العنوان : التواصل الذكي

القسم: #الاجتماعي

الرقم: 94

السؤال:

 

السلام عليكم ورحمة الله وبركاته انا عندي كدا كام مشكله مع أولادي اول شي بحس ولادي بعاد عني جدا وبحس أنهم ما في عندهم اي عاطفه أو حنيه عليا

 

مع العلم انه ابني الصغير هو 10سنين بس بحس انه ما في حنيه ابدا ولا اي لهفه على خالص واخواته الكبار هما ولاد جوزي بنت عمرها 18سنه وولاد 15سنه بس انا مربيهم من كلمة صغار كتيييييير

 

وأنا لله الحمد ماعندي تفرقه ابدأ وكلهم سعر واحد وهاد فضل من الله ربي طبيعتي انا عصبيه كتير بس طيبه ومابحب ائذي حدا بس احيانا بضربهم لما بيعصبوني كتير

 

انا نفسي اقرب ولادي مني كلهم يبقو يخافو على هنا بيحبوني بس مافيش ايه بحس الحنيه على حتى اللي هوى ابني اللي مني الصغير اللي عمروا 10سنين ده ابني اعمل ايه علشان أقرب ولادي كلهم مني

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

انا هبتدى اتكلم على نقطة معينة اول حاجة لفتت نظرى وهى عصبيتك مع ابنك وكويس انك مدركة الجزئية دى ودى اول خطوات التغيير

 

مشكلتك مش بس عصبيتك لكن مشكلتك كمان في عدم فهم الطريقة الصحيحة فى معاملة ابنك وانك بتضربيه  خصوصا انه 10 سنين يعنى بداية سن المراهقة  .

 

فى الحقيقة لو رجعنا للسيرة النبوية ومواقف النبى صلي الله عليه و سلم مع الاطفال هنتعلم منها كتير وهنتكلم عنها فى نهاية الرسالة  , لكن مشكلة الاباء والامهات دلوقتى انهم بيتعاملوا مع اولادهم بطريقة عشوائية بمعنى " ربيه كده " " لأ ده كده احسن" " طب ما تجرب تعمل معاه كده؟"

 

لكن مفيش حد مستعد كأب وكأم انه يقول انا عايز اتعلم .. انا عايز اتعلم أربى ولادى صح   .

 

وهنا نيجى للسؤال المهم :

 

 ازاى اكسب ابنى العنيد ؟ ازاى اربي ولادى صح ؟

 

الابن عنده 10 سنين زى ما قولنا بداية سن المراهقة يعنى بداية انه يبقى مجادل ويحب يتناقش فى كل حاجة تقوليهاله ومش بس كده ده هيبقى مجادل مستفز

 

يقدر بكلامه يخليكى تتعصبى عليه اكتر وهنا ييجى رد فعلك الغير مناسب اللى بدل ما يصلح الامور هتخليه يعند اكتر

 

والجدال فى امور الحياة معاه مش هتنتهى بس فيه قواعد لازم تحافظى عليه اثناء الجدال معاه ومحاولة تصحيح اخطاءه عشان تستمر العلاقة حلوة بينكم دون خسائر .

 

 

 

• أولا توقفي عن الغضب : متغضبيش اصلا من فكرة الجدال، فكرة الجدال صحية فى السن من 10-17 سنة .. انتى ممكن تلاحظى انه عنيد .. انتى مش واخدة بالك ان السن ده كده .. اقبلى من جواكى كده.. ايوة انا قابلة ان ابنى فى المرحلة دى لازم يجادل.. ليه ؟

 

--------------------------------------------------------------------------------

 

 

• ثانيا  أكدى له دايما فى كل وقت مش ساعة الخناقة لا دا كل وقت قوليله ( انا بحبك مهما حصل ) يعنى حب غير مشروط

 

 

 

• مش لازم انتى كمان تصغرى عقلك ..

 

----------------------------------------------------------------------------

 

•  خليكى دايما حريصة ان الجدل ما يوصلش للصراخ والصوت العالى بشدة: لو لقيتى ان لازم يكون فى عقوبة يبقى تعاقبى بهدوء وبعدها يبقى الصلح سهل ،بلاش الجدال الصدامى، بلاش الصوت العالى ، بلاش يستفزك لغاية ما يوصلك انك تفقدى اعصابك

 

 

• لو راح الجدل مع ابنك فى منحنى عاطفى يعنى عيطلك وانتى مش هينفع توافقى على طلبه لانه غلط اوعى تجرحى عواطفه وتقوليله بلاش دموع مش هتعمل حاجة او مهما عملت برضو مش هسيبك تعمل كده.. ولكن استخدمى كلمات لطيفة "انا حاسة بيك" "انا عارفة انك عايز تروح الحفلة الفلانية بس انا اسفة مش هينفع اوديك " وهكذا بس اوعى تجرحى عواطفه وتتهاونى بمشاعره

 

 

•  دخلى فى الموضوع كلمات لطيفة متدخليش فى صدام من قبل حتى الحوار ما يبدأ .. اتكلمى بنكتة مثلا او اى حاجة زى " على فكرة على الرغم انى مضايقة منك بس التيشرت ده جميل اوى عليك "

• غيرى الموضوع شوية وانتى بتتكلمى قبل ما تدخلى فى جدال صدامى ده هيلطف الجو شوية قبل ما تتناقشوا وتتعصبوا على بعض اوى

 

-----------------------------------------------------------------------------

 

طيب نيجى للسؤال المهم وهو ازاى تكسبى قلبه ؟ وتخليه يحبك ويبقى حنين عليكى ؟

 

•  حبى ابنك :

 

 

 

 

• قللى من استخدام كلمة "لا" معاه بدون توضيح سبب واضح او اعطاء بدائل  , سهل اوى على الام تقول لابنها "لا" على اى طلب يطلبه من غير ما توضح سبب رفضها له فهو يفهم انه مش عايزاه فرحان او ما يهماش سعادته .. تخيلى طلبتى من زوجك حاجة فقال لك "لا" بالتأكيد اول رد منك هتقولى له : ليه لأ؟؟؟

• إلمسى ابنك :  لأن اللمس بيندرج تحت نقطة الحب ولكنى وضعته فى نقطة منفصلة لأهميته البالغة ، صدقينى اللمسة لها مفعول سحرى بسبب او بدون سبب ألمسى ابنك ، ضعى يدك على رأسه ، امسحى شعره ، قبليه ، احتضنيه

 

• عقاب طفلك : مشكلة المشاكل وحديث الساعة وكل ساعة عقاب الاطفال ، بقدر الامكان اضبطى أعصابك ولا تلجئى للضرب الا فى أحلك اللحظات , ولابد تبتعدي عن الضرب القاسى المؤلم المهين انسيه تماما ، الأمر فعلا خطير نفسيا وجسديا ومستقبليا على الأطفال

 

• احترمى ابنك فى الحديث ، فى الطلب منه ، فى الاعتذار ، احترمى مشاعره وهو حزين وهو غاضب وهو فرحان ، احترميه وهو يتحدث معك ، وانصتى له كويس

 

 

• شاركيه اللعب واديله وقت كافى فى اليوم تقعدى معاه وتصاحبيه وتنزلى لعمره ، عيشى معاه أوقات ممتعة خليه ما يزهقش من القعدة معاكى ، رتبى معاه اللعب بتاعته وانزلى لمستوى عقله ، اجرى وراه فى البيت عادى والله واعتبريها رياضة

 

ببساطة لو مشيتي علي الخطوات ديه , هتلاقي نفسك اقمتي تواصل ذكي معاه , وبقي قريب منك فوق ما تتخيلي