العنوان : خطيبي ولا شغلي

القسم: #الاجتماعي

الرقم: 57

السؤال:

 

اتخطبت من كام شهر لانسان محترم و متدين و مفيهوش عيب

 

بس دلوقتي بدأ يكلمني اني اسيب الشغل لما نتجوز هو مش بيحب مراته تشتغل وعايزها تقعد في البيت وانا مش موافقة , مش عايزة حد يتحكم فيها وهو خطبني و انا شغالة يعني مش حاجة جديدة

 

و اساسا شغلي مش متعب , شغالة في مكتب حجوزات طيران و بروح الساعة 5 يعني قبل ما هو يوصل البيت

 

هو منشف دماغه و بقيت بافكر اسيبه مش عارفة اعمل ايه , بس متقوليش سيبي الشغل عشان مش سايباه

 

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

 

انتي بتبعتي السؤال و الإجابة مع بعض , يعني بتختمي كلامك باننا منقولكيش سيبي الشغل ,  خلاص  , سيبي خطيبك لو عايزة  . .

 

انا عن نفسي مكنتش هقولك سيبي الشغل , ومكنتش هقولك سيبي خطيبك , كنت بس هشرحلك معادلة رياضية مرتبطة بالموضوع نفسه , وعلي أساسه انتي اتخذي القرار . .

 

لو قلنا مثلا ان  :

 

ك = 1 س + 10 ص + 200 ع

 

إيه ده ؟ إيه علاقة الرياضة و المعادلات و الحاجات المخيفة بديه بموضوعنا ؟ ؟

 

علاقة وثيقة , ركزي معايا . .

 

لو قلنا ان ك هي نسبة قبول طالب معين إنه يلتحق بكلية معينة . .

 

و هي معتمدة علي 3 عوامل

 

طبعا فعليا هي معتمدة علي عوامل كتير , بس هنا هنتعامل مع 3 بس عشان نبسط الدنيا . .

 

فيه حاجة اسمها س , وليكن مثلا درجته في الفيزيا

 

و حاجة اسمها ص و ليكن درجته في التاريخ

 

و حاجة اسمها ع و ليكن درجته في الانجليزي

 

فلو فيه طالب جايب في الفيزيا (س) 9 من 10 

 

وفي التاريخ (ص) 5 من 10

 

وفي الانجليزي  (ع) 2 من 10

 

 

لما تيجي تطبقي الكلام ده في المعادلة , هتلاقي الدرجة النهائية 459

 

بينما لو هنقارن بطالب تاني , الفيزيا (س = 3) , والتاريخ (ص = 6) , بس الانجليزي كويس (ع = 8)

 

هتلاقي الرقم بقي 1633

 

يعني حوالي أربع أضعاف الطالب الأول . . .

 

طب ليه ؟ ؟

 

لأنك هتلاقي ان الرقم المضروب في بند الانجليزي (ع) رقم كبير جدا , فالزيادة فيه رقم ع عوضت اي نقص كان في س او ص , اللي هي باقي الدرجات  . .

 

وكأن الكلية يهمها جدا ان الطالب يكون كويس في الانجليزي , حتي لو ضعيف في باقي المواد  . .

 

بينما الطالب الضعيف في الانجليزي مش هيتم قبوله حتي لو مقفل باقي المواد,  لأن الرقم 200 كبير جدا و لما يتضرب في رقم قليل هيكون المجموع قليل

 

مش فاهمين حاجة . . .

 

-------------------------------------------------------------------

 

يعني ببساطة انتي عليكي إنك تحددي عدد من العوامل المهمة , بالغة الأهمية , اللي الزواج هيتوقف نجاحه او فشله عليها . .

 

و العوامل ديه يكون ليها تأثير أكتر لما تقيميه علي اساسها . .

 

يعني لو هتاخدي رأيي مثلا , هقولك ان النقط التالية ديه , لا نقاش فيها  ,لو مش موجودة او موجودة بدرجة قليلة فاصلا فكرة الزواج هتكون مأساة  :

 

(يكون بيشرب , مدمن , يقبل المال الحرام , لسانه طويل , غير محترم  , أهله متحكمين فيه , مش عايز يشتغل , استغلالي , كداب , خاين , ديوث ,  )  وكل الصفات اللي بتضرب فورا في الدين و الخلق , واللي غالبا بتكون غير قابلة للاصلاح الا ما ندر . .

 

 

بعدها تبصي علي حاجات تانية , هي مهمة فعلا , لكن لو مش موجودة , ممكن يتغير تدريجيا او يتعلمها زي

 

(بخيل شوية , مسرف , مش بيسمعلك , بيغضب بسرعة , فيه شوية تحكم  , مش رومانسي قوي , تخين , مش شيك )  وهي الحاجات اللي بتأثر سلبا علي الزواج , مش منقدرش نقول إنها هتهده , كمان أغلبها قابل للاصلاح و التغيير طالما فيه ارادة . .

 

بعدها بقي فيه قائمة من الحاجات اللي بالفعل تاثيرها ضعيف في الزواج , وكتير من الناس بيشوفوها إنها هيافات , وديه القائمة تطول فيها . .

 

و هنا كنا نشرنا رسالة مهمة عن ازاي تعرفي تعملي تقييم لخطيبك قبل الجواز في رسالة : إختبارات الزواج

​

----------------------------------------------------------------------------------------------

​

يعني من الاخر قصدي ايه ؟

 

قصدي ان الشغل بالنسبة لك لو هو أولوية لا نقاش فيها , ومن مكتسبات ثورة المرأة الكبري , وانك تكوني ستورنج اندبندنت وومان و الحاجات ديه , فهو فعليا من الحاجات الاقل اهمية لما تيجي تقيمي شريك حياتك . .

 

يعني يعني لو عندنا (س) اللي هو بيحبك و يحترمك و يخاف عليكي ومتدين و ابن ناس , بس مش عايزك تشتغلي  . .

 

و عندنا (ص) اللي موافق علي شغلك و محترم و كويس و كل حاجة , بس "ابن امه" و حماتك اللي بتتحكم فيه . .

 

متخيلة حياتك معاه هتكون عاملة ازاي ؟

 

طب لو هو موافق علي شغلك , و بقي يلح عليكي عشان تساهمي بمرتبك في البيت , وواحد واحدة بقي يكسل في الشغل لما يقعد في البيت و انتي اللي شايلاه  ؟

 

طب لو موافق علي الشغل , بس فيه عيب انه بارد شوية و مش غيور عليكي مثلا  ؟ ؟

 

أي إنسان فيه عيب , وأي عريس هيكون فيه نقطة ضعف , ولما يكون عيبه الوحيد (علي كلامك) انه مش عايزك تشتغلي , أكيد هيكون أحسن كتير من واحد تاني عيبه إنه بيضرب مراته , أو لسانه طويل  ,أو بتاع نسوان . .

 

من حقه لما يرجع البيت يلاقيكي في البيت منتظراه , دماغك رايقة و البيت جاهز , مش لسة راجعة من الشغل مهدودة و متنرفزة ومخنوقة , وبتجري علي المطبخ تعملي الاكل , وتشوفي الواد اللي بيعيط  . .

 

من حقه إنك محدش يتصل بيكي الساعة 8 بالليل عشان يقولك قومي حضري الايميل عشان المدير عايزه بكرة , أو يلاقيكي مضطرة تتأخري في المكتب عشان السيزون , وهو يعمل لنفسه اندومي يتغدا بيه  . .

 

شغل الست مش عيب ولا حرام , بس لابد يتوافق مع معطيات أهم و أولي , و لما تلاقي حد عايز يريحك , وتصحي براحتك الساعة 11 الصبح , وعندك وقت تروحي النادي و تذاكري انجليزي و تشوفي مسلسلات علي اليوتيوب , ومزاجك هادي , فصدقيني ديه نعمة بنات كتير تتمناها

 

و هنا كنا نشرنا رسالة مشابهة , في رسالة : شغلي ولا أسرتي اقريها هتفيدك 

​