العنوان : مَوَاطن الضَعف

القسم: #العاطفي

الرقم: 34

السؤال:

 

السلام عليكم

 

انا متزوجة من ٥سنين عن قصه حب كبيره  , هو اول حد عرفته وأول حد حبيته وهو كمان حبني واستناني لحد تانيه كليه واتجوزنا والحمد لله حياتنا مستقره ومبسوطين ودايما فاهمين بعض وبنعمل الحاجات اللي بتسعد الطرف التاني وعندنا بنتين .

 

بس وهو صغير يعني١٨سنه كده كان هيتجوز واحده قريبته او بمعني أصح كان دايما الكلام م الأهل ان دول لبعض فطلع ملقيش غيرها بس كان دايما بيحاول يغير فيها حاجات كتيره مش عجباه بس بيقول يلا اللي موجوده لما فتحها ف الموضوع يخطبها وتبقي رسمي قالتله انت لسه صغير ويمكن يجيلي فرصه احسن لما تطلع م الجيش

 

ولما خلص جيش كنّا اتخطبنا واتجوزنا بعدها بسنه وهو نسي الموضوع ده بس من فتره لاحظت انه بيكلمها وخبي عليا عشان مايضايقنيش لما اكتشفت الموضوع صارحته وقلتله اعمل اللي انت عاوزه لكن واحنا اصحاب مش بنخبي ع بعض قالي انا برضي غروري اني اتجوزت واحده احسن منها وهي لسه متجوزتش

 

طبعا الموضوع كان مضايقني لكن كنت عاوزه أكسبه انه يحكيلي كل حاجه وفعلا ده اللي حصل كل ماتكلمه كان يقولي وأحيانا بوريني الرساله عادي وكله كلام عادي ف حياتها لان عندها مشاكل دايما مع اَهلها وكده

 

المهم دلوقتي انا بكلمها عادي بس ف المناسبات او لو رحنا زياره وهي من النوع الجرئ اللي بياكل اللي قدّامه في الكلام متلحقهاش اصلا وانا من النوع الهادي لكن لما بتكلم بقول حاجات مفيده محدش يعرفها وجوزي دايما يقولي انا طول عمري كنت بشوف فيها عيوب وعاوز اغيرها لكن انتي عمري ماشفت فيكي عيوب بحب كل حاجه فيكي هدوئك وثقافتك وعقلك وكل حاجه

 

ولما بسأله ليه بتكلمها كده هي اللي ممكن تتعلق بيك قالي هي بتحكيلي حاجات ف بيتهم مينفعش تتحكي ولو ماسمعتهاش ممكن تقولها لأي حد مش واثق ف تصرفاتها لانها طايشه وبتصعب عليا ساعات عشان بيجلها عرسان وأبوها اللي هي ترفضه يوافق عليه واللي هي توافقه يرفضه

 

وبيتكلم معايا عادي ف حياتها وبديله اقتراحات بس م جوايا كأي ست بغير وبحب جوزي لان ساعات بيقول هي رنت عليا وهدخل اشوف عاوزه ايه ويكلمها ف الاوضه وبيرجع يحكيلي

 

مش بكون عارفه التصرف اللي بسمح بيه ده صح ولا غلط وانا واثقه فيه بس مش عاوزه امنعه عشان مايعملش حاجه ويخبي عليا وهو بيكون حاسس من شكلي بيقولي بتغيري قلتله اكيد عشان بحبك بس انا واثقه فيك وعارفه انكً تعرف حدودك لكن خلي بالك لان الشيطان موجود وانا عارفه نيتك كويسه وأنك عاوز تساعدها وبس لكن ساعات بيقولي ساعات تقوله نفسي حد يحضني وكلام مينفعش يتقال . مع العلم انا جميلة زيها بس هي عينيها خضر و انا عسلي

 

مش عارفه أتصرف ازاي هل انا غلط ولا صح وايه اللي اعمله ؟

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله . .

 

الرد باختصار : هو غلطان بتواصله معاها , وهي غلطانة بفتح قنوات التواصل مع زوجك , و انتي غلطانة علي السماح بده , والمشكلة ديه لازم تتوقف في اقرب وقت . .

 

و هنا التفاصيل .

 

-----------------------------------------------------------------------------

 

المولي تبارك و تعالي حينما ذكر في الآية 39 من سورة الحجر , كلمات ابليس (قَالَ رَبِّ بِمَا أَغْوَيْتَنِي لَأُزَيِّنَنَّ لَهُمْ فِي الْأَرْضِ وَلَأُغْوِيَنَّهُمْ أَجْمَعِينَ) , العلماء توقفو عند كلمة : "لأزينن"  , واللي معناها ان الشيطان سيضع زينة في طريق المعاصي , يعني هيجعل طريق المعصية شكله حلو و جذاب و رائع

 

و منها استخلصو قاعدة مهمة , ان بعض المعاصي , الإنسان بيروح لها وهو بيحسب انه بيعمل حاجة كويسة , انه بيصلح مشكلة ما , انه بيحل أزمة معينة , انه بيعمل خير . .

 

و ده اللي يتوافق  بشكل كبير مع خواتيم سورة الكهف (قُلْ هَلْ نُنَبِّئُكُم بِالْأَخْسَرِينَ أَعْمَالًا   الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا) , يعني اللي ماشيين في الضلال وهما بيظنو بسذاجة انهم بيعملو حاجة كويسة . .

 

و للاسف ده اللي جوزك ماشي فيه باصرار . .

 

هو عنده حجة ساذجة , ان هو لازم يسمع منها , عشان هي متقولش لحد تاني و تعمل مصيبة , يا سلام !! , هو بجد مصدق نفسه  ؟ ؟

 

طب ما يخرج معاها في كافيه و يقضو وقت جميل مع بعض عشان هي متعملش ده مع حد غريب , طب ما يروحلها و يخليها تبكي علي كتفه عشان متعملش كدة مع حد غريب , بالله عليكي ده اسمه كلام ؟ ؟

 

هل هو مطالب بحل مشاكل الكون ؟ يا تري مقدار اهتمام بمحارمه (اخته , مراته , امه, بنته ) , بنفس مقدار اهتمامه بالاخت ديه ؟

 

طب ما يشوف العواجيز من نساء الأسرة اللي اكيد عايزين حد يسمع لهم و يبددو الملل اللي هما عايشينه , ولا هو ميحلاش يحل مشاكل الا لذوات العيون الخضر  ؟ ؟

 

واخدة بالك ازاي الشيطان بيزين المصيبة للانسان , انه يزقه ناحية مشكلة كبيرة , وهو بيقنعه انه بيعمل شئ كويس , ومش بعيد يقنع الشخص كمان ان ربنا هيعطيه ثواب عظيم نتيجة الاستماع لهمسات و تنهدات فلانة . .

 

بالطبع اللي بيعمله زوجك هي مصيبة , واول مسمار في نعش الحياة الزوجية , اياكي تقتنعي بمبدأ : ان عينه مليانه و مش هيبص لبرة , اياكي تظني ان  القلوب مش بتتحرك و الهرمونات مش بتتغير , ديه طبيعة بشرية يستحيل تحديها . .

 

----------------------------------------------------------------------------------------

 

الشرع لما وضح حدود واضحة في التعامل بين الذكر و الانثي , فده لأن المولي تبارك و تعالي يعلم الضعف البشري الموجود عندنا , واللي بيتسبب في مآسي لا حد لها لما بيتم إطلاق سراحه , وهو بمنتهي السذاجة بيظن انه : كل شئ تمام , و متقلقيش يا حبيبتي , انا عمري ما هفكر فيها . .

 

استمرار تواصله معاها هيدمر الهناء الزوجي اللي بينكم , لأنها – رغما عنها – هتجعله لا شعوريا يقارن بينها و بينك , بين واحدة مش بيشوفها الا كل فين و فين , وواحدة قدامه 24 ساعة , و لما تحطي في بالك ان الانسان بطبعه سريع الملل , وان الإنسان بيميل للتغيير و التجديد , فهتكون النتيجة واضحة زي الشمس قدامك . .

 

وياريت مثلا حدود العلاقة بينهم متعلقة بشغل او دراسة , كنا ممكن نتفهم ده , لأ ديه متعلقة بشكاوي نفسية و اجتماعية و عاطفية , يعني هي بتجعله فعليا يلمس مواطن ضعفها و رقتها و عاطفتها و شغفها – بل و هرموناتها – وانتي بكل بساطة مصدقة ان الموضوع سهل , بل و احيانا بتقدمي ليه النصيحة عشان يبعتها لها . .

 

و هي بلغت من وقاحتها انها تقوله : (عايزة حد يحضني) , بالله عليكي هل متوقعة من زوجك يكون في عفة سيدنا يوسف ؟ متوقعة منه يكون قلبه من صخر ؟

 

ان كان ده هو الجزء اللي بيحكيلك عليه , فماذا لو كان فيه اجزاء مش بيحكيلك عنها ؟ ؟

 

الرسول صلي الله عليه و سلم لما قال في الحديث اللي رواه احمد بن حنبل (لا يخلون رجل بامرأة فإن الشيطان ثالثهما) , وبالطبع ده ينطبق علي مكالمات التليفون اللي هو بيسحب نفسه و يجري علي الاوضة و يقفل الباب , معقولة هيكون بيقفل الباب عشان بيتناقش معاها في ازمة الشرق الاوسط  ؟ ؟

 

لو كان هو عارف ان كلامه معاها يخلو من تجاوزات غير مقبولة , كان فتح السبيكر و قعد يتكلم معاها قدامك , لكن هروبه منك سريعا ملوش الا معني واحد بس , انتي متأكدة منه , بس مش عايزة تعترفي بيه .

 

وكون انك تقولي : انا مش عايزة امنعه عشان ميتكلمش معاها من ورايا , فديه أزمة تانية , هو ينفع اخلي ابني يشرب حشيش قدامي عشان ميشمش بودرة من ورايا ؟ ده كلام ؟

 

------------------------------------------------------------------------------------

 

فاللي تعمليه دلوقتي كالتالي :

 

• أولا لازم تؤمني ان الوضع الحالي غلط , وانه هيفسد اي سعادة حقيقية بينك و بين زوجك , وانسي اي كلام متعلق بفكرة : هو بيحبني و انا مالية عينه , مفيش راجل بتتملي عينه ابدا

 

• لازم تفتحي معاه الكلام بشكل واضح و صارم , ومتقوليش الكلام علي استحياء او بخجل , عشان ميحسش ان الموضوع سهل , اتكلمي كلام واضح ومن الاخر , ان الماساة ديه لازم تتوقف

 

• قوليله ان الكلام الوحيد المتاح معاها , انه يفتح السبيكر و يقعد في الصالة , ويكون كل فين و فين , اي نوع غير كدة يبقي اسمه : خيانة

 

• لو هو بالفعل مقتنع انه بينقذها , فهميه ان هو مش فوق دماغه مهمة انقاذ الكون , وان اصلاح المجتمع مش بيبدأ بإنقاذ قلوب العذاري , وان هو بيضحك علي نفسه

 

• لو بدأ يجادلك , قوليله اتفقنا,  انا كمان من بكرة هبدأ اشوف زمايلي الشباب من ايام الكلية  , وهبقي اطمن عليهم و احل لهم مشاكلهم العاطفية , بكلمات هامسة بالليل , او لما انت تروح الشغل و هبقي امسح الشات قبل ما تيجي , ايه رأيك ؟

 

• لو وافق علي الفكرة المجنونة ديه تعرفي ان فيه مشكلة حقيقية في دماغه

 

• لو رفضها , قوليله ان ده زي ده , ولو عايز تصلح المجتمع شوف واحد عجوز عنده 80 سنة و اقعد سليه , مش واحدة عينيها خضر

 

• لو هو وافق علي كلامك , حذريه انك لو اكتشفتي انه بيلعب بديله او بيكدب عليكي انك مش هتعديها ابدا , وهتعملي مشكلة مش هتخلص , ممكن الأمر يوصل للطلاق

 

• لو قعد يجادل فكريه ان عنده بنات , وان كل ساقي سيسقي بما سقي , وانه يخاف ربنا في التعامل عشان بناته ميتعذبوش في المستقبل من شخص سافل يلعب بقلوبهم و يدمرها

 

• لو وصل الأمر انك تتصلي بيها و تهزقيها اعملي كدة

 

• لو استمر في العناد اتصلي باسرته و عرفيهم ان ده خراب لبيتك , بس متعمليش كدة الا بعد ما تحذريه الاول انك هتقولي لفلان و فلان لو هو استمر في التواصل معاها

 

------------------------------------------------------------------------

 

فملخص الكلام , اللي بيعمله شئ غير مقبول او محتمل , وغيرتك شئ صحي و سليم ,و متعمليش مقاومة لغيرتك ,ومتسكتيش علي الوضع المريض ده , وادعي ربنا يهديه للصراط المستقيم