السلام عليكم يا ادمن

متشكرة علي صفتحكم الجميلة افادتني فعلا 

انا نفسي احافظ علي قيام الليل احيانا بصلي ركعتين قبل ما انام بس مش باحس انها كفاية و مش بتكون كل يوم كمان 

 

نفسي اقوم كل يوم قبل الفجر بساعة و اصلي لغاية الفجر بالمصحف و كدة عايزة اسستم حياتي علي النظام ده بس مش عارفة اطلاقا

ياريت لو عندك حل تفيدني

متشكرة جدا .

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة  :

 

قيام الليل هو من العبادات الهامة والمكفرة للذنوب , والمقربة لله تعالي , وهو شرف المؤمن كما وصفه الرسول صلي الله عليه و سلم في الحديث الذي رواه الحاكم و البيهقي (واعلم أن شرف المؤمن قيامه بالليل وعزه استغناؤه عن الناس)

و الحقيقة ان بيكون فيه خصوصية لأي عبادة غير مرئية من الناس , زي الصيام و صدقة السر , وقيام الليل , العبادات ديه بيكون ليها دور فعال في غسل القلب من الكبر و الرياء و "ضوضاء" البشر , وبتجعل قلبك صافي و قريب جدا من الله تعالي , وبتجعل المولي تعالي يري في قلبك انك بالفعل بتعبديه له وحده مش لأي دافع تاني , كمان من العبادات اللي بتساعد كتير علي الإخلاص , وإزالة أثر الرياء من القلب . 

 

كمان هي بتساعد علي عبادة منسية و مهمة , اسمها "الخلوة بالله" معناها ببساطة إنك تقعدي فترة من الوقت , ربع ساعة , نص ساعة , مبتعمليش حاجة غير إنك تذكري الله , وتتفكري فيه  ,تدعيه , تتوبي عن ذنب , وهكذا . .

 القيام بيهيئ الجو المناسب لحاجة زي كدة , البيت هادي , كله نايم , مفيش تليفون ولا فيس , الشارع ساكت , الدنيا ليل والإضاءة بسيطة , فإنك تقعدي 10 دقايق يوميا بتذكري الله أو تستغفريه أو تتفكري في ملكوته قبل صلاة القيام , ديه بتغسل قلبك تماما , وبتعطيكي شحنة ايمانية رائعة تستمر معاكي باقي اليوم . . 

 

والخطأ اللي البعض بيحصل له في قيام الليل , إنه يحاول يوصل لمستوي عالي من القيام مرة واحدة , يعني إنه يحاول يصحي قبل الفجر بساعة مثلا , ويحافظ علي قراءة جزء أو جزئين بالمصحف , وبعدها صلاة الفجر , والنقطة في إن الانسان اللي مش متعود علي ده  ,هيتعب بسرعة , ومش هيكمل . . 

فالبداية يفضل تكون تدريجية بسيطة , خدي بالك مفيش تدرج في الفرائض , يعني صلاة الفجر ديه أساسية , لكن القيام باعتباره من النوافل , فلا بأس بالتدرج واحدة واحدة , والقاعدة الشرعية الهامة : قليل دائم خير من كثير منقطع . . 

 

ابدئي بحاجة سهلة , ركعتين تصليهم قبل ما تنامي , مش سنة العشاء , لا ركعتين لوحدهم بنية قيام الليل , وحتي ممكن يكونو ركعتين خفيفتين من غير مصحف . . 

واظبي عليها شهر مثلا من غير ما تتقطع . بعدها زوديها شوية  ,إما تزودي العدد يكونو أربعة , او تزودي طول الركعتين انك تصلي بالمصحف فيهم , مثلا ربع أو ربعين في كل ركعة . . 

 

لما تتقدمي خطوة , خليها خطوة بسيطة مش كبيرة , عشان متتعبيش , وفي نفس الوقت واظبي عليها بشكل مستمر , و متتنقليش للخطوة اللي بعدها الا لما تتأكدي انك بقيتي مواظبة علي الحالية 

 

و خدي بالك العبرة بالكيف مش الكم . . 

 

يعني مش المهم بتصلي كام ركعة , وبكام ربع فيهم , لكن المهم قلبك و كيانك موجود قد ايه فيهم  ؟ ؟ 

في قيام الليل لازم تكوني معزولة عن العالم  ,أرجوكي ابعدي الموبايل تماما و انسيه خالص لغاية لما تخلصي الصلاة بالكامل , لا تفكري في مذاكرة ولا كلية ولا شغل ولا سوسن قالت ايه . . لازم تكوني بالفعل معزولة عن العالم , وقلبك مركز بس في الخشوع . . 

ولما تيجي لحظة السجود , ركزي علي حاجتين أساسيتين  . . 

 

الأولي  : انك تستغفري ربنا من كل الذنوب اللي عملتيها في اليوم ده , إنك تستغفري بقلب نادم , وحزن حقيقي , وخشوع بين يدي الرحمن , في اللحظة اللي قلبك و لسانك بيعترف بالذنب و بيطلب من الله المغفرة . 

 

والتانية  : إنك تلحي علي ربنا بالدعاء لكل اللي انتي عايزاه ,  من الطلبات الدنيوية او الدينية , أياكي تتكسفي تسألي ربنا علي شئ معين , أو تقللي من طمعك في كرمه , افتكري دايما بيت الشعر اللي بيقول (الله يغضب إن تركت سؤاله , وبني آدم حين يُسأل يغضب)

لو بالفعل واظبتي يوميا علي الحاجتين دول (الاستغفار , والدعاء) , هتلاقي انك بتعملي إزالة يومية لأي ذنوب حصلت طول اليوم , في نفس الوقت , انتي حاسة انك رميتي علي همومك من فوق دماغك , لأنك عارفة ان كل المقادير بيد الله تبارك و تعالي . . 

 

وكنا جاوبنا من فترة سؤال علي صلاة الفجر , وازاي الواحد يقدر يعمل مجموعة من الخطوات عشان يصحي للفجر , هنا الرابط  

​

واظبي عليها بقدر الإمكان , واعمي تهيئة قلبك للتعامل بشكل مختلف مع العبادة المهمة ديه .