سقف الطموح
الرسالة السابقة
العنوان : سقف الطموح
القسم: #النفسي
الرقم: 101
نلتقي مجددا مع عدد من الأسئلة المجمعة , والتي تستعرض عدد من الأسئلة التخيلية و الإجابة عنها
-------------------------------------------------------------
# : انا حاسس باليأس بشكل رهيب
* : ليه ؟
-------------------------------------------------------------
# : مفيش حاجة بانجح فيها ابدا , النتيجة طلعت و جبت مجموع زفت , حاولت كذا مرة اتعلم انجليزي مش باكمل الكورس لاخره , ابدا في نظام دايت عرفش اكمل فيه , اشترك في الجيم اروح يومين و اكسل , حاسس ان مفيش امل
* : عارف اكبر ازمة عندك ايه ؟
# : ايه ؟
* : انك معلي جدا سقف طموحك
-------------------------------------------------------------
# : يعني ايه معلي سقف طموحي ؟
* : يعني عامل لنفسك اهداف كبيرة في حين ان وقتك و جهدك و ارادتك محدودة , و بتوعد نفسك انك تقدر تنجح في التحدي كل مرة بشكل كبير , في حين الموضوع مش بالسهولة ديه
-------------------------------------------------------------
# : فعلا ده اللي بافكر فيه , لما بدات الدايت بدات بداية سخنة جدا , و كان نفسي اخس 8 كيلو في الشهر لكن مقدرتش اكمل
* : و ديه اكبر ازمة , انك بتدخل كل تحدي من دول بكل تقلك و انت رافع سقف طموحك , فلما تفشل بيه بتنهار اكتر , والاسوء ان ثقتك بنفسك بتقل لغاية لما هتختفي
-------------------------------------------------------------
# : يعني الحل اني ميكونش عندي طموح ولا امل ؟
* : لا طبعا , الحل انك تكون عقلاني و منطقي في تحديد اهدافك , و معرفة النتيجة المتوقعة , بشكل واقعي مش بشكل حالم
-------------------------------------------------------------
# : يعني ايه , مش فاهم حاجة
* : يعني لما تبدا الدايت , خلي هدفك اول شهر انك تنزل 2 كيلو بس في الشهر , رقم بسيط و سهل توصل له بمقدار معقول من الرياضة , فلما توصل لهدفك و تحققه تبدا تشوف الهدف التالي
-------------------------------------------------------------
# : بس انا عايز اخس بسرعة
* : و ديه المشكلة , استعجالك في تحقيق اهدافك مش هيوصلك اي مكان , و هتفضل شهور طويلة بتحاول و بتفشل , في حين لو كنت مشيت بهدوء كان زمانك وصلت
-------------------------------------------------------------
# : طب نفس المشكلة برضه في انهي اتعلم لغة او اقرا كتب , مش باعرف اكمل حاجة للاخر
* : غالبا لانك برضه رافع سقف طموحك , اصنع هدف معين بمقدار محدد , يكون واقعي مش حالم , وهتقدر توصله
-------------------------------------------------------------
# : بس غيري بيسبقوني و انا عايز اتفوق عليهم
* : العبرة مش باللي يلحق الاول , لكن باللي يقدر يصبر علي المشوار الطويل , واغلب اللي بيقطعو خطوات واسعة في اي مجال , هما نفسهم اللي بيقعو في النص , بينما اللي بيجري علي مهله هو اللي بيوصل في النهاية
-------------------------------------------------------------
# : تصدق فعلا عنك حق
* : حط في بالك مبدا انك تخلي كل حاجة تستوي علي نار هادية , ده مبدا عام في الحياة هيفيدك في اغلب جوانب حياتك