العنوان : حُرمة الدماء

القسم: #السياسي

الرقم: 27

السؤال:

​

سؤالي: أحكام الإعدام اللي اتنفذت النهاردة في قضية اغتيال النائب العام .. القضية اجراءتها القضائية مليئة بالعوار والشباب اللي اتعدم قال انه اعترف بالاجبار في احدى الجلسات .. ايه اللي نعمله عشان نجيب حق الناس دي لو مظلومة ..

 

بالاضافة انه ليا قريب استشهد في احدى التفجيرات اللي حصلت في القاهرة ..  هل فعلا اللي بيتم اتهامهم مظلومين ولا عايشين دور البرئ المغتصب ..

 

سؤالي المرة دي سياسي عشان الموضوع دا تعب نفسيتي جدا وجاء في بالي اني ممكن اكون مكانهم في يوم .. ايه الحل مع الفجر في الخصومة من قبل النظام الحاكم

​

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

​

سؤالك عن نقطتين بالتحديد . .

 

• هل الشباب دول او غيرهم , بالفعل مشتركين في قتل النائب العام و الجرايم المنسوبة ليهم

• نعمل ايه عشان نجيب حق اللي ماتو ظلم

 

هحاول في كلامي اكون مركز و مختصر , و أكون موضوعي بقدر الإمكان , لأن بالفعل المساحات الرمادية في القضية المصرية كبيرة , و أغلبنا بيكون عنده حيرة  في اتخاذ قرار او موقف في القضايا ديه

 

------------------------------------------------------------------------------------

 

تعالي نبدأ بالسؤال المحير : ياتري الشباب التسعة اللي ماتو دول , فعلا مظلومين وتم تلفيق التهم ليهم ؟ ولا ايديهم مغموسة في قتل هشام بركات و غيره من المسؤولين ؟ ؟

 

سهل علي أي حد إنه يتخذ قرار سريع بناء علي عاطفته او انحيازه السياسي , فمؤيدي السيسي يقولك طبعا مجرمين , والاعترافات موجودة و مكتوبة , و فيه بدل الدليل عشرة  . .

 

و معارضي السيسي يقولك كل الاعترافات ديه كلام فاضي و لا يعتد بيها , خاصة انها حصلت بعد التعذيب الغير محتمل , و كلهم ملهومش علاقة بهشام بركات او غيره . .

 

و هنا احنا هنكون محتارين , يا تري نصدق الأدلة و الاعترافات و فعلا التسعة دول متورطين في قتل هشام بركات , وبالتالي يستحقو الإعدام , ولا نصدق المعارضين اللي بيؤكدو خلل و عوار كل اجراءات القضية من البداية . .

 

فاللي هنعمله – طالما احنا مشفناش ادلة بعنينا – اننا هنطبق المبدأ الهندسي القديم , اللي بيقول انك لما تعمل خط بين نقطتين , لازم هيستمر عشان يوصل للنقطة التالتة . .

 

يعني تعالي نعمل قياس سياسي لمدي نزاهة المنظومة السياسية و القضائية من الأساس من سنين فاتو , وبناء عليها نقدر نستنتج مين فيهم الصح . .

 

فلو عملنا استعراض سريع لعلاقة السلطة القضائية بالسلطة التنفيذية في مصر , خلال السنوات اللي فاتت , هنشوف العجب  . .

 

• في ديسمبر 2004 , قررت وزارة الداخلية الإفراج عن الجاسوس الإسرائيلي عزام عزام بعد مرور 7 سنين من أصل 15 سنة حكم عليه , بدعوي "الإفراج الصحي" , وبعدها سافر فورا علي تل أبيب و استقبلوه هناك بالأحضان

​

• في صيف 2005 , ولما أيمن نور قرر يتشرح قدام مبارك في الإنتخابات الرئاسية , فورا ظهرت من الفراغ قضية خاصة بالتوكيلات الرئاسية , و اتسجن لمدة اربع سنين

​

• في يونيو 2010 , تم اعتقال الشاب الاسكندراني خالد سعيد , و تعذيبه حتي الموت , وخرجت تفسيرات وزارة الداخلية انه بلع لفافة بانجو , ومظهرتش الحقيقة كاملة الا بعد ثورة يناير

​

• في ديسمبر 2010 , وقبل اسابيع قليلة من ثورة يناير , وبعد ما حصل تفجير لكنيسة القديسين في اسكندرية , تم اعتقال الشاب السلفي "سيد بلال" , وتعذيبه حتي الموت , وخرجت تبريرات وزارة الداخلية انه من المشتركين في تفجير الكنيسة , وبعد ما سقط مبارك و ظهرت وثائق أمن الدولة اتضح انها كانت بتخطيط الداخلية نفسها, وان سيد برئ منها .

​

• في يونيو 2012 , وقبل ايام من تنصيب أول رئيس مصري بعد الثورة , قامت المحكمة الدستورية العليا بحل مجلس الشعب , وهو مجلس الشعب الوحيد اللي نقدر نقول عليه إنه تم انتخابه بشكل نزيه في تاريخ مصر , وكان واضح إنه قرار سياسي 100 % لدحر أي نفوذ للإسلاميين . .

​

• بعد الإنقلاب , كانت كل قرارات المحكمة الدستورية العليا , ومجلس القضاء , و النيابة العامة , متوافقة و متناغمة بشكل تام مع قرارات المجلس العسركي بقيادة السيسي , بداية من شرعنة الإنقلاب و جعله دستوري , مرورا بحل مجلسي الشعب و الشوري , و حل عدد من أحزاب المعارضة , وحظر جماعة الإخوان و حزب الحرية و العدالة,  وحل جميع النقابات اللي تم انتخابها , وانتهاء بحل الجمعيات الخيرية التابعة للإسلاميين .

​

• في مارس 2016 , أعلنت وزارة الداخلية مقتل خمس أفراد في ميكروباص في التجمع الخامس , بدعوي إنهم تورطو في مقتل الطالب الإيطالي "جوليو ريجيني" , وبعد ما تم دفن القتلي الخمسة و تصوير الاحراز الخاصة بريجيني , الجانب الإيطالي دحض الرواية الساذجة ديه , فوزارة الداخلية تراجعت و اعلنت ان ده غير صحيح , واننا لسة بنعمل تحقيقات .

​

• في ديسمبر 2016 , قضت محكمة جنح العجوزة  ,ببراءة حبيب العادلي من تهمة عدم تنفيذ أحكام قضائية , بعد ما تمت تبرئته في مارس 2015 , من تهمة الكسب غير المشروع.

​

• في مارس 2017 , حكمت محكمة النقض بحكم نهائي ببراءة مبارك في كل القضايا المنسوبة اليه , هو و اولاده الاتنين

​

• في مايو 2017 , تم اختراع تهمة "ارتكاب فعل فاضح" للناشط السياسي خالد علي , وده بعد ما كان أحد قياديي مظاهرات تيران و صنافير في ابريل 2017 , للتنديد بالتفريط في التراب المصري

​

• في ديسمبر 2017 , تم القبض علي "أحمد شفيق" و ترحيله من الإمارات للقاهرة فورا , وده بعد ما أعلن إنه هيترشح للرئاسة ضد السيسي , و بعد ما اختفي تماما ايام طويلة , ظهر في الإعلام  مبتسم و فرحان , وهو بيتراجع عن فكرة الترشح , وبيدعو للوحدة الوطنية خلف السيسي

​

• في يناير  2018 , وبعد ما أعلن الفريق سامي عنان ترشحه لرئاسة الجمهورية , تم التحفظ عليه فورا تحت الإقامة الجبرية , بعدها تم القبض عليه  بتهمة : مخالفة القواعد العسكرية

​

• في فبراير 2018 , تم القبض علي مؤسس حزب مصر القوية : عبد المنعم أبو الفتوح , بتهمة إثارة البلبلة , والتواصل مع القيادات بالخارج , وده كان بعد إطلاقه عدد من التصريحات النقدية ضد النظام لما كان في زيارة لبريطانيا , مع أن ابوالفتوح من الداعين لـ 20 يونيو من البداية

​

• في مارس 2018 , أصدرت المحكمة الدستورية العليا , قرار بإلغاء الأحكام القضائية اللي صدرت من المحكمة الإدارية , ومحكمة القضاء المستعجل اللي حكمت ببطلان التنازل عن تيران و صنافير , يعني المحكمة الدستورية العليا قررت إن التنازل عن جزيرتي تيران و صنافير شرعي و قانوني , و تعتبر ملك للسعودية

​

• في فبراير 2018  , ولما خالد يوسف أعلن معارضته للتعديلات الدستورية , ظهرت فجأة تسريبات جنسية له و اضطر انه يسافر فرنسا و مرجعش من ساعتها

​

• وأخيرا في يوليو 2017 , قضت محكمة النقض بإعدام المتهمين في اغتيال النائب العام هشام بركات , وبالفعل في  فبراير 2018 , تم الإعدام

 

 

لما نضع النقاط ديه كلها جنب بعض , مش هنكون محتاجين اننا نشوف أدلة او قرائن , نفس النظام اللي قتل 5 افراد  بدعوي انهم هم قاتلي ريجيني , وبعدها اعتذر و قال لا مش هما , واللي افرج عن عزام عزام , واللي برء مبارك و العادلي و كل رموز النظام السابق , نفس النظام هو هو  : بيقول ان فيه 9 شباب قتلو النائب العام . .

 

وانتشر علي الفيسبوك , فيديو لأحد المتهمين اللي تم اعدامهم (محمود الأحمدي) , أثناء محاكمته في اغسطس 2016 .  وهو بيقول اننا اتعذبنا عذاب لا يحتمل , وهاتلي اي حد دلوقتي و اعذبهولك و اخليه يعترف باللي انت عايزه . .

 

المثل بيقول : اللي ميشفوش من الغربال يبقي أعمي , يا تري بعد كل ده معقولة الصورة مش باينة  ؟

 

--------------------------------------------------------------------------------------

 

نروح للسؤال التاني : نعمل ايه عشان نجيب حق الناس اللي ماتو . .

 

مش عايزين نضحك علي نفسنا او نقول كلام "تخديري" يريحنا عشان نحس اننا عملنا اللي علينا و نستريح من تأنيب الضمير , حق الناس ديه , وحق كل الشهداء اللي سقطو من أول 25 يناير و لغاية دلوقتي , مش هييجي إلا بسقوط النظام . .

 

احنا بنتكلم عن نظام بيستأصل شأفة المعارضة بلا استثناء , اخواني او سلفي او ليبرالي او حتي مسيحي , اي حد يعارض السيسي مش هيرحمه , و مفيش أي آلية لإرجاع حقوق الشهداء إلا بإسقاط النظام اللي دمر كل حاجة في مصر . .

 

أي شخص لسة عنده ذرة أمل في إصلاح نظام السيسي هو يا اما شديد السذاجة و البراءة , يا اما شديد الخيانة لمبادئه و قيمه عشان مصلحته الشخصية . .

 

و ده اللي هينقلنا للسؤال الأكتر أهمية و خطورة : هو ازاي نسقط نظام زي ده ؟

 

ده سؤال اكبر من انه يتم الإجابة عنه هنا , ده شئ محتاج تحرك مجتمعي هائل بين كل قوي الثورة و فئات الشعب , لإسقاط الطاغية , وده شئ مش باين انه هيحصل علي المدي القريب . .

 

لكن عشان منعقدش نفسنا , انت كشاب بسيط , ممكن يكون في ايدك حاجات تعملها , واللي حتي لو معملتش إسقاط للنظام , ولا انها جابت حق الشهيد , فعلي الاقل هتقابل ربنا و انت عملت اللي تقدر عليه . .

 

 

• لازم يكون في قلبك إنكار كامل للجرايم المستمرة ديه , مش بس الإعدامات , كمان السجن و الاعتقال و التصفية و المطاردات و التحفظ علي الأموال و الفصل من العمل بناء علي اراء سياسية, وكمان قتل كل مواطن برئ ملوش علاقة باللي بيحصل , وكل الأعمال اللي انت عارف ان فيها ظلم , لازم من جواك تكون شديد الغضب و الإنكار , عشان تقابل ربنا يوم القيامة و مفيش في ايدك قطرة دم

​

• اعمل توعية للناس حواليك , ايوة عارف فيه ناس دماغها جزم , بس احنا مأمورين اننا ننقل الرسالة , انقل المعلومة الصح و حرمة الدماء عشان تفهم الناس الفرق بين الصح و الغلط , بما لا يتعارض مع امنك و سلامتك , ومن غير ما تعمل تعريض لحياتك للخطر

​

• اي حد صديقك او قريبك , انت عارف انه بيشتغل في مكان ليه علاقة مباشرة او غير مباشرة مع الظلم الرهيب ده , حاول تنصحه يسيب الشغل , عشان ميموتش و في رقبته حق المظلومين و هيتحاسب عشانهم قدام ربنا يوم القيامة

​

 

• يا تري العبادة عاملة ايه ؟ يا تري صلاة الفجر اخبارها ايه ؟ طب غض البصر ؟ طب الحجاب ليكي يا بنت ؟ طب بتقرأ قرآن كل يوم ؟ آخر مرة عملت صدقة كان امتي ؟ ؟

 

 

 

 

اياك تفرق بين العبادة و النصر , لو الواحد مش قادر يقاوم برد الشتا عشان يصلي الفجر , ولا عطش الصيف عشان يصوم تطوع , فينسي بقي اي نصر هييجي من ربنا

​

• ربي ولادك علي الصح , ربيهم يكونو رجاله و محدش يدوسلهم علي طرف , ربيهم انهم يعرفو الصح من الغلط ,ازرع جواهم انهم يقدمو الحق علي مصلحتهم فورا , انهم ينصرو الحق حتي لو ضد رغباتهم , انهم يقرو بالخطأ لو وقعو فيه , اصنع جيل ملتزم و محترم و بناء , وثق ان هما اللي هيشيلو الشيلة من بعدك

 

• اقرأ علي قد ما تقدر , اكبر كارثة وقعنا فيها في يناير 2011 , اننا مكناش بنقرأ كويس , منعرفش حاجة عن ثورة رومانيا 1989 . ولا الانقلاب في اسبانيا 1981 , ولا انقلاب النميري ثم ثورة سوار الذهب في السودان , ولا الدور المخزي للمخابرات الأمريكية في الانقلابات في امريكا اللاتينية , ولا الثورات الملونة في شرق أوروبا , عشان احنا مكناش بنقرأ , اتضحك علينا بسهولة

 

• انشر المعلومة الصح علي قد ما تقدر , يعني اعمل صفحة علي الفيسبوك , واعمل لها ترويج بـ (facebook ads) عشان تنتشر , وخليها منبر ليك عشان تنقل للناس المعلومة الصح , وتوجههم للفكر السليم

 

--------------------------------------------------------------------------------------

 

وأخيرا . .

 

المولي تبارك و تعالي علمنا كيف نتعامل مع المواقف العصيبة ديه , بل و أجاب لنا علي العديد من علامات الاستفهام اللي في دماغنا , بس احنا مش بناخد بالنا أحيانا . .

 

يعني لما تقرأ الآيات من 138 إلي 142 في سورة آل عمران , هتجد تطابق مذهل مع الواقع اللي احنا عايشينه . .

 

الآيات اللي نزلت بعد غزوة أحد , لما أصاب المسلمين ضرر كبير نتيجة الخطأ اللي وقع فيه بعض الرماة . .

 

اقرأ الآيات بتمعن هتجد فيها معاني مختلفة . . 

 

(هَذَا بَيَانٌ لِلنَّاسِ وَهُدًى وَمَوْعِظَةٌ لِلْمُتَّقِينَ)  هذه الآيات فيها توضيح كامل للي عايز يدور علي الحقيقة . .

 

( وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ) إياكم يا مؤمنين ان تصابو بالحزن او الإحباط  و انتم عارفين إنكم أعلي منهم , وأرفع درجة , إياكم أن تشعرو بالإنكسار او اليأس

 

(إِنْ يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِثْلُهُ وَتِلْكَ الْأَيَّامُ نُدَاوِلُهَا بَيْنَ النَّاسِ) لو كان هناك ضرر أصابكم حاليا (قتل , اعتقال , اعدام , مطاردات , فقر . . ) فخصمكم يصيبه ضرر مماثل , حتي لو كان الشكل مختلف , وده اللي بنشوفه أحيانا في صراع داخلي بين قوي السلطة , او ذعر أو أمراض يصاب بها بعض الظالمين , وهذه سنة الحياة

 

( وَلِيَعْلَمَ اللَّهُ الَّذِينَ آَمَنُوا وَيَتَّخِذَ مِنْكُمْ شُهَدَاءَ وَاللَّهُ لَا يُحِبُّ الظَّالِمِينَ  وَلِيُمَحِّصَ اللَّهُ الَّذِينَ آَمَنُوا وَيَمْحَقَ الْكَافِرِينَ) و ده الهدف الأساسي من وجود هذه الابتلائات العصيبة , هي بس موجودة عشان يظهر المؤمن الحقيقي من مدعي الإيمان .

 

( أَمْ حَسِبْتُمْ أَنْ تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنْكُمْ وَيَعْلَمَ الصَّابِرِينَ ) هل فاكرين ان دخول الجنة سهل ؟ هل فاكرين ان جنة الخلد ببلاش ؟  , الحديث الذي رواه الترمذي (ألا إن سلعة الله غالية ألا إن سلعة الله الجنة) الجنة غالية و تستاهل كل الضرر اللي انتو بتتعرضو ليه  . .

 

رحم الله الشهداء  وانتقم من الظالمين , وحقن الله دماء الأبرياء . .

​