العنوان : نظرات الكراهية

القسم: #الاجتماعي

الرقم: 81

السؤال:

 

ابنى أبوه كان بيسلطه عليا يضربنى لغاية ما انطلقت اللى فهمته فى الآخر إن العمايل دى كلها علشان يطفشنى من البيت

 

أعمل ايه الولد الصغير رجع لى بعد سنة كانوا عند عمتهم , كل دع عشان زوجي مريض نفسى , عنده كهربا زيادة و اكتئاب حاد و راح للدكتور النفسي كتير

 

 أعمل ايه علشان أرجع ابنى أنا أخدت حكم من المحكمة بس مش ها ينفع يجى غصب عنه ومش قادرة أقوله على أبوه ما تسمعش كلامه عملت المستحيل مع الولد هو فى أولى اعدادى

 

أنا كنت معلمة ضحك عليا وفتح محلات بإسمي اللى فهمته بعد كده علشان الضرائب يعني دمرني تماما

 

وابوهم بيعاقب الولد اللى جانى التانى ما فيش مصاريف ولا تليفون ولا اى حاجة بيفرق فى المعاملة حتى قبل ما يطردنى

 

وأنا وابنى الصغير عند ابويا فى شقة صغيرة و لسه المحاكم حبالها طويلة لسه ما اخدتش ولا جنيه منه

 

وخسرنى وظيفتى الولد بيشتم ويضرب واكيد ابويا مش هايسكت

 

حسبى الله ونعم الوكيل بدعى من ربنا إن ربنا يضربهم فى بعض ويجينى ابني طايع بخاطره مش غصب عنه ذى أخوه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

وعليكم السلام و رحمة الله  . .

 

مشكلتك ليها شقين أساسيين , اولا الأثر النفسي الموجود عندك من طليقك و إجرامه في حقك , ثانيا معضلة كراهية ابنك ليكي و عدم تقبله الحياة معاكي . .

 

نبدأ بالأولي . .

 

انتي مذكرتيش تفاصيل عن الأثر النفسي اللي فيكي , والمعاناة اللي عندك من اللي حصل  ,لكن ده شئ يسهل استنباطه من الأحداث و التفاصيل . .

 

لابد اولا انك تعالجي المشكلة ديه , والآلام النفسية اللي حصلت عندك   , واللي لو استمرت في التواجد هتضغط علي جهازك العصبي بشكل دائم  , و ده معناه معاناة مستمرة .

 

و الحقيقة ان مفتاح علاج المشكلة ديه , انك تعرفي ان المتسبب في الأزمة ديه كلها , هو إنسان : مش في وعيه . .

 

بالفعل هو غير مدرك و غير واعي , وخلينا نقول انه مش مجرم بالشكل اللي ممكن تظنيه  .

 

ليه  ؟

 

لأن مريض الاكتئاب MDD   هو إنسان بالفعل وعيه مش حاضر 100 % , قراراته مش كلها جاية من ذهنه , حتي ان بعض المحاكم بتضع ده في اعتبارها , في حالة ان شخص مصاب باضطراب الاكتئاب , لما يرتكب جريمة معينة .

 

مريض الإكتئاب غالبا بيكون عقله فيه عدد هائل من الأفكار و الوساوس الغير منطقية و الغير معقولة , و علي أساس الوساوس ديه , بيتخذ قراراته , وبتكون تصرفاته , وبالتالي انتي ممكن تقولي ان طليقك هو ضحية , اكتر من هو مجرم . .

 

مش بقول كدة عشان أقول انه برئ  , لكن عشان من جواكي تؤمني انه إنسان غير سوي , وقراراته نابعة من الاف الواسوس اللي بتعصف بذهنه بشكل مستمر .

 

فلازم بداية تؤمني انه بالفعل بيعاني , وان هو كمان بيتعذب من جواه , حتي لو كان له مظهر شرير قاسي .

 

وبالتالي عشان ننتهي من النقطة ديه , ابدئي من دلوقتي انك تستبدلي مشاعر الغضب اللي جواكي تجاه خطيبك , لمشاعر الشفقة .

 

استبدلي مشاعر الكراهية , للتعاطف معاه , ايوة التعاطف , هو بالفعل شخص عنده اضطراب نفسي عميق .

 

استبدلي مشاعر الحزن الرهيب اللي جواكي , لنوع من الرضا بالواقع الحالي , باعتبار انك ابتعدتي عنه حاليا , لأن حياتك مكانتش هتستمر معاه بالشكل الطبيعي . .

 

اعملي استبدال تدريجي لكل المشاعر ديه  , عشان تفرغي اي مشاعر سلبية جواكي  , و متحسيش بنوع من الندم او الحزن علي اللي فات .

 

---------------------------------------------------------------------------------------

 

ماذا عن ابنك . .

 

ابنك كمان ضحية للإضطراب اللي عاني منه أبوه , و الوساوس اللي كانت عند الأب , هي اللي جعلته يشحن الطفل بكمية لا تصدق من الكراهية تجاهك . .

 

معاناة ابنك في إنه قد يتحول لشخص "سيكوباتي" معقد نفسيا , من كمية الكراهية اللي تم زرعها جواه , سواء من ابوه او عماته .

 

واكيد أكتر شئ بيؤلمك كأم , إنك تشوفي في عينيه نظرات الكراهية تجاهك , وإن مشاعره ناحيتك شديدة السوء  .

 

بس خلينا نقول ان الأمل مش منعدم , وان فيه إمكانية لعلاج مشكلة كراهية ابنك ليكي , وده اللي هنحاول نسرده في النقط ديه :

 

 

• أول خطوة هي التعامل الكويس , و الصبر الطويل علي ده .

 

 

 

• الشئ التاني المهم , إنك لو اتقابلتي معاه , متنقليش ليه كراهيتك لأبوه . .

 

 

 

• شوفي اهتماماته . .

 

 

 

• لو هو لسة رافض الاقامة معاكي , متعمليش اي اجبار له , لانه لو جالك رغما عنه , وبحكم المحكمة , هيكرهك و مش هيطيقك , ومش هيستحمل المعيشة معاكي .