التعامل اللين
الرسالة السابقة
العنوان : التعامل اللين
القسم: #الديني
الرقم: 34
السؤال:
ممكن اسأل سؤال
هو الانسان لما يدافع عن وجهة نظره او يدافع عن نفسه قصاد اخوه مثلا او امه بمعنى بيطول الجدال فى وقت الخناقة
يعنى مثلا انا لما اتخانق مع اخويا بيبقى متعصب جدا وانا كمان هو مش بيمشى من قدامى وبيفضل يعلى صوته ويقول كلام مستفز يعصبنى اكتر وممكن انا كمان مش غلطانة فببقى بدافع عن وجهة نظرى او بفضل فى جدال طويل معاه بيزيد الخناق اكتر
فماما بتقول لى انتى كده غلطانة حتى لو على حق لانك لو اتجوزتى وفضلتى تجادلى كده وقت الخناق مع جوزك ممكن تطلقى
انا عارفة انى غلطانة ونفسى اتغير بس انا نفسى الاقى الحل العلمى بطريقة علم النفس مثلا او التنمية البشرية بحيث اقتنع واغير نفسى فى النقطة دى ومش لاقية اجابة فلو عند حضرتك حاجة مشابهة اجابة ياريت اقتنع لانى بجد نفسى ابقى اهدى من كده فى النقاش فى الخناقة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي .
في البداية عايزين نفرق بين حاجتين , هما قريبين من بعض , بس فيه شوية اختلافات بينهم . .
وهما : اتباع الحق , و الوسيلة المناسبة لتطبيقه . .
اتباع الحق , يعني اكون عارف الصح من الغلط , واتمسك بالصح ولو علي رقبتي . .
الوسيلة المناسبة لتطبيقه , معناها الشخص يكون عنده من الذكاء و الحكمة , انه يختار الاسلوب المناسب , والوقت اللي ينفع ليه , والكمية المطلوبة , بل و كمان انه ممكن يأجل تنفيذ حاجة معينة لوقت محدد . .
و ابلغ مثال علي ده , ان الرسول صلي الله عليه و سلم كان بيصلي في صحن الكعبة لمدة 13 سنة كاملة , و كانت تحوطها الأصنام , فوق لـ 360 صنم حول الكعبة . .
تخيلي ان اشرف خلق الله , كان بيسجد بين يدي رب العالمين , وفي اطهر مكان في الكوكب , و سايب قدامه اصنام الناس بتسجد لها , وتتقرب لها من دون الله . .
ليه ؟ لأنه كان يعلم بحكمته ان مش وقت تكسير الاصنام , ده وقت نشر الدعوة , مش عمل صدام مبكر مع قريش .
و نفس الموضوع , كبار الصحابة كانو شايفين ابو جهل – لعنه الله – بيعذب في والدي عمار بن ياسر , لغاية لما الاتنين قتلو من التعذيب , ومحدش فيهم فكر في اغتيال ابو جهل , وكان الموضوع متاح لو هما عايزين , بس أوامر الرسول صلي الله عليه وسلم كانت واضحة في الفترة ديه . .
يعني من المهم ان الشخص يفكر في كل ابعاد الحاجة اللي هيعملها , قبل ما ينفذها . .
----------------------------------------------------------------------------------------------
ماذا عن المواقف اللي انتي بتقابليها , سواء مع صديقاتك او اقاربك او اخوكي ؟ ؟
مش بس المهم انك تكوني متمسكة بالحق , كمان مهم انك تنقلي رسالتك بشكل سليم و هادي و حكيم . .
المولي تبارك و تعالي لما أمر الرسول صلي الله عليه و سلم – و المسلمين من بعده – في سورة النحل بالأمر الواضح (ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ) , الحكمة يعني حسن اتخاذ القرار , يعني تفكري ايه اللي يتقال و ايه اللي ميتقالش , ويتقال ازاي . .
بعدها ربنا بيؤكد المعني (وَجَادِلْهُمْ بِالَّتِي هِيَ أَحْسَنُ) , الكلام ده مع المشركين , فما بالك لما بتناقشي مسلمين , و كمان من اسرتك او اقاربك . .
واخيرا (إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ) ,. يعني في النهاية القلوب بيد المولي تبارك و تعالي ,وهو وحده المطلع عليها , ومتحرقيش في اعصابك اكتر من اللازم , انتي بس عليكي ابلاغ الرسالة , مش انك تجعلي اللي قدامك يتغير . .
و مشكلة الشخص اللي بيتعصب بشدة في الدفاع عن الحق - و اقصد التعصب المذموم , اللي يجعله يتصرف تصرف غير مناسب – مشكلته ان ممكن نيته من جوه متكونش بالكامل لله . .
يعني لما تشوفي زميلتك "س" بتعمل مشكلة ما – وليكن بتشرب حشيش - فانتي لو جادلتيها جدال عنيف , وتطور الأمر لخناقة بينكم و مقاطعة , فانتي كدة انتصرتي لنفسك , مش للحق . .
الشئ الي في مصلحتها , انك تفضلي جنبها صديقتها المقربة , و بالتوازي تستمري في دفعها للشئ الصح , او علي الاقل تتأكدي انها مش هتنحدر للمزيد من المآسي , لكن لما تقطعي علاقتك بيها , او تقوليلها كلمتين في عضمها , انتي كدة افدتيها بايه ؟
بالعكس , انتي قدمتي خدمة هايلة للشيطان , انك جعلتيها وحيدة بين اصابعه , يتحكم فيها كما يشاء , بعد ما فقدت نصحك و ارشادك , اللي كان ممكن يرجعها للطريق السليم . .
اقرأي الآيات من 41 الي 48 في سورة مريم , عشان نتعلم من ابو الانبياء سيدنا إبراهيم عليه السلام , ازاي كان بيناقش ابوه الكافر – ويقال إنه عمه مش أبوه – و ازاي ده كان بمنتهي الهدوء و الحب و الود , مع الاحتفاظ بالجدية و الحزم في امر العقيدة . .
انا اخشي ان في اللحظات اللي بتتعصبي فيها عشان الحق , بيكون ده انتصار لموقفك و لكرامتك , اكتر من رغبة في احقاق الحق . .
-------------------------------------------------------------------------------------------
طب والحل ؟ ؟
هي خطوتين , لو عملتيهم هتلاقي الدنيا اتغيرت . . .
أولا انك اصلا تغيري قناعتك الداخلية , انك من جواكي تؤمني ان اسلوب الصدام هو شئ بعيد عن الدين و المنطق و العقل , ومش بيعمل اي شئ الا انك تأذي الناس اللي حواليكي , بل و بتخليهم يكرهو رسالتك اللي عايزة تنقليها ليهم , يعني ياريتك ما قلتي حاجة من الأساس .
لابد من جواكي تؤمني ان اسلوبك غير مناسب , وانه لازم يتم استبداله و تغييره . .
ثانيا : انك تتدربي علي الاسلوب الجديد , واي حاجة بتيجي بالتعود و التدريب , دربي نفسك علي هدوء الاعصاب , وعلي التعامل اللين , وعلي فن النقاش ( مش هقول الجدال ) .
دربي نفسك علي انك مش مطالبة ان الناس تتغير , انتي مطالبة انك انتي من جواكي تكوني كويسة + انك تنقلي الرسالة بشكل مناسب , لكن في النهاية انتي مش هتحاسبي الا علي نفسك . .
الله تبارك و تعالي خاطب الرسول صلي الله عليه و سلم في بداية سورة الشعراء (لَعَلَّكَ بَاخِعٌ نَفْسَكَ أَلَّا يَكُونُوا مُؤْمِنِينَ) , يعني لا تلوم نفسك انهم مش مؤمنين , انت يا محمد ليس عليك الا البلاغ . .
دربي نفسك انك توقفي النقاش في لحظة معينة , حتي لو كان الموقف شكله "انك مغلوب علي امرك" .او "انك مش عارفة تردي" , اياكي تبصي علي شكلك او صورتك , بصي علي الاثر السلبي اللي ممكن يوصل لهم لو استمريتي في الجدال الاعمي .
دربي نفسك علي فتح الموضوع في وقت محدد , فيه نصيحة بتتقال : ( لا تذكر الغاضب بالله ) يعني لما تشوفي حد متعصب و متضايق و بيتخانق , متقوليلوش وحد الله ولا صلي علي النبي , لان من شده غضبه ممكن يسب الدين , الصح اننا نقفل الموضوع , ونتكلم عنه بعدين . .
دربي نفسك انك متاخديش كل المواضيع علي اعصابك , انتي مش هتحلي مشاكل الكون , وانتي مش مسؤولة عن كل واحد و افعاله , عم الرسول صلي الله عليه و سلم مات كافر , ولما استغفر له الرسول , ربنا نهاه عن الاستغفار عنه . .
متنسيش , انتي بس عليكي ايصال الرسالة , مش مسؤولة عن افعال الناس . .
اخيرا متنسيش إن المولي تبارك و تعالي , خاطب الرسول صلي الله عليه و سلم في سورة آل عمران (فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ) . .
صدق الله العظيم