العنوان : الشخصية المزاجية

القسم: #الاجتماعي

الرقم: 78

السؤال:

 

السلام عليكم

 

انا عندى ازمه نفسيه كبيره مش قادره ولا عارفه اخرج منها وكل ما افتكر انى اتخطيتها التقى نفسي لسه جواها نفسي بجد ارتاح

 

انا حبيبت واحد زميلى فى الشغل وهو كان متجوز وعنده بنتين وسكت ومرضتش اتكلم لانى عارفه ان مفيش اى امل بعدها بفتره عرفت أن فى مابينه ومابين مراته مشاكل كتير وأنه مش مرتاح فى عيشته معاها وعرفت كمان أنه هيطلقها لانها خلاص خانته

 

عرفت كده مش منه كان فى صديقه مشتركه بينا هى كانت بتحكيلى عنه كل حاجه من غير مايعرف ولا يحس , هو كان معروف بعلاقته النسائيه الكتير وكان دائما شاددنى لأنه حسيته أنه بيدور ع الحب الحقيقي ومش لاقيه

 

المهم مرت الايام وفعلا لقيته ابتدأ يهتم بيا وبقرب منى شويه بشويه لكن عمرنا ما خرجنا مع بعض والكلام بقا كله تلميحات وشكله حس انى بحبه فعلا لكن والله العظيم ماقلت ولا فتحت بؤي لأنى اساسا خجوله وبرفض النوع ده من العلاقات

 

المهم مرت الايام وهو صارحنى بحبه وقالى ع حوار أن مراته خانته وأنها مهمله فى نفسها وانا طبعا حاولت ابعد مليون مره وفى الاخر مقدرتش هو وعدنى أنه هيطلق مراته والمفروض اصلا كان يطلقها من ساعة خيانتها ليه بس هو مكنش عارف ليه فضل معاها يمكن عشان عياله

 

هو طلقها قبل ما نتخطب بحوالى ست شهور واتجوزنا وكان متفق معايا أن العيال ممكن تيجي تعيش معانا فى اى وقت وانا طبعا وافقت واقنعت اعلى بالعافيه بيه ومش قادره اقولك انا سمعت كلام  اد ايه من الناس واخويا اللى محضرش فرحى

 

عشت معاه ايام حلوه وسافرنا فى شهر العسل وعملنا فرح وكل الناس تقريبا كانت حسدانا ومسنغربه أن الجوازه لسه مفشلتش لحد دلوقتى حتى اخويا صالحنى وصالحه والدنيا كلها عرفت اننا بنموت فى بعض

 

مع الايام ابتدأ المشاكل تظهر انا كنت يساعده فى مصروف البيت وحملت منه  مرتين لكن ربنا ماردتش

 

والعيال كانت بتيجى كل حبه وانا والله كنت براعى ربنا فيهم حتى لو تعبانه ابتديت احس انى مضغوطه وان الشيله كبيره عليا وفوق طاقتى بقيت اتخانق معاه واتعصب ومشكلتى انى برد عليه انا عصبيه لكن هو عارف كده

 

فى الفتره الاخيره حصل تاتش مابيننى وما بين أهله  فقلت ابعد عنهم لحد  ما التمور تهدى لقيته هو كمان قاطع اهلى قبل الطلاق بشهرين لقيت معملته اتغيرت معايا وبقا بيبعد كتير عند أهله اكتر من بيته وانا كلمته واشتكيتله لكن هو فعلا كان مقلوب

 

حصلت خناقه كبيره بينا ومد ادين عليا وانا رديت عليه وأبوه جه وابويا جه بس دى الخناقه الوحيده اللي. اقدر اقول انه كان متلككلى فيها وانا طلبت الطلاق بس لما أهله واعلى جم رجعت فى كلامى لما هديت ومرضتش اسيب بيتى

 

من الوقت ده اتغير معايا تماما ومهما أقوله أو اعاتبه مفيش فايده شاغلى فى الاسود سالت صحابي قالولى شكل فى واحده تانيه وهى معانا فى الشغل وقربت منى الفتره الاخيره بحجة ان ربنا هداها لانها كانت شقيه وليها علاقات وانا صدقتها بناءا على كلامه هو أن هى بقت كويسه

 

المهم هواتصل باخويا وقاله الجوازه دى مش نافعه وانا عايز اطلق مرضيش يدينى قايمتى وخد حاجته إلى. جابها وقال لاخويا ده شقايه وانا مخلفتش منها وغير كالون الباب

 

وانا اتنزلت عن نفقتى وكل حقوقى بس عشان اخلص منه ومكنتش عايزه اخس فى محاكم وتطويل بعد الطلاق لقيته عادى جدا ولقيته فعلا على علاقه بالبنت دى تليفونات ونظرات هى متجوزه وعندها ولد والناس كلها خدت بالها فى الشغل والكلام فعلا بقا كتير عليهم ومش منى والله لانى كنت بدافع عنهم وبقول دى اشاعات قبل الطلاق

 

انا صدمتى فيه متتووثفش وع قد وجعى كابرت ومبينتش انى بموت من جوايه واهتميت بشكلى ومظهرى اخر حاجهلدرجة أن كلهم قالولى انك نورتى بعد الطلاق حتى صاحبتى الخائنه اتهامات معاها عادى قدامه عشان ميفتكرش أنه كسرنى أو فارق معايا م الاخر مثلت الدور ده باتقان وانا بتقطع حته حته

 

بعد الطلاق بحوالى شهىر ابتدأ احوالى تتحسن وافوق وهى اللى ابتدأ يتعب ويتكسر وبحس أنه خرب الدنيا والناس كلها لاحظت ده , ابتدأ يشتغلى فى النظرات ويحاول يتكلم مع واحده صاحبتى عشان تبقا واسطه بينا بس صحبتى ننفضتله وهو قالها وكان بيتحايل عليها عشان يحكلها اللى حصل وقالها والله لو غلطينى لاردها دلوقتى

 

انا لقيت قلبي رق غصب عنى وكان نفسي يجى اليوم إلا. يقول فيه نرجع عشان احس ان ربنا جبلى حقى لانى كنت هرفضه واعلى مكنوش هيافقوا . انا كنت محتاره لأن فى ناس قالولى ولا تبينى اى حاجه لو هو حتى عايز يرجع لازم يتربي ويراضيكى ويراضى اهللك ويرفع راسك قدام الدنيا وانتى متعمليش اى حاجه

 

وفى الاخر عرفت أنه قرر يمشي يروح مكان تانى والبنت دى كمان ماشيه فى نفس الوقت طبعا انا مقهوره ناس بتقول ده هو لسه بيحبك ومش قادر يقعد وأنه بيعمل أنه ع علاقه بالبنت دى عند فى الناس عشان اتكلموا عليه والناس بقت بتعامله وحش

 

انا بصلى وبحسبن وبستغفر بس انا حاسه باعراض الاكتئاب ونفسي افهم هو ليه محاولش يعمل اى حاجه عشانى انا لسه فى شهور العده ولما هو ندمان ومكسور زى مانا شيفاه ليه محاولش يرجعنى وسكت وقرر يبعد كل ده عشان انا مش مبينه انى مكسوره انا مكنش فى حل فى ايدى غير كده دول اخر شوية كرامه فضلنلى بعد ما رمانر الرميه دى

 

ساعدوني ليه كل ده حصل وليه طلقنى اصلا انا مش عايزه اروح لدكتور نفسي بس انا حالتى بتسوء ده حب عمرى والله ورغم انى مكنتش مرتاحه فى عيستى معاه والله ماكنت هخرب بيتى ابدا ..ساعدونى

 

انا اسفه ع التطويل

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

الرد في كلمات معدودة : من كرم ربنا عليكي إن تم الطلاق , لأن استمراره معاكي معناه مسلسل لن ينتهي من المعاناة و العذاب النفسي , ليكي او لأي حد من أولادك اللي كان ممكن يتولدو منه . .

 

هو غلطان , وانتي ضحية , متضايقيش نفسك , ومتحمليهاش فوق طاقتها , حصلت تجربة مؤلمة بسبب صفاته الغير سوية , ونقص خبرتك في التعامل مع طباع البشر . .

 

وهنا التفاصيل . .

 

--------------------------------------------------------------------------------------

 

 

مع بداية قراءة الرسالة , عملت انطباع و رأي سلبي إلي حد كبير عن طليقك . .

 

لكن تدريجيا , مشاعري تجاهه و انطباعي ناحيته اتغيرت من الغضب للحزن الممزوج بالقليل من الشفقة  , مع استمرار مقدار لا بأس به من الغضب .

 

زوجك فيه كل صفات "الشخصية المزاجية" , او "الشخصية الهوائية"  واللي بتصفه كتب علم النفس بعدد من الصفات , زي :

 

• تقلب المزاج (كل فترة برأي مختلف)

• اختلاف المشاعر (كل فترة بمشاعر مختلفة تجاه نفس الاشخاص)

• احيانا يكون متفهم و متعاون في النقاش , واحيانا يكون شديد العناد

• سريع الملل , ويحب التغيير بشكل مستمر

• فيه جزء من البراجماتية , وغالبا بيكذب للوصول لهدفه

• اجتماعي ويبعد عن الإنطوائية

• اجتماعيته بتجعله غالبا لبق , ويسهل خداع الناس بكلامه الجميل

• فيه جزء كبير من التردد , وتغيير الرأي بعد ما استقر عليه

• غالبا سريع الانجذاب للمرأة , ولو اتعود علي امرأة معينة غالبا بيعمل تغيير لها

• ممكن يأخذ موقف عنيف من شخص , ويقطع العلاقة معاه , بدون سبب الواحد شايفه , ومن غير ما هو يوضح ليه

 

هتلاقي ان علي مدار قصتك المؤلمة , اغلب الصفات ديه متواجدة فيه , وبالتالي جميع المعاناة اللي انتي عيشتي فيها بسببه , واللي هو اصلا عايش فيها , واللي كمان بناته و يمكن طليقته عايشين فيها , واللي غالبا هتعيش فيها اي واحدة هتتجوزه , كل ده بسبب الصفات المتداخلة و المتشابكة لشخصيته الغير مستقرة .

 

هنبدأ التحليل ليه هو , عشان نعمل تفسير لتصرفاته و سلوكه علي ضوء معرفة نوعية شخصيته , وبعدها نتكلم عن الجزء الخاص بيكي . .

 

---------------------------------------------------------------------------------

 

لو هنبدأ بيه , معرفة انه شخصية هوائية , هيعمل تفسير للعديد من الخطوات اللي قام بيها , واللي كان فيها شئ من الغموض زي ما انتي شفتيها . .

 

• فبداية من طلاقه من زوجته الأولي, و زي ما انتي ذكرتي إنك حسيتي إنه وارد يكون ظلمها , واتهمها كذبا بالخيانة , كمبرر لتركها .

 

• كونه شخصية هوائية , غالبا هو الدافع اللي خلاه "يمل" منها بعد سنوات من الزواج , ويبحث عن علاقات نسائية عديدة زي ما وصفتي .

 

• غالبا هو حبك في البداية فعلا , لكن مشكلة الشخص الهوائي ان حبه ممكن ميكونش مستقر , وميكونش واقف علي اقدام ثابتة , وده اللي جعل حبه الحقيقي ليكي يقل تدريجيا بعد سنوات , ويتحول لكراهية و إصرار علي الطلاق .

 

• ومع إن كان عنده فرصة و انتي لازلتي في شهور العدة , إنه يرجعك تاني , خاصة لما كان عنده شئ من الندم و الإنكسار , لكن اسلوب تفكيره الغير منظم , والقرارات العشوائية اللي بياخدها بناء علي لحظة سريعة في التفكير , جعله يصر علي موقفه السلبي منك .

 

• وللأسف بعد ما اختفي حبه ليكي , هو لم يعاملك بما يرضي الله , وادالك حقوقك المادية , لأ هو كمان اصر علي أكل حقك , وبيقولك أعلي ما في خيلك اركبيه .

 

• و غالبا البوادر اللي ظهرت عنده بعد الطلاق لارجاعك لعصمته (لما كلم زميلتك) , مكانش عن رغبة حقيقية في العودة للحياة الزوجية , قد ما هو قرار عشوائي اتخذه لما وجد انك "نورتي بعد الجواز" زي ما وصفوكي في الشغل , ولو انتي وقتها كنتي وافقتي علي رجوعه , هو كان هيغير رأيه بعدها بأيام . 

 

• وارد يكون أحد أسباب اختفاء حبه ليكي و قرار الطلاق , هو إنجذابه للبنت الجديدة اللي في الشغل , واللي هي اصلا متزوجة و معاها طفل , و متتعجبيش من الاختيارات الغريبة له , الشخص الهوائي احيانا بيقوم بحاجات مختلة .

 

• متنسيش كمان الاختلاف الكبير في موقفه من الحمل , ان مشاعره تتفاوت بين : عايز الحمل , لا خلاص مش عايز الحمل , بعدها الندم علي عدم الحمل , ديه علامة واضحة في الاسلوب الغير مرتب في تفكيره و طريقة اتخاذ القرارات .

 

• بالنسبة لسؤالك : هل لسة بيحبك ؟ الإجابة للأسف لأ , بل خلينا نقول ان حبه من البداية مكانش مبني علي أرض صلبة , ولكن قرار هوائي محكم عليه بالفشل في وقت ما للأسف , وده نفس تفسير سؤالك التاني : هو ليه مبذلش أي جهد حقيقي عشان يرجعك زوجة ليه . .

 

• التردد العاطفي اللي عنده , مكانش بس تجاهك , لكن كمان كان واضح مع بناته , اللي هو ازاي بيبحهم و بيخاف عليهم , لكن كمان مش قادر يراعيهم , ويعطيهم الإهتمام الكافي لدرجة ان بناته بقم اقرب ليكي منه هو , وانتي زوجة ابوهم  . .

 

• كمان التردد في القرارات , هو مش قادر يتخذ قرار في بناته , يسيبهم عند طليقته ولا عند امه ولا عنده هو ولا يعمل ايه , كل فترة يغير رأيه وهو عايش في حيرة مستمرة

 

 

---------------------------------------------------------------------------------------

 

طب ماذا عنك انتي ؟ ؟

 

أغلب الأسهم في القصة تشير ليه هو كجاني , وانتي كضحية , لكن ده ميمنعش وجود عدد من الأخطاء اللي حصلت من طرفك , هي اقل من أخطاءه في الكم و الكيف , لكن مهم نحط تحت خط , ونتعرف عليها . .

 

 والكلام عن الإخطاء اللي حصلت من طرفك مش علي سبيل اللوم و المحاسبة , لكن علي سبيل التعلم و تجنب التكرار , انتي سنك صغير , وفرصة تكرار زواجك واردة جدا , فمهم إنك تعرفي ايه المشكلة اللي حصلت قبل كدة عشان متتكررش

 

 

• بداية الأزمة في سوء تقييمك ليه كزوج , وفي اعتمادك علي عوامل غير دقيقة في انجذابك و حبك ليه , والموافقة علي الزواج منه . .

 

 

• نقطة كمان مكملة للأولي  , هو سوء تفسيرك لعلاقاته المتعددة , لما وصفتيه ( كنت دائما بشوفه ساكت كده ومع نفسه وحزين ) إنه : "بيبحث عن الحب" , الكلام ده يا فندم بيتم بس في الروايات العاطفية وأفلام فاتن حمامة , الحياة الواقعية مختلفة , أكثر قسوة , وأقل خيالا . .

 

• السبب في النقطة ديه , ان الشخص ذو العلاقات الواسعة من الفتيات , هيرتفع جدا سقف طموحاته  ومتعته مع الزوجة اللي هيتزوجها, وهيحتاج لجرعة أكبر من الأنوثة عشان يقدر يستمتع , وبالتالي مهما كانت زوجته جميلة و رائعة و "مثيرة" , فهو هيظل متعطش للمزيد لأنه أصلا حصل عنده تشبع من النساء قبل الجواز , خاصة لما يعتاد زوجته , او تنشغل – رغما عنها – في أمور البيت و الحياة .

 

(نؤكد تاني إننا بالكلام عن أخطاءك مش عايزين نلومك أو نعاتبك , لكن بنلقي الضوء علي عدد من الأسباب اللي جعلت المشكلة تحصل , عشان تتجنبيها في اي زواج قادم ان شاء الله )

 

 

• لازم هاتكلم عن العصبية , وهي أم المشاكل, والسبب الرئيسي للخلافات المستمرة بين الزوجين , ولازم تضعي في أولوياتك التخلص منها , وهو أمر مقدور عليه لو انتي عندك العزيمة الكافية . .

 

 

 

• لما بدأت تحصل المشاكل , انتي بدأتي تضعي كتير من الضغط علي أعصابك , سواء في مشاكل أهله , أو سوء معاملته , او المشاجرات , وحتي بعد الطلاق . .

 

 

• انا حاليا شاكك في مشاعرك الحقيقية تجاهه , انا شاكك إنط بالفعل بتحبيه , غالبا إنتي بتظني انك بتحبيه , لكن مش قادرة تمسكي حقيقة مشاعرك بشكل دقيق . .

 

• غالبا المزيج ده من المشاعر هو اللي انتي حاساه دلوقتي  , وكل المشاعر ديه بتشير لعدم استمرارك معاه , مش انك تكملي معاه

 

------------------------------------------------------------------------------------

 

 

• هو مش ليكي و انتي مش ليه , هو بالفعل مش هيكون زوج مناسب ليكي , فلو جالك بعد اسبوع ولا بعد شهر , ولا بعد 5 سنين عشان يرجعك , اعتذري ليه , مالم تجدي انه اتغير بالفعل تغير جذري في شخصيته , وللأسف ده شئ يصعب التأكد منه الا بالمعاشرة .

 

• لازم تضعي في بالك ضرورة تجاوزك للمحنة النفسية الحالية , فكرة ذهابك لطبيب نفسي فكرة مش وحشة , مش لازم تعرفي اي حد من أهلك أو أصدقائك  , مش لازم تروحي لفترة طويلة , لكن علي الاقل في الفترة الحالية عشان يساعدك بخطوات عملية و عدد من الأدوية انك تمري بالمرحلة المؤلمة ديه بسلام

 

• لازم تنزعي من قلبك بقايا حبك ليه , ده حب عبثي , وهيكون عبئ عليكي , ومش هيفيدك بشئ الا باجترار الآلام و الأحزان كل شوية , اعملي تغيير في قناعاتك و لازم تؤمني انه أصلا مكانش اختيار مناسب من البداية , وان عدم رجوعه ليكي حاليا في من مصلحتك

 

• لازم تعالجي العصبية , لانها ممكن تدمر حياتك كلها , يعني حتي بعيدا عن الحياة الزوجية , فأي معاملات مع اقارب او اهل او اصدقاء , العصبية هيكون ليه أثر مؤلم .

 

• استعيني بالله دايما , وحافظي علي قراءة جزء من القرآن , و الدعاء بين يدي الله في الصلاة

 

• اشغلي نفسك عشان متكونيش فاضية في الوقت اللي بعد الشغل , وهتلاقي عشرات الحاجات المفيدة او حتي الهايفة اللي ممكن تاخد كل وقتك