الإطار السليم
الرسالة السابقة
العنوان : الإطار السليم
القسم: #الاجتماعي
الرقم: 97
السؤال:
السلام عليكم ورحمة الله وبركاته
عندي ابني عنده 22سنه طبعا زي أي أب وأم نفسهم يفرحوا بابنهم
المهم في يوم زوجي كان جاي من عمله قابل واحده ست وبنتها في إحدى وسائل المواصلات عن طريق الصدفه الست فتحت مواضيع الشباب والبنات والارتباط وهكذا وحصل كلام بينها وبين زوجي عن أن بنتها مرتبطه بابن خالتها وهتفركش لأنها مش بتحبه فزوجي رد وقالها والعريس عندي
فالست اخدت رقم تليفون زوجي علشان يحصل تعارف بين العائلتين وفعلا هي اتصلت ع زوجي تاني يوم وطلبت إننا نتقابل ف مكان عام واتعرفنا ع بعض
المهمانا حسيت انها خفيف جدا في تصرفاتها كان معظم كلامها مع زوجي وانا طلبت منها رقم بنتها علشان ابني يكلمها ويفهموا بعض هي مااعترضتش
ولما روحنا البيت كانت البنت بعتت لابني قلب واغاني رومانسيه وثاني يوم كلمته فيديو وهى بشعرها برغم إنها محجبه ومامتها كلمته فيديو وهى من غير نقاب برغم هي منتقبه والبنت بتقول لابني يا قلبي و روحي وهي لسه عرفاه من يوم واحد وكل ده لسه هتفكرش مع العلم أبوها عايش
المشكلة بقى انا قلقانه من تصرفاتها هي وأمها هل أكمل ولا انسحب ملحوظه احنا عكسهم تماما وحساهم خفاف جدا ياريت تفيدوني
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام ورحمة الله وبركاتة
الحقيقة أنا قرأت القصة كذا مرة ووقفت كتير أوى فى كل جملة كتبتيها ، ما بقيتش عارفة أتكلم عن ايه ولا ايه لأن الموضوع من أوله وأخره بدون عقلانية وان دل يدل على سوء التقدير .
يبدأ الموضوع بإن زوج حضرتك يتعرف عن طريق الصدفة البحتة بست معاها بنتها فى المواصلات، ما يعرفوش بعض أصلا او حتى لو يعرفوا بعض من بعيد ويقعدوا يتطرقوا لموضوعات خاصة ويفتحوا مواضيع وفجأة وبدون مقدمات يعرف إن بنتها هتسيب خطيبها لسبب ما .
وبالطبع محدش يقدر يحدد مدي مصداقية الست في كلامها , يا تري بالفعل هتسيبه للسبب ده , يا تري اصلا هي ناوية تسيب خطيبها ؟ يا تري من الاساس هي مخطوبة ولا بترسم كلام تاني ؟
و الغريب ان زوجك يطلب إيديها لأبنه وهو عارف انها لسة مخطوبة حتى لو ناوية تفركش لكن لسة ملتزمة هى واهلها بوعد لإنسان مالوش أى ذنب غير انه ارتبط بواحدة غير أمينة هى وأهلها خانت العهد اللى بينهم
إحنا مش بنتكلم دلوقتى عن كونها عايزة تسيبه ولا لأ لإن ده طبعا حقها ، لكن كمان زى ده من حقها فمن حق الانسان المرتبطة بيه " خطيبها" تحترمه فى وجوده وغيابه، ولما تسيبه رسميا خلاص تبقى تعمل اللى هى عايزاه .
لأ وكمان أخدت مواعيد منكم واتقابلتوا كلكم وعقدتم العزم بقى على حكاية انكم تتقربوا اكتر من بعض وتتعرفوا أكتر حتى لو ده عكس الدين والتقاليد، ونسيتوا حاجة مهمة أوى نسيتوا قول رسول الله صلى الله عليه وسلم
( َلا يَخْطُبْ الرَّجُلُ عَلَى خِطْبَةِ أَخِيهِ حَتَّى يَتْرُكَ الْخَاطِبُ قَبْلَهُ ، أَوْ يَأْذَنَ لَهُ الْخَاطِبُ ) وانتى بنفسك قولتى انها كانت بتكلم ابنك وهى مازالت مخطوبة فبالله عليكى هل ده كلام ؟ ؟
فمينفعش أبدا اللى انتو عملتوه ده لا شرعا ولا حتى أخلاقيا ينفع تعملوا كده .. مش بس كده ، لا ده كمان الست أمها هى اللى متقمصة دور الراجل وتتصل وتعمل أقصى ما بوسعها علشان الموضوع يمشى ، هنا السؤال : هل الست دى كده مش هقولك تعرف الدين لكن هقولك هل تعرف الأصول ؟
فين دور زوجها فى التدخل والقوامة اللى ربنا خصصها له؟
-------------------------------------------------------------------------------
نيجى بقى للدور التانى حضرتك.. طلبتى منها رقمها علشان تقدر تتواصل مع ابنك ، ليه؟ علشان يتعرفوا أكتر لما يتكلموا ويتناقشوا ، ده على أساس ان مفيش حاجة اسمها رؤية شرعية وبرضو هيقدروا يتناقشوا ويتكلموا زى باقى الناس فى الاطار السليم .. بالله عليكى ترضيها على بنتك ؟
لو عريس جه لبنتك وطلب رقمها وانه عايز يقرب لها اكتر قبل ما يتقدم رسمى هل توافقى بكده ؟ هنسيبلك الاجابة
وتصرف البنت الأحمق وانها تبعتله اغانى ودباديب على الفيس وشوية شوية هتلاقى عنيها قلبت عيون ،لأ
والمصيبة الاكبر كلمته فيديو وبشعرها ، هل دى كده عندها حياء ؟ هل عندها دين؟ هل هى دى اللى النبى صلي الله عليه و سلم قال عليها ( فاظفر بذات الدين تربت يداك)
هل دى مؤهلة انها تكون زوجة مسؤولة عن بيت وزوج واولاد وهتربى اطفالها ازاى ؟
البنت السهلة اللى بترخص نفسها بقلة عفتها وقلة حياءها وتبرجها لا يتوقع منها شئ
انا مش بتكلم وكأنى عندى ميزان الايمان اللى أقيس بيه إيمان الناس ودينهم، لكن لنا الظاهر ولله النوايا ومحدش عارف مين هيموت على حسن الخاتمة ورضا الله ، لكن هل دى تصرفات ناس عندهم دين ؟ يمكن بعدين تبقى كويسة جدا وتلتزم بالدين وتبقى أحسن من أى حد تانى لكن السؤال هنا طيب ولو اتجوزت الابن و ما التزمتش وقتها هنتصرف ازاى ..
وضحنالك نقاط مهمة فى الموضوع يمكن ما كنتيش شايفاها وواخدة بالك منها والقرار النهائى عندكم مش عندنا ، لا هنقولك سيبوها ولا هنقولك كملوا الجوازة .. اظن النقاط وضحت . .
سامحينا لقسوة كلامنا , بس فعلا ده من كتر ما بنشوف مآسي زوجية , من إهمال عدد من الأسس شديدة الأهمية
ربنا يوفقكم يا رب , ويفتح لكم الخير دايما .