كل سنة مرة
الرسالة السابقة
العنوان : كل سنة مرة
القسم: #الاجتماعي
الرقم: 31
السؤال:
انا كنت مخطوبه وكنت بحبه جدا وبسبب ان عندى فى البيت محدش بيحبه علشان مش بيجى كتير وبعد حب سنتين ونص وقبل فرحى بشهرين سبته
رغم انه والله مش بيعمل معايا مشاكل وطيب وغلبان ومحترم ومش بيكدب ولا بيخون
اعمل ايه مع اهلى علشان يرجع تانى ونتجوز الدبله لسه عندى مش عايز يجى يخدها علشان لسه عايزانى وانا عايزه وبحبه جدا وحاسه مش هكون مبسوطه مع حد غيره
والسبب اهلى علشان مش بيحبه , هو ولا اتغير ول حاجه خالص
بس هما كانو مش بيحبه و علشان مش بيجى عندى كتير كل شهرين او 3مره . وهى ساعة ويميشى
مش بيجلى فى اى مناسبه خالص هو لسه بيحبنى ومش عايز يخد الدبله علشان عايز يكمل وخايف يجى تانى وهما يرفضو
مش بيجى غير كل 3شهور مره دايما لما كنت بقوله تعالى نخروج مش بيوافق خالص والمناسبات الرسميه مش بيجى فيها حتى عيد ميلادى رغم انى والله ما بطلب حاجه ولا عايزه اصلا
عندى بيقوله ممكن يكون بخيل
بس بيكون نفسى اشوفه مش اكتر ولما بيكون اجازه بيكون مع اصحابه وبيقعد مع نفسه بيفكر فى مشاكل الشغل وموضوع الجواز
فى فتره السنتين ونص خرجت معاه مرتين بس والمرتين كنت عند مامته فى البيت
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
انا شايف مشكلتين مش مشكلة واحدة , وغالبا المشكلة التانية هي السبب في الاول .
المشكلة الاولي رفض أهلك ليه , والمشكلة التانية قلة الاهتمام منه ليكي .
تعالي نبدأ بالتانية , لانها مسببة للأولي .
عمري ما سمعت عن خطيب يزور خطيبته مرة كل 3 شهور , وانهم ميخرجوش اكتر من مرتين في سنتين و نص , يعني بمعدل خروجة في السنة . .
ده مؤشر سلبي جدا , وبالفعل قادر علي هدم البيت لو تم الجواز .
يعني احنا متعودين علي المشاكل اللي بيكون فيها "تجاوز" في العلاقة بين الشاب و خطيبته ,وبنقول ان ده غلط , وان كتير من الكلام و الهزار و الخروجات اللي بتتعمل بالاسلوب ده , لازم تتعمل بعد الجواز مش قبله .
لكن هنا شايفين الوضع العكسي , ان اصلا هو مش موجود في حياتك , فيه حاجة اسمها زيارة كل 3 شهور , يعني مظبط نفسه مع الفصول الأربعة , يعني زيارة في كلا من الصيف والشتا و الربيع و الخريف ؟ ؟
فترة الخطوبة بتكون اختبار كامل و تدريب بين شخصين , علي انهم هيعيشو مع بعض تحت سقف واحد , حياة طويلة فيها سعادة و فيها ملل , فيها ضحك وفيها مشاكل , عشان يشوفو هيتعايشو مع بعض ازاي .
و كتير من حالات الزواج بتفشل , لان فترة الخطوبة مكانتش بالمعايير السليمة , يعني يا اما قصيرة جدا , يا اما مكانش فيها نقاش جاد في مساحات الاشتراك و الاختلاف بينهم . .
عشان كدة لما تم الزواج , هو فوجئ انها عصبية , وهي فوجئت انه ابن امه, و بدأت الخلافات واللي احيانا بتهد البيت .
فعدم تواجده بشكل معقول معاكي , وعدم جديته في الحضور و زيارتك بشكل مناسب , معناه حاجة من تلاتة , والتلات حاجات "زي الزفت" .
اما ان اهتمامه بيكي اصلا قليل , صحيح ان شكله انه مش بيعرف بنات تانية , لكن ممكن يكون عنده اولويات كتير عن مراته , و ده بالتأكيد هينعكس و هيتفاقم بشكل حاد بعد الزواج , وهتلاقي نفسك بتكلمي الحيطان لما تتجوزي , وهو قاعد علي القهوة .
واما ان هو مهتم بس عنده خلل في تنظيم وقته و جهده , وهو من النوع اللي لما بيتلغبط بيشيل "عبد القادر" فوق دماغه , زي ما انتي قلتي انه بيقعد مع نفسه بيفكر في بلاوي الشغل و الجواز .
و هو اصلا فيه تعارض بين ده و ده ؟
يعني انت لما تزور خطيبتك مرة كل اسبوعين يا سيدي , هل ده اللي هيدمر جدول اعمالك اللي مقطعة بعضها
ووجود الخلل في ظبط اموره مؤشر سلبي خطير , وهتلاقيه موجود بالطبع بعد الجواز , وبصورة انيل .
و اما انه هو بخيل , و بشكل مدهش .
ده احنا متعودين علي الشخص البخيل , انه بيمثل شويه انه كريم في الخطوبة , وبعد الجواز يبدأ يرجع لاسلوبه القديم .
فما بالك بقي باللي مش هاين عليه يجيلك و معاه حاجة في ايده , اكتر من اربع مرات في السنة , مرضيش تخرجي معاه الا مرة في السنة ؟ يا ساتر يا رب علي الناس .
لو كان بخيل بالشكل ده فنصيحة بلاش , مش هتستحملي معاه المعيشة , باستثناء انك لو كنتي متقبلة الصفة ديه .
صحيح انك ذكرتي انك مش عايزه منه حاجة مادية . لكن هي مش بتتقاس كدة ,لان البخيل بشكل مبالغ فيه , هيقولك يللا نتمشي ده المكان قريب يدوبك ساعة الا ربع مشي , ليه نجيب للواد جزمة بدل المقطعة ديه , نلزقها و خلاص , مش لازم كل اسبوع يعني تطبخي لحمة , حرام عليكي , وديه هتكون مأساة بالفعل
فعدم تواجده و زيارته ليكي ليه سبب من التلاتة (قلة الاهتمام , خلل التصرف , البخل) , وانتي اللي تقدري تقولي هو انهي فيهم موجود , وبالتالي هتتحل ولا لا .
ممكن يكون فيه سبب رابع , هو انه يشعر بالحرج الشرعي في التجاوزات المحرمة في فترة الخطوبة , والوازع ده في حد ذاته جميل , بس لازم يظبطه .
لانه بالفعل ممكن يزورك بشكل معقول , يعني مرتين في الشهر مثلا , وميكونش فيه اي نوع من المحرمات الشرعية .
فانتي لو هتقعدي قدامه بالملابس المحتشمة بالكامل , من غير مكياج ولا برفان , ومعاكي حد قاعد في الغرفة , و بتتكلمو في حاجات حقيقية و جادة , مش كلام فاضي .
حتي الخروجات لم تمت في اطار اسري عائلي , او حتي انتي معاكي حد من المحارم (اب , اخ , عم , خال) فممكن تتم الخروجة في اطار شرعي كامل , لكن الغائها من الاساس غلط
----------------------------------------------------------------------------
بالنسبة للسبب الاول , رفض الاهل .
انا حاسس ان اهلك رافضينه لسبب من الاسباب اللي قلناها فوق , مش منطقي اهل بنت يرفضوا واحد من باب للطاق .
كون انه محترم و اخلاقه كويسة ده لوحده ميبنيش بيت , لان الانسان المحترم الذوق البخيل ,او غير المهتم , ده عذاب مستمر في حياتك .
انتي محتاجة انك الاول تعملي تحليل كامل ليه , عشان تعرفي ايه السبب اللي بيجعله يشوفك "كل سنة مرة" , و لما تحطي ايدك عليه , هتعرفي سبب رفض اهلك .
وارد يكون فيه سبب تاني , وميكونش مشكلة كبيرة ,وقتها انتي تمسكي بيه و اضغطي عليه عشان ييجي تاني .
كمان وارد يكون العيب اللي عنده ممكن يتصلح , فهو لو مشي في خطوات جادة لاصلاح المشكلة , وانتي شايفاه اتغير , يبقي تمسكي بيه .
لو هو متفتح الفكر , خليه يتواصل معانا و يبعتلنا هو ليه مش بيزورك كتير , واحنا نقوله ازاي ممكن يحل المشكلة . .
لكن بالفعل لو لقيتي ان هو متغيرش و مش عايز يتغير , يبقي اعرفي ان الزواج منه ممكن متكونش فكرة مناسبة , وانك لو سبتيه هتقدري تنسيه بعد فترة ,و ربنا هيرزقك بواحد تاني افضل منه .
قبل ما تفكري في سبب رفض اهلك , فكري في سبب بعده , وهتلاقي ان ده هيحل ده
وياريت تقري المشكلة اللي بعنوان زوجي البخيل هتلاقي فيها كلام مهم