العنوان : العُذر الوهمي

القسم: #العاطفي

الرقم: 29

السؤال:

 

 أنا عندي مشكله ومش عارفه اتخطاها

 

مبدئيا كدا أنا عندي إعاقه

 

حبيت بني آدم وانا عندي ٢٠ سنه ومن اول يوم طبعا وهو عارف اني عندي اعاقه بعد فتره من ارتباطنا عرفت أن والدته رفضاني علشان الاعاقه ف انا بعدت بس رجع وكلمني وحلف كتير أنه هيعمل المستحيل وهيحاول يقنع والدته وطلب مني كتير جدا افضل جنبه وأنه عمره ماهيتخلي عني وبالفعل رجعنا تاني ووقت جنبه دور علي شغل واشتغل وبعدها ب سنه ونص قال إنه الشغل مش مرتاح فيه وأنه هيسافر برا سنه ونص وإني اقف جنبه واستحمله وفعلا سافر وفضلت مستنياه بصيت لاقيت العمر عدي وبقا عندي ٢٥ سنه وهو رجع وبدون مقدمات قال إن مش هينفع يكمل لأن والدته رفضاني تماما والدكتور مانع عنها الزعل وأنه لما بيفتحلها موضوع ارتباطنا بتتعب وبعد كام شهر خطب وفضل تقريبا سنتين خاطب والشهر اللي فات اتجوز

 

وأنا النهارده ٢٧ سنه واقفه محلك سر كل حاجه حلوه في حياتي مبقتش شيفاها بقيت حسه اني منتهية الصلاحية

 

ومش عارفه اعمل ايه وأنسي إزاي   وازاي أسامح علشان أرتاح

 

كان نفسي اوي اوي ابقي ام بس المشكله اني مبقاش عندي امل في اي حاجه

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

أهلا بيكي . .

 

خليني أبدأ كلامي بتعليق بسيط علي اللي هو عمله , بعدها أقولك انتي المفروض تعملي ايه . .

 

------------------------------------------------------------------------------------

 

بالنسبة ليه هو , لو هاتعامل معاه بحُسن الظن هقول عليه إنه إنسان ضعيف الشخصية و غير قادر علي تحمل المسؤولية , ولو هافترض سوء الظن لابد هتهمه بالخداع و الكذب  . .

 

لو هاتعمل معاه بحُسن الظن , فلازم اقول إنه بالفعل ضعيف الشخصية , لأنه مكانش قادر انه يتخذ قرار مصيري زي الزواج بنفسه , وترك لوالدته انها تتحكم في مسار حياته .

 

لا يجوز شرعا للأب أو الأم انهم يجبرو ابنهم او بنتهم علي زواج معين , وغير مناسب انهم يغضبو عليه لو هو اختار شريكة حياته , طالما كانت تتسم بالدين و الخلق و من أسرة محترمة , فاللي أمه عملته خطأ لا يغتفر , وهو كان يقدر يتصرف لو كان عايز , لكن قراره بالتخلي عنك لا يفسر إلا بمحمل سلبي . .

 

خاصة إنه بالفعل من أول يوم وهو عارف كل شئ عنك , فإنه يستمر معاكي سنين طويلة و بعدها يفاجئ بقرار أمه بالرفض , ده شئ لا ينم إلا عن شخصية بعيدة كل البُعد عن التعامل السوي .

 

ولو هكون سئ الظن بيه , فلازم هاتهمه بالخداع , وإن وارد ميكونش في دماغه من اليوم الأول اي ارتباط حقيقي بيكي , لكن كان مستمتع بالتواصل معاكي لسنين طويلة , واول مايزهق يطلع بحجة "أمي هتغضب عليا" , يخترع عذر وهمي عشان يخلع . .

 

------------------------------------------------------------------------------------

 

ليه بافتح سيرته تاني دلوقتي ؟ ؟

 

عشان أؤكدلك ان ربنا كرمك بالفعل انه مباقش من نصيبك , وان من نعمة ربنا عليكي انه سابك . .

 

ارتباطك بإنسان صفاته تتأرجح بين ضعف الشخصية , او عدم القدرة علي تقييم الأمور , و مقدار محتمل من الكذب , هو إرتباط محكم عليه بالفشل من البداية , و هيحتوي علي كم لن ينتهي من المعاناة و المشاكل المستقبلية . .

 

متنسيش ان أغلب حالات الطلاق اللي بتشوفيها , هي نتيجة ارتباط بين طرفين أحدهما او كلاهما يحتوي علي عدد من الصفات الغير سوية , واللي لا شك بتقوم بتدمير كل معاني الحياة الزوجية . .

 

و اعرفي ان أي واحدة مطلقة او حتي تعيش في زواج فاشل حاليا , تتمني لو رجع بيها الزمن لورا , وكان حصل فسخ لخطوبتها من البداية , من غير الدخول في لمساحة المظلمة للزواج الفاشل . .

 

عرفتي ليه بقولك ان ربنا كرمك لما الشخص ده بعد عنك ؟ ؟

 

هو بالفعل غير سوي , و احتمالية نجاح الزواج بينكم لو كان تم احتمال قليل , ولأن المولي تبارك و تعالي يختار ما هو أصلح لعباده , فهو سبحانه اختار لكي انه يبعد عن طريقك .

 

------------------------------------------------------------------------------------

 

طب ماذا عن الألم النفسي اللي حصل ليكي دلوقتي ؟ ازاي تتغلبي عليه وتقدر تتجاوزيه ؟

 

هقولك علي اربع خطوات , لو استمريتي عليها اتأكدي انك هتتعافي سريعا من الألم الموجود .

 

 

 

• أولا لازم تغيري قناعتك إنك خسرتي إنسان كويس , لازم تؤمني من جواكي انه بالفعل كان هيأذيكي , وان استمرار العلاقة بينكم معناها سلسلة مستمرة من العذاب النفسي لكي , الإنسان اللي باعك عشان مش قادر يواجه اسرته , كان هيبيعك بعد الجواز لو قالوله طلقها , حتي لومعاكي أطفال . .

 

 

 

• توقفي عن التفكير فيه

 

عقلك هيحاول يمارس هواية  "اجترار" ذكرياتك معاه , ديه أكبر غلطة تعمليها , اي تفكير فيه معناه زيادة آلامك علي الفاضي , وفي حين هو شايف حياته انتي بتتعذبي عشان انسان ميستاهلش دمعة واحدة من دموعك .

 

فورا توقفي عن التفكير فيه , لا بالخير ولا بالشر , أصلا امسحيه من ذاكرتك , واعرفي ان " بعيد العين بعيد القلب" , وبمجرد ما يبعد عن تركيزك كام شهر , تختفي ذكراه من عقلك و قلبك .

 

 

 

 

​

• انشغلي

 

طول ما انتي فاضية , شياطين الحزن و الإكتئاب هتجيلك , لازم يكون عندك برنامج كامل تملي بيه يومك , و متسيبيش وقت فراغ تجتري فيه أحزانك

 

لو تقدري تتعلمي حاجة جديدة , تابعي كورس لغة علي اليوتيوب , روحي مركز كومبيوتر و اتعلمي لغة برمجة , اعملي دراسات عليا في تخصصك , شوفي مكان تشتغلي فيه او حتي تتطوعي بشكل خيري . .

 

 

 

• استردي ثقتك بنفسك . .

 

وديه حاجة محتاجة تدريب و متابعة , بس تقدري تعمليها لو عندك الإرادة الكافية . سنك صغير , كتير من البنات بتتجوز في التلاتينات , ولسة الفرص قدامك.

 

لازم تنسي الجملة اللي قلتيها في رسالتك : ( كل حاجه حلوه في حياتي مبقتش شيفاها بقيت حسه اني منتهية الصلاحية , مبقاش عندي امل في اي حاجه ) , كل الكلام اللي في الإطار ده هو تدمير للذات , وياريته عشان إنسان يستاهل , ده اصلا ابتعاده عنك نعمة .

 

و أخيرا عالجي جرح قلبك بالقرب من الله , ثقي انك هتلاقي في الصلاة و القرآن والدعاء و البكاء بين يدي الله خير علاج .