تقويم المراهق
الرسالة السابقة
العنوان : تقويم المراهق
القسم: #الاجتماعي
الرقم: 28
السؤال:
ابني عنده 11 سنه دايما بيزعق مش بيسمع الكلام
غير ضربه لاااخوات وديما متهمني بالتقصير وديما بيقول اني بعامل إخوانه افضل منه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
انا مش هجاوب علي سؤالك , لكن هاتكلم حواليه ,واول ما الكلام هيخلص هتكوني عرفتي الاجابة كاملة . .
في مقولة مهمة – الناس بتظن انها حديث لكن هي مقولة لسيدنا عمر رضي الله عنه – بتتكلم عن مراحل تربية الاولاد . .
لاعب ابنك سبع , وأدبه سبع , وصاحبه سبع . .
و فيه ناس بتضيف عليها كلمة : ثم اترك له الحبل علي الغارب . .
اكبر مشكلة في الابوين , انهم مش بيلاعبو ولادهم في الفترة اللي المفروض يلاعبوهم , ومش بيأدبوهم في المرحلة اللي المفروض يأدبوهم , ومش بيفكرو ابدا يصاحبوهم , الا لما يكونو فوق الستين , ويفاجئو ان ولادهم كل واحد في مكان . . .
ان كان عقوق الآباء جريمة , فعدم انشاء الابناء بالشكل السليم هو غالبا المسبب ليها , الابن العاق مجرم مفيش نقاش , ولكن اللي صنعه هو الاب و الام اللي معندوهمش الوعي الكافي لتربيته , و قام بانشاءه بخبرته الحياتية المحدودة , وعلمه الضعيف , فاتعرض لعدد من الامراض السلوكية المختلفة , خاصة وان احنا بالفعل عايشين في جو موبوء بكل البلاوي الاخلاقية . .
ولما نقارن بين حرص الابوين واهتمامهم بالناحية التعليمية او الصحية , و بين اهتمامهم بتوفير جو صحي "نفسيا" و تطبيق المعايير العلمية السليمة لانشاء الطفل بسلوك طبيعي , هنشوف مدي الحماقة اللي بيرتكبها كتير من الاباء و الامهات . .
لو انهم بالفعل بيبذلو عـُشر – فقط 10 % - من الوقت و الجهد و التعب و الاهتمام , اللي بيعطوه للشق التعليمي للطفل , لو انهم بيبذلوه عشان يعرفو ازاي ينشئو اولادهم في جو سليم سيكولوجيا (نفسيا) و سيسيولوجيا (اجتماعيا) , وبيحرصو علي تنمية مهاراته و خلقه و معاملاته , لتغير الحال تماما . . .
الاب و الام يعرفو ازاي يختارو مدرسة لغات للطفل , لكن ميعرفوش ازاي ينمو خياله . .
يعرفو ازاي يحاسبوه علي "هوم ورك الماث" , لكن ميعرفوش ينمو عنده مهارة الفضول العلمي . .
يعرفو ازاي يحضرو الاكل في "اللانش بوكس" , لكن ميعرفوش حاجة اسمها ان الطفل يتخلص من الانانية . .
يعرفو ازاي يزقوه انه يجيب الدرجة النهائية , بس ميعرفوش ازاي يعلموه انه يفتح قلبه للعمل التطوعي . .
يعرفو ازاي يخلو ابنهم المراهق يجيب درجة عالية في الـ "سات" , لكن ميعرفوش يخلو اسرار ابنهم عندهم مش عند زميله في المدرسة . .
يعرفو ازاي يورو ابنهم العين الحمرا , لكن ميعرفوش ازاي يكتسبو ثقة ابنهم فيهم . .
يعرفو يروحو للدكتور فورا لو فيه حبة حمرا طلعت في وشه , لكن ميعرفوش حاجة اسمها "الاستشارات النفسية للطفل" . .
ببساطة احنا كآباء و امهات اللي بندمر الجيل , لانتشار "الجهل" بينا في كيفية التعامل مع الابناء , احنا بس فالحين نشوف مدرسة بالشئ الفلاني , ونجري ورا الدكاترة عشان اي مرض فسيولوجي , و نجيب اكل و لبس و بتاع , لكن كل الشق النفسي و الاجتماعي و الخلقي , مش عارفين عنه اي شئ اساسا . .
انا كل ده ماتكلمتش في الشق الديني في الاساس - وهو الأهم و الاكثر خطورة – مش باتكلم عن صلاة او مسك لسان او حجاب للبنت البالغة , ده انا باتكلم عن الخلق والصحة النفسية اللي بيتفق فيها المسلم والقبطي و البوذي . .
فعشان كدة لا نتعجب اننا نشوف اجيال طالعة , شكلها هايل , مستحميين و حاطين برفان و "ديوترانت" , لابسين احسن لبس , معاهم افضل شهادات , و عندهم كمية من الكلاكيع و العقد النفسية محدش يقدر يتخيلها , غير الخلق الزبالة , والسلوكيات الشاذة . .
فلما نشوف الفرق الجبار بين ده وده , محدش يتعجب , لان ده من صنعنا احنا . .
----------------------------------------------------------------------------
والمراهق المتمرد , هو متولدش متمرد , ولا هو كان صغير كيوت و لطيف , و نام بالليل , صحي الصبح بقي متمرد و عنيف و بيضرب اخواته و مش بيسمع الكلام . .
ببساطة كان فيه نوع من الممارسات التراكمية الخاطئة من الابوين تجاهه , وهي اللي صنعت منه هذا المراهق المتمرد . .
وكأن الاطفال لما بيتولدو , بيكون فيه بينهم تقارب في السلوكيات و الاخلاق و التعامل , وعندهم نفس الاساس هو هو . .
لكن لأن "زيد" نشأ مع أبوين فاهمين ازاي يربو ابنهم , وازاي يتعاملو معاه بالشكل الصحيح , وامتي يعطوه و امتي يحرموه , وامتي يحبوه و امتي يعاقبوه , وايه اللي يقولوله ايوة و ايه اللي يقولوله لا . .
ولأنهم عرفو يختارو اصحابه والناس اللي بتأثر فيه . .
و ايه اللي بيشوفه في الموبايل و ايه اللي بيشوفه في التليفزيون . .
كل ده واللي قلناه قبل كدة فيما يسمي "مصادر المعرفة للطفل" , كل ده جعل من "زيد" مراهق محترم طموح ذكي مطيع لوالديه , ومش طيب يتضحك عليه ولا قاسي عشان يظلم و هكذا . .
لكن لأن "عبيد" , نشأ مع ابوين عندهم جهل تام بكل اللي قلناه – حتي لو معاهم شهادات الدكتوراه - و عندهم مزيج من الاهمال علي التعامل الساذج علي القسوة علي العصبية , و كان الاب مهتم جدا انه يدخلهم احسن مدارس , والام مهتمة جدا باللانش بوكس و الهوم ورك , ونسيو باقي الحاجات المهمة , فطلع "عبيد" بالشكل المفزع ده . .
والفرق بين "زيد" و "عبيد" ان هنا فيه ابوين مهتمين و هنا فيه ابوين جهلة , بس كدة . .
يعني لو سردنا مثلا عدد من الممارسات الخاطئة اللي بتقوم برسم الصورة المخيف للمراهق المتمرد , ممكن نقول ان فيها انواع مختلفة . .
يعني مثلا فيه مشاكل سببها ممارسات خاطئة بين الاب والام بتحصل قدامه زي :
-
خناق
-
زعيق
-
مشاكل مستمرة بينهم
-
ضرب الاب للام
-
البخل الشديد
-
اب مهمل او ام مهملة في المطلوب منهم
-
حد بيكذب وهو عارف انه بيكذب
وفيه مشاكل سببها التعامل الغير سليم معاه هو كطفل او كمراهق زي :
-
العصبية معاه
-
الضرب المفرط
-
تجاهله و عدم السماع ليه
-
عدم الاهتمام باولوياته حتي لو هايفة
-
البخل الشديد (منعه من كل شئ حتي لو حلال ) او الاسراف الشديد (اعطائه كل شئ حتي لو حرام)
-
ظلم طفل لحساب التاني
-
الكذب عليه وخداعه
-
التسويف و المماطلة
-
اذاعة سر طفلك ائتمنك عليه
-
الشك الدائم فيه ,او الثقة العمياء فيه
-
التحكم الكامل فيه , او تجاهله تماما
-
الابتعاد عنه لسنوات (ظروف السفر) حتي لو لضرورة
وممكن يكون من ظروف اخري محيطة بيه
-
اصدقاء السوء
-
اصدقاء السوء
-
اصدقاء السوء
-
اصدقاء السوء
-
اصدقاء السوء
كان لازم اكررها خمس مرات , عشان تدركو اهمية البند ده , ومدي تأثيره في صناعة كل شئ عنده
وياريت تشوفي سؤال ابني مش بيحترمني , لان فيه كلام مرتبط جدا بموضوعنا
---------------------------------------------------------------------------------
طب والحل ؟ ؟
احنا اساسا متكلمناش عن مشكلتك , احنا زي ما قلنا في اول الرد , بنتكلم علي المشكلة العامة للجيل كله , واللي هي بالكامل من صنعنا . .
صحيح ان ممكن يكون فيه ممارسات خطأ من الابوين و يطلع الولد صالح ,او يكون فيه اهتمام و مراعاة شديدة للابن و يطلع منيل بنيلة , بس ده الاستثناء اللي اكيد مش هنبني عليه اي قواعد . .
احنا علينا الدور كله في تشكيل وعي الجيل القادم , واللي هنتحاسب عليه قدام ربنا . .
ولو هقول الحل , فهقول تلات نقط , مش هعرف ازود عليهم حاجة . . .
النقطة الأولي : الخصها في كلمة الاهتمام . .
يعني زي ما انتي كأم تعرفي كل حاجة عن الهوم ورك و الكلاس و اللانش بوكس و ازاي تغسلي هدومه و تكويها ومواعيد الباص و امتي امتحان الترم (وكل ديه حاجات مهمة مش هنسيبها) . .
فلازم كمان تعرفي يعني ايه شخصية سيكوباتية ,وشخصية نرجسية و شخصية هوائية , وشخصية عنيدة , وتبقي فاهمة ايه الفرق بين "نمط اللا انتباه" , و "نمط الحركة المفرطة" . .
و زي ما انت يا اب , عارف رقم دكتور الاطفال و دكتور الجلدية , ورقم مدرس الماث و مدرس الساينس , وعارف ايه احسن مدارس في مصر . .
كمان لازم تكون عارف رقم طبيب نفسي (اصلا تكون مؤمن باهيمته للطفل) , وعارف يعني ايه "طفولة متأخرة" , و "النكوص" . .
احنا مش عايزينكو تحضرو ماجيستير في "علم نفس الطفل", لكن علي الاقل اقرو كتابين تلاتة , وشوفو كام فيلم وثائقي , هتلاقو كل حاجة بقت واضحة في ابنائكم . .
زي ما انتي يا ام بتتعبي عشان تعمليلهم مكرونة بشاميل , خدي شوية من الوقت ده , وخدي بنتك للمول و اشتري هدية عشان عيد ميلاد صاحبتها , شوفي هتحبك قد ايه . .
وزي ما انت يا اب مطحون في وقت اوفر تايم عشان تدفع قسط المدرسة ,سيبك من الاوفر تايم , ودخله مدرسة عادية ارخص , والوقت ده خد ابنك اللي عنده 15 سنة علي كافيه في مقطم و اتكلم معاه في اهدافه و مستقبله و نفسي يطلع ايه لما يكبر . .
اغلب الاباء و الامهات مش مهملين لابناءهم , لكن بيوجهو جهدهم وقتهم للاتجاه الغير دقيق , في حين فيه جانب مهم جدا هما مش معبرينه . .
-----------------------------------------------------------------------------
كل ده كان النقطة الاول , ايه بقي التانية ؟ ؟
اننا ببساطة نتجنب كل البلاوي اللي اتقالت فوق , في اسباب تدمير وتشويه خلق و سلوك الطفل و المراهق . . .
يعني انا ذكرت من شوية 20 مسبب لتشويه سلوك الطفل , امسك يا اب و امسكي يا ام النقط ديه واحدة واحدة , وشوفو كام مصيبة منهم بيتم عملها بالفعل مع ابنكم , هتلاقو عدد مش قليل . .
بقاء و استمرار عدد من الاسباب ديه قدامه , بتشكل شخصيته تدريجيا , وبتغير سلوكه للاسوء بشكل مستمر . .
فابنك اللي بيزعق , ومش بيسمع الكلام , وبيضرب اخواته , وبيتهمك بالتقصير وبالظلم , هو مجابش الحاجات ديه كلها من فراغ . .
وحتي ان كان بعض اللي بيقوله هو "تجني" و غير سليم , فالباقي هيكون ليه اصل حقيقي , هو شافه و عاشه . .
ببساطة نجفف منابع المشاكل , عشان تتحل . .
---------------------------------------------------------------------------------
النقطة التالتة هي التمسك بالدين . . .
ومع اني نادرا ما باذكر الدين كعلاج في قسم المشاكل النفسية , الا ان دوره شديد الأهمية . .
لان بالفعل الوازع الديني عند الطفل هو اللي هينهاه انه يظلم اخواته ,او يزعق في امه , او يجادل بغباء , او يخون , او يكذب , او يكسل عن شئ مهم . .
ولان كتير من الاسر مش عاملين اهتمام بالدين بربع اهتمامهم بالمذاكرة و التعليم , فببساطة بيلاقو النموذج التقليدي للشاب المتفوق دراسيا , والفاشل سلوكيا . .
فالطبيب الغشاش و المهندس الخاين والسياسي الكاذب و التاجر اللص , هم نماذج لناس تفوقت دراسيا و فشلت اخلاقيا وسلوكيا . .
اكيد لا اطالب بتطبيق شعائرالدين وحدها , مش عايزين حد قاعد في المسجد و فاشل او بيسقط , اساسا ده ضد تعاليم الدين الحنيف . .
لكن ان كنتي بتهتمي بدراسته و مذاكرته و صحته 24 قيراط , يبقي سيبي حتي لو قيراط واحد للدين , وهتلاقي ازاي شخصيته اتغيرت
مشكلتك يا فندم حلها سهل , بس محتاج منك بحث و مجهود وصبر