العنوان : الأزمة العميقة

القسم: #النفسي

الرقم: 72

السؤال:

 

انا بنت غير متزوجة  , مع اني فوق الـ 30 سنة وعندي كذا مشكلة مع بعض

 

من و انا صغيرة و عندي مشاكل من المعاملة العنيفة اللي كانت من والدي واللي كان بيوصل بيه الأمر للضرب المستمر

 

ولما كبرت شوية كنت خايفة اكون تخينة فبدأت اعمل ريجيم حاد . المشكلة اني فعلا مكنتش باكل حاجة لغاية لما خسيت جدا لدرجة بقيت 32 كيلو .  بس ده عمل مشاكل دايما مع اهلي انهم بيضغطو عليا عشان الأكل و انا فعلا مش عايزة . لدرجة ان كان هيغمي عليا و رحت المستشفي و علقولي محاليل عشان اعرف اعيش

 

بعدها بفترة بدأت انعزل عن الكل حتى أخواتي وبدأت اتصرف معاهم بعدوانية وفصلت نفسي عنهم في كل حاجه اكلي ونومي لدرجة كنت بنام في الصاله عشان ما حدش بقرب لي

 

رحت بعدها لاكتر من طبيب نفسي وما حدش عارف يعملي حاجة لأن أصلا مش بتكلم مع حد وكل همي أذاكر وبس و دخلت بعدها مصحة نفسية

 

وبعدها يأسوا مني  كان كل همهم اتجوز  وأنا رافضة لأن خايفة حد يفرض عليا أكل

 

اتخطبت اكتر من مرة وفشلت وكل ده وبرده ما فيش تعامل مع حد ،لدرجة قالوا عندي توحد

 

كملت دراستي وقعدت في البيت طبعاً كان كل أملي اشتغل واشتغلت في اكتر من مجال ونجحت

 

بعدها اتقدملي شاب انا مكنتش مستريحة له لكن وافقت عشان يسكتو  بدأ يتكلم معايا في امور خاصة و حاجات انا مش بحب الكلام فيها بس هو كان مصرو حتي بدأ يبعت لي صور وكنت لما أقوله المشاهد دي حرام يهاجمني ويقولي وده عادي

 

وللأسف سكت لكن كنت كل يوم بصحي من نومي بستغرب إن أنا بجد أعمل كده وأقول أهو خلاص هنتجوز قريب وننتهي

 

في الفترة ديه كنت باتعالج نفسيا من حاجات تانية ووصل بيه الأمر انه تحرش بيا بشكل عنيف و كان عايز يتهجم عليا و هنا اعصابي انهارت و طردته من حياتي تماما

 

انا عمرى ما اتمنيت الموت حتى في أصعب الظروف بس فعلا دلوقتي بتمناه ومش فارق معايا نظرته ليا

 

أنا خايفة يكون ربنا كارهني أو أكون مريضة نفسيا فعلاً

 

(ملحوظة الفريق : تم حذف العديد من التفاصيل لطول الرسالة الكبير و لعدم إمكانية نشرها)

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اهلا بيكي . .

 

مشكلتك طويلة و متعبة , عشان كدة اخدت مننا حوالي 10 ايام علي ما نقدر نجمع اطرافها بشكل مناسب , ونجيب رد نتمني يكون مناسب و موفق .

 

مشكلتك الاساسية مش قلة الاكل , ولا الخجل , ولا  ضعف التواصل , ولا العنف اللي كان في طفولتك ,و لا الاكتئاب , ولا اضطراب النوم , مع ان كل الحاجات ديه موجودة بشكل ما  , وبعضها كان سبب مشكلتك الكبيرة .

 

مشكلتك تتلخص في تلات نقاط اساسية , لابد تكوني عارفاهم كويس عشان تقدر تتخطيها و تتجاوزيها

 

رقم 1 : سوء التفسير للاحداث

رقم 2 : كمية العناد الغيرمعقول

رقم 3 : ردود الافعال غير المناسبة

 

 

التلات حاجات ديه , هي بالفعل اساس مشكلتك , واللي لازم تركزي عشان تحليها , لو انتي بالفعل عايزة تتخطي الازمة اللي انتي عايشة فيها , وهي ازمة عميقة و مش سهلة .

 

هتلاحظي ان التلات نقاط دول , موجودين معانا علي طول الخط , و هتلاقيهم متواجدين في جميع مراحل حياتك زي ما وصفتي لينا , اما كسبب او كنتيجة .

 

حاولنا نلخص اللي حصلك علي مدار حياتك, فقدرنا نعمل 6  نقاط اساسية انتي مريتي بيها , وهي  :

 

• الطفولة المؤلمة     

• القهم النفسي  

• الانعزال الاسري

• العناد مع الاطباء

• التصرفات الحمقاء من الشاب  

• الحالة النفسية المتردية

 

لازم نتكلم بالتفصيل عن كل نقطة فيهم علي حدة

 

-------------------------------------------------------------------------------

 

نبدأ بالطفولة المؤلمة .

 

وهي غالبا المرحلة اللي بيركز عليها اي طبيب او اخصائي نفسي , لما يبدأ يعمل تحليل للمشكلة اللي قدامه , لاننا عارفين ان اغلب المشاكل النفسية اللي بتصيب الناس , بتكون نتيجة لمشاكل حصلت في مرحلة الطفولة , اما مشكلة كان الطفل طرف فيها , او مشكلة الطفل شافها حتي لو مكانتش بتمسه بشكل مباشر

 

ربنا ابتلاكي بأب عصبي , عنيف , غير متفاهم , و تصرفاته الغير عقلانية , عملت فيكي اثر غير محدود انتي بتعاني منه الي الان .

 

لو كانت ربع التصرفات ديه , كانت بتحصل في بلد اوروبي , لكن الطفل اتسحب فورا من غير نقاش من الاب , وهو اترمي في سجن مدة طويلة , عشان يتعلم ان هو بيعمل جريمة في حق اولاده .

 

ممكن تشوفي ان العقاب ده مؤلم جدا , ان يتم سحب الاطفال و ايداع الاب او الام اللي بيتعامل بالعنف مع ابنائه في السجن , بس لما تفكري تاني , هتعرفي ان وجود العقاب ده , وجدية الحكومة في تطبيقه , هو الشئ اللي بيمنع اي اب انه يتجنن و يؤذي ابناءه بالشكل المريض ده .

 

عنفه معاكي , وايذاءه ليكي , من ضرب و شتيمة و اسلوب غير محتمل , وانك تشوفي مشاكله اليومية مع والدتك , بل و تحذيره ليكي من ذهابك لجدتك المريضة , كل ده اللي عمل تشكيل للأزمة النفسية اللي انتي بتعاني منها دلوقتي .

 

لو كان الشخص مش قد تربية الاطفال يبقي ميتجوزش , او يتجوز و ميخططش لانجاب اطفال , لكن هذا التعامل المرضي مع الاطفال هي جريمة , ربنا هيحاسبه عليها حساب شديد , نتيجة الاذي الرهيب اللي اصابك و بيصيب غيرك من هذا النوع من الآباء , معقولة فيه اب يضرب بنته حتي علي البكاء ؟ ؟  ده بالفعل مريض نفسي و محتاج يتعالج

 

و غالبا , فالنقطة التانية في مشكلتك (كمية العناد غير المعقول) هي نتيجة للي حصل في طفولتك , كحيلة دفاعية لجئ ليها عقلك الباطن عشان تقدري تتصدي لكمية العنف المبالغ فيها اللي حصلتلك

 

و حاليا مفيش شئ تقدري تعمليه في البند ده , الا انك تحاولي تنسي اللي حصل , او لو معرفتيش تنسيه يبقي قللي تاثيره عليكي بقدر الامكان

 

-----------------------------------------------------------------------------

 

نوصل للنقطة التانية المهمة , وهي القهم النفسي  . .

 

القهم بحرف القاف , مش الفهم , ( ق هـ م ) , هو لفظ عربي بس مش منتشر فكتير من الناس ميعرفوش معناه .

 

القهم في اللغة العربية , هي عكس كلمة الاشتهاء , وهي بتتقال علي الطعام بالتحديد , فالقهم معناه : اللا شهية تجاه الاكل

 

 القهم النفسي بالتحديد , هو اضطراب نفسي , يصيب البعض في ان بيكون عندهم نوع من الخوف الرهيب من زيادة الوزن , وبالتالي اصرار علي عدم الاكل , او ان يكون الاكل للحد الادني من مقومات الحياة .

 

يعني القهم النفسي مش مجرد اختفاء الشهية عن الاكل , نتيجة مشكلة معينة (نتيجة الاكتئاب مثلا) , لا هو فقدان تام للشهية نتيجة ان صاحب المرض ده بيظن انه تخين , وانه لازم يخس , وبالتالي بيمنع نفسه عن الاكل الا اقل القليل , واحيانا كمان يمارس رياضة بشكل حاد , عشان يخس اكتر و اكتر .

 

واسمه العلمي هو : فقدان الشهية العصابي , أو  Anorexia nervosa , وحوالي 88 % من المصابين بيه من الاناث , بينما اقل من 12% منهم من الذكور .

 

و مش بيتم تشخيص ان فلان عنده (القهم العصبي) الا لما يكون بالفعل هو مُصر علي ان هو تخين , بينما كل المقاييس العادية بتأكد ان هو جسمه كويس و يمكن اقل من المتوسط , وكمان لما هو يكون مصر علي اتباع نظام غذائي قاسي , او حتي يعرض عن الاكل بشكل مستمر , بالطريقة اللي بتأذيه تماما .

 

و كل دول اوروبا , شرعت للطبيب النفسي انه يعمل شئ اسمه (العلاج الالزامي في المستشفي) , يعني يتم العلاج رغما عن المريض , وحتي لو هو معترض , طالما هو وصل لمرحلة الخطر , لانهم وقتها بيتعاملو معاه علي انه فاقد للرشد , ومعندوش الامكانية انه يتخذ القرار السليم اللي في صالحه , حتي لو هو معترض .

 

و انا اندهشت لما قلتي ان وزنك تحول لـ 32 كيلو , ده رقم مخيف , يعني حتي ميجيش وزن طفل عنده 10 سنين , يعني ممكن ببساطة واحد يشيلك بايد واحدة . .

 

انا بالفعل مندهش انك لسة عايشة , ربنا ستر في الفترة اللي فاتت , وكرمك انك موصلتيش لمرحلة الوفاة مع الانحدار الرهيب ده في وزنك .

 

وبالتالي انا لو مكانهم كنت هاعمل نفس اللي عملوه و اكتر , كنت بالفعل هساعد في ربطك في السرير , وتعليق محاليل ليكي لارواء عطش عروقك , اللي انتي معذباها بالشكل الغير معقول ده .

 

ولو رجعتي للنقاط التلاتة اللي ذكرناها ليكي في بداية الرسالة , هتلاقي ان اتنين منهم موجودين في المشكلة ديه .

 

يعني في البداية  ,انتي عندك سوء تفسير للاحداث , في انك لما شفتي والدتك و جدتك بوزن زايد شوية , فانتي اصريتي انك لازم متكونيش زيهم .

 

و ان كان وجهة النظر ديه صحيحة , لان الحفاظ علي وزن مناسب , وجسد رشيق ده شئ مهم  ,لكن انتي تخطيتي المعقول في سعيك لخفض الوزن , فان كان جدتك تعبت جدا من وزنها الزايد , فانتي تعبتي اكتر منها بالوزن الضئيل ده .

 

مفيش حاجة اسمها ده جسمي و عاجبني , انتي بتقتلي نفسك ببطئ , اضطراب القهم العصبي هو أكبر اضطراب نفسي مسبب للوفاة في كل الامراض النفسية , واقل من 80 % من المصابين بيه بيعيشو , والباقي بيموتو او بينتحرو .

 

 

اللي عملوه معاكي كان صح , لانهم شايفينك ماشية باصرار للقبر , وكان لازم يوقفوكي في مرحلة ما .

 

كمان النقطة التانية من النقاط التلاتة (العناد غير المعقول) موجودة و باينة جدا هنا .

 

كمية لا تصدق من العناد و الاصرار , و اللي جعلك مع كل الضغوط اللي عليكي اصريتي علي موقفك و استمريتي في تجويع خلايا جسدك

 

المشكلة ديه لازم تتحل من عندك انتي الاول , انك تؤمني ان التخن شئ وحش , والرفع المبالغ فيه شئ وحش , وان الاتنين بيوصلو للهلاك , وانك لازم بالفعل تستمعي لرأي الاطباء

 

--------------------------------------------------------------------------------------

 

ماذا عن مشكلة الانعزال الاسري ؟ ؟

 

للأسف البداية المؤلمة كانت منهم هما , سواء من والدك القاسي  ,او اخوكي المهمل  , او اختك اللي اتهمتك بالجنون , او الظلم اللي وقع عليكي بشكل عام .

 

لكن النقطة الاولي (سوء التفسير) , والنقطة التالتة (ردود الافعال غير المناسبة) اشتركو مع بعض عشان يعملو تعميق للأزمة .

 

فالاهمال اللي حصل من اخوكي اكيد شئ غير مقبول , لكن انتي كان المفروض تتجاوزي الامر ,علي اعتبار ان مهما كان اللي حصل  , فهو مكانش بأثر سلبي خطير .

 

اختك لما كان يحصل مشاحنات بينكم , كان الافضل ان انتي تتجاوزي اللي حل , عشان المشكلة تتحل .

 

بل ان الامر يوصل انك تقولي كلام غير مناسب لوالدتك , حتي لو ظلمتك لحساب اختك  ,فهو شئ غير مقبول

 

و كمان انعزالك عنهم عمق الأزمة اكتر , مفيش حد بينام في الصالة عشان يهرب من اسرته , ده هيأكد عندهم الانطباع اللي عندهم انك غير طبيعية , وهيجعلهم يصنفوكي في خانة معينة مش هتتغير .

 

فكنت اتمني يكون فيه تفسير افضل للي حصل , ويكون فيه رد فعل اكثر ملائمة  , هما اية غلطو , بس احنا بنتكلم علي حل المشكلة مش تعميقها

 

 

نوصل لصمتك مع الاطباء النفسيين . .

 

يعني هو المفترض اي طبيب او معالج نفسي , ازاي اساسا هيقدر يشخص الانسان اللي قدامه , ويحاول يعالج مشكلته , مالم يتكلم عنها . .

 

هو الطبيب ده ساحر ؟ هل هو قارئ للغيب ؟ هل بيقرأ الافكار ؟   

 

مالم يكون فيه تعاون بين الشخص اللي عنده المشكلة  والطبيب فهو مستحيل يكون قادر علي المساعدة .

 

 حتي بالوصف اللي ممكن هو يعرفه  من الوالدة او اخواتك شئ غير كافي  , لازم يسمع منك و يعرف دوافع المشكلة و اسبابها , عشان يعرف جذور المشكلة و يبدأ يخلهلها عشان يحلها .

 

فصمتك هو تأكيد للنقطة الاولي اللي ذكرناها : العناد غير المعقول , وكمان النقطة التالتة : ردود الافعال الغير مناسبة .

 

لازم كنتي تعرفي ان الطبيب ده عايز يساعدك , عايز يخليكي تستريحي من المعاناة اللي انتي في قلبها , هو ادري بيكي منك انتي , و هيعرف عنك اكتر من اللي تعرفيه انتي عن نفسك , لانه دارس كل انماط البشر , بس لازم في البداية يكون عنده مفاتيح المشكلة , هيساعدك ازاي و هو يجهل كل شئ عنك ؟ ؟

 

ان مكانش فيه تعاون مع الطبيب فمفيش علاج , فيه مثل بيقول : اذا كان الطبيب حكيما , والمريض مطيعا , زالت اسباب العلة ,   فطبيعي ان المشكلة هتزيد و تتفاقم طالما مفيش تعاون منك

 

ارجوكي ده لازم يتغير , لو انتي بالفعل محتاجة علاج لمشكلتك

 

----------------------------------------------------------------------------------------

 

نيجي للنقطة الخطيرة , والخاصة بهذا المجرم . .

 

و مش قادر اوصفه الا انسان مجرم , يخلو من اي تدين او مروءة او اخلاق .

 

ده مش ممكن يكون متدين , مش ممكن يكون بيفهم اي شئ في الدين , انا مش باحكم علي علاقته بربنا لان ده شئ في علم الله , انا باحكم علي تصرفاته القذرة من بداية تعارفكم . .

 

فيه حاجة اسمعها شوفي معايا علي الصور الجنسية ديه ؟ ايه الحماقة ديه ؟ ايه الخلل النفسي اللي في عقله ده ؟

 

وبعدها انه يستدرجك لبيته , ويدعوكي للدخول و البيت فاضي , فده ملوش اي تفسير برئ , ملوش الا معني واحد قذر موجود في ثنايا عقله .

 

وبعدها لما يتهمك بالجنون , وبعدها لما يدعوكي عشان تيجي تطبخيله . .

 

ده انسان بيستغل الضعف اللي انتي بتعاني منه في حالتك النفسية المتردية , بشايف ان الطريق ليكي سهل , هل كان يقدر يقول نفس الكلام لواحدة عادية ؟ كانت مسحت بيه البلاط . .

 

مقالوش ليكي الا عشان عارف ان حالتك النفسية هشة , من المعاناة الطويلة اللي عانيتيها في السنين اللي فاتت , وان انتي هتتعلقي بيه باعتباره اعطالك امل في الزواج . .

 

والحقيقة انا مندهش منك انتي في حاجتين اساسيتين . .

 

ازاي اولا بعد مشكلة دعوتك لشقته الفاضية , ازاي اصلا مبهدلتيهوش , علي الاقل قدام اهلك و اهله , ده شئ لا يمكن السكوت عليه , وملوش اي تفسير برئ للاسف .

 

ثانيا : ازاي لسة متواصلة معاه ؟ هل انتي بجد لسة عندك امل انه انسان سوي ؟ هل شايفة الصنف ده من الناس يصلح انه يكون زوج او اب  ؟ ؟

 

ازاي لسة فيه كلام معاه ؟ ازاي بتردي علي كلامه ؟ انتي بردك عليه – حتي لو كان رد ناشف – بتخليه يقتنع انك سعيدة بالتواصل معاه , وان الجريمة اللي عملها شئ مغتفر , وده اللي خلاه يتبجح و يقولك تعالي اطبخيلي في البيت , بالله عليكي ده تصرف انسان سوي ؟ ؟

 

ان كنتي انتي معذورة في البداية لما اتخدعتي فيه , فانتي غلطانة بالكامل لما تتواصلي معاه حتي الان – حتي لو كان بردود قاسية – الشاب ذو التفكير الحيواني اللي من النوعية ديه , لما بيشوف 1 % تجاوب من اي بنت , بيفسرها علي انها موافقة علي الاستمرار في النهج ده , وان من جواها هي "فرحانة" باللي بيحصل .

 

ارجوكي اقطعي فورا اي تواصل معاه , خليه يشوف منك العين الحمرا , خليه يعرف ان اللي عمله من فترة طويلة شئ لا يغتفر , خليه يعرف ان اخلاقك و دينك و كرامتك اعلي من اي حاجة تاني , وان انتي ابعد ما تكوني عن النوعية القذرة اللي هو بيدور عليها . .

 

خليه يبحث عن واحدة تشبه له في مكان تاني , وعند واحدة تانية , مش انتي خالص , وثقي لما اكررلك تاني , ان اي تجاوب معاه – حتي لو كان كلام قاسي – هو هيفسره انك "عايزة" .

 

حرام عليكي تهيني نفسك اكتر من كدة بالتواصل معاه تاني , فورا بلوك , فورا تصرخي في وشه  ,فورا تبلغي اهلك لو كلمك تاني , حتي لو تعملي محضر في القسم , واللي حتي لو معملش تاثير عليه , هتخيله هو يعرف انم مش بتهزري , وانك بالفعل هتقتليه لو شفتيه قدامك , فيخاف منك و يسيب المنطقة كلها , ويدور علي واحدة شبهه في مكان تاني

 

كمان في النقطة ديه , انتي عملتي حاجتين من التلاتة اللي قلناهم في بداية الرسالة , عملتي سوء تفسير للاحداث , فمعرفتيش تشوفي حقيقته المتوحشة  وفسرتي اللي هو عمله بشكل اقل بشاعة من الواقع  , و عملتي ردود فعل غير مناسبة  ,لانك تساهلتي معاه شوية , وكان المفروض ياخد فوق دماغه بالجزمة , عشان يعرف ان بنات الناس ميتلعبش معاهم .

 

لو كان ابوكي متفهم لحالتك  ,كنت هقولك قوليله فورا , ساعتها كان هيروح و يعلمه الادب , ومش بعيد يصفي دمه في الشارع جزاء انه حاول يتحرش ببنته

 

اياكي تتنازلي او تتساهلي في النقطة ديه , ممنوع اي تواصل معاه لاي سبب , واقفلي الصفحة ديه من حياتك تماما

 

 

 

انتي ذكرتي في نهاية رسالتك سؤال واحد , بس انا حاسس ان الاسئلة كتير , بس انتي غالبا معرفتيش تركزي و تصيغيها بشكل مناسب .

 

انتي ذكرتي : هل ربنا هيرضي عليا بعد الذنب ده ؟

 

و مذكرتيش نقاط تانية بالغة الأهمية . .

 

زي الاكتئاب اللي بتاعني منه . .

 

عدم انتظامك في النوم . .

 

الالم النفسي اللي جالك من صدمتك في الشاب اللي وثقتي فيه . .

 

عذاب اجبارك علي الاكل و انتي مش عايزة . .

 

وحدتك وعزلتك وانتي عايشة وسط اهلك , لانهم بعيدين عنك تماما . .

 

المعاناة النفسية المترسبة من مشاكل الطفولة  . .

 

 

ولو هتاخدي راينا , فاغلب المشاكل ديه هتتحل تدريجيا , لما تمسكي تحلي النقاط اللي اتكلمنا عنها بالتفصيل من شوية .

 

احنا عملنا تحليل كامل للي حصل , و قلنالك خطوات تتنفذ , بس خلينا نلخصها هنا , عشان تكون خطوات واضحة تقدري تنفذيها بشكل كامل :

 

• بالنسبة لسؤالك الاخير : ايوة ربنا هيغفرلك وهيسامحك , اول ما تتوبي اليه , التوبة شروطها سهلة و معروفة , وتتلخص في 3 حاجات (الاستغفار و ترك الذنب, الندم عليه , الاصرار علي عدم تكراره) , وان شاء الله  ربنا هيقبل توبتك , خاصة مع معاناتك النفسية المؤلمة

 

• لازم تحلي مشكلة سوء التفسير للاحداث , و تعملي اعادة تقييم لكتير من الامور عشان تقدري تشوفيها بالشكل السليم

 

• لابد تحلي مشكلة الاكل , اياكي ترجعي للـ (القهم العصبي) تاني , لانه هيأثر عليكي فسيولوجيا و سيكولوجيا , و هيدمر اي علاج ليكي

​

• متنزعليش عن المجتمع , افتحي قلبك للناس اكتر , ووسعي دايرة معارفك , من الناس المحترمة

​

• حاولي تنسي اثار الطفولة  ,وان منسيتيهاش يبقي علي الاقل متفكريش فيها , ولما تفتكريها ابعديها عن ذهنك

​

• لازم تزوري طبيب نفسي  , والاهم انك تتعاوني معاه , وتكوني بالفعل عايزة تستريحي من عذابك المستمر ده

​

• مشكلة العناد عندك خطيرة , لما الكل يجمع علي حاجة معينة , يبقي غالبا هما صح وانتي منشفة دماغك , ارجوكي ساعتها اسمعي كلامهم حتي لو مش عاجبك

​

• اتفقنا بالفعل علي قطع اي تواصل مع الشاب ده لاي سبب , وايا كان اللي حصل , ولو جه اتقدملك و عايز يتجوزك الاسبوع الجاي ارفضي , لانه انسان غير سوية من البداية

​

• اعملي نوع من التصالح مع افراد اسرتك , حتي لو مبقيتوش حبايب , يبقي علي الاقل مش اعداء , ومفيش مشاكل انتي بتعيشيها معاهم

​

• الاكتئاب زيه زي باقي الامراض النفسية ليه علاج , بس محتاج طبيب متخصص , يمشي معاكي خطوة خطوة  , بعلاج نفسي و عدد من الادوية , وتاني اؤكد عليكي لازم تروحيله و لازم تتعاوني

​

• قربي جدا من ربنا , و انا تعمدت اقول الخطوة ديه في الاخر , عشان أؤكد ان العلاج النفسي مش بس بالدين , الدين و القرب من ربنا بيساعد علي العلاج النفسي لكنه مش كل شئ , والا كنا نعالج السرطان بالصيام , او كنا نعالج السكر بالصدقة . . ده فهم غير سليم للدين , وتطبيق لمبدأ التواكل اللي نهانا عنه الرسول صلي الله عليه وسلم , هو نفسه أمرنا ان : نعقلها و نتوكل , فلازم تمشي بالخطوات العلمية موازية للجانب الديني , لكن خط لوحده من غير التاني مش هينفع

 

 

معنديش حاجة تاني اقولها غير ان انتي في أزمة عميقة , وهي بالفعل من اصعب المشاكل اللي اتبعتت لنا في الصفحة ,  وعلاجها بايدك  , بس محتاج منك تغيير قناعات , وقرار حاسم

 

ارجوكي متعنديش في انقاذ نفسك من المعاناة المستمرة ديه

 

بالتوفيق ان شاء الله