الغيبة و البغضاء
الرسالة السابقة
العنوان : الغيبة و البغضاء
القسم: #الديني
الرقم: 29
السؤال:
معلش بس محتاجة توضيح أكتر فى موضوع الغيبة أو النميمة (معرفش الفرق بينهم ) بس الأهم إنى معرفش بدايتهم فين ، يعنى أنا بحاول فعلا متكلمش على حد ومبتبقاش صعبة عشان أنا مكبرة دماغى ومش فارق معايا مين يعمل ايه خالص
بس المشكلة كلها لما بقابل بنات خالاتى ، منهم ناس تغيظ فعلا فغصب عنى باجى اشتكى لصحبتى منهم عشان أهون على نفسى ، واحدة كنت عاملة معايا خناقة جامدة وكنت محتاجة أحكى لصاحبتى بعدين حسيت إنى غلطت فروحت قولتلها آسفة وسامحينى أنا جيبت فى سيرتك لما اتخانقنا
والموضوع قلب دلوقتى إن بنات خالاتى التانيين بيشتكوا منها وبيوصفوا اللى بتعمله واللى بيغيظهم وأنا مبعرفش اقولهم يسكتوا عشان مش مقتنعة إن مجرد وصف اللى حصل من غير ذم فيها تعتبر غيبة .
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي . .
بداية احنا كنا اتكلمنا بالفعل عن الغيبة بالتفصيل في رسالة : الغيبة علي لساني
و قلنا ان المقياس اللي علي اساسه هتعرفي هي غيبة ولا لا هو الحديث الشريف بالغ الأهمية :
(قيل ما الغيبة يا رسول الله؟ فقال: ذكرك أخاك بما يكره، قيل: أفرأيت إن كان في أخي ما أقول؟ قال: إن كان فيه ما تقول فقد اغتبته، وإن لم يكن فيه فقد بهته) . رواه مسلم.
وده معناه ايه ؟
ان لما سعاد تقعد مع مي , وتتكلم علي مني , لو كان كلام سعاد و مي هيضايق مني , حتي لو الكلام سليم و صحيح 100 % فهي غيبة و عليها ذنب . .
اكيد فيه استثناءات معينة , بس الاستثنائات قليلة , واشهرها : ان الشخص يكون مظلوم و بيشتكي للقاضي اللي هياخد حقه منه , او شخص بيحذر من شخص معين عشان مثلا هيتاجر معاه او هيناسبه
فلو انتي بتتكلمي مع طنط علياء و عرفتي ان ابنها هيخطب عفاف وانتي عارفة ان عفاف فيها مشكلة معينة
فلازم تقوليلها ان عفاف عنده مشكلة كذا كذا
لكن نقطة ان فلانة ضايقتك وانتي من جواكي متضايقة فعايزة تفضفضي , فده مش من الاستثناءات , وبالتالي مينفعش انك تقوليها . .
طب لما واحدة تتكلم قدامك و بتفضفض ليكي , ساعتها ايه الحل ؟
المشكلة ان سماعك للغيبة و سكوتك عنها , ممكن يكون فيها ذنب مثل انك قولتيها بالظبط , وبالتالي مينفعش تفضلي ساكتة .
يا اما توقفيها عن الكلام ده , يا اما هي تغير الكلام , يا تسيبيها و تمشي .
انا عارف ان البنات بيكونو من جوة متضايقين و عايزين يفضفضو , بس برضه فكري في الموضوع من ناحية عكسية . .
يا تري لما هاجر تقعد مع سامية و يتفتح بينهم الكلام عليكي . .
اكيد انتي من جواكي , لو عرفتي انهم اتكلمو عليكي و قالو كلام يضايقيك , حتي لو الكلام حقيقي 100 % , اكيد انتي هتضايقي .
بينما لو انتي عرفتي بكيفية ما , ان اول ما هاجر قالت : البت فلانة ديه فظيعة (اللي هو انتي) , فساعتها لو ان سامية قالت لهاجر , مش عايزين نتكلم عنها ولا عن غيرها عشان حرام .
ساعتها انتي هتحبي جدا سامية , انها مرضيتش تتكلم عليكي , صح ؟
و ده هو الهدف العظيم من تحريم الغيبة , ان المجتمع ميقطعش في بعضه و ميكونش فيه عداوة و بغضاء , و حتي لو انتي من جواكي متضايقة من فلانة ممكن تروحيلها هي نفسها و تتكلمي معاها , ان يا هاجر انا اتضايقت منك من موقف كذا كذا. .
كمان ممكن لما تتكلمي معاها هي تقولك اللي حصل و تلاقي نفسك سامحتيها.
لكن ان سعاد تتكلم مع هاجر علي مني , ده مينفعش , و ده اللي هيعمل مشاكل مستمرة بين الناس .
فبشكل عام لو انتي شايفة انك هتقدري تتكلمي بحيادية رهيبة , ومن غير ما تقولي اي حاجة تضايق زميلتك اللي بتتكلمي عنها , وان هي مش هتضايق من اي كلمة انتي هتقوليلها , تبقي مش غيبة , غير كدة يبقي لازم الباب يتقفل .
------------------------------------------------------------------------------
و الشيخ عمر عبد الكافي ,. كان حكي عن واحد كان عنده مشاكل مع مراته , فزمايله بيسألوه , مالك بقالك كام اسبوع مش علي بعضك . .
قال عادي , مشاكل في البيت . .
قالوله : خير ايه اللي حصل . .
قال مشاكل و خلاص , ومستحيل اتكلم عن مراتي . .
بعد كام شهر حصل طلاق , فراحوله , قالوله طمنا بقي ايه اللي حصل , انت مش طلقتها خلاص . .
قال ديه ست غريبة عني و مش في ذمتي , وانا مش باتكلم عن ست في في ذمتي . .
واخدة بالك هو محترم قد ايه ؟ , واخدة بالك ان هي لو سمعت اللي هو قاله لزمايله , هتحبه و تحترمه . .
هو ده قصد الشرع الحنيف , ان الناس متقطعش في بعض , ومحدش ياكل في لحم أخيه . .
وأخيرا متنسيش ان الغيبة من الكبائر . .
عارفة يعني ايه كبائر ؟
يعني راسها براس الزنا و السرقة و القتل , الناس بتتعامل مع الغيبة انها سهلة , لكن هي كارثة كبيرة . .
فموضوع الغيبة لابد يتم حذفه من قاموسك تماما , و اياكي تتكسفي لما تسمعي حد بيغتاب , فتقعدي معاه و تتحرجي تمنعيه او تسيبي المكان و تمشي . .
متنسيش الحديث المهم : ( مَنِ الْتَمَسَ رِضَى اللَّهِ بِسَخَطِ النَّاسِ ، رَضِيَ الله عَنْهُ ، وَأَرْضَى النَّاسَ عَنْهُ ، وَمَنِ الْتَمَسَ رِضَا النَّاسِ بِسَخَطِ اللَّهِ ، سَخَطَ اللَّهُ عَلَيْهِ ، وَأَسْخَطَ عليه الناس )
فانتي خلي اللي يتضايق يتضايق , المهم انك تتصرفي صح . .
و طبعا لو هتوقفي حد , يكون باسلوب لطيف , مش زعيق او شتيمة , يعني بالراحة كدة , حتي لو احرجتي اللي بيتكلم , او تقولي كلام عام زي : طيب خلينا نغير الموضوع عشان مناخدش ذنب