العنوان : جدار الثقة

القسم: #الاجتماعي

الرقم: 52

السؤال:

 

 اشعر بالاكتئاب وان الدنيا كلها كذب وخيانه وما فى حب صادق وما ف حد بيعمل المستحيل علشان حد وبحب اقعد لوحدى كتيير

 

كنت دايما بكره الجواز لان علاقه ابى وامى ما كنت بلاقي  بينهم حب ولا اسلوب حوار فيه احترام

 

ولما حبيت شخص و اتجوزته , اكتشفت خيانته , مش خيانة كاملة لكن بيكلم ستات كتير وبيفكر في التعدد كمان

 

كنت اثق فيه ثقه عمياء ومن بعده وانا حالتى اتغيرت , بقيت بهلوس كتير و احلم بخيانته ليا

 

للاسف ضعيفه ف اتخاذ القرارات بحس بخوف فمفكرتش في الطلاق

 

كنت بحب جوزي جدا, بس اهماله  بيا ضيعني اكتر من خيانته

 

و بحس بالوحده وبقيت احبها  حتي هواياتي اللي كنت باعملها قبل الجواز و سبتها لما قالي كدة , رجعتلها تاني دلوقتي

 

والمشكلة ان اهماله خلانى ضعفت وحبيت شخص غييره ودى اكبر مشكله بتعذبني , مع انه بس كلام من بعيد , وانا بحاول ابعد عن الشخص ده

 

والمشكلة اول ما بحس انى مستحيل اكون مع الشخص اللي بحبه بتجنن وافضل ابكي واول ما قعدت  يومين مكلمهوش تعبت جسديا , قصدي علي الشخص التاني اللي بكلمه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

 الإجابة                    :

 

 طيب انتي ببساطة مريتي بمشكلة اجتماعية , صنعت مشكلة نفسية .

 

المشكلة الاجتماعية هي خيانة زوجك ليكي بعد ما كنتي واثقة فيه بشكل كبير .

 

و كل الحب اللي كنتي بتحبيه اتقلب لغضب و كراهية كبيرة , وده بسبب ثقتك الكبيرة فيه , وحبك الشديد له .

 

صحيح ان خيانته مش كاملة , وانه موصلش للفاحشة والعياذ بالله , لكن اللي عمله كان مؤلم جدا ليكي .

 

تعالي نتناول المشكلة الاجتماعية الاول , وبعدها الأزمة النفسية . .

 

 

لو بدأنا بالمشكلة الاجتماعية : الخيانة , فالطبع لا نملك الا اننا نقول انه غلطان 100 % .

 

لأن فتح الباب للكلام و الهزار و الضحك مع بنات تانية  ,هي بداية خراب البيت الزوجي .

 

مفيش اي زوجة سوية توافق علي الوضع ده ابدا , و التعامل بمنطق ان انا رجل و اعمل اللي انا عايزه تعامل مشين .

 

كمان بعض الازواج بيكونو شايفين الموضوع بسيط , ايه المشكلة لما اتكلم و اهزر , انا معملتش حاجة , وده يدل علي خلل في طريقة تفكيرهم .

 

لان الكلام بالشكل ده مع بنات تانية اكبر اهانة لاي زوجة في العالم , مش بس في البلاد العربية , وبيشعل نار الغيرة , واللي هتاكل السلام الداخلي للحياة الزوجية .

 

ولازم هو يعرف ان اللي بيعمله شئ مينفعش السكوت عليه , وانك تقوليلهاله صراحة , يا اما بيتك و عيالك  ,يا اما الطريق التاني اللي انت ماشي فيه  .

 

و هبعتلك في اخر الرسالة , خطوات عملية يارب تكون مفيدة في انك توقف زوجك عن اللي بيعمله

 

بس عايز اعلق علي نقطة انتي ذكرتيها , انك حبيتي شخص تاني , وعايزة تكوني معاه .

 

غالبا انتي مش بتحبيه ولا حاجة , اللي بتشعري بيه نوع من "تنفيس" الغضب الهائل اللي اصابك من خيانة زوجك ليكي .

 

فبمجرد ما هو كسر جدار الثقة اللي كان مبني بينكم , انتي فقدتي الطمأنينة ليه , والثقة في وفاءه , ففورا عقلك الباطن دفعك انك تردي الغلط بغلط , و تعملي نوع من الانتقام منه , وفي نفس الوقت , البحث عن الاهتمام من مصدر تاني .

 

فده اللي جعلك تبحثي عن "بديل" للحب , في الشخص التاني , اللي بتكلميه من بعيد , ودلوقتي انتي حاسة بحب كبير ناحيته .

 

و خليني اعرفك انك بتعمل غلطة كبيرة جدا , لان مهما كان اللي عمله زوجك , فهو مش مبرر ابدا انك تردي عليه بنفس الاسلوب  .

 

يعني هو لو خانك , وحتي لو حب عليكي , بل حتي لو عمل خيانة جسدية و العياذ بالله , فده مش مبرر ليكي ابدا انك تردي عليه بخيانته  ,لان في النهاية ده غلط و ده غلط  .

 

مش هقول غلط عشان وفاء ليه , هو غلط لانه شئ محرم و غير مقبول ابدا .

 

من حقك انك تطلبي الطلاق لو عايزة , لكن الخيانة مش رد ابدا , ومش هتحل المشكلة  .

 

لما طرف من طرفي الحياة الزوجية يغلط , التاني يا اما يحاول يحل المشكلة , يا اما يطلب الطلاق طالما باين ان مفيش امل , لكن لما التاني يخون  , انتي كدة عمقتي المشكلة محليتيهاش .

 

و خدي بالك من حاجة , ان هو لما يعرف اللي انتي عملتيه , فورا هينسي كل اللي هو عمله , وهيمسك في غلطتك انتي ,و مش هيفكر ابدا ان هو السبب اللي دفعك لده , ولا هيتفهم ده .

 

بل ان مجتمعنا العنصري اللي ميزانه مختل , ممكن يسامح الزوج الخاين لكن مستحيل يسامح الزوجة الخاينة , صحيح الخيانة هي هي , بس ديه طريقة تفكير الناس للاسف .

 

و بالتالي لو انتي عملتي بس 10 % من اللي جوزك عمله , الناس كلها هتقوم عليكي و تبهدلك , وهينسو اللي عمله زوجك .

 

صحيح اننا ميهمناش كلام الناس , لكن وقتها المشكلة هتتعمق بشكل رهيب , والاهم من ده , ان انتي كدة بتعملي عمل يغضب ربنا والعياذ بالله , حتي لو كان بس كلام و هزار و ضحك .

 

فلابد انتي اولا تقفلي الباب ده تماما , وقفل الباب يعني قفله تماما من غير ما تسيبي اي فرصة ان يكون فيه اي تواصل تاني بينكم

 

 

نيجي للجانب النفسي اللي حصلك بسبب المشكلة ديه

 

انتي ذكرتي هنا عدد من المشاكل اللي حصلت لما الازمة ديه تمت وهي :

 

• الاكتئاب

• العزلة

• فقد الثقة فيه و فيه الناس

• الهلوسة

• الضعف في اتخاذ القرار

 

 

وواضح ان المشاكل ديه كلها "حديثة" , وكلها حصلت بسبب الأزمة الاخيرة , وانها مرتبطة ببعض بشكل ما .

 

ولأن المشاكل الخمسة دول  , هما نتيجة مش سبب , يعني هما حصلو نتيجة مشكلة تانية اعمق منها (خيانة زوجك  و كلامك مع الشاب و تأنيب ضميرك) , فالحل بيبدأ من علاج المشكلة الاصلية , مش علاج النتايج .

 

يعني مش هيكون مناسب اني اقولك نصايح عن الاكتئاب او العزلة او الهلوسة , لان طالما الازمة الاولي متحلتش فالمشاكل النفسية التابعة ليها هتظل موجودة و مش هتتغير .

 

ولفت انتباهي جملة : (انك بتتعبي جسديا لما متكلميش الشاب اللي بتحبيه ) , و ده معناها ان معاناتك بتزيد بشكل كبير .

 

لان لما يبدأ الاضطراب النفسي يسيب اثر جسدي ملموس في الشخص ,فده بسبب انه الضغط النفسي كميته كبيرة جدا , و في نفس الوقت مفيش تنفيس عنه .

 

و ديه اشارة الي ان المشكلة لازم تحليها بشكل فورا و عاجل , عشان متستسلميش لنداء الشيطان في طريق الشاب التاني , او ميحصلش ليكي انهيار عصبي من كتر الضغط النفسي

 

 

لما نبدأ بحل مشكلة زوجك , فهنقل ليكي هنا خطوات ذكرناها قبل كدة في حل مشكلة مشابهة , ويارب يكون ليها نتيجة ايجابية

 

 

 

• اول حاجة انك تكلميه صراحة  ان اللي بتعمله ده مينفعش يتم من زوج سوي , وانا يا انا يا هما  , ومفيش اي اختيار تالت , ويا اما تكون زوج مخلص ليا  , يا نتطلق و نقفل الصفحة ديه تماما

 

 

• متوقع انه يزعق فيكي , يقولك اي كلام خايب , وقتها تردي عليه و متبقيش ضعيفة ولا حاجة , وتقوليله ان ده غير مقبول , وهل توافق اني اعمل زي ما بتعمل , واصاحب رجالة و اتكلم معاهم ؟

 

 

 

• لو استمر في اللي بيعمله  , ابدئي اعملي نوع من "تعطيل البيت" , يعني مفيش طبخ ولا غسيل الا لنفسك و اولادك بس , مفيش اكل ولا غسيل ليه , لغاية ما يبدأ يحس ان فيه مشكلة .

• لو استمر متناميش معاه في نفس الغرفة , روحي نامي في غرفة الاولاد , و متخليهوش يلمسك .

 

 

• لو استمر الحال و لسة راكب دماغه , ابدئي اتكلمي مع حد من اهله بس يكون عاقل و فاهم , عشان يعمل ضغط نفسي عليه , ويفهمه الصح من الغلط .

 

 

 

• لو المشكلة متحلتش خدي نفسك و اولادك وروحي بيت اهلك و سيبيله فترة شهر مثلا , عشان نشوف هل هيستوعب حجم المشكلة ولا لا

• لو لسة المشكلة متحلتش , اطلبي الطلاق , خلاص انتي عملتي كل اللي عليكي , وهو مفيش عنده امل انه يتعالج من المرض اللي فيه  , بس لازم تتصلي بدار الافتاء او شيخ ثقة  , وتسألي هل طلب الطلاق في الحالة ديه ينفع شرعا ولا لا

 

 

لو انتي عملتي اي خطوة من الخطوات اللي فاتت , وارد هو يبدأ يتراجع و يعتذر اعتذار بسيط , مفيش حاجة اسمها اعتذار بسيط , لازم يكون اعتذار كامل , ندم لكل اللي حصل , والاتفاق علي استحالة رجوعه للي بيعمله ده تاني .

 

مش من كلمتين اسف و بتاع  , تسامحي و خلاص , لازم يكون بالفعل تغير في السلوك , مش كلمة يقولها وخلاص .

 

و اي اعتذار يكون مربوط باتفاق واضح,ان لو هو رجع تاني للي بيعمله  ,فمش هينفع تسامحيه ساعتها .

 

 

 

بالنسبة ليكي انتي , فلازم تقفلي تماما اي باب للتواصل مع الشاب ده , يتقفل من غير اي نقاش , يعني مش بس بلوك من الفيس او الواتس , لأ ده لو تواصل معاكي من اكونت تاني , ساعتها امسحي الحساب بتاعك ده علي الفيس تماما ,واعملي حساب جديد باسم مختلف , عشان ميعرفش يوصل لك ابدا .

 

ولو معاه رقمك يبقي ارمي الرقم ده و اشتري خط جديد ميعرفش يوصلك بيه .

 

اي تواصل اضافي معاه انك كدة بتعمقي المشكلة و مش بتحليها , وهتسيبي لزوجك حجة انه يهد البيت فوق دماغك , و يمسح كل ذنوبه فورا طالما انتي كمان بتتكلمي مع حد .

 

و بالتوازي عليكي بالدعاء لربنا , ان ربنا يهدي زوجك , ويربط علي قلبك ويخفف عنك الازمة ديه