العنوان : الألم الداخلي
القسم: #النفسي
الرقم: 66
السؤال:
السلام عليكم
لو سمحتو كنت عايزا اسال ازاي مضعفش قدام او مع اقرب حد ليا عايزا اعرف اخبي وجعي عنهم وعن اي حد عايزا اعرف مكونش مخنوقه واحكلهم ممكن
عايز اكون قويه ومضعفش في اي حاجه قدام اقرب اتنين ليا مش عايزة اقل حاجه منهم تفرحني واقل حاجة تزعلني ولو واحد يزعلني منهم من غير قصد اروح اتكلم مع التانيه
بمعني اصح مش عايزة اضعف قدام اي حد واعرف اخبي انا بعرف قدام اي حد اخلي حتي اهلي لو متضايقه او مخنوقه بس هما لا
بيقولو انهم فامهمني كويس واكتر من نفسي بس انا عارفه ان محدش فهمني عشان انا مش فاهمة نفسي فعايزة اكون مكتفية بمشاكلي لوحدي ومشاركش حد واغير من طبع الطيبه اللي فيا ده
ولما بكون مخنوقه ساعات بكون متسرعة في ردود افعالي او قرراتي او متضايقه من حد بدب كلام بيحرق الدم وساعات بضيع حقي بسبب كدة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
طيب احنا ممكن نعمل توصيف سريعا لمفاتيح شخصيتك , واللي هي باينة بشكل ما من خلال وصفك للي بيحصل .
انتي شخصية حساسة الي حد ما , فيكي كمية من التوتر , والقلق , ونوع من الحيرة اللي بتواجهك مع مواجهة المشاكل الي بتقابلك .
انتي من الناس اللي مش بتعرف تتصرف بشكل كامل , كمان ممكن تفتقدي للباقة فمش بتعرفي تعملي صياغة مناسبة للكلام قبل ما تقوليه , وده اللي بيخلي كلامك احيانا يتفهم غلط او يتسبب في شوية ضيق للي قدامك .
ده غير ان خبراتك الحياتية قليلة , ومعارفك مش كتار , وميل للانطوائية اكتر من الاجتماعية , وده اللي مخلي ثقتك بتكون كبيرة في الناس اللي بتعرفيهم , وكمان مش بتثقي في حد جديد لما تقابليه .
عدد من الصفات اللي فيكي هي حاجات كويسة , وعدد منها ممكن يتعبك شوية , ويتسبب في بعض المشاكل , بس ده ممكن يكون توصيف عام لشخصيتك .
وغالبا البنت اللي بيكون عندها الصفات ديه , بتكون عاجزة عن الاحتفاظ بألمها داخلها , وبيكون صعب عليها انها تحل أمورها بنفسها , فتبحث عن صديقة مقربة , تفضفضلها , وتسمع منها , وتاخد رأيها .
و حتي لو الصديقة ديه مافادتهاش بشكل كامل , حتي لو معرفتش تديلها رأي مناسب , فمجرد الفضفضة و انها تحكيلها , ده بيعمل تفريغ لنسبة كبيرة من الشحنة المكبوتة داخلها , وبيجعل البنت ديه تشعر براحة اكتر , و تكون قادرة علي مواجهة الحياة لفترة ما , لغاية لما "تتشحن" تاني , وتروح لصديقتها عشان "تفرغ" الشحنة .
--------------------------------------------------------------------------------------------
والمشكلة اللي بيواجهها النوع ده من البنات , تتمثل في كذا نقطة . .
- ان اولا الصديقة اللي بتحكيلها ديه , ممكن تخون ثقتها لسبب ما , صوابعك مش زي بعضها , و مفيش حد مضمون انه يفضل علي حاله للأبد , فهي تدريجيا بتحتفظ بكمية ضخمة من اسرارك اللي انتي بتحكيهالها , وممكن لاي سبب تقلب عليكي , او تستغل ده بشكل سلبي . .
وقتها هتكون الصدمة اكبر من تحملك ,مش بس من خيانة ثقة سنين طويلة , ده كمان ان جعبة اسرارك بقت في الشارع و علي الفيس و تويتر, و "اللي ما يشتري هييجي يتفرج"
-
ثانيا ان مفيش حد بيستحمل حد للابد , مفيش صبر زي صبر الام ابدا علي ابنائها , لكن الصديقة مهما كانت بتحبك , فهي ليها تحمل و صبر علي تحمل سماع طاقة سلبية بشكل دائم , فان كانت دلوقتي متحملة و صابرة , فممكن قدام متتحملش , وديه مشكلة
-
ثالثا , ماذا لو كانت الصديقة ديه مش متاحة , ماذا لو سافرت , ولا بتذاكر ولا مشغولة ولا اتجوزت و مبقتش فاضية للجلسة الدائمة ديه , لو انتي متعودة علي الاسلوب ده من التعامل , فاختفائها لاي سبب هيئذيكي فورا
-
رابعا , ان كتير من قراراتك مش هتكون من دماغك , بل من ارائها هي , فهتظلي طول عمرك منتظرة اللي يوجهك , وديه مأساة , طب لما تتجوزي و تحصل عقبة معينة مع زوجك , والمفروض المشكلة متخرجش من البيت هتعملي ايه ؟ لازم انتي يكون عندك القدرة علي تناول المشاكل و حلها تدريجيا
الاسباب ديه و غيرها , اللي بتأكد عليكي ان لازم تعملي تطوير لشخصيتك , وانك تكوني اكتر صلابة و تحمل , وتكوني قادرة بالفعل علي مواجهة مشاكلك العادية , والتعامل معاها , وحلها .
لا بأس من فكرة "الاستعانة بصديقة" يعني انك تستشيريها او تستشيري غيرها لما تقابلك مشكلة محيرة , ديه حاجة طبيعية , بس تكون مرة كل عشر مشاكل , مش في كل حاجة تحصلك تجري عليها , محدش هيستحمل حد للأبد .
ده غير ان لازم يكون عندك القدرة علي التحكم في مشاعرك , وكتمانها , والسيطرة عليها , بل و مواجهة أمور الحياة العادية من غير ما تعملي "تفريغ" لمشاعرك مع صديقة ما , ديه من اساسيات مواجهة الحياة ,لان انتي بعد التخرج هتكوني مقبلة علي فترة مختلفة من حياتك , سواء الشغل او الخطوبة او الزواج او التعامل مع اهل زوجك او تربية الابناء او الاحتكاك بالجيران الجدد , وحتي التعامل مع زوجك محتاج نوع من الفطنة و الذكاء , في ايه اللي يتقال و ايه اللي ميتقالش , امتي اسامحه و امتي اعاتبه , وهكذا
و صلب سؤالك عن : ازاي ابقي شخصية اقوي , ازاي ابقي اكتر تحمل و صلابة , بحيث ابدأ اخبي , ومقولش كل اللي في بالي , ازاي اتحمل الألم الداخلي من غير ما انهار , هو ده اللي هنحاول نحله دلوقتي عن طريق خطوات محددة . .
---------------------------------------------------------------------------------
طب ماذا عن الحلول ؟ ؟
هنا فيه عدد من الخطوات اللي لو طبقتيها , ممكن تفيدك بشكل كبير في تغيير عدد من مفاتيح شخصيتك , للوجه الافضل , و ان يكون فيه تغيير كامل في تعاملك مع الناس , و مع مشاكل حياتك .
من الحاجات اللي هتفرق معاكي كتير , ان يكون عندك اتساع افق , واطلاع اوسع علي مشاكل الحياة و امورها , وتكوني علي معرفة بانماط الناس المختلفة , وتكوني قريتي كتير من المشاكل الاجتماعية اللي بتواجه الناس , و ازاي بيقدرو يتعاملو معاها .
النقطة ديه بتفرق كتير ايجابا , لان الشخص لما بيقرأ اكتر عن الحياة الاجتماعية و التعامل مع الناس , ده بصنع عنده خبرة تراكمية جميلة , بتفرق معاه كتير في حل مشاكله الشخصية , وتدبير اموره الذاتية .
و اكتر من تعليق وصل لنا من اعضاء الصفحة الكرام , ازاي ان بقرائتهم للمشاكل المستمرة اللي بتنزل و حلولها , ده بيصنع عندهم افق اوسع , ومهارة اكبر في التعامل مع الحياة , وتخطي صعابها . .
فحاولي توسعي من اطلاعك في الامور ديه , هتلاقي كتب و مواقع كتير مخصصة للامور ديه , وحتي صفحتا بقي فيها اكتر من 200 سؤال حتي الان , اظن هيقدرو يفيدوكي بشكل ما في توسيع مساحة معرفتك
هنا مش باتكلم عن معلومات و قراءة , لكن باتكلم عن صديقات و زميلات و معارف . .
واضح ان عندك شوية انعزال عن المجتمع , وانك محتفظة بس بعدد محدود من صديقاتك ومش عايزة تنفتحي اكتر مع عدد اكبر من المعارف . .
و ده شئ مش صح , لازم تتسع دايرة معارفك , ويكون ليكي صديقات في اماكن و فئات مختلفة , لان كل خبرة حياتية هتكتسبيها من كل واحدة فيهم هتفرق معاكي ايجابا, و كل اتصال جديد مع واحدة جديدة , هيخلي افقك اوسع من المنظور الضيق الحالي .
بالطبع علاقاتك بيهم متبقاش مفتوحة تماما , يعني مش عايزك تشاركي اسرار , او تنفتحي بشكل كامل , او تمنحي ثقتك لاي صديقة جديدة و خلاص , لكن تكونو معارف و فيه بينكم مساحات مشتركة عديدة , و ويكون فيه قنوات للاتصال, لان ده بيفرق معاكي كتير , نفسيا و اجتماعيا .
لكن فرملي تماما تبادل اي اسرار مع واحدة جديدة , الا لما تعاشريها سنين طويلة , تتأكدي من اخلاقها و طباعها
- فيه علامة استفهام علي علاقتك بالشاب . .
من خبراتنا الطويلة في التعامل مع المشاكل الاجتماعية و العاطفية , نقدر نؤكد بكل ثقة ان فيه صداقة متينة بين شاب و شاب , وفيه صداقة متينة بين بنت و بنت , لكن صداقة حقيقية شاب و بنت هو شئ غير موجود .
هو بالفعل شئ مش موجود , مش باتكلم عن المنظور الديني – مع ان فيه تحريم للتعامل بالطريقة ديه بين شاب و بنت – باتكلم عن منظور اجتماعي بحت .
اي تواصل مستمر بين شاب و فتاة , لابد هيحرك القلوب , لابد هيصنع مشاعر معينة عند كلا منهما , اما مشاعر اعجاب ,او حب , او كراهية او غيرة , او تنافس ,او عداء , او غيرها من المشاعر المختلفة .
كمان التواصل ده لا يمكن ينفصل عن حياة كلا منهما الاجتماعية ,يعني هو لما يرتبط , هينفع يستمر في الكلام معاكي كدة ؟ انتي لما تتخطبي , خطيبك هيوافق انك لسة بتكلميه ؟
و الاسوء ان لما كلا منكم يرتبط , ان ذهن كلا منكم هيقارن بين شريك حياته , واللي لابد هيكون فيه مميزات و عيوب , حسنات و سيئات , لحظات فرح و فترات مشاكل , و بين الشخص التاني اللي مشافش منه شئ سلبي , فالمقارنة مش هتكون في صالح بقاء البيت .
مينفعش لاي سبب تستمري في التواصل معاه كدة , مفيش حاجة اسمها ده اخ ,ما تخدعيش نفسك , ومتصدقيش الروايات العاطفية و الافلام السينمائية .
لو كان ينفع كان ربنا احله , كنا نلاقي الصحابة و الصحابيات قاعدين بيدردشو مع بعض , ربنا مش هيحرم شئ الا لو كان ذو اثر تدميري خطيرفي حياتنا كلنا .
اقطعي التواصل معاه , لا اسرار ولا استشارة ولا حاجة , وثقي في اراء الخبراء في المجال ده , واللي شفنا مآسي بسبب بدايات بسيط زي اللي قلتيها
- ابدئي عودي نفسك علي الصلابة , اتعودي واحدة واحدة , الموضوع صعب بس ممكن .
يعني امسكي موقف صغير , واكتميه جواكي و متحكيهوش لصديقتك , خلي عندك خبر مهم عايزة تقوليه , وامسكي نفسك و متقوليهوش ليها , قابليها في خروجة و خلي كل الكلام عن حاجات عادية مش عنك , لما تبدأ تسألك : هاه عاملة ايه , ايه الجديد عنك , قولي كلام عام و متحكيش تفاصيل
عارف الموضوع متعب عليكي بس اتدربي عليه بشكل تدريجي , اعمليه مرة و اكسريه 5 مرات , ابدئي فيه واحدة واحدة و هتلاقي الامر مش مستحيل .
حتي لو هتحكي , حددي بينك و بين نفسك ايه هيتقال و ايه مش هيتقال , متقوليش كل حاجة عنك , و هتلاقي تدريجيا قدرتك علي التحكم في كلامك بتزيد
في كتير من الاحيان الشخص بعقله بيكون غير قادر علي ترتيب افكاره , وصياغة حل مناسب و قرار سليم لمشكلة ما , بس لما يمسك ورقة و قلم , ويرتب كل حاجة قدامه , ويعمل سرد لمميزات و عيوب القرار اللي هياخده , ويكتب البدائل التانية , احيانا بتلاقي خيط معين تقدري تمشي وراه تدريجيا , لغاية لما توصلي لقرار بالفعل مناسب .
بل ان مجرد كتابة تفاصيل مشكلة معينة ,مجرد كتابتها بس بيعمل تفريغ لجزء كبير من مشاعرك المكبوتة جواكي , وبتحسي بنفس الشعور – او بجزء منه – انك كنتي مع صديقتك و حكيتيلها , بس الميزة ان الورق مش هيخون ثقتك , ومش هيخدعك , ومش هيزهق منك , ومش هيكون مشغول عنك .
جربي كدة تمسكي مشكلة ولو بسيطة و تحليها علي الورق و القلم , ممكن تلاقي نتيجة ايجابية
مش بهزر , اكيد مش هتكتبيها عشان تتنشر او تتعمل كتاب , لا بتكتبيها لنفسك , وعشان تعملي نفس التاثير اللي اتكلمنا عنه حالا في النقطة اللي فاتت , تاثير تفريغ المشاعر .
بعض الناس بالفعل بيستريحو جدا مع كتابة مذكراتهم بشكل مستمر , و هي طريقة من طرق العلاج النفسي لكتير من المشاكل , حتي ان الشخص بينتظر يروح البيت امتي , عشان يكتب كل تفاصيل اللي حصل , وفلانة عملت كذا , والمعيدة في الكلية اتضايقت مني عشان حاجة انا مليش ذنب فيها , واحساسي اليوم كان متداخل بين كذا و كذا . .
فمجرد كتابة المذكرات بتفرق معاكي , واوصفي المشاعر بقدر الامكان , متهتميش بالتفاصيل كلتو ايه و لا قلتو ايه , ركزي اكتر كنتي حاسة بايه
ممكن بالفعل يكون ليها تاثير ايجابي عليكي , وهتندهشي انك مش هتقدري تسيبيها , وهتستمري فيها فترة طويلة
بس بالطبع يكون ده بعيد عن عيون اللي حواليكي , عشان متلاقيش كل اسرارك بقت فجأة معروفة علي الملأ , حتي ممكن تعملي ملف (وورد) علي اللاب , ويكون بكلمة سر
- تعاملي بنظام : الثقة الحذرة
يعني ايوة بتثقي في فلانة , لكن بمقدار معين , مش تكوني كتاب مفتوح ليها , والا فانها ممكن بالفعل تقلب عليكي , وتدمرك بكمية الحاجات اللي تعرفها عنك .
يعني تكوني واثقة من فلانة ماشي , لكن تبدئي تتحكمي في ايه يتقال و ايه ميتقالش و مش تخوين في حد , لكن ده هو المسار الطبيعي لاي انسان , و الثقة المطلقة ديه متكونش الا لافراد اسرتك بس : اب , ام , اخ , اخت , زوج .
لكن الصديقة مهما كانت , لابد يكون ليها حدود معينة , عشانك و عشانها .
فيه مثال بيقول : أحبب حبيبك هونا ما عسي ان يكون عدوك يوما ما , فلما تتعاملي بالمنطق ده بشكل دائم , هتلاقي ان تعاملك هيكون بذكاء اكبر , وحرص اكتر .
نتمني نصايحنا تكون مفيدة ليكي , وانها تكون بالفعل قادرة علي مساعدتك في تطوير مفاتيح شخصيتك للافضل
===================================================
جميع الأسئلة #النفسية :
https://www.facebook.com/shof.ya.sidi/posts/280427006143046
