الطرف الواحد
الرسالة السابقة
العنوان : الطرف الواحد
القسم: #العاطفي
الرقم: 04
السؤال:
انا هحاول اختصر …
انا كنت مرتبطه بواحد و مش علشان بقول مرتبطه ابقا عملت حاجه غلط انا كنت بتقي ربنا علشان ربنا يباركلنا و نفضل مع بعض …
اللي كان بيحصل اننا كنا بنسيب بعض كتير و رجعنا و كل مره هو اللي كان بيقولي نرجع و علي حسب كلامه انه كان ناوي ياخد خطوه جد بس حصلت مشكله في البيت عنده بسببي
دلوقتي انا فضلت اكدب علي نفسي و اني كرهته و اصده كل ما يكلمني بس مشاعري هتقتلني و اول ما اعترفتله ان منستهوش اتحول بقيت انا اللي بكلمه بعد ما كان هو اللي بيكلمني و اصده
السبب في الاول كان بسبب ان كنت خايفه يلعب بيا و كنت بعمل مشاكل انا بعترف بده و بافعاله و خيانته خسر ثقتي بقيت مش بصدقه في كل حاجه ده
غير انه مش بيقدرني و لا بيخاف علي زعلي زي انه عارف ان بغير بلاقيه مش بيتكلم غير علي البنات و الستات و اهانه
و الاقيه بيذلني لمجرد انه يحس ان مش قادره اعيش من غيره و كل شويه الاقي بنت علي الاكونت عنده هو مكنش في الاول كده
مش عارفه هو كان مخبي حقيقته و لا بيعاند معايا علشان عارف ان ديه حاجه رفضاها
دلوقتي انا مش عارفه اعمل ايه هو حد عصبي و انا بقفش منه و مش عارفه المفروض نرجع و لا لا بس انا مش بقدر ابعد و لا ابطل تفكير فيه عايزاه يبطل عند معايا و نبقا كويسين
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
كنا اتكلمنا قبل كدة , في الرسالة اللي بعنوان "لهيب الحب", علي الفارق بين الحب بمعناه الحقيقي و الصحيح , وبين التصور الموجود في بعض أذهان المراهقين , واللي بيجعلهم يتصورو انه حب حقيقي . .
وهيتم نقل نسخة من الرسالة ديه , في اخر الرد . .
بالطبع مع عدم رؤيتي للاحداث اللي بتقوليها , الا ان – للأسف – اغلبها ينطبق بشكل كبير علي النوع التاني من الحب , واللي ممكن نقول عليه انه مش حب ولا حاجة . .
الوصف اللي بتقوليه ينطبق علي ثنائية مشهورة جدا , واللي بنلاقيها كتير في السن اللي من 14 لـ 22 تقريبا . .
وهي ثنائية "فتي يتسلي – فتاة موهومة "
عندنا شاب بيتسلي بالفعل , عنده لذة اصطياد الفرائس , والتلذذ برؤيتها تقع في شباكه , وبعدها يبدأ في الشعور بالملل السريع , والبحث عن التالية . .
وفي نفس الوقت عندنا بنت , هي تشعر انها بتحبه , و تعتقد انه بيحبها , وبتدعي ربنا ليل و نهار تكون من نصيبه , ومن كرم ربنا انه لا يستجيب لهذه الدعوات , والا صار مصيرها الطلاق السريع . .
ولما هو بيكون في مود "الحبيب" قبل الاصطياد , ويكون "كيوت" , و "لطيف" , و "عسولة" , هي بتفسر كل شئ بيقوم بيه علي انه بيحبها ودايب في هواها . .
و لما هو ينتقل لمرحلة الملل والزهق , وانه "يخلع" منها بشياكة , وقتها هي بتندهش , وتتعجب وتسأل نفسها و تسأل صديقاتها , هو ايه اللي حصله ؟ ؟
هو اتغير ليه ؟
---------------------------------------------------------------------------
الحقيقة هو متغيرش , لكن انتقل من حالة الي حالة تانية , لكن نفس الفكر والخلق الزبالة هو نفسه . .
ده باختصار توصيف حالتك , حتي لو كنتي شايفة ان كلامي مش كويس , انا باعتذر اني مقلتلكيش اللي انتي عايزة تسمعيه , لأني لازم اقولك الصح , والحقيقة اللي هتشوفيها بعينيكي قريب . .
و الدليل الأكبر اللي بيوضح هو جاد ولا "بيتسلي" هو , امتي هييجي يخبط علي البيت من بابه ؟ ؟
امتي هيعمل خطوة جادة ؟ ؟
اول ما تلاقيه لابس البدلة الزرقا , ووصل معاه ابوه وبوكيه ورد , وتورتة من مونجيني , تعرفي انه جاد و فعلا بيحبك وشاريكي
لكن لما يعتذر لاي سبب , تعرفي انه مش هيغلب يخترع حجة, للتسويف , وانه بيخلع منك بالراحة . .
وانتي شفتي بعينيكي انه بيتسلي مش جاد . .
هقولك امتي . .
انتي لما هو بدأ يتلكئ , فانتي "تقلتي" شوية , تعاملتي معاه علي انك خلاص مش عايزاه , ومش طايقاه و بتاع . .
هو لما حس ان تسليته هتروح منه , فكان لازم يقرب تاني , ويتحايل و يعتذر و يهزر وبتاع , لغاية لما ترجعي تاني . .
ولما انتي استسلمتي , ورجعتي في "مصيدة" هواه , وهو اطمن انك دخلتي القفص , رجع هو لحوارات التنفيض و الزهق , وده لأنه فارغ من جوة . .
---------------------------------------------------------------------------
يعني بالله عليكي , هل ده سلوك شخص جاد عايز يبني بيت و يأسس أسرة ؟ ؟
هل اللي زي ده تأتمنيه علي نفسك و عرضك و حياتك كلها ؟ ؟
اللي زي ده , تطمني عليه لما يختلف معاكي بعد الجواز , انه هيعاملك بما يرضي الله ؟ ؟
ده لو انتي شفتيه بيقولك انا جاي بكرة اخطبك , لازم ترفضي اساسا ,لان الخلل الموجود في ذهنه هيمنعه من بناء اي بيت مستقر . .
والدليل انه و من دلوقتي وانتو علي البر , مش بس بيكلم بنات , ده كمان بيغيظك بيهم , و هو فرحان بالتعليقات و الاعجابات والقلوب والدباديب اللي مغرقة البروفايل بتاعه , عشان انتي تشعللي . .
ده انسان مريض نفسيا ,بيستلذ بعذابك , بيستمتع بغيرتك الشديدة عليه , ده بيرضي غروره المريض و بيحسسه انه دونجوان عصره . .
وجودك في حياته هو مصدر للتسلية مش اكتر , هو فقط بيحس ان فيه انثي بتجري وراه , ده بيرضي غروره . .
ده لا عند منه , ولا تعمد اذلال ليكي زي ما سالتي , ديه احساس بالنقص من شاب فاشل في حياته , ومتعته ان قلوب العذاري تكون بتجري وراه وهو بيرفضها . .
لو بيحبك مش هيعذبك , لو مهتم بيكي مش هيولع نيران الغيرة عندك , لو بيحترم مشاعرك مش هيدوخك كدة . .
فورا و من غير مقدمات , اعملي له بلوك , و اقفلي اي وسائل تواصل معاه , وشوفي دراستك او شغلك او حياتك , حرام عليكي العذاب اللي بتعذبيه لنفسك . .
هل فيه حب بينكم ؟ الحقيقة ايوه , بس حب من طرف واحد , انتي بتحبيه , او بتحسبي انك بتحبيه , وهو بيتسلي باسلوب شديدة الغرابة , لا يقال عنه الا انه "سادي" . .
عارف ان كلامي مش هيعجبك , بس اساسا لما بجاوب علي سؤال مش بدور علي اللي يعجب صاحب الرسالة , لكن اللي يرضي رب العالمين , ويرضي ضميري لما اقولك الصح ايه . .
اسئلي نفسك السؤال اللي قلته من شوية , هل ده يصلح زوج ؟ ؟ وانتي جاوبي عليه وهتعرفي قصدي ايه
وهنا الرسالة اللي بعنوان لهيب الحب اقريها و هتعرفي قصدي ايه