العنوان : فن التربية

القسم: #الإجتماعي

الرقم: 73

السؤال:

 

انا عندي مشكله مع ابني هو ِعنده ٦ سنوات مشكلته أن ع طول عاوز اللي يطلبه ياخذه..

 

ولو في مكان ما وصعب اشتريها في الوقت الحالي يفضل يعيط ويزن عشان اجبها.. اتكلم معاه بالراحه برضو مفيش سماع للكلام دا غير أنه عنيد جدا وحساس لدرجه عاليه جدا عكس اخوه الصغير ٤ سنوات..   المشكله اني بحس انه شخصيته ضعيفه في بعض الأحيان وبيخاف اخوه الصغير مش كدا..

 

وللاسف زوجي مغترب بينزل شهر في السنه وهو متعلق بأبوه جدا وكتير طلب مني أن ابوه ينزل ويستقر جمبنا بس عندنا التزامات وصعب دا حاليا.. والده بيحبه جدا ومش بيحرمه من حاجة بس وقت الغلط بيتصل بيه ويشد عليه ويزعقله..

 

 مش عارفه اتعامل معاه ازاي أوقات بتعامل بالضرب واني ازعقله واوقات كتير بالكلام والشرح والاحتواء. الأصعب من دا انه من شهرين كدا بدأ كل يوم قبل ماينام يقولي ياماما في أفكار غريبه بتيجي في دماغي قولتله زي ايه قالي اني بخاف بحس ان ممكن سكينه تدخل في عيني حقنه تدخل بطني.. اتخضيت من كلامه دا وحاولت أقنعه أن دا من الشيطان وأنه لازم يبدل الفكره الوحشه دي بحاجه ايجابيه واديت له أفكار كتيير كويسه وبدأ يشرح فيها ويضحك

 

بس انا خايفه لأنه كل يوم بيقولي نفس الكلام.. ومن اسبوع كان في حادث عربيه خبطط ولد جمبنا وسمعني بتكلم عرف وفضل يقولي انا خايف من الحجات اللي بتموت دي بخاف منها..

 

ارجو الإفادة السريعه لو سمحتو لاني بثق فيكم لأبعد حد وجزاكم الله خير

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

مشكلة مؤلمة و منتشرة للأسف . .

 

رسالتك فيها نقطتين بالتحديد , الأولي العناد اللي في الطفل , والتانية الهواجس اللي بتجيله . .

لو هنبدأ بالعناد , فلازم الأولي تقرأي الرسائل اللي نشرناها هنا , واللي اتكلمنا بالتفصيل عن تشخيص و اسباب و وسائل حل العناد مع الطفل : 
 

رسالة  : طفلي العنيد

رسالة : صناعة التدليل

رسالة : جنة الأطفال

​

لو هتلاحظي ان الرسالة التالتة تتشابه بشكل كبير مع ظروف الطفل عندك , وازاي ان اعطاء الطفل كل او اغلب الحاجات اللي بيطلبها , بتصنع عنده – رغما عنه – صياغة غير سليمة لمفهوم حقوقه في الحياة , وبالتالي هيتعامل بشكل عنيف و عنيد لما يتم منعه .

 

إعطائه أغلب اللي بيطلبه ديه حاجة غير صحيحة ابدا , لابد يبدأ يتعود ان علي الاقل 50 % من اللي يطلبه يتم رفضه , طبعا كلامي في الحاجات الرفاهية (ايس كريم , عايز التاب , نروح دريم بارك , عايز لعبة جديدة  ) , اكيد مش باتكلم في حاجات اساسية او مهمة .

 

أكبر جريمة بيعملها الاب و الأم اللي حالتهم المادية كويسة , انهم ميحرموش طفلهم من حاجة , هما حرفيا بيدمروه , بيصنعو داخله شخصية متعودة علي الراحة والحياة السهلة و التبذير , وان طلباته أوامر .

 

فلما يكبر شوية , هيكتشف ان الحياة اكثر قسوة , وان اغلب نواحي الحياة  محتاجة منه مقاومة و اصرار و الامتناع عن حاجات بيحبها , و المشكلة انه يبدأ يستسلم لمزاجه و هواه , ويفشل حياتيا .

 

اغلب رجال الأعمال و المليونيرات حول العالم بيربو اولادهم علي حياة قاسية "ماديا" , وانه ياخد اقل من 50 % من اللي يطلبه , عشان يتعود ان الحياة تعب ومجهود ومشقة , وعشان لما يكبر و يكون في ايده الملايين , ميصرفهاش بغباء و يدمرها .

 

ولما انتي قلتي ان العناد عنده ظهر من سن 3 سنين , فده شئ منطقي , لانه السن اللي بيبدأ يتحول فيه الرضيع من طفل كل احتياجاته (أكل , شرب , نوم) , الي طفل له كيان و رغبة و متطلبات واحتياجات تانية , ممكن يتوافق عليها و ممكن تترفض .

 

حبك و حب ابوه ليه , المفروض ميخليكومش انكم تفسدوه باعطائه كل اللي يطلبه , زي ما قلتلك , بالكتير 50 % من اللي يطلبه ياخده , حتي لو الشئ رخيص , حتي لو مش مؤذي .

 

---------------------------------------------------------------------------

 

والمشكلة بتتفاقم لما يطلب حاجة , وانتي ترفضي , فهو يعيط و يزن , فانتي توافقي . .

 

هنا المشكلة فعلا بتتضاعف . .

 

ليه ؟

 

لأن هو كدة هيعرف ان الحل في العياط , الحل في الزن , الحل انه يقعد يصوت و يقطع قلبك عليه , لغاية لما تشفقي عليه و توافقي . .

 

و لو لقاكي لسة رافضة هيزود جرعة العياط , ويعلي الصوت اكتر , وهيراهن انك هتستسلمي قبله , ومتقلقيش عليه , لان الاطفال الصغيرين الحنجرة عندهم ماشاء الله قوية , ومش بيتعبو من كتر الصويت . .

 

فلازم لازم لازم  , طالما انتي اتخذتي قرار ان لا , يبقي لأ , ولو اتشقلب علي دماغه , او صويته ملي الشارع كله . .

 

لازم هو من جواه يعرف ان الصويت مش هيحل المشكلة لكن هيزودها , لما من جواه يشوف بنفسه ان العياط مش هيجيب نتيجة , وان انتي عنيدة اكتر منه , هيبدأ تدريجيا يشوف طريقة تانية انه يطلب اللي عايزه , او هيستسلم و يسمع كلامك .

 

مش من مرة واحدة  هيتعب و يستسلم , لكن لما انتي تتمسكي بقرارك و متستسلميش لعياطه عدد كبير من المرات ورا بعض , علي الاقل عشر مرات , ساعتها تدريجيا هيبدأ يغير من اسلوبه  .

 

من دلوقتي و رايح , لما يطلب منك حاجة معينة , انتي شوفي لو الشئ مؤذي ( عايز بيبسي قبل ما ياكل) , يبقي ترفضي فورا من غير نقاش , وديه متتحسبش من نسبة الـ 50 % اللي بيتوافق عليها و يترفض .

 

لو الشئ مش مؤذي (عايز التاب) , يبقي هو ليه نسبة 50 % بس من اللي يطلبه يتنفذ , والباقي يترفض .

 

لما ترفضي (سواء من النوع الاول او التاني) , تبقي كلمة واحدة و مفيهاش تكرار , تكلميه بهدوء و تقوليله لا يا فلان , مش هتاخدها , وتسيبيه و تمشي .

 

هيبدأ يعيط , سيبيه يعيط , ومتسأليش فيه اصلا  ,لا تروحي تزعقيله , ولا تتعصبي , ولا تضربيه  ولا تطبطبي عليه , ولا تكلميه تاني , تجاهليه تماما , بس طبعا وانتي متأكدة انه مش هيأذي نفسه بطريقة ما  .

 

هيبدأ يعلي صوته في العياط ,انتي ولا يهمك , كانك مش سامعاه اصلا .

 

هيعصبك و يضايقك , انتي خليكي باردة تماما , لا تضربيه ولا تزعقي فيه .

 

وقتها هيبدا يخاصمك , هتقوليله تعالي كل هيقولك مش هاكل , قوليله براحتك , الاكل موجود عايز تاكل تعالي مش عايز هشيله , لا تزعقي فيه ولا تعتذريله ولا تجبريه علي الاكل .

 

لما تصطدم ارادته مع ارادتك , وعنادك مع عناده , ويكتشف انك اقوي منه , هيلين غصب عنه , بس بشرط , لا تزعقي فيه ولا تضربيه ولا تتعصبي , ولا تسمعي كلامه طبعا .

 

مرة مع التانية مع التالتة , هتلاقيه يغير من اسلوب تعامله معاكي , خاصة لما يلاقي ان عدد من الطلبات بيتم الاستجابة ليها مش كل حاجة بتترفض .

 

 

وبالنسبة للضرب , فالمقدار القليل منه كويس طالما انتي شايفه انه مهم وعلي الوصف اللي قلتيه انا شايف انه كويس  , بس اياكي تندمي لما تضربيه او تعتذريله .

 

لأن اي ندم او اعتذار بعد الضرب , هو هيعرف انه كان مظلوم وانك كنتي غلطانة , فهيقوي قلبه عليكي وياخد منك اكتر من حقه .

 

يعني حتي لو انتي لقيتي في مرة انه ضربتيه زيادة عن اللزوم , او انه مش غلطان قوي , فاقفلي الموضوع و كلميه عادي , او صالحيه بس من غير ما تقوليله : انا اسفة اني ضربتك , والا هتكوني هديتي اللي عملتيه معاه

 

فحل المشكلة ببساطة : عمل المزج المتقن بين الحب و الحزم , اللين و الشدة , الموافقة و الرفض , التفاهم و التجاهل (لما يعند) , الاحتواء  والخصام , كل حاجة بكمية سليمة و في وقتها السليم .

 

يعني ده يختصر في كلمة : فن التربية . .

 

-----------------------------------------------------------------------------------------

 

طب ماذا عن الهواجس المخيفة اللي بيتكلم عنها بقاله فترة  ؟ ؟

 

الحقيقة اني مش قادر استبعد الأثر التدميري الرهيب للتليفزيون + اليوتيوب , من اللي هو بيتكلم عنه  , و بيفكر فيه . .

 

عقل الطفل زي اي حاجة في الدنيا , هو كأنه صندوق ليه مدخلات  inputsو ليه مخرجات outputs  , وعلي أساس المدخلات بيتم تشكيل المخرجات . .

 

زي بالظبط المفرمة اليدوية القديمة , اللي كانو بيستخدموها زمان . .

 

لو دخلو فيها فول ناشف و خضرة وبصل , تعمل عجينة فلافل .

 

لو دخلو  لحمة نية و بصل و فلفل , تعمل لحمة مفرومة . .

 

فحسب اللي بيدخل , بيحصل تشكيل و صياغة للمخرج .

 

و لأن طبيعة طفل عنده 6 سنين , انه مش بيروح الشغل , ولا بيروح مدرسة الا ساعات محدودة , ولا بيتابع اخبار العالم , ولا عنده فيس بوك, فأغلب المدخلات لعقل الطفل في السن ده بيكون من 3 مصادر :

 

• افراد اسرته

• اصدقاءه

• المحتوي اللي بيشوفه (علي التليفزيون او غيره)

 

 

ولأن افرد اسرته مش هما مصدر الهواجس ديه , وانتي مذكرتيش شئ عن اصدقاءه هل بيتكلمو في حاجة زي كدة ولا لا , فاصابع الاتهام بتشير بوضوح للمحتوي اللي بيشوفه لعدد مش قليل من الساعات يوميا علي التليفزيون او اليوتيوب .. 

 

و للأسف بقت عادة خطيرة منتشرة , ان الام عشان يكون عندها وقت لشغل البيت , انها تفتح التليفزيون او التاب للطفل وهو يقعد عليه بالساعات . .

 

و الام بتظن انه طالما بيتفرج علي حاجات للاطفال و كارتون , فمفيش ضرر عليه ولا حاجة , وطبعا ده فهم خاطئ .

 

للاسف حتي محتوي الاطفال و الكارتون , سواء العربي او الاجنبي المبدلج او المترجم , فيه كمية لا تنتهي من الرسائل السلبية , والتأثيرات الخطيرة علي اللاوعي الخاص بالطفل .

 

ابحثي بس في جوجل علي تاثير الكارتون علي الطفل , هتلاقي كلام يشيب له الشعر .

 

ده غير انه بيقتل اي خيال او ابداع هينمو عند الطفل , لانه هيتعود علي تلقي المعلومة جاهزة , من غير استنتاج او تفكير .

 

لابد يتوقف فورا عن العادة المدمرة ديه , و ميزيدش مجموع الفترة اللي بيتفرج فيها علي اي محتوي , علي ساعتين اسبوعيا , حتي لو كان شئ مفيد .

 

و يتم استبدال ده بالعاب يدوية  , يفك و يركب حاجات , يجمع بازل , يلون و يشغبط , يكون مكعبات , يبني هرم , يشكل صلصال , تقري معاه قصة , ولما يكبر شوية , هاتي اي جهاز بايظ (راديو مثلا او خلاط) و خليه يفكه و يركبه , انتي كدة بتعلميه الابداع و التفكير , لكن القعاد علي التليفزيون و التاب بتدمر المخ حرفيا

 

ارجوكي اقري الرسالتين دول , فيهم نصايح بالغة الأهمية

​

رسالة : أنا أكره المدرسة 

رسالة : الفضول و العقاب
 

وابدأي تدريجيا اعملي استبدال لوقت التليفزيون و التاب , لانشطة تانية تزود من ذكاؤه و إبداعه , و هتلاقيه نسي كل الهواجس الغريبة اللي عنده , وانتي يفضل متقوليش كلمة "الشيطان" دلوقتي , هو مش في سن عشان يفهم البعد الديني للكلمة ديه , ده غير انها هتخوفه اكتر , وهتصنع في عقله خيالات مرعبة .

 

و اول ما يجيبلك سيرة الهواجس ديه , امسكيه و احضنيه , وقوليله اطمن انا معاك و مفيش اي حاجة هتعملك مشكلة  وبعدها فورا افتحي اي سيرة حاجة كويسة , عشان تشغليه عن السيرة ديه , يعني استخدمي تكنيك "بص العصفورة" .

 

و لو قدرتي تبعديه عن الفيديوهات سريعا , هتعملي تجفيف كامل لكل مصادر الازعاج النفسي اللي في عقله

​