المشكلة المتكررة
الرسالة السابقة
العنوان : المشكلة المتكررة
القسم: #العاطفي
الرقم: 32
السؤال:
انا كان عندي مشكله كبيرة .
اتعرفت علي شاب من شهور طويلة و حبني و حبيته . و كنت احيانا بخرج معاه و بيحصل شوية تجاوزات
ووعدني انه هيخطبني لما يخلص الكلية و الجيش وكل ما اعرفه اني قلقانه يحلفلي انه مش هيسيبني ابدا
دلوقتي هو خلص الجيش من كام شهر و بياجل معاد الخطوبة من غير سبب و يقعد يقولي ظروف و كدة مع اني عارفة انه مستريح ...
المصيبة بقي ان ماما عرفت و عملت خناقة كبيره معايا و بهدلتني ولما قلتله كدة قالي كل شئ نصيب و احنا مش لبعض...وبعدها غير رقمه و عملي بلوككك من الفيس
وانا دلوقتي نفسيتي تعبانه جدا ومش قادره اصدق اللي بيحصل دا اصلا انا مش عارفه انسي وابدا من جديد لاني مش قادره اتخيل انه قدر يضحك عليا انا ويتخلي عني ..
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله . .
المشكلة المتكررة التي لن نمل من الحديث عنها , ولن نتوقف عن التفصيل فيها , طالما الأزمة منتشرة و مستمرة بين البنات . .
وهي مشكلة : التواصل مع اي شاب خارج إطار الزواج .
خدي بالك انا باتكلم بس عن التواصل , يعني التواصل في حد ذاته هو مشكلة , وبيتبعها مآسي , والبنات مش بيسمعو الكلام لغاية لما يتقرصو للأسف . .
اتكلمنا عنها كتير في القسم الاجتماعي و القسم العاطفي , كفاية رسالة : الصياد والفريسة اللي شرحنا فيها سيكولوجية الصياد (الشاب) , اللي بيتربص بالفريسة (البنت) , وازاي انه بيبدع في الحيل عشان تقع في شباكه . .
و لما تقع يرميها ببساطة , لأنه اساسا مش عايز الا كدة , هو لا عايز حب ولا نيلة , هو عايز يشبع غريزته الحيوانية .
انا مندهش إنك إلي الآن مش شايفة انه كذاب من أول يوم , وانه مخادع ومش عايز ارتباط ولا جواز , مفيش حد يصاحب بنت شهور طويلة عشان يخطبها في الآخر .
و مصدر الإندهاش اني مقتنع ان البنت لازم تحكم عقلها فوق قلبها , عشان لو سمعت كلام قلبها هيوصل معاها لمساحات مظلمة , ربنا يحفظنا
و الأزمة ان "اللي بيدوق مش هيشتري" , اعرفي ان اللي عمل تجاوز معين مع بنت , عمره ما هيتجوزها , حتي لو كان التجاوز بسيط .
لأنه ببساطة مقتنع انها زي ما تساهلت معاه , فهي اكيد تساهلت مع غيره , ووارد تتساهل مع اي حد تاني , حتي لو كان التساهل ده شئ خفيف , هو مش هيقتنع بفكره المريض انها عملت كدة عشان بتحبه , هي غلطانة و هو مجرم .
--------------------------------------------------------------------------------
طب و الحل ؟ ؟
الحل ببساطة في الخطوات التالية , اللي ارجوكي متكسليش عن اي خطوة فيهم .
- بداية لازم يكون فيه توبة الي الله , ايوة انتي موصلتيش للمساحة المظلمة ربنا يحفظنا , بس اللي حصل مش قليل , و اي تجاوز بين ولد و بنت , حتي انه يمسك ايديها , او يخرجو مع بعض لوحدهم , اسمه ذنب , وهو مش قليل .
و هنا كنا شرحنا خطوات التوبة بالتفصيل في رسالة : لذة المعصية
-
تاني خطوة هي الإعتذار لوالدتك و تعرفيهم ان ده كان من طيش منك , وانك اتخدعتي فيه , متكابريش و متقوليش انه كويس , او ان عليه ضغوط , والا هيعرفو ان دماغك زي ما هي , اعتذري و عرفيهم ان خلاص انتي اتغيرتي و الباب ده اتقفل من حياتك
- الخطوة التالتة انك تؤمني انه مجرم , لازم من جواكي تعرفي انه إنسان مخادع كذوب , وانه كان معاكي بيتسلي مش اكتر , وان هو هيعيد التسلية مع بنات غيرك , لغاية لما يأتيه العقاب الرباني مالم ربنا يتوب عليه, ربنا يتوب علينا جميعا
- الخطوة الرابعة انك تقفلي الباب ده من الأساس , تمنعي اي تواصل معاه لاي سبب , خدي بالك هو وارد بعد فترة يفك البلوك و يكلمك , او انه يكلمك من حساب تاني , لو انتي تواصلتي معاه ساعتها يبقي متلوميش الا نفسك , واعرفي انك كدة هتدمري حياتك , و هتخلي اسرتك تشعر بالعار منك. .
-
متكرريش نفس الغلطة مع اي حد تاني , اقفلي باب التواصل اصلا مع اي شاب الا لو كان جاي يخبط علي البيت من بابه , ساعتها اهلا بيه , لكن اي حد تاني بيتسلي اقفلي الباب فورا في وشه
-
اشغلي يومك و حياتك كلها بحاجات مفيدة , عشان لما الشيطان يحاول يدخل لك , يلاقي انك بالفعل مش فاضية للهراء ده
ربنا يوفقك و يتقبل منك التوبة , ويحفظك من كل شر