الخبرة المطلوبة
الرسالة السابقة
العنوان : الخبرة المطلوبة
القسم: #النفسي
الرقم: 27
السؤال:
انا لسة متخرجة وشغالة مدرسة
المهم ان حاولت اكتر الدروس بتاعتي القيها بتصغر من الناحية التانية
اللي اقصدو بقي , لية الناس بتتعامل مع حديثي التخرج انو معندوش الكفاة زى المدرس اللي شغال بقالو الف سنه
وبعد كام حصة يستغنو عن المدرس ويعتذرو
لييية , والمفروض اني مش ايااس واكمل
انا مكتئبة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي
شوفي يا ستي . .
هنتناول الموضوع من محورين , الاول النقطة النفسية ,ثانيا نصايح عملية . .
خلينا نبدأ بالنصايح العملية باعتبارها ابسط شوية , و اسهل في التطبيق . .
أغلب الخريجين بيتصدمو بالدائرة المفرغة اللي اسمها :
(الشغل عايز حد عنده خبرة , وعشان يكون معايا خبرة لازم اصلا اشتغل ) . .
وحديث التخرج بيحاول يفك لوغاريتمات المعادلة الرياضية المستحيلة ديه , هو بيتسائل في باله , هو البيضة الأول ولا الفرخة ؟ ؟
مهو فعلا , اغلب اماكن العمل محتاجة حد عنده خبرة , وده حقهم , مش عايزين حد يجرب فيهم , ولا يتعلم باخطائه معاهم . .
وهو عشان ياخد خبرة مهو لازم يشتغل من الاساس , يعني هيجيب الخبرة من بيتهم ؟ ؟
و حل المعادلة المعقدة ديه , بيكون فيه احد فرصتين , شوفي انهي فيهم المتاحة . .
الفرصة الأولي بتكون في اماكن مش عايزة حد معاه خبرة , وديه غالبا بتكون اماكن مرتباتها ضعيفة , و معايير النجاح عندهم اقل شوية من المطلوب , فهما مش هيقدرو علي مرتب حد معاه خبرة , وفي نفس الوقت معندوهمش مشكلة ان اللي هييجي انه "يتعلم" فيهم لغاية لما يفهم الشغل عامل ازاي . .
و بالتالي ابحثي في النطاق ده ,يعني المدارس ذات المستوي الاقل , واللي مراتباتهم في الارض , فهما عشان مش هيقدرو علي مرتب مدرس خبير ,فهيوافقو علي الغلابة اللي مش معاهم خبرة , بالمرتب القليل . .
و بمجرد ما تقعدي معاهم سنة و اتنين , كدة انتي كسرتي الحلقة المفرغة , وجاوبتي علي سؤال البيضة و الفرخة بنجاح . .
الطريق التاني هو التدريب بلا مقابل . .
يعني انتي لو رحتي مدرسة مستواها متوسط او كويس , وقولتيلهم انا مستعدة اشتغل معاكم سنة كاملة من غير اي مرتب , لاني هكون سعيدة اني اشارك في الصرح التعليمي الرائع ده و . . . الخ الخ , وتقولي كلمتين حلوين لسيادة المديرة . .
فيه احتمال انها توافق , انتي فعليا مش هتكلفيهم حاجة و هيستفادو منك , وقتها تكوني برضه اخدتي الخبرة اللي انتي عايزاها , وبعدها بسنة قدمي في مدرسة احسن و هتتقبلي , وممكن اساسا نفس المدرسة يعملولك عقد السنة اللي بعدها . .
صحيح ان الشغل لمدة سنة من غير مرتب حاجة متعبة ماديا و نفسيا , بس انتي بصي لقدام , و علي ميزة انك تشتغلي في مدرسة مميزة قدام بمرتب كبير يعوضك عن السنة ديه . .
ديه النصيحتين اللي ممكن يفيدوكي في تخطي المشكلة الحالية . .
-----------------------------------------------------------------------
طيب ماذا عن الشق النفسي للموضوع . .
انتي ذكرتي هنا اليأس و الاكتئاب . .
و خليني اقولك ان انتي مزوداها شوية , ومعندكيش حق في الشعور ده . .
لأن اليأس و الاحباط و الاكتئاب , يصيبو الفرد لما يحس بالظلم . .
و الظلم بييجي لما الشخص بيكون عارف ان ليه حق في حاجة معينة ,ومياخدهاش . .
فانتي لو شغالة في مدرسة , و ليكي في شهر يونيو المكافأة السنوية اللي بتعطي في اخر العام الدراسي , لو انك مأخدتيهاش , وانتي عارفة انك تستحقيها , فده اللي بيصنع الاحساس بالظلم , واللي ممكن يصيب الشخص بالاكتئاب او الضيق . .
بينما لو انتي مثلا كنتي طول السنة متأخرة و مش بتراعي قواعد المدرسة , و وجدتي انك اتحرمتي من المكافأة بسبب الاهمال , فالشعور بالظلم هيختفي , لأنك بالفعل عارفة السبب اللي جعلك تتحرمي من المكافأة . .
فالشعور بالظلم بيأتي لما تكوني انتي متوقعة شئ معين , وتتحرمي منه من غير سبب مقنع , والشعور بالظلم هو اللي بيصنع الاكتئاب و الاحباط و اليأس . .
طيب ماذا عن حالتك هنا ؟ ؟
لو انتي في مكان مديرة المدرسة , هتلاقي ان بالفعل ليها بعض الحق في رفض تعيين حديثي التخرج , هي مش في حاجة لشخص ييجي يتعلم في المدرسة و يجرب فيها , ويعمل مشكلة ممكن تدمر سمعة المدرسة . .
فرفضها ليكي مش "ظلم" , قد ما هو تطبيق قواعد صارمة شوية . .
و زي ما قلنا عشان فيه طريقين لكسر الحلقة المفرغة بتاعت البيضة و الفرخة , فعندك بالفعل طريقين ممكن تدوري فيهم . .
لكن لو انتي شعرتي بالظلم او الاحباط , من شئ هو بالفعل مش غلطهم , وشئ متوقع , فانتي كدة مش موضوعية في حكمك . .
وهو نفس الفرق بين واحد مش قادر يجيب موبايل عشان غالي جدا , وواحد تاني اشتري موبايل بس باظ من اول اسبوع . .
الشخص الاول و ان كان متضايق بس متظلمش , لان هو مش معاه الفلوس لتمنه . .
لكن الشخص التاني حاسس بالظلم اكيد لأنه دفع الفلوس بالفعل , لكن لم يأخذ قيمة الشئ اللي دفع تمنه . .
بقول كدة مش عشان الومك , لكن عشان اوجه مشاعرك في الاتجاه الصحيح , و عشان امنع المشاعر السلبية عندك انها توقفك عن طريق انك تطوري من نفسك . .
حاولي تشوفي الطريقين اللي قلناهم من شوية عشان تكسري الحلقة المفرغة اللي قلناها . .
او اعملي تطوير لنفسك , شوفي لو فيه دبلومة تربوية تدرسيها لمدة سنة مثلا , لو تاخدي ايلتس فممكن تدرسي في مدارس لغات , لو تقدمي علي ماستر , فيرفع من فرصك انك تشتغلي و هكذا . .
متخليش اليأس و الاحباط يتملك منك , واعرفي ان الطريق قدامك طويل , بس محتاج مجهود