الخطوة الحمقاء
الرسالة السابقة
العنوان : الخطوة الحمقاء
القسم: #العاطفي
الرقم: 30
السؤال:
فى الحقيقة هى قصة صاحبتى عمرها 25 سنة وانا عايزة اساعدها
هى و واحد جارهم كانت بتكلمه ع الفيس مع العلم انه متجوز فبعتتله دعوة حلوة من الحرم على اساس انها تفرحه وبس هو كمان نظراته لها انه معجب بيها وهى عرفت كده من نظراته واعجبت بيه كمان بس مكانوش وصلوا للحب لسا ولا اصلا كلموا بعض ومكانوش يعرفوا حتى صفحات بعض
فدعتله هناك فى الحرم ب اسمه وكتبت اسمه فى ورقة قصاد الكعبة ففكرت تبعتهاله من اكونت تانى لها لصفحته عشان ما يعرفهاش ونفس الوقت تفرحه لما يشوف الدعوة لانها نفسها تشوفه فرحان اوى
وفعلا بعتتله بس هو فرح جدا وحب يعرف مين اللى عمله كده ودعاله هناك وافتكره كده وفى النهاية عرف مين واتعلقوا ببعض من خلال الكلام بس حتى ما قابلوش بعض اصلا ولا هى كانت بتخليه يشوفها مع انهم جيران وسهل تتحجج ب اى حجة عشان تخليه يشوفها لكن هى فاهمة صعوبة الموقف
والموضوع بدأ انها اصلا كانت حلمت بيه حلمين معناهم انه مضايق من حاجة ف حياته ومخنوق وكانت بتدعيله كتير بعد الحلمين ومن هنا ابتدا تعلقها بيه من كتر ما كانت بتذكر اسمه فى دعاءها من غير هو ما يعرف وهي حست ان الحلم ده رسالة من عند ربنا ليها وبتقول اكيد ربنا له حكمة يبعته ليها ف الحلم اشمعنا هى اللى تحس بيه كده من غير ما تعرف
ومع انهم حبوا بعض واتعلقوا ببعض وحسوا انهم بيخافوا ع بعض وعلى فرحة بعض لكن عمرها ما فكرت حتى تدعى ربنا انها تتجوزه عشان خايفة تكسر قلب مراته بس هى مستنية اى شاب كويس ييجى وتتجوزه ومش موقفة حياتها ع اللى بتحبه مع انها بتحبه اوى
وهو طلب يتجوزها عشان حبها قال انا مش هغضب ربنا فيكى وهتجوزك طالما حبيتك بس هى بتهرب من الطلب ده لانها مش ناوية تتجوزه عشان هو متجوز وفى نفس الوقت عايزاه يفضل معاها يكلمها لحد ما نصيبها ييجى وقالت طالما كده كده هيحصل فراق يبقى يحصل وقت لما يبقى غصب عنى ونصيبى ييجى لكن انا وهو ماليين حياة بعض خلاص
مع العلم انها دايما حاسة بالذنب انها هى اللى بعتتله من الاول وظلمته وظلمت نفسها بس مش قادرة تبعد عنه
مع العلم هي متدينة جدا ومحافظة ع الصلوات والنوافل والاذكار والقيام والحجاب وبتدعى كتير ربنا يعملهم الخير ويرضيهم بيه وواثقة فى حسن اختيار ربنا بس الحب بقى كمان هي عمرها ما كلمت اولاد قبل كدة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
انا قرأت الرسالة أكتر من مرة عشان اقدر استوعب اللي حصل , وكل ما أقرأها يزداد يقيني بسفاهة اللي حصل . .
مش لاقي للأسف مصطلح اخف او ابسط من كلمة "سفاهة" , لأنه بالفعل يعبر عن إحساسي بالاحداث . .
سامحيني علي قسوة الفاظي في الرسالة ,بس لابد لما نشوف الغلط اننا نمسك اللي غلط و نقرصه من ودانه , ونعرفه حجم الجريمة اللي عملها , وإلا هنكون بنضحك علي نفسنا , وبنتخلي عن امانة نقل العلم . .
يعني هي كبنت محترمة و متدينة و بتخاف ربنا و ذات حياء و مش بتكلم ولاد , فبكل سذاجة تصور اسمه في الحرم المكي الشريف و تبعتهوله , و قال ايه , هو مش هياخد باله و مش هيعرف حاجة . .
يبقي الناس بتدفع الآلاف عشان يروحو في رحاب بيت الله المعظم , عشان يتمسكو بأستار الكعبة , و يغسلو عيونهم بدموع التوبة و التقرب من الله , وهي رايحة عشان تقوم بتصرف طفولي ساذج , إنها تتواصل مع راجل متزوج . .
ايه الخيبة التقيلة ديه ؟ ؟
بالله عليكي لو هي كانت متزوجة , وشافت واحدة بتبعت لجوزها شئ مماثل , كانت هتقول عليها ايه ؟ ؟
اكيد مكانتش هتقول عليها كلمة أقل من : سفاهة و حماقة . .
و هي مش صغيرة , 25 سنة يعني اللي زيها زوجة و أم و معاها أطفال , معقولة فيه حد يفكر بالطريقة الحمقاء ديه ؟ ؟
لما تصرف زي ده يخرج من واحدة بعيدة عن الدين والحياء مش بنستغرب , لكن لما زميلتك اللي بتتقرب إلي الله بشكل دائم تعمل الحماقة ديه ,يبقي لازم نضرب كف علي كف , و فين ؟ في بيت الله الحرام ؟ اللي الحسنة فيه بعشر امثالها و السيئة فيه بعشر امثالها كمان ؟ ؟
الناس رايحة تحب في الكافيهات و علي الكورنيش ,و هي رايحة تحب شاب متجوز في رحاب الكعبة ؟ ؟
شئ مؤلم و الله . .
------------------------------------------------------------------------------------
وسلسلة الحماقات بدأت من تفسيرها الساذج للحلم اللي شافته , شافت انه بيعاني ومتضايق , فقالت تفرحه انها تعلق قلبه بواحدة تانية غير زوجته , فكرة عبقرية !!
ليه مفتكرتش الآية الثامنة من سورة فاطر (أَفَمَن زُيِّنَ لَهُ سُوءُ عَمَلِهِ فَرَآهُ حَسَنًا ) ربنا بيوصف الناس اللي بيشوفو عملهم السئ علي إنه شئ إيجابي و رائع , يشوفو ذنوبهم علي إنها حاجة جميلة .
ليه مفتكرتش الحديث اللي في صحيح البخاري (لا يؤمن أحدكم حتى يحب لأخيه ما يحب لنفسه) , ليه محطتش نفسها مكان مراته لو شافت جوزها فرحان جدا ان واحدة بعتتله اسمه من الحرم , وهي بتضرب كف علي كف
ليه هي فسرت الحلم علي إنه رسالة من المولي تبارك و تعالي ؟ ؟ يعني معقولة ربنا هيبعت لها رسالة ان تواصلي مع فلان المتجوز عشان هو متضايق ؟ ؟ بالله عليكي ده كلام ؟ ؟
هل ده تفكير واحدة في سن الرشد ؟ معقولة واحدة تفكر بأسلوب (ربنا له حكمة يبعته ليها ف الحلم اشمعنا هى اللى تحس بيه كده من غير ما تعرف) , ده كلام ؟ ؟
ولو كانت هي بعيدة عن الدين كنا ممكن نعذرها و نعرفها الصح من الغلط , لكن كونها بتحافظ علي حدود و محارم الله , يخلينا نندهش من تصرفها الغير معقول . .
شوفي آية سورة الأعراف مطابقة ازاي لنفس الموقف ( وَإِذَا فَعَلُوا فَاحِشَةً قَالُوا وَجَدْنَا عَلَيْهَا آَبَاءَنَا وَاللَّهُ أَمَرَنَا بِهَا قُلْ إِنَّ اللَّهَ لَا يَأْمُرُ بِالْفَحْشَاءِ أَتَقُولُونَ عَلَى اللَّهِ مَا لَا تَعْلَمُونَ ) , معقولة ربنا هيأمرها انها تبدأ في خطوات خيانة زوجية ؟
اي حد فينا بيشوف حلم بيظن إنه رسالة من ربنا , وطبعا ده كلام غير سليم , الرؤيا لها شروط معينة , وهي نادرة الحدوث من الأساس , و 90 % من اللي بنشوفه في المنام هي تفاعلات العقل الباطن مع رغباتنا المكبوتة مش أكتر . .
يعني هي عشان في الاساس من جواها رغبة انها تتكلم معاه , فشافت في الحلم ترجمة لرغبتها المكبوتة , فمنتهي التبجح ترجمت رغبتها لعمل علي أرض الواقع , وكانت بداية المأساة . .
-------------------------------------------------------------------------------------
و ياريت التجاوز توقف عند الرسالة ديه و خلاص , لأ ديه تواصلت معاه – و لسة بتتواصل – في تصرف مدهش يخلينا نتسائل عن دي استقرار الإيمان في قلبها , و عن تأثيره اللي المفروض يفرملها عن السفاهة ديه . .
و هو مش أقل منها في الحماقة , انت كشخص متزوج لابد تغض من بصرك و تحفظ فرجك كما أمرك المولي تبارك و تعالي في سورة النور , لو عايز تتجوز تاني يبقي تخبط علي البيت من بابه , مش تربط قلبك بعلاقة انت عارف ان ملهاش مستقبل محدد , وعارف انها بتهد البيت .
بالله عليك توافق علي مراتك تتواصل مع شاب بالشكل ده ؟ توافق علي أختك تكون في نفس مكان البنت ديه ؟ ليه بتحرم عليهم اللي بتحلله لنفسك , ايه الخيبة اللي الناس فيها ديه . .
ومن الواضح إن الشيطان نجح بامتياز في مهمته واللي كانت أول خطوة فيها في بيت الله الحرام , و ان القلبين صارو معلقين ببعض , لدرجة انها توصف ( نفسها تشوفه فرحان , بيخافو علي بعض , انا وهو ماليين حياة بعض ) ده المتجوزين مش بيحبو بعض بالشكل ده . .
لازم هو و هي يثقو انهم ماشيين في طريق غضب الله , وانهم بينتهكو حرماته سبحانه , و ان كل ده هيكون ليه انعكاسات سلبية خطيرة علي كلا من بيته هو , بيتها لما هي تتجوز . .
هي بسذاجة بتقول : ( وفى نفس الوقت عايزاه يفضل معاها يكلمها لحد ما نصيبها ييجى ) هي بتظن ان لما يجيلها حد يتقدملها , فهي بسهولة هتنسي الشاب ده , وتفتح قلبها لخطيبها و تعيش معاه في سعادة و هناء , هي مش عارفة انها بتهدم اي فرصة حقيقية لبناء اي علاقة صحيحة مع زوج في المستقبل , لو استمرت في التواصل معاه . .
------------------------------------------------------------------------------------
فالحل دلوقتي حاجة من اتنين ملهاش تالت . .
اما انهم يتجوزو , وده في حالة ان هو قادر ماديا و معنويا و نفسيا علي التعدد و تبعاته , و علي العدل بينهم , لو هو قادر علي ده , وهي مستعدة للتعدد و تبعاته , وهو مستعد لأي رد فعل من زوجته الأولي ,و اللي ممكن تطلب الطلاق و تاخد اولادها و تجبره يجيبلها شقة و يدفع نفقة شهرية , لو هما مستعدين للتبعات ديه كلها يتجوزو . .
لو مش هيقدرو يستحملو , يبقي فورا من غير تأخير يقطعو اي تواصل بينهم , لا مكالمة اسبوعية ولا شهرية ولا فيس ولا واتس , اي تواصل بينهم هو تعميق للجرح اكتر , وهو تدمير لنقاء الحياة الزوجية بينه و بين مراته , وهي لازم تبكي طويلا بين يدي المولي تبارك و تعالي انها بسذاجتها افسدت عليه هدوء حياته الزوجية , وجعلت قلبه معلق بها , و قد تكون السبب في مشاجرات يومية بينه و بين زوجته . .
لازم تبكي بين يدي الله انها بدأت الخيبة ديه كلها من بيت الله الحرام , الناس تروح هناك عشان يطلبو المغفرة و تكفير الذنوب , وهي رايحة عشان تدمر حياة انسان , حتي لو مش عن عمد . .
خلينا تقتنع ان اي استمرار في التواصل معاه يبقي هي بتحكم علي نفسها و عليه هو بتواصل المأساة , ولما هي تيجي في المستقبل و تلاقي انها مش عارفة ترتبط بحد لأنها دايما بتقارن بين خطيبها و بين الشخص اللي بتحبه , يبقي متلومش الا نفسها