العنوان : التدمير المستمر

القسم: #الاجتماعي

الرقم: 21

السؤال:

 

انا متزوجة من سنتين

 

مشكلتي انا جوزي عنيد ومغرور في نفسه علي طول شايف نفسه عليا

 

مش بيخليني اطلع من البيت بروح عند أهلي بالعفيه

 

مش بيخليني اروح عند حد من قريبه أو حد من أهلي خالص كل أما أقله علي حاجه يقلي لاءه

 

أهله هما إلا بيمشوه علي كيفهم وهوه بيسمع كلمهم في أي حاجه تصرفاته كلها زي الأطفال وبخيل في كل حاجه الفلوس والأكل

 

لما حد من قريبنا يكون تعبان واقله تعاله نشوفه يرد عليا ويقلي لما يموت هنبقا نروح نشوفه وأهله ناس بخله وبيحب ياخد بس مياديش

 

انا من كتر تصرفاته الزباله كرهته وكرهت نفسي

 

وندمت اني اتجوزته بصراحة اتخنقت وجالي حاله نفسيه وعصبية

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

مش فاهم ايه اللي حصل في الرجالة . .

 

بعضهم بالفعل بيكون عنده كمية من العقد و الكلاكيع النفسية , اللي بتجعله يفش غله في اللي معاه , و يستمتع بالقتل النفسي لهم بلا رحمة . .

 

بعضهم عنده هواية التدمير المستمر لكل ما هو جميل في حياته , لغاية لما تتحول حياته لصحراء قاحلة مفيهاش الا نبات الصبار . .

 

يعني ممكن الزوج يكون عنيد او مغرور او بخيل او متحكم او قليل الذوق . .

 

لكن كل الحاجات ديه مع بعض , ازاي اصلا ؟ يعني كل العقد ديه جابها منين ؟ ؟

 

ليه مش قادر يفهم ان مفيش بشر بيتحمل التصرفات الزبالة ديه , وان الزوجة مش معناها انها هترتبط بيه للأبد, وانما فيه حد معين من التحمل بعدها هتنفجر . .

 

وحتي ان عاشت معاه فهتكون جسد بلا روح , تتعامل معاه زي علي انه مصدر للدخل و خلاص , طالما انت اللي وصلتها كدة . .

 

ليه بعض الرجال بيخلو اسرهم يتمنو موتهم , يتمنو اليوم اللي يستريحو فيه من قرفهم . .

 

فعلا شئ مستفز , واللي يضايق اكتر اني مش عارف اوصله عشان اوصله الرسالة , اللي زي ده لا هيفتح فيسبوك علي اي صفحة مفيدة , ولو حد نصحه ولا قاله خاف ربنا في بيتك هيزعقله و يشتمه . .

 

--------------------------------------------------------------------------

 

انا فعليا مش لاقي حل مباشر للمشكلة ,  لان كل الحلول في ايده هو , ومش عارف ايه اللي انتي ممكن تعمليه عشان تصلحي الأذي المستمر اللي من ناحيته ده  . .

 

 

والمتاح معاكي حاليا انك تحاولي تصلحي فيه بالطريقة المتاحة , سواء بالاقناع او الضغط عليه او حتي العياط , احيانا الزوج بيرق مع بكاء زوجته . .

 

احيانا لما الزوجة تعامل زوجها بجفاء شوية , او خشونة بيعرف ان فيه مشكلة  , وممكن يتغير شوية , بس حذار من النشوز طبعا . .

 

كمان متفكريش في الطلاق حاليا مع الاسباب اللي ذكرتيها , وهي ان كانت مؤذية بالفعل لكن موصلتش لدرجة المعاناة اللي تسمحلك بطلب الطلاق . .

 

بل ان اغلب العلماء قالو لو ان الزوج تعنت في عدم زيارة اهلك , فمينفعش تزوريهم بالفعل , و هو ذنبه علي ربنا  . .

 

و كنا اتكلمنا قبل كدة عن مشكلة بخل الزوج , عملنا بوست تفصيلي فيها هنا الرابط بتاعه  :

 

 

مذكرتيش انتو عندكو اولاد ولا لا , لو هتاخدي رأيي متجيبيش اولاد في الظروف ديه لغاية لما يتغير و اسلوبه يختلف . .

 

لو حسيتي انك بالفعل مش طايقة المعيشة معاه , من حقك طلب الطلاق , طالما هو مصر علي النظام الغبي ده في التعامل . .

 

 

وانتي لازم تتجنبي وجود العصبية عندك , لانها هتدمرك انتي كمان , خلي اعصابك هادية , و"باردة" لغاية لما ربك يحلها  . .

 

اسف اني معرفتش افيدك ,بس بالفعل مش لاقي اي حاجة تاني ممكن تتعمل . .