ملئ الفراغ
الرسالة السابقة
العنوان : ملئ الفراغ
القسم: #العاطفي
الرقم: 33
السؤال:
أولا مش عايزة الرسالة تتنشر بإسمى
كل مشكلتى إنى مش قادر أحدد مشاعرى تجاه خطيبى اللى مخطوباله من 5 سنين بدايه العلاقة كنت بعيدة تماما
منه بكل الأشكال كنت لسه فى ثانويه عامة ومش عايزة اشغل نفسى بالمواضيع العاطفية
خلصت ثانوية عامة وهو دخل الجيش من هنا بدأت العلاقة وابتديتها أنا بإنى أسال عنه وبعد كدا بقينا نسأل على بعض أحنا الإتنين
ويمكن هو الفترة دى أكتر فترة اتعلق فيها بيا بس عندى إحساس دايما إنى انا المتحكم الرسمى فى العلاقة على الرغم من هو صرحلى مشاعر كتير تثبتلى حبه بس أنا وبسمعه بحس باللى هو بيقوله وبعد كدا لما أفكر
وبسأل نفسى هو انا بحبه مابعرفش أجاوب ودايما انا اللى أكلمه يمكن أكتر حاجة بضايقنى منه
أما مشكلته هو انه دايما حاسس بذنب من ناحيتى انه خاطبنى ليه 5 سنين وإن هو شايل مسؤليتى وهمى ونظرة الناس ليا ان مخطوبة من فترة طويلة وانا مش قادرة أقنعه ان لسه ماجاش الوقت المناسب لجوازنا
وهو دايما شايل هم مع العلم ان هو بيبلغ قصارى جهده عشان نتجوز
انا عارفة إنى رسالتى طويلة معلش بس الرجاء الرد
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي
بداية عشان نحاول نوصل لمعني تقريبي للحب , فممكن نقول عليه : انه الراحة في التعامل .
يعني الشخص اللي لما بتكوني معاه بتكوني مستريحة , مش متكلفة , ولا متوترة , ولا قلقانة ولا متضايقة .
اكيد معني الحب اوسع من كدة , بس ديه احد التناولات البسيطة اللي ممكن نقرب بيها المعني , واللي حطيها في بالك عشان تعرفي مدي اقترابك او ابتعادك عنها في علاقتك بخطيبك .
و من هنا حاولي تعملي تقييم عام , يا تري مقدار حبك ليه قد ايه , وكذلك مقدار حبه ليكي , خدي بالك ان اختفاء العامل ده مش معناه بالضرورة انهيار الحب , او مش معناه فشل العلاقة , زي ما قلنا ديه احد التناولات للحب مش التناول الوحيد .
----------------------------------------------------------------------------
بالنسبة لشعورك بالغربة لما بتبعدو في الكلام فترة , خدي بالك فيه ناس كتير بتكون من نوعية : قريب العين قريب القلب , فلما الشخص ميكونش قدامه , فرغما عنه اهتمامه بيه بيقل .
وده معناه ان الشعور ده مش هيحصل بعد الجواز ان شاء الله , و هتكون العلاقة بينكم مختلفة طالما تحت سقف واحد .
انا بس يهمني دلوقتي انك تعرفي هل بالفعل فيه تفاهم بينكم ولا لا ,فيه مساحات مشتركة كافية ولا لا , عشان تقدري تحددي مدي نجاح الزواج .
عدم وجود مساحات مشتركة حالية مش معناه بالضرورة فشل الزواج , لكن ممكن يكون معناه ضرورة انك تسعي لبناء جسور اقوي للتواصل بينكم .
وياريت تهتمي بفكرة : الطباع المختلفة , اللي كنا اتكلمنا عنها بالتفصيل في رسالة : اختبارات الزواج
لأن فهمك الدقيق لطباعك و طباعه , هيخليكي قادرة علي تخطي اي عقبات بينكم , و ملئ اي فراغ يتواجد
--------------------------------------------------------------------------------
اخيرا حاولي تعوديه و تعودي نفسك علي الصراحة المتبادلة .
من الحاجات السلبية اللي بتتواجد بين الشخصين اللي هيتربطو , ان حد فيهم بيكون متضايق و ميقولش للتاني , او يكون عنده ملاحظة معينة و يبلعها و يسكت , وديه مشكلة بتتفاقم و تزيد و بتسبب مشاكل لاحقة .
فحاولي توصلي له المعلومة بشكل لطيف , ان يكون فيه مساحة للصراحة المشتركة بينكم , لتجنب اي "تخزين" لمشاعر سلبية عند اي طرف فيكم ضد التاني .
بس من ناحية تانية ممكن تتفهمي فكرة انه مش عايز يتكلم عن حاجات بتضايقه بشكل شخصي , الرجل طبيعته غير الست في النقطة ديه ,أغلب الإناث بيكون عندها رغبة مستمرة في الفضفضة و شرح ابعاد اي مشكلة بتقابلها , الرجل طبيعته بيميل للكتمان و محاولة حل المشكلة لوحده . .
ياريت تقرأي كتاب : الرجال من المريخ و النساء من الزهرة , واللي شرح النقطة ديه بالتفصيل .
---------------------------------------------------------------------------------
و بالتوازي مع ده كله , ممكن تحطي في بالك ان ظروفه الوقتية او المزاجية ممكن متسمحلوش انه يتصل بيكي بشكل مستمر , خلي عندك رحابة صدر , وتفهم أكبر لظروفه اللي ممكن تكون قاسية . .
و بالتالي لو كان هو بعيد ي الاتصال لمدة يومين تلاتة , الموضوع مش ازمة , طالما ده عن انشغال , مش عن مشاكل بينكم , الفرق كبير .
و في نفس الخط , تجاهلي تماما كلام الناس واللي بيقولوه , رضا الناس غاية لن تدرك , ومن راقب الناس مات هما , فانتي انسي تماما هما بيقولو ايه , وبيفكرو ازاي , وركزي بس في مقياس الصح و الغلط , والحلال و الحرام , ويكون ده المقياس الوحيد لأعمالك
لما تحاولي تمشي بالتوازي في النقط السابقة ديه , هتلاقي انك بقيتي اكثر قدرة علي تقييم حقيقة مشاعرك تجاهه , وحسن تصرفك معاه