بن علي هَرَب
الرسالة السابقة
العنوان : بن علي هَرَب
القسم: #السياسي
الرقم: 20
السؤال:
سلام عليكم
ياريت تقولنا سريعا اللي حصل في الثورة التونسيه عشان كل ما اقرا فيها اتوه ومش عارف ازاي بن علي هرب اصلا
شكرا
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
"الشعب التونسي العظيم , تحيا تونس الحرة, يا توانسة معادش خوف , المجد للشهداء , الحرية للتوانسة, بن علي هَرَب , بن علي هَرَب"
الكلمات الخالدة , للمحامي التونسي "عبد الناصر العويني" , واللي صرخ بيها يوم 14 يناير 2011 , معلنا نهاية عصر طاغية مستبد , وبداية عصر مختلف لتونس والعالم العربي بالكامل , واللي مثـّلت كرة الثلج اللي كبرت و تضخمت , وغيرت من مصير اربع دول عربية تانية : مصر ثم ليبيا ثم سوريا ثم اليمن , غير التأثير غير المباشر اللي شمل الأردن و البحرين و المغرب والسعودية و العراق و لبنان . .
ومن حسن الحظ ان تم تصوير اللحظات الجميلة ديه , في الفيديو المشهور
بن علي هَرَب , بن علي هَرَب . .
كلمات خلدها التاريخ , وطـُبعت في ذاكرة 200 مليون مواطن عربي , وهما شايفين حلم بيتحقق , وثورة بتنجح . .
مع إن السؤال ده تم إرساله من فترة , لكن تم نشره يوم 14 يناير , احتفالا بذكري الثورة التونسية العظيمة . .
تعالي نتعرف سريعا علي خط الأحداث , وايه اللي حصل في تونس . .
----------------------------------------------------------------------------
كالعادة لابد نعمل زيارة سريعة للماضي , عشان نكون قادرين علي رسم صورة كاملة , و ربط السياسة بالتاريخ . .
فرنسا احتلت تونس في أواخر القرن الـ 19 , بالتحديد 1881 , في الوقت اللي كانت القاهرة بتغلي فيها من ثورة عرابي , وقبل ما الاسطول البريطاني يوصل اسكندرية لاحتلال مصر بحوالي سنة .
الاحتلال الفرنسي لتونس كان بعد ما احتلت الجزائر بخمسين سنة (1830) , و بعد ما احتلت جيبوتي بـ 19 سنة (1862) , وقبل ما تحتل المغرب بتلاتين سنة (1912) , واستمر الإحتلال 75 سنة, لغاية لما أعلنت تونس الإستقلال سنة 1956 . .
و من يوم استقلالها , وحتي لحظة اندلاع الثورة التونسية ,يعني لمدة 54 سنة حكم تونس رئيسين فقط , الحبيب بورقيبة لمدة 30 سنة (1957 - 1987) , وزين العابدين بن علي لمدة 24 سنة (1987 – 2011 ) . .
الحبيب بورقيبة كان منفي خارج تونس في آخر ايام الاحتلال الفرنسي لتونس , لأنه كان واحد من زعماء الثورة التونسية المسلحة ضد الإحتلال الفرنسي , وبعد إعلان الاستقلال بشهور , تم إعلان إلغاء الملكية في تونس , و تم خلع آخر ملك تونسي "محمد الأمين" , واختيار بورقيبة أول رئيس لتونس الحرة .
وللأسف أداء "الحبيب بورقيبة" السياسي كان أبعد ما يكون عن الديمقراطية ,او تداول السلطة , استخدم كل نفوذه لتكريس السلطة لنفسه , حتي انه في سنة 1974 , عمل تعديل في الدستور بحيث يكون رئيس مدي الحياة , يعني "ملك" جديد لكن باسم مختلف . .
الأداء السياسي الديكتاتوري , السخط الشعبي المتنامي , هو اللي شجع رئيس الوزراء وقتها "زين العابدين بن علي" علي الإطاحة بيه في نوفمبر 1987 . .
----------------------------------------------------------------------------------------
بن علي أساسا درس العلوم العسكرية في تونس , بعدها استكمل دراسته في فرنسا ثم الولايات المتحدة , ثم تدرج في عدد من المناصب السياسية و الأمنية , لغاية لما تم تعيينة وزير الداخلية سنة 1986 , يعني قبل ما يعمل الإنقلاب علي بورقيبة بسنة واحدة . .
و في اكتوبر 1987 (قبل الإنقلاب بشهر واحد ) تم تعيينه رئيس وزراء , وهنا وجد إن الفرصة سانحة للإنقضاض علي السلطة , وعزل بورقيبة اللي كانت شعبيته تتآكل بشكل سريع , واللي وصل بالفعل وقتها لعمر 84 سنة . .
وبالفعل يوم 7 نوفمبر تم حصار القصر الرئاسي , و عزل بورقيبة , وتم فرض الإقامة الجبرية عليه , وظل فيه لغاية لما مات سنة 2000 . .
أما "بن علي" فكعادة اي انقلابي , وعد الشعب التونسي بالحرية و الديمقراطية و الرخاء وحرية الرأي و التعبير, و وعد الأحزاب السياسية بتداول السلطة و التعددية السياسية , و طبعا كعادة كل انقلابي , كل ده كان حبر علي ورق , واتبخر تماما بعد شهور قليلة . .
وبالفعل بدأ الشعب و الأحزاب يشوفو الوجه القاسي لـ "بن علي" , و يعرفو انه تم استبدال طاغية , بطاغية مختلف .
و علي الرغم من إنه دخل 5 انتخابات رئاسية (1989 – 1994 – 1999 – 2004 – 2009 ) إلا إن نتايجها بتكون محسومة بالفعل لبن علي , وكان واضح إنها انتخابات ديكورية , وتحصيل حاصل . .
و الأنكي هو زواجه من الكوافيرة "ليلي الطرابلسي" سنة 1992 , واللي كان واضح إن شخصيتها هي المسيطرة علي مقاليد الحكم , وبدأ الشعب التونسي البسيط , يري التزايد المستمر لثروات آل علي و آل الطرابلسي , وهو يضرب كف علي كف , ويترحم علي شهداء المقاومة التونسية ضد الإحتلال الفرنسي علي مدي 75 سنة . .
و مع نهاية العام العاشر , من الألفية الجديد , كانت تونس علي موعد مع زلزال سياسي من نوع مختلف , واللي عمل خلخلة لعرش بن علي . .
---------------------------------------------------------------------------------
البداية كانت من شاب بسيط عمره 27 سنة , من ولاية سيدي بوزيد , اسمه "طارق الطيب بن محمد البوعزيزي" , من أسرة فقيره , أبوه مات وهو طفل , و له أخ معاق , و اضطر يترك الدراسة عشان يقدر يشتغل و يساهم في إعالة أسرته , وكان شغله من صغره في بيع الفواكه . .
يوم 17 ديسمبر 2010 , كان ماشي بعربية الفواكه , استوقفته سيارة شرطة , و حاولو يصادرو عربة الفواكه باعتبارها غير مرخصة , و حاول عدد من أهل "بوعزيزي" التدخل لعلاج الأمر , إلا إن الموضوع تطور بالتحديد بين الشرطية "فادية حمدي" , و "بوعزيزي" , وأصرت علي مصادرة عربة الفواكه , ولما حاول بوعزيزي الإعتراض , ضربته علي وجهه "بالقلم" قدام الناس , وصرخت فيه بالفرنسية "Dégage" يعني إرحل . .
"بوعزيزي" كان عارف إن أي رد عنيف منه علي صفع "فادية حمدي" ليه , معناها انه هيتسجن فترة غير محدودة , وتشريد اسرته اللي معتمدة علي الدنانير اللي بيكسبها , وفي نفس الوقت مكانش مستحمل ان شرطية تصفعه علي وجهه بالشكل المهين ده قدام الناس , فما كان منه إلا إنه إنهار بالبكاء من صعوبة الموقف , ومن الظلم المستمر , وإنه عارف انه مش هيعرف ياخد من الحكومة حق ولا باطل . .
اول ما تم مصادرة عربة الفواكه , راح فورا للبلدية و حاول انه يطلب الإفراج عن عربة الفواكه , لكن مفيش فايدة , حاول يعمل شكوي ضد الضابطة اللي ضربته علي وجهه , لكن مكانش فيه أي أذن صاغية . .
و هنا و في لحظة يأس كامل , وفقدان كل ما يملك من أمل , سكب علي نفسه سائل سريع الإشتعال , وأشعل النار في جسده , أمام مبني البلدية . .
تم الإتصال بالشرطة و الإسعاف فورا , لكن تأخر وصولهم جعل حروقه تتفاقم بشكل خطير , وأصيب بحروق من المستوي الأول و تم نقله للمستشفي فورا . .
و ديه بالفعل اللي ممكن نسميها : القشة اللي قصمت ضهر الشعب التونسي . .
من تاني يوم : 18 ديسمبر , بدأ يحصل مواجهات عنيفة بين شباب مدينة بوزيد اللي شهدو الواقعة , وبين قوات الأمن , غضبا و انتقاما من اللي حصل , وانتشرت قصة بوعزيزي في أرجاء تونس و العالم العربي , وبدأ الإعلام يتكلم عنها , وتم إتهام فادية حمدي بالقسوة الغير معقولة . .
الشرطة التونسية نفت الواقعة , وأنكرت ان فادية حمدي صفعت او أهانت بوعزيزي , وساقت عدد من المبررات المعتادة . .
المواجهات بدأت في "بوزيد" و "القصرين" و تحولت لمظاهرات و المظاهرات تحولت لانتفاضة كاملة في اغلب المدن التونسية , وده بعد ما بدأ يسقط قتلي و جرحي من الصدامات العنيفة بين قوات الشرطة , والشعب التونسي . .
حادث البوعزيزي أشعل في صدور التونسيين كل الغضب المكبوت تجاه السلطة الحاكمة لمدة ربع قرن , واللي تدهور فيها الاقتصاد و الحريات و الوضع السياسي بالكامل . .
و هنا كان علي قصر قرطاج (القصر الرئاسي التونسي) التحرك لامتصاص غضب الشعب , وتجنب أي تفاقم للغضب الشعبي , فورا ظهر في خطاب تليفيزيوني في 26 ديسمبر بكلام هادي , فيه نوع من الاعتذار المبطن لبوعزيزي , ودعوة الشعب التونسي للهدوء و ترك التظاهر . .
إلا إن سقوط المزيد من الضحايا جعل الشباب التونسي يعرف إنه بدأ طريق لابد يكمله للنهاية , وبالفعل بدأ لأول مرة يتردد هتاف ارحل Dégage , وهي نفس الكلمة اللي قالتها الشرطية للبوعزيزي . .
بن علي اضطر يزور بوعزيزي نفسه في المستشفي , و يتصور جنبه كمحاولة لامتصاص الغضب المتنامي في الشارع التونسي , لكن من غير فايدة . .
و بعد أيام , في 4 يناير 2011 , اتوفي محمد بوعزيزي من تفاقم جروحه , وفي لحظة إعلان وفاته تأكد الشباب التونسي إن ثورتهم لابد من الإستمرار للنهاية , وبدأت الثورة التونسية تتشكل بشكل كامل في وجدان المشاركين فيها, وتم حرق مقر الحزب الحاكم و قسم الشرطة في عدة مدن تونسية . .
و بعدها بيومين في 6 يناير , تم اعتقال عدد من الناشطين و المدونين علي الانترنت , بل ومغني "راب" تونسي , نظرا لدعمهم الثورة علي وسائل التواصل الإجتماعي . .
و في 9 يناير , بدأت تونس العاصمة تنتفض بشكل غير مسبوق , وعمت المظاهرات مناطق عديدة , و ردت قوات الأمن بالعنف , وسقط 35 قتيل برصاص الشرطة
استمرار المظاهرات في أرجاء البلاد , جعل بن علي يظهر في خطاب تاني يوم 10 يناير , ووعد بتوفير فرص و اصلاح الاقتصاد , كمحاولة لتهدئة غليان الشارع , وتم تعليق الدراسة بالمدارس و الجامعات . .
تاني يوم , يوم 11 يناير , تم حرق عدد كبير من مقرات الحزب الحاكم في تونس العاصمة , وعدد من أقسام الشرطة , وردت الشرطة بالرصاص الحي , وسقط 35 قتيل .
اليوم التالي : 12 يناير , بن علي أقال وزير الداخلية "رفيق بالحاج قاسم" , وتعيين وزير جديد "أحمد فريعة" ,واللي فورا فرض حظر التجول في الشوارع التونسية , كمحاولة لوأد الثورة المتأججة .
يوم 13 يناير , ظهر بن علي في خطاب تليفيزيوني أخير , و وعد بعدم الترشح للإنتخابات الرئاسية القادمة في 2014 , وردد العبارة المشهور "انا فهمتكم " , وهي الكلمة المقتبسة من خطاب الرئيس الفرنسي "شارل ديجول" سنة 1958. .
و بعدها بساعات , يوم 14 يناير 2011 , كانت طائرة بن علي الرئاسية تقلع للمرة الأخيرة في الأراضي التونسية , معلنا نهاية عصره , وسقوط عرشه . .
-----------------------------------------------------------------------------------------
طب ليه بن علي هرب من تونس ؟ ؟ ايه السبب بالتحديد ؟ ؟
فيه عدد من الأسباب و التفسيرات , واللي مش هنقدر نحدد انهي فيهم الأصح و الأدق , لأن مفيش دليل واضح علي مدي دقة أيا منها . .
تفسير فيهم , إن بن علي اتأكد ان عرشه صار في مهب الريح , وإن أيام حكمه صارت معدودة , وان ممكن جدا اي قائد عسكري من الجيش او الشرطة يستغل الثورة العارمة , عشان يلقي القبض عليه و عزله , زي ما هو بالفعل عمل مع "بورقيبة" , وكان من غير اي ثورة ولا مظاهرات . .
فيه تفسير تاني بيقول ان تم خداعه , ان يا بن علي حاول تطلع بالطيارة علي دولة معينة يومين تلاتة لما الدنيا تهدي , وتعالي و هتلاقي المشاكل اتحلت , واول ما طلع بالطيارة تم إعلان هروبه و نجاح الثورة . .
فيه تفسير تالت – واللي صرح بيه المحامي اللبناني "أكرم عازروي" , وهو محامي بن علي - إن بن علي تم إعلامه ان فيه محاولة لاغتياله , فاضطر يترك البلد مؤقتا لكنه لم يتخلي عن الرئاسة . .
كمان متنساش حاجة مهمة , ان بن علي وصل الحكم عن طريق سلك الشرطة , مش الجيش , لأنه كان في الأصل وزير داخلية , بعكس أغلب رؤساء العالم العربي , واللي كان في الأصل ضباط جيش (مصر , ليبيا , سوريا , اليمن , الجزائر , السودان) . .
و ده اللي جعل بن علي علي تخوف دائم من انقلاب الجيش عليه , عشان كدة اللي تصدي للمتظاهرين التونسيين كانت الشرطة فقط , لكن الجيش كان واقف بيتفرج , ومنتظر اللحظة المناسبة . .
الأهم من كدة , إن سوء حظ بن علي , إنه اول دولة يمر بها قطار الربيع العربي , وبالتالي هو كان مرعوب و مش عارف ازاي يتصرف , ده غير ان دول العالم الغربي فوجئت حرفيا باللي حصل في تونس , فمكانش فيه خطط او افكار لانقاذه او مساعدته . .
و يمكن ده السبب اللي جعل آخر ثورتين في الربيع العربي (اليمن و سوريا) , هما اكتر نظامين استمرو في مقاومة الشعب و المتظاهرين , لأنهم اتعلمو من اللي حصل في تونس و مصر و ليبيا .
وماذا عن مسار طائرة بن علي . .
فيه اخبار متناثرة – يصعب التأكد من مدي صحتها – إن بن علي طلب من باريس الإذن بالهبوط , لكن الرئيس الفرنسي نيكولا ساركوزي , رفض فورا . .
كمان يقال انه طيارة بن علي طلبت الإذن بالهبوط في القاهرة , لكن "حسني مبارك" مكانش عايز يورط مصر في لهيب الثورة , وهو اصلا كان عارف ان عرشه علي المحك , خاصة مع أزمة برلمان 2010 المزور . .
وبعدها طلب الإذن من الرياض , وبالفعل وافق "عبد الله بن عبد العزيز" علي استضافته , بشرط عدم الكلام او الظهور تماما , يعني يظل صامت للأبد , وبالفعل أقام في قصر في جدة لغاية اليوم . .
-----------------------------------------------------------------------------------------
فور هروب بن علي , ارتج العالم العربي بالخبر المدهش , ديه أول ثورة شعبية تحقق أهدافها من أيام خلع النميري في السودان سنة 1985 , ومكانش الشعب التونسي او الشعوب العربية تتوقع هروبه . .
فورا , بدأ عناصر الجيش التونسي في الانتشار في الشوارع , وحماية المتظاهرين من انتقام الشرطة , بل إنه تم القبض علي عدد كبير من ضباط و جنود الشرطة التونسية ,بتهمة قتل المتظاهرين . .
وتم تعيين رئيس مجلس النواب "محمد المبزغ" رئيس مؤقت , لحين إقامة انتخابات رئاسية قريبة . .
و في نفس الوقت , تم القبض علي عدد من اقارب و معارف بن علي , بتهمة الفساد , و أيضا علي "عماد الطرابلسي" أخو "ليلي الطرابلسي" زوجة بن علي , وعدد من مسؤولي الأجهزة الأمنية التونسية . .
كمان تم الإفراج عن كل المعتقلين السياسيين , وعودة أعداد كبيرة من السياسيين اللي كانو في المنفي ايام بن علي . .
" بن علي هَرَب , بن علي هَرَب" . .
نجحت الثورة التونسية في جولتها الأولي , وأشعلت الأمل في صدور المصريين و الليبيين و السوريين و اليمنيين , وبالفعل انطلق قطار الثورات و لم يتوقف . .
أيوة الثورات لم تحقق أهدافها , بسبب دموية الحكام , وتخاذل دول العالم , وأيوة تسببت في نهر من الدماء خاصة في سوريا و ليبيا و اليمن , لكن يكفي إنها كسرت حاجز الخوف , وصنعت أجيال تحلم بالحرية . .