العنوان : الأساليب الخاطئة

القسم: #الاجتماعي

الرقم: 96

السؤال:

 

السلام عليكم..لو سمحت انا عندى بنتى 5سنين ونص بقالها شهرين تقريبا كل ما تعمل حاجه عاديه تيجى تقولى يعنى مثلا تكون بتلعب من الاطفال ولمست شعرهم او وشهم تيجى جرى تقولى مامى انا عملت كذا...مره كنا ماشين فى الشارع لمست يافطه عاديه مامى انا عملت كذا...تعمل حركة بوشها او حركة رياضية تيجى جرى انا عملت كذا

 

الموضوع زايد عند حده وانا بقيت اتوتر وازعق ليها اقولها اعملى اى حاجه ومتجيش تقوليلى  هى بتروح حضانه بس مش بأنتظام بتاخد درس بتتعامل مع اطفالى عادى بس دايما بحس عندها حته التوتر الزايد...ياريت تردوا عليا وتقولولى الطريقة الصحيحة فى التعامل معاها...وشكرا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

كتير من الامهات والاباء دلوقتى بيتبعوا عدد من الأساليب الخاطئة فى التربية قد ينتج عنها مشاكل كتير فيما بعد، او توجد المشكلة بالفعل مع الطفل وتفضل تكبر معاه ويبقى من الصعب بعد كده تغييرها ، ومن اكبر الأخطاء دى هى : الضرب

 

اللى فى حد ذاته بيسبب اثار نفسية سيئة جدا على الطفل مبدأيا وقبل اى حاجة ، لازم تعرفى ان عملية الضرب للطفل فى السن ده مش هتفيد بحاجة لانها بمثابة إيلام بدنى فقط لمعاقبته على خطأ ما ارتكبه . .

 

 فى حين إن الحقيقة العلمية بتؤكد ان الطفل خلال التسع سنوات الأولى ما يقدرش يفرق او يدرك الفرق بين الخطأ اللى عمله والضرب اللى حصل له كعقاب.

 

يعنى الطفل عمل حاجة غلط قومنا ضربناه علشان عمل كده وهو اصلا مش فاهم اننا ضربناه علشان الغلطة اللى عملها  , لانه دايما بيفصل بين الاتنين وبالتالى الغرض من الضرب اصلا مبقاش موجود يبقى ما استفدناش اى حاجة منه، بل بالعكس أدى الى طريقة عكسية. .

 

ممكن الطفل يحس انه غير مرغوب فيه علشان كده امه او ابوه ضربوه، لإن زى ما قولنا هو مش بيربط بين العقاب والخطأ

 

وبالتالى ممكن يسبب له خلل واضطراب فى التوازن النفسى للطفل اللى مش هيتخلص منه الا اذا رجعت الثقة قوية بينه وبين امه وابوه، وزودوا حنيتهم وتعاملهم المناسب مع الطفل.

 

فضلا عن الاسلام نهى عن الضرب فى السن ده، زى ما الرسول صلى الله عليه وسلم قال ( مروا أولادكم بالصلاة لسبع واضربوهم عليها لعشر ) مع العلم برضو انه الضرب المقصود ميكونش ضرب مبرح .

 

الضرب اضراره النفسية كتير اوى مش بس بتخلى الطفل فاقد الثقة بنفسه لكن كمان دايما هيبقى فاقد الثقة فى اللى حواليه وهيحس بالخوف وعدم الامان.

 

تيجى البنت تكلميها وتحركى ايديكى تلقائيا ناحيتها تفتكرك هتضربيها فتحاول تحمى نفسها، ييجى الباب يخبط تخاف وتتوتر.. وده ناتج طبيعى عن الضرب اللى هى شعرت بيه وفسرته بعقلها الخيالى لحاجات تانية واتترجم لخوف شديد عندها، فبلاش موضوع الضرب ده بلاش.. ودى كانت أول نقطة.

 

----------------------------------------------------------------------------

 

ومن الاخطاء الشائعة فى التربية ايضا، ان الطفل يشاهد الكرتون او التليفزيون بشكل كثير، بعض الامهات بتسيب اولادها قدام الكرتون او التليفزيون عشان ينشغلوا شوية عنها وتروح هى تعمل المسؤليات اللى وراها.

 

وما بيفكروش ابدا فى الاضرار الجسيمة اللى ممكن تنتج من كده، خصوصا ان سن ٥ سنوات دا سن مهم جدا فى بناء شخصية الاطفال، وغرس القيم والأخلاقيات والمبادئ الجميلة اللى هيعيش بيها باقى حياته.

 

ومعظم افلام الكرتون جاية لنا من ثقافات بعيدة عن بلادنا العربية وبالتالى هتنقل قيم مختلفة عننا، بالاضافة الى ان معظمها شخصيات خيالية زى : سوبر مان،باتمان ,  وده فى حد ذاته بيخلى الطفل يحس بقلة الثقة فى قدراته لان طبعا لما يحاول يقلد الشخصيات دى او يطير زيهم مش هيعرف ف هيحس بالفشل

 

بالاضافة انها بتقتل الابداع والابتكار عند الطفل لان ببساطة كل حاجة قدامه شايفها و مش محتاج يتصورها او يعطى فرصة لخياله يفكر فيها.

 

ونلاقى ان امريكا على الرغم انها تمتلك اصدارات كتيرة لافلام الكرتون الا ان الخبراء التربويين بينصحة بعدد محدود من الساعات لا يتم تجاوزها ابدا , عشان عارفين الضرر الكبير علي الطفل من وراها

 

فياريت تحاولى تخليها تشوف الفيديوهات ساعات محدودة اسبوعيا . وانتى طبعا معاها ، حاولى كمان تعملى بدائل للكرتون تشغلى بيها وقتها بطريقة مفيدة بإنك مثلا :

 

• تحكيلها حكايات وطبعا القصص كتير وحتى الخيالية طالما بالكلام لان ده هينمى جواها مهارة التخيل والابداع طالما مش شايفة الصورة قدامها .

 

• او حتى توديها حلقات تحفيظ القران الكريم او لو ما قدرتيش خلاص حاولى تحفظيها انتى بنفسك وشغلى القران كتير فى التليفزيون وهى تسمعه وتنشغل بيه

 

• حاولى تشغلى وقتها بحاجات تانية مفيدة وتنمى مهاراتها.

 

• خليكى صديقة لها قبل ما تكونى أم، خليكى الركن الحنين اللى تجرى عليه اول ما تحس بالخوف، حسسيها بحنيتك وقوليلها انا بحبك علشان تحس فعلا بكده وتثق فيكى، وحاولى تتحكمى فى اعصابك لما تحسى انها خلاص نرفزتك او عملت حاجة غلط

 

• عرفيها الغلط وعلميها الصح وخلى اسلوب المناقشة هو سيد الموقف دايما ، خلى بالك ان الطفل دا بيحب التقليد جدا يعنى لو شافتك بتكذبى هتكذب زيك ولو شافتك بتسمعى تليفزيون كتير هتسمع زيك ..

 

• احكيلها حكايات ولو حتى حدوتة قبل النوم وعلميها الصدق والامانة والاخلاق، وافتكرى دايما ان مهمتك مش سهلة ومحتاجة الصبر والاجتهاد علشان تجنى ثمرتها فى النهاية.