الطريق إلي الجنة
الرسالة السابقة
العنوان : الطريق إلي الجنة
القسم: #الديني
الرقم: 33
السؤال:
السلام عليكم ورحمة الله وبركاته
السؤال دا مشوش عليا شويتين انا كفرد مسلم ازاي اعيش يومي الطبيعي علشان انول رضا ربنا وادخل الجنه
بمعنى أصح ايه المطلوب منى من اول ما اصحى لحد ما انام بخلاف الصلاه والصوم دول امر مفروغ منه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله . .
سؤالك علي بساطته , إجابته مش هتكون بسيطة , لأن هي جوهر حياة كل واحد فينا , عايش في الدنيا بحثا عن مرضاة الله تبارك و تعالي . .
و إجابة سؤالك ده , هو الشئ اللي شغل بال الآلاف من التابعين و السلف , واستغرقو فيه عمرهم في تدوين و كتابة و صياغة وسائل عملية و خطوات تنفيذية . .
و إلي الآن شيوخنا و اساتذتنا الأفاضل ,بيبذلو ما بوسعهم لمحاولة الإجابة علي سؤالك , عن طريق الدروس او الخطب او المدونات المقروءة و المسموعة و المرئية
كل التفاصيل ديه عشان تقدر تقيس مدي أهمية السؤال , مدي عمق الإجابة المطلوبة , واللي هنحاول هنا نقرب منها بقدر الإمكان , ونرسملك خطوط عامة تمشي عليها , واللي ان شاء الله توضحلك المنهج بشكل كافي . .
فيه اربع حاجات , لو حطيتهم في بالك , هتلاقي نفسك وصلت لهدفك إن شاء الله
-
مؤشر الطاعة
-
مؤشر المعصية
-
الجهد الدعوي
-
النجاح الحياتي
نبدأ بأول واحدة .
---------------------------------------------------------------------------------
يعني إيه مؤشر الطاعة ؟
زي ما انت لما بتكون سايق , بتكون دايما عينيك علي مؤشر البنزين عشان تتأكد انه هيكفي , ومؤشر الحرارة عشان تطمن ان العربية مش هتسخن , كمان لابد انت كمُسلم يكون قدام عينيك دايما مؤشر الطاعة الخاص بيك .
يعني تقوم دلوقتي و تجيب ورقة و قلم , و تقسم الصفحة 3 أجزاء , الجزء الأول تكتب فيه الطاعات اللي انت بتعملهم بالفعل , الجزء التاني تكتب فيه الطاعات اللي انت بتعملهم بس مش بشكل كامل او فيه نوع من التقصير , و في الجزء التالت تكتب الطاعات اللي مش بتعملها خالص . .
بعدها تعمل خطة لنفسك , بالتعامل مع الأجزاء التلاتة بشكل مناسب . .
فالجزء الأول (الطاعات اللي بتتعمل) لابد تحافظ عليها بالكامل , وتتأكد إن مفيش اي تقصير او تهاون فيها .
والجزء التاني (طاعات بس مش انتظام) تبدأ تعمل إختيار لواحدة فيهم , بحيث تعود نفسك علي الإنتظام فيها بشكل مناسب , و بعد مدة و ليكن شهر مثلا , تتأكد إنها اتنقلت من القسم التاني للقسم الأول , و تمسك الطاعة اللي بعدها
كمان في الجزء التالت , يكون فيه خطوات حقيقية انك تمسك الطاعات اللي فيه , و ترتبها حسب الأهمية , وتبدأ تعود نفسك علي واحدة واحدة فيهم بالترتيب .
و دايما حط في بالك انك تتعامل باسلوب النفس الطويل , يعني متستعجلش و تعمل ضغط علي اعصابك , فهتلاقي نفسك تعبت و زهقت و وقفت في نص المشوار , لكن الصح انك تعمل خطة علي المدي الطويل , و تمشي بخطوات بطيئة صحيحة , بدل خطوات سريعة متوترة و تقف في الآخر
---------------------------------------------------------------------------------
نوصل للنقطة التانية , مؤشر المعصية .
واللي لازم يكون بنفس أهمية النقطة اللي فاتت . .
فإن كان مراقبة مؤشر الطاعة ضروري للوصول إلي مرضاة الله تعالي , فمراقبة مؤشر المعصية لا يقل عنه أهمية , لأن تراكم المعاصي كفيل بتدمير كل خططك , وعرقلة اي تقدم تقدر تحققه في طريقك الي المولي تبارك و تعالي . .
شوف الرسول صلي الله عليه و سلم وصف الذنوب ازاي , في الحديث عن ابن مسعود "إياكم ومحقرات الذنوب ، فإنهن يجتمعن على الرجل حتى يهلكنه" . .
محقرات الذنوب , يعني الذنوب البسيطة اللي احنا بنبص لها انها حاجة بسيطة , اللي احنا بنحتقرها من حجمها الصغير , اللي احنا بنستهون بيها و مش بنركز معاها اساسا . نظرة هنا , شتيمة تتقال , نكتى مش مناسبة , اغنية تتسمع , فيديو كليب في السريع , هكذا . .
الرسول صلي الله عليه و سلم وصف انها لما تتجمع علي شخص فهي تقوم بإهلاكه , ربنا يحفظنا جميعا .
فانت امسك ورقة تانية , و هتعمل دلوقتي قايمة واحدة , و فيها كل المعاصي اللي انت بتعملها و مستمر عليها , سواء صغيرة او كبيرة . .
بعدها تعمل ترتيب تنازلي ليها , يعني من الكبير للصغير , خلي البلاوي الكبيرة تكون في الأول و بعدها الاقل فالأقل . .
و زي ما عملنا في الطاعة , هنعمل هنا كمان , انك تمسك اول معصية و تعمل لنفسك خطة للتخلص منها خلال شهر, إما تخلص تام او حتي تقليل بنسبة كبيرة , ما لا يدرك كله لا يترك جله , يعني لو وصلت انك قدرت تقلل كتير من المعدل بتاعها فده نجاح في ذاته , ولازم تستمر فيه . .
و التعامل مع القائمة ممكن يكون بالتوالي (يعني تمسك معصية معصية في القايمة و تتخلص من كل واحدة ورا التانية ) , او بالتوازي (يعني تبدأ في اكتر من معصية مع بعض) , حسب مقدرتك و صبرك و اهتمامك . .
و زي ما قلنا في البند الأول , متستعجلش , و متوترش نفسك , ومتضغطش علي أعصابك , مقاومة النفس البشرية من الأشياء المرهقة , ومحتاجة صبر و طولة بال , المهم الاستمرارية مش انك تنجز بسرعة و خلاص . .
و دايما يكون في بالك القاعدة اللي بتقول : قليل دائم خير من كثير منقطع , امشي علي مهلك بالراحة , بس بشكل مستمر من غير ما توقف , احسن من خطوات سريعة مفاجئة و تقف بعدها .
---------------------------------------------------------------------------------
ماذا عن النقطة التالتة : الجهد الدعوي
بعيدا عن المعني العميق و الكبير لمفهوم الدعوة إلي الله , انت لازم تكون عارف ان عليك مسؤولية ما عن توصيل رسالة المولي تبارك و تعالي لباقي الناس , واللي هتتلخص في السؤال المهم اللي لازم تسأله لنفسك دايما : انت قدمت إيه لدينك ؟ ؟
مش مطلوب انك تطلع تخطب الجمعة او انك توعظ في الناس , لكن مطلوب إنك تتطبع بطباع الرسول صلي الله عليه و سلم و الصحابة الكرام , في المواقف الحياتية المختلفة . .
لما تشوف حد بيعمل حاجة غلط تنصحه لو ده في مقدورك . .
لما تشوف حد مظلوم تروح و تساعده .
لما تشوف حد بيغلط في شخص , تعرفه ان هو كدة بيأكل من لحم أخيه . .
لما يكون قدامك موقف فيه ظلم تتدخل او علي الأقل تقول كلمة حق . .
لما تشوف حد غرقان في المعصية تفكره و تاخد بايده . .
لازم جواك يكون فيه شعلة مستمرة اسمها "رسالة الإسلام" , واللي تنعكس بشكل مستمر في اخلاقك , معاملاتك , نصايحك , كلامك , و تصرفاتك .
وحتي اونلاين , ممكن بالفعل تستغل الفيسبوك لتصحيح مفهوم , او ارسال نصيحة .
مفهوم الدعوة إلي الله مفهوم واسع وكبير , وبشكل ما احنا كلنا مطالبين بيه , بقدر الإستطاعة , و علي قد ما نقدر , من ناحية مش مطالبين نعمل مجهود اكبر مننا , ومن ناحية مينفعش ننساه تماما . .
لو انت قدرت توصل للمفهوم ده , فانت علي أول الطريق السليم اللي هيوصلك لهدفك .
--------------------------------------------------------------------------------
النقطة الرابعة بالغة الأهمية , ومرتبطة بالمفهوم الديني ارتباط وثيق , وهو النجاح في حياتك .
و المقصود بالنجاح في حياتك , هو تحقيق إنجاز و تقدم حقيقي في جوانبك حياتك المختلفة , لأن الدين مش صلاة و زكاة و بس , الدين مش شعائر في المسجد و صيام في رمضان , الدين – جنب كل اللي سبق - انك تصنع من نفسك نموذج ناجح يقتدي بيك في كل مكان .
فلو انت بتدرس فالتفوق هو شئ لا نقاش فيه , لو بتشتغل فإنك تتقن شغلك و تتفوق فيه يكون من أولوياتك . .
لو مش لاقي شغل , فلازم تطور نفسك و تنميها (عن طريق التدريب او الخبرة او اللغة او تعلم شئ جديد) , عشان يكون فيه دافع لشركة او مؤسسة لتعيينك و التمسك بيك . . .
لازم يكون فيه خطة واضحة قدامك امتي هتخطب و تتجوز و تفتح بيت , ولما يكون عندك اولاد ازاي هتقدر تراعيهم و تهتم بيهم و توفرلهم الحد الأدني من المقومات المعيشية . .
و بالطبع دورك كأب و كزوج هو من أسس الدين اللي مش هنتكلم فيها , انك تراعي ربنا في البنت اللي ابوها استأمنك عليها , و تعاملها بما يرضي الله من غير ما تظلمها او تجرحها , انك تهتم بأولادك و تبذل لهم الجهد الحقيقي في تربيتهم بشكل سليم ,و تعطيهم حقهم من الرعاية النفسية و الاهتمام و الحب . .
--------------------------------------------------------------------------------
لو إنت بالفعل قدرت تمشي علي المحاور الأربعة ديه بشكل سليم , ثق إن حياتك هتتغير . .
راقب مؤشر الطاعة و اتمسك بيه , راقب مؤشر المعاصي و تخلص منهم بالتدريج , ابذل اللي تقدر عليه في نشر رسالة الإسلام , و ابني حياة ناجحة . .
انت كدة علي أول طريق مرضاة الله تبارك و تعالي , وثق انك هتوصل طالما انت مستمر فيه . .
لازال الباب يُطرق , حتي كاد أن ينفتح . .