الأمل الكاذب
الرسالة السابقة
العنوان : الأمل الكاذب
القسم: #الاجتماعي
الرقم: 93
السؤال:
لو سمحتو بعد إذنكم عايزا آخد رأيكو في مشكله تخص عيلتنا وبسببها البيت مشاكل بس في الأول أعتذر منكم إن الرساله طويله جدا عشان أحطكم في الصوره وتعيشو الوضع معانا .
أخويا إجوز من سنتين هو 33 سنة ومراته 26 ، بيتنا تلات أدوار ،، أخويا دا ساكن معانا في البيت ،، شقته في الدور التالت ،، قبل مايجوز قعد فترة خطوبه حوالي السنه ونص حصلت فيها مشاكل بينو وبين خطيبتو كان بيقول إنها عنيده في كلامها معاه ،، وفي كل مشكله كانو إخواتي البنات بيدخلو وبيحلو المشكله وهما الإتنين كانو بيستجيبو للصلح دا على طول وبيرجع الوضع بينهم طبيعي .
إجوزو وإبتدت المشاكل وإبتدا معاه حرقة الدم والأعصاب ،، جوازهم دام أربع شهور بالظبط وبعدها إنفصلو ،، كانت إنسانه مهمله في جوزها وبيتها جدا ،، أخويا كان لسه عريس ينزل كل يوم يفطر عندنا عشان مراتو مابترضاش تقوم تجهزلو الفطار ،، مهمله في بيتها وعلى طول عند أهلها ،، كنا نحن تحت بيت العيله شايفين كل الوضع الغلط دا ووالله العظيم لا إتكلمنا ولا فتحنا بقنا لأن دي حاجه تخصهم هما وحتى صاحب الشأن ( إلي هو أخويا ) ما إشتكاش منها
صحيح كان أحيانا بيقول عنها قعادها زي غيابها مافيهاش فايده بس ماكنش بيطلب مننا نلاقيلو حل ،، حصل حمل بعد عشر أيام من جوازهم ،، في فترة الوحم إقسم بالله ماخليناها تعمل حاجه عشان كانت بنيتها ضعيفه جدا ،، قلنا لخويا حنتكفل بغداك كل يوم لحد ماتخلص فترة الوحم ،، جه رمضان ،، فطارهم كل يوم عندنا تحت ،، والله والله قلنالها إرتاحي ماتعمليش حاجه تنزل من شقتها على أذان المغرب وتطلع بعد آخر لقمه تاكلها وماكنش عندنا مشكله .
ربنا عالم عاملناها إزاي ،، إقسم بالله كنا بنشيل الأكل لفوق عندهم في شقتهم ،، نساعدوها في تنظيف شقتها ،، الكل بيدلع فيها حتى إسمها بندلعوها بيه وهي قصاد كل دا نظرتها لينا كانت دايما نظرة قرف وإشمئزاز ،، لحد مافي يوم تخانقت مع أخويا كانو أهلها عندها ،، علت صوتها عليه وقعدت تصرخ وتقول إنو بخيل ومجوعني وبيصرفش عليا وكسرت إزاز في المطبخ
إقسملكم بالله العلي العظيم المطبخ مليان من خيرات الله وفي رمضان كان يطلع بيها للمحلات قبل الفطار وبعد الفطار ،، وحتى بعد رمضان ،، طلباتها أوامر عند أخويا ،، بعد المشكله دي سابت شقتها وإحنا حاولنا كتير نمنعها بالرغم من إلي عملتو لكن هي قفلت دماغها وسابت بيتها وراحت لبيت أبوها ،، عرفنا إنها خرجت من بيت أبوها لمدة تلات أيام من غير علم جوزها راحت حضرت فرح وأخويا راح إتخانق مع أبوها بسبب الحكايه دي .
جه العيد الكبير يوم وقفة عرفه أمي قالت نروح نجيبها يمكن يكون إتصلح حالها وتعيد في بيتها مع جوزها ،، راح أخويا الكبير جابها من بيت أبوها ومعاها أبوها وأمها وياريتنا ماجبناها ،، حصل حوار بينا وبين أهلها وهي مستفزززززززين جدااااا لحد ما جوزها طردهم من البيت ،، قالو علينا كلام إحنا البنات والله العظيم كلو كدب ،، قالو إننا كنا نكسر باب شقتها ونستعمل أغراضها وإننا متغاضين منها
نزلت منشور عالفيس على العام بتشتم أمي ودعت علينا بالسرطان وإننا ساحرات وخرابات بيوت وإننا بنات بيتنا مفتوح أي راجل يدخل علينا وقالت على جوزها راجل ديوث وكل دا على الفيس .
دلوقتي هي عايزا ترجع لخويا وأخويا للأسف موافق يرجعها بحجة إن قلبو محروق على بنتو ( هي خلفت بنت ) ،، عرفت تدخلو من باب إن البنت تتربى بعيد عنو وإنها محتاجه لحنان أبوها ،، إحنا رفضنا بشده كبيره جدا وبالذات أمي وقالتلو لو عايز ترجعها براحتك لكن مش هنا مش في بيت العيله روح إشتري شقه برا ورجعها فيها ،، هو زعل وقال لأ ما أقدرش أسيب بيت العيله ،، الوضع في البيت أصبح لا يطاق ،، زعل ومشاكل بسبب الموضوع دا وبالذات أمي زعلانه من أخويا جدا لأن مافكرش حتى يجيبلنا حقنا بعد الكلام إلي قالتو عننا عالفيس .
هل رفضنا إنو يرجعها يغضب ربنا ولا معانا حق ؟ وإيه الحل ؟
آسفه مره تانيه على طول الرساله
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله
رأينا باختصار : النوع ده من النساء نادرا ما بيتغير , و غالبا هي بنفس الفكر المريض الخاص بيها , فالحل انه يطلقها , لأنها هتدمر حياته . .
و التفاصيل هنا
----------------------------------------------------------------------------------
بداية المشكلة حاجتين , الاختيار الغلط من البداية + التعامل الغير سوي من اخوكي لها . .
أولا : الاختيار الغلط واضح في الوصف التفصيلي لصفاتها , الصفات ديه مش بتظهر من يوم و ليلة , ولكن مترسخة عندها من سنين طويلة , وهو للاسف مكانش عنده القدرة انه يتعرف علي حقيقتها في فترة الخطوبة , او ممكن انه شاف صفاتها الحقيقية , بس تعامي عنها عشان بيحبها وكان عنده امل كاذب انها تتغير . .
ويا ويل الشباب من الحب , لما يعمي العين و العقل . .
لما يكون الواحد شايف بالفعل مصايب في الطرف التاني , بس مستمر معاه علي امل مخادع بالاصلاح و التغيير , وطبعا كلام فاضي .
وثانيا التعامل غير السوي معاها . .
يعني ايه التعامل غير السوي , يعني انه كان فاتح باب الكرم بشكل غير معقول , لدرجة إن هي آمنت ان هو "خاتم في صباعها" , وان هو هيجيبلها لبن العصفور لو هي طلبته . .
وبعض الزوجات لما تعرف ان جوزها بيحبها بالشكل الكبير ده , بيستغلو الحب ده لاقذر درجة , مش بس استغلال مادي و فلوس و مشتريات , لأ كمان عشان يقطع في رحمه , ويعادي أهله . .
و النوعية ديه من الزوجات بيعرفو ازاي يستخدمو اسلحتهم الأنثوية (جمال , دلال , بكاء , مخاصمة , محايلة . . ) عشان جوزها ينفذ اللي عايزاه , ولو بدأ يسمع كلامها يبقي كدة مع السلامة كل مفاهم الحياة الزوجية السوية .
وده اللي حصل للأسف .
-------------------------------------------------------------------------------
و من كرم ربنا إن أخوكي بدأ يفوق من الغيبوبة , وبدأ يشوف وجهها القبيح و لسانها الطويل و قلبها الأسود , وبالتالي حبه ليها اختفي او ممكن يكون قل شكل كبير . .
لكن واضح ان عنده دافع الحفاظ علي بنته , انها متترباش بعيد عنه , عشان كدة عايز يجيب مراته .
و المشكلة ان النوع ده من النساء , لما بيعرفو ان اسلحتهم الأنثوية قد نضبت , فبيلجئو لسلاح الأبناء , عشان تجعل زوجها يأتي لها صاغر و مطيع .
و خليني اقوله علي رأيي : مينفعش تضحي بنفسك و باسرتك و امك و اخواتك عشان تجيب بنتك عندك , ده خلل في التفكير .
خاصة إن أصلا لو انت جبت مراتك و استمرت بنفس الوضع , ثق انها هتستمر في "ركوب دماغك" , والاسوء انها هتعلم بنتها نفس الحوار , ومش بعيد تلاقي بنتك لما تكبر تتكلم باحتقار مع عماتها او جدتها , طالما انت وافقت علي الوضع الغير سوي ده .
انا مش شايف حل الا الطلاق , ديه انسانه بفكر مريض . وملهاش حل الا انها تترمي في وضع مادي فقير , عشان تعرف الصح من الغلط .
و احتمال اصلا يكون حبها لبنتها مش كبير , فوارد لما يحصل طلاق انها تقولك تعالي خد البنت , وده هيكون في صالحك , عشان تخليها تتخلص من امها الغير سوية .
لو عايز ممكن تعمل فرصة أخيرة , و يكون بمثابة اختبار لمصداقيتها و حرصها علي بيتها , انها اولا تعتذر اعتذار تفصيلي لاسرتك , وتنشر ده علي الفيس زي ما نشرت الكلام القذر القديم .
و بعدها ترجع بيتك عادي , و انت تمشيها علي الطريق السليم , ان مفيش دلع , مفيش تعامل زبالة , مفيش مشاكل نفسية , لو هي مش بتحب امك و اخواتك مفيش مشكلة , يبقي متتكلمش معاهم و حقها انها متزورهومش , لكن انها تحاول توقع بينكم فهي كارثة .
و في نفس الوقت لازم تعرفها ان مش كل شئ هي تطلبه لازم ييجي ,واياك تكرر الغلطة مع اولادك , الاب اللي بيجيب كل شئ ابنه بيطلبه هو بيدمره حرفيا , وبيصنع منه كائن مشوه يستحيل انه يشيل اي مسؤولية . .
احنا مش شايفين حل الا ده , يا اما الطلاق المباشر , يا اما هي ترجع بس تمشي علي الصراط المستقيم