العنوان : محاولات الاصلاح

القسم: #الاجتماعي

الرقم: 12

السؤال:

 

 

السلام عليكم....

 

انا سبت البيت وروحت عند اهلى عشان جوزى بيعاملنى بطريقه وحشه جدا

 

لما بتكون ماما عندى جالى زيارة بسبب مشاكل بين (جوزى-بابا-ماما)من وقت عفشي ما راح لحد وقتنا ده

 

وديه تانى مرة اغضب بسبب المشاكل بينهم

 

واخرمشاكل بينهم بقا جوزى خيرنى ببن اهلى وبينه هووابنى وانا طبعا اخترت ابنى وهدت الامور شويه

 

بس بعد كم يوم طلبت اكلم ماما بس هو رفض وفضل فترة مبيكلمنيش (وطبعا مامته عارفه ومش بتدخل الا في اللى هى عايزاه وبس وهى كمان قالت عليا كلام محصلش لجوزى وطبعا هو مصدقها.....)

 

بعدين اعمامى راحلولى البيت و طلبت منهم يحلوا المشاكل ديه كلها لكن جوزى رفض انه يحلها وقالى عجبك كده عيشى مش عجبك اتفضلى روحى لاهلك وشنطه هدومك انا بنفسي حجهزهالك وتروحى لوحدك من غير ابنى.......

 

تانى يوم انا اخدت ابنى وطلعت من البيت روحت لاهلى ومن وقتها وهو عمل بيتكلم ف اسرار كنت قاليله عليها مش تخصنى شخصيا بس هو عارفاها يعنى وطلع بردوه اسرار شخصيه وحاجات خاصه كانت بينا ف الخطوبه بيقولها للناس وعايز يوصلها لبابا واهلى

 

وقالى لما جالى مرة..(عايزه ترجعى ارجعى اما طلاق فانا مبطلقش عشان ابنى وانتى حتقعدى ع ابنى وحتربيه وف الاخر حيرجعلى لانى ابوه ف النهايه )

 

ودلوقتى هو موافق ع شروط خالى اللى هى....

 

انى اروح لاهلى وهما يزرونى ف اى وقت ويجبولى زيارة معاهم وكده ويبقى معايا فون عشان اكلمهم فى اى وقت بس هو رفض بقا الفون .....وقال انى ابقى اكلمهم من فونه..بس انت رفضت عشان قبل كده

 

روحت ع الاساس ده وهو كان بيمنعنى اكلم ماما وبابا ف الفون لما كان بيحصل بينهم خناقه...ّ

 

 انا بقا زهقت والتلاته معندين كل واحد اللى ف دماغه بينفذه وانا ف الوسط انا وابنى مش عارفه اعمل ايه....؟

 

اه نسيت اقولك ان ماما وبابا عايزين يطلقونى منه..... ارجوك ساعدنى....

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اللي فهمته من المشكلة باختصار ان فيه خلافات مستمرة , وتدخل الأهل من الطرفين هي أهم اسبابها , وان معاملته ليكي وحشة  , ان سيرة الطلاق لما اتفتحت هو رافضه تماما عشان الطفل الصغير . .

 

واننا عايزين حل دلوقتي . .

​

في البداية ياريت تكوني قريتي التلات اسئلة دول , الاولي بعنوان بيتي هيتخرب  و رسالة   الاعتداء الزوجي و رسالة  الا كرامتي  

​

ومع ان مشكلتك مش متطابقة معاهم , بس فيه شوية حلول هتفيدك من هنا و من هنا  , فمحتاجة تقريهم كويس . .

 

و هنحاول نقول هنا عدد من الخطوات العملية و اللي لو انفذت ممكن تحل المشكلة , او جزء منها

 

---------------------------------------------------------------------------

 

• محتاجة تعملي اولا التقييم الشامل اللي ذكرناه في المشكلة التانية (الاعتداء الزوجي) , واللي بتقومي فيه بكتابة كل مميزاتك و عيوبك , ومميزاته هو و عيوبه , عشان تدوري علي المساحات المشتركة بينكم , واسلوب حلها

 

• لازم تحطي في بالك ان الزواج تضحية , يعني لابد يكون فيه كمية من التنازلات منك ومنه عشان نحافظ علي البيت , وميتخربش , وعشان الطفل يعيش بشكل صحيح من غير اي تعقيدات او مشاكل مستقبلية

 

• لابد من منع تدخل الاهل تماما , بالخير او الشر , وابدئي بعائلتك , لان الشيطان بيلاقي اكبر فرصة لخراب البيت , اول ما المشكلة تخرج من حيطان الشقة , و تروح للاهل و الاصدقاء و القرايب , والأسوء ان حتي لو الزوجين عايزين يحلو المشكلة بعض الاهل بينفخو في النار اكتر عشان متطفيش

 

• حطي في بالك , ان  لو كان الطلاق هو مشكلة في حالة مفيش اطفال , فهو مأساة في حالة وجود اطفال خاصة لو كانو صغار , فعلشانهم لازم نضحي و نستحمل بعض شوية

 

• فيه تفاصيل رفيعة , زي العفش و التليفون و هكذا , الحاجات ديه هتتحل اوتوماتيك اول ما النفوس تصفي , والشياطين تسيب البيت , فانتي الاول هدي الموضوع شوية و متصريش علي بعض الحاجات اللي شايفة انها مش موقفة البيت , بالتدريج هو هيلين

 

 

• حاولي تعملي قاعدة هادية , بينك انتي وهو  , ولو فيه شخص تالت هو يحترمه , وفي نفس الوقت انتي عارفة انه حقاني ومش عايز يخرب البيت

 

 

القعدة ديه يتم الاتفاق فيها علي اللي المساحات المشتركة بينكم , وانك موافقة علي كذا كذا ,بس محتاجة منه يعاملك بالطريقة الفلانية (متجيبيش سيرة حاجات اقل اهمية دلوقتي)

 

 

رتبو موضوع زيارات الأهل بحيث يكون فيه اتفاق واضح بينكم

 

 

وتتفقو ان الاهل ممنوعين تماما من التدخل في امور البيت , وانك هتبدأي باسرتك , وبالتالي هو كمان مطالب يعمل ده في اسرته

 

 

وخلي الشخص التالت يكون شاهد علي كلام زوجك , عشان ميرجعش فيه

 

 

• اول ما النفوس هتصفي , هتلاقي مشاكل كتير كانت معقدة اتحلت فورا , وهتلاقي ان هو من جواه فيه مميزات انتي مش واخدة بالك منها , وزي ما قلنا فتشي جواكي عن اي شئ كان بيغضبه و تجنبيه

 

• حذاري تسيبي البيت مرة تانية , او تطلبي الطلاق , حتي لو هو قسي عليكي شوية , متخليش كلمة الطلاق تكون سهلة في بقك , ولا تستفزيه بانك تسيبي البيت , الاستثناء الوحيد لما يعمل اي تصرف مجنون  ,زي انه يضربك من غير عقل

 

• كلامي ممكن يتفهم منه اني بانصفه علي حسابك انتي , او اني بقول هو صح وانتي غلط , لا مش كدة خالص , لكن انتي الطرف اللي اقدر اكلمه , واعرفه يعمل ايه , وبالتالي انتي اللي ممكن تنقذي البيت عشان خاطر ابنك