتوبة الي الله . .
لما تفكري في ده كله ,هتدركي قد ايه ربنا كريم انه جعلك تتوقفي في مرحلة معينة , وان فيه غيرك بنات راحو لمساحات مظلمة اكتر , بيكسبو لقمة عيشهم ببيع شرفهن , فكون انك تجنبتي المصير البشع ده , دلالة علي حب الله لكي . .
فورا قومي و اغتسلي , وامحي من قلبك و جسمك كل آثار المستنقع المظلم , واقفي بين يدي رب العالمين , وصلي بس ركعتين , وبعدها ارفعي ايدك , واتكلمي باللهجة العامية , متقوليش دعاء محفوظ , لا قولي اللي في قلبك . .
استغفري عن كل مرة الشيطان ضحك عليكي و جعلك ترتكبي حرمة من حرمات الله , استغفري عن كل ذنب تم , وعاهدي رب العالمين انك هتمشي علي طريقه حتي الموت . .
الخطوة ديه لابد منها لخروجك من الوضع المزري اللي انتي عايشاه , وعشان تعملي تغيير جذري في حياتك المأسوية . .
ربنا نزل آية مخصوص لكل واحد فينا غلط كتير في حقه تبارك و تعالي , وكان عنده "بجاحة" انه يعصيه بشكل مستمر . .
الآية 53 من سورة الزمر (قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ)
يعني ربنا بيقولي و بيقولك و بيقول لكل واحد فينا غلط كتير في حقه ,اوعي تيأس , واوعي تبعد عن طريقه , واوعي تفتكر ان ربك مش هيغفر , لا هو هيغفر اول ما تقربي و انتي تمدي ايدك . .
- تعديل السلوك :
وهي خطوة لابد منها , وتابعة للخطوة الأولي و هي التوبة . .
لو كان فيه اي تواصل او اتصال باي سافل استغل انوثتك , فاقطعيها فورا ومن غير اي تردد , ياريت لو تجيبي تليفون جديد ومحدش يعرفه الا الناس المحترمة , لو حد عندك علي الفيس او الواتس اعملي بلوك فورا . .
ومتسمحيش لنفسك انك تتكلمي او تخرجي او تتواصلي مع اي حد من مجموعة السفلة ديه , والا هيشدوكي معاهم تاني لعالم الزبالة اللي انتي بتحاولي تخرجي منه . .
- صديقات السوء :
وهي اخطر بوابة هيدخلك منها الشيطان . .
مهو معروف ان (ودت العاهرة لو كانت النساء جميعا مثلها) فانتي مستحيل باي حال انك تلتزمي علي خط التوبة , وتعرفي ترجعي الي الله , طالما لسة ليكي صديقات في هذا السلوك المشين . .
هي مستحيل ترضي انك واحدة تكون انضف منها , وتخرج من كوم الزبالة اللي هي عايشة فيه , فهتتعامل معاكي بالسخرية او بالزن او بالالحاح او بالاغواء , لغاية لما تقعي مرة تانية . .
مالم تقطعي علاقتك بيهم بالكامل , هتظلي للاسف في نفس المكان دون تغيير
- علاقتك بالاسرة :
يعني تغيير علاقتك بابوكي , مراته, اخواتك , اعمامك , امك . .
والخطوة ديه تكون بعد تنفيذ الخطوات التلاتة اللي قلناهم فوق الاول ,يعني بعد ما تكوني قطعتي شوط في التوبة و الحجاب و الصلاة , وتكوني بالفعل انهيتي اي علاقة ليكي بالماضي المؤلم او صديقات الفساد , ويكون سلوكك اتغير تماما . . .
هنا لما تتعاملي بشكل مختلف مع الدواير المحيطة بيكي , هما نفسهم هيندهشو من ان فيه واحدة جديدة مكانك ,مش انتي خالص , ولا شك تعاملهم معاكي هيختلف . .
حتي لو تعاملهم مختلفش شكل كامل , فاي تغيير ايجابي ده شئ كويس , علي الاقل ان مكانوش حبايبك , ميبقوش اعدائك . .
وخدي بالك ان اهم نقطة خلاف مع ابوكي و مراته هتكون اتحلت بالفعل , لانهم لما يشوفو انسانة مختلفة بتصلي و ملتزمة بسلوك و خلق يتضرب بيه المثل , فده هيجعل جزء كبير من مشاكلهم معاكي هتختفي بالفعل . .
- البحث عن عمل :
عارف انه مش شئ سهل في الظروف الاقتصادية الصعبة , بس مش مستحيل . .
شوفي ربنا قال ايه في بدايات سورة الطلاق (وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ ۚ وَمَن يَتَوَكَّلْ عَلَى اللَّهِ فَهُوَ حَسْبُهُ ۚ)
يعني بمجرد ما تمشي علي طريق ربنا , هيجعلك "مخرج" يعني طريق للخروج من الازمة . .
كمان هيرزقك من مكان انتي متتوقعيوش ابدا , ولا عمرك فكرتي فيه . .
ولما تتوكلي علي الله هيكون "حسبك" يعني وكيلك , تخيلي ان ليكي حد في وزارة الداخلية قريب من الوزير بيخلصلك كل حاجة , شوفي بقي لما خالق الكون كله يكون هو وكيلك . .
ابدئي في خطوة البحث عن عمل بعد ما تكوني بالفعل عملتي الخطوات الاربعة الاولي بنجاح (التوبة - قطع علاقتك مع الماضي - قطع علاقتك مع صديقات الفساد – تغيير معاملتك لاسرتك) , وثقي ان ربك هيفرجها من مكان انتي متتخليهوش . .
- الانتقال . .
لو المكان لسة محاوطك بكل عناصر الفساد , فكري انك تروحي عند حد من قريباتك المحترمات , واللي ممكن تكملي حياتك هناك بشكل مختلف , وممكن يجيلك انسان محترم و ابن حلال عشان تكملي حياتك معاه , المهم تتمسكي بمنهج ربنا في كل حياتك
-----------------------------------------------------------------------
دول ست خطوات , لو نفذتيهم بشكل صحيح , هتفاجئي حياتك اتغيرت ازاي , وهتتحولي لصورة تانية مختلفة . .
انسانه محترمة ماشية في الشارع سمعتها الطيبة سابقاها , محدش يقدر يقول عليها كلمة , بتشتغلي في مكان كويس , بدخل حتي لو قليل , تساعدي ابوكي في مصاريف البيت , وده اللي هيخليه يحبك رغما عنه هو و مراته , وبكدة تكوني انقذتي نفسك . .
انا اديتك روشتة كاملة للخروج من المستنقع , اتمني تكوني جادة و عندك ارادة و رغبة حقيقية في الخروج , ومتستسلميش للذباب اللي اكيد مش هيفرح بخروجك ,وهيقاوم بشدة . .
ربنا يوفقك يا رب