العنوان : بين الطيبة و البلاهة

القسم: #النفسي

الرقم: 30

السؤال:

 

اناا عندي مشكله..

 

ف ان انا شخصيتي ضعيفه جداا بعرف ازعل مش بعرف ارد ع حدد ولا حتي بعرف اخد حقي

 

واكترر الوقت اللي حولياا بيجو عليا وبسكت بزعل شويه وبرجع اتكلم مع كله عادي

 

مش بشيل من حدد بس نفسيتي تعبت جداا بحاول ابعد عن كل الي حولياا وابقي لوحدي

 

وخيفه جداا من الي بقيت فيه علشان سعات بتجيلي افكار وحشه وبعيط بطريقه وحشه جداا..

 

عوزاا اي حل

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

أهلا بيكي . .

 

فيه خلط عند كتير من الناس  , بين مصطلحين قريبين من بعض , واحد فيهم ميزة كبيرة , والتاني مشكلة خطيرة . .

 

ولأنهم قريبين من بعض , فكتير من الناس بيتلغبطو بينهم , و بيدخلو كل واحد في التاني فتلاقي بعضهم يتمسك بالتاني (اللي هو المشكلة ) وهو بيحسبه ميزة , او تلاقي ناس تبعد عن الاول (الميزة) , عشان بتحسبه هو المشكلة . .

 

وعدم الفهم الكامل و التفريق الدقيق بين المصطلحين , بيعمل فعلا لغبطة كبيرة . .

 

 

المصطلح الاول اسمه "الطيبة" , والتاني اسمه "البلاهة" . .

 

المصطلح الأول معناه كالتالي : ان الشخص يكون قلبه نضيف و ميشيلش من حد , ويسامح عند المقدرة , وانه ميكونش حاسس بالحقد او الغل او الحسد علي حد .

 

أما المصطلح التاني فمعناه : ان الشخص يكون ضعيف الشخصية  ,مهضوم حقه ,  بياخد علي "قفاه" , والناس واكلة حقه وهو مش عارف يتصرف .

 

ولأن الناس بتخلط بين الاول اللي هو حاجة ايجابية , والتاني اللي هو عيب خطير , فالناس زي ما قلنا بتعمل احد مشكلتين  .

 

اما انهم في الاساس يتجنبو الاتنين , باعتبار ان الاتنين واحد ,  و ان طيبة القلب معانا ان حقك هيتاكل , يبدأو يتحولو لوحوش مسعورة , علي اعتبار ان "اذا لم تستذئب , أكلتك الذئاب" .

 

او انهم يتمسكو بالاتنين , باعتبار ان طيبة القلب حاجة حلوة , فيكون قلبه نقي فعلا , بس مهضوم حقه بشكل مستمر , وهو بيحسب انه بيعمل حاجة كويسة بياخذ علي ثواب   .

 

والحقيقة ان ده غلط , وده غلط .

 

من ناحية ان انتي تسوء اخلاقك بدعوي ان لازم اعمل كدة عشان اواجه المجتمع , انتي كدة بتزودي المشكلة في نفسك و في المجتمع , و اخلاقك هتتحول لشئ بشع الناس هتنفر منك فيه . 

 

وان انتي ظننتي ان لازم الواحد يفترس اللي قدامه , عشان حقه ميتاكلش تبقي غلطانة , لان ممكن برضه حقك يتاكل من شخص اقوي منك , ومش هتعرفي تفتحي بقك .

 

ومن ناحية لو فاكرة ان خلاص الواحد يفتح حنفية المسامحة للجميع , وان لو حد ضربني علي خدي , اديله قفايا عشان يكمل العلقة , وان "كل ده بثوابه" , و "خلي قلبك طيب" , ده كمان غلط  .

 

لان لما تسيبي حد يظلمك و انتي متتخذيش الخطوات المتاحة لعقابه و القصاص منه  ,فده هيخليه يكمل ظلم ليكي و لغيرك , وديه مأساة .

 

و الحقيقة ان الفرق بين المصطلحين دول , بيتجسد بقوة في المثل عجيب الشأن اللي بيقول   : يا بخت من بات مظلوم ولا بات ظالم . .

 

سبحان الله  . . 

 

هو مفيش وسط ؟ هو مينفعش ابات لا مظلوم ولا ظالم . .

 

هو انا لازم حقي يضيع و ابلع لساني و اخلي الناس تتحكم فيها و اسكت , والا هكون ظالم  ؟ ؟

 

مفيش منطقة مشتركة , بحيث مظلمش حد , بس برضه لو حد ظلمني اضربه فوق دماغه عشان اخد حقي ؟ ؟

 

كان واحد راح للشيخ في المسجد , وقاله ان جاري اللي جنبي ظلمني و سرق مني  "موتور المياه" بتاع العمارة , وهو شئ غالي , ودلوقتي انا اقدر اخد حقي منه , يا تري الاحسن اني اخد حقي منه  ,ولا اسامحه و ربنا يحاسبه ؟ ؟

 

الشيخ مردش عليه باجابة , هو بس قرأ عليه الاية 39 من سورة الشوري (وَالَّذِينَ إِذَا أَصَابَهُمُ الْبَغْيُ هُمْ يَنتَصِرُونَ)

 

و بعدها قاله , لو تعرف تاخد حقك من غير ما تظلمه او تاخد اكتر من حقك , خده فورا  , عشان متسيبش ظالم ماشي في الارض وهو مطمن . .

 

إذن الحل للمعادلة المركبة اللي بنتكلم عنها , انك لازم تغيري شوية من قناعاتك  ,وتعرفي من الحاجات اللي عندك صفات ايجابية لازم تستمري في التمسك بها (الطيبة  ,متشيليش من حد . . ) , وصفات سلبية لازم تتخلصي منها  (متعرفيش تردي  , مش بتاخدي حقك . . )

 

 

 

من النقط الايجابية اللي انتي ذكرتيها , واللي تنتدرج تحت بند "الطيبة" , واللي لازم تتمسكي بيها :

 

 

• انك متزعليش من حد . .

 

• المسامحة . .

 

 

 

بينما النقط السلبية اللي انتي ذكرتيها , واللي لازم تتعالج تدريجيا  . .

 

 

• الشخصية الضعيفة . .

 

 

 

• عدم الرد . .

 

 

 

• مش بتاخدي حقك  .

 

• السكوت لما حد يزعلك  . .

 

 

 

• انك تبعدي عن الناس  . .

 

 

 

• الافكار الوحشة و العياط .

 

 

------------------------------------------------------------------------

 

فببساطة , كل اللي قلناه من شوية , هو شئ التدريب عليه صعب بس مش مستحيل , وانتي محتاجة  انك تتواصلي مع صديقة ليكي , من اللي من النوع "قوية و مفترية" , واللي بترد الكلمة بعشرة .

 

اتكلمي معاها و قوليلها تعلمك شوية "تكنيكات" لادارة اي معركة كلامية . .

 

هي هتقولك  ازاي تتصرفي لما حد يتريق عليك  , او يسخر منك  ,او يظلمك و هكذا  .

 

بس اياكي تتعلمي منها اي شئ محرم , او شتايم او كلام خارج , انتي ممكن "تمرمطي" اتخن تخين يقولك حاجة , من غير ما تطلع منك العيبة .

 

الموضوع صعب بس انتي قده , ربنا يوفقك يا رب

 

وممكن تشوفي هنا عدد من المشاكل اللي هتفيدك في نفس الإطار : وهي العـُزلة الاختيارية و  رقة القلب و القصاص  و  الابتعاد عن الناس