العنوان : أعظم الذنوب

القسم: #الديني

الرقم: 35

السؤال:

 

مشكلتي هي تقصيري في الصلاة،  نفسي التزم بالصلاة

 

مقصرة جدا في الصلاة  ممكن تعدي عليا ايام واسابيع وانا مش بصلي

 

بالرغم اني عارفة كل حاجة عن عقوبة ترك الصلاة وانها اول عمل الانسان بيتحاسب علية  وحافظة كتير من القران  ويفضل الوم نفسي كتير ع قلة الصلاة وبخاف اموت وانا لسة مقصره

 

وكمان عندي مشاكل في حياتي  وحاسة ان سببها تقصيري في صلاتي

 

بفضل استغفر واصل علي رسول الله  عشان ربنا يقدرني علي الصلاة مع العلم ان اكتر وقت بلتزم بية في الصلاة بيكون شهر رمضان   

 

وكل سنة اقول باذن الله هفضل كدا مواظبة ع الصلاة علي طول  لكن للاسف برجع واكسل تاني علي الصلاة هو انا متعودش ع الصلاة من صغري  لكن انا عارفة ان دا مش عذر  بس بقول يمكن هو دا السبب اللي مخلي الصلاة صعبة عليا  , كمان دايما وقت الصلاة  بكون مشغولة يا مع الولاد يا في شغل البيت يا بكون نايمة

 

وكمان زوجي مش بيصلي   واخواتي حالهم زي حالي  وامي وابي ملتزموش بالصلاة غير علي كبر  ممكن  تساعدوني اني التزم في صلاتي

 

وشكرا لكم وبارك الله فيكم

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

و عليكم السلام و رحمة الله . .

 

مش محتاجين نتكلم عن أهمية الصلاة , لأن من الواضح انك عارفاها بما يكفي , و انك علي دراية بأبعاد ترك الصلاة , واختفائها من حياة المسلم .

 

كفاية بس اننا نقول كلمة ابن القيم في كتاب "الصلاة"  :   ترك الصلاة المفروضة عمدا من أعظم الذنوب، وأكبر الكبائر، وأن إثمه أعظم من إثم قتل النفس، وأخذ الأموال، ومن إثم الزنا، والسرقة، وشرب الخمر. وأنه متعرض لعقوبة الله وسخطه

 

انتي متخيلة انك بتعملي ذنب أكبر من الفاحشة ؟ ؟ متخيلة الأمر عامل ازاي ؟ ؟  هل شايفة الحجم الحقيقي للذنب اللي هو يفوق القتل و الخمر و السرقة مع بعض ؟ ؟

 

صدقيني لو الصورة كاملة في ذهنك , هتقوي تنتفضي فورا دلوقتي و متعمليش حاجة الا انك تلتزمي بالصلاة بكل خطواتها الجسدية و القلبية . .

 

---------------------------------------------------------------------------

 

و قبل ما اقولك علي خطوات عملية للتمسك بالصلاة , لازم أتأكد ان اصلا انتي من جواكي عندك الدافع الكافي للتمسك بالصلاة , لان ببساطة من غير وجود دافع قوي , مش هتواظبي عليها . .

 

الأمر شبه واحدة عايزة تفقد وزنها و تكون رشيقة , لو هي من جواها معندهاش الوازع الكافي و الدافع القوي للوصول للهدف اللي في بالها , مش هتقدر تقاوم شرائح البيتزا او قطع الشيكولاتة  . .

 

فحضرتك لو مش قادرة تزرعي جواكي دافع كافي للهروب من نار جهنم , و التشبث برضوان الله سبحانه , و ضبط باقي أركان حياتك , فممكن متكونيش قادرة علي المواظبة الكافية علي خطة التمسك بالصلاة . .

 

لازم تحطي في بالك الخطر الرهيب لترك الصلاة , واللي وصل عند بعض العلماء لاعتبار صاحبها كافر , تخيلي ان الشخص يُخلد في نار جهنم عشان كان مكسل عن الصلاة , شايفة الصورة قد ايه مخيفة ؟

 

ياريت يكون الدافع موجود عندك بالفعل , عشان تقدري تمشي ورا الخطوات العملية اللي ممكن تساعدم علي التمسك بالصلاة , وهي  :

 

• هل انتي بتدعي ربنا انه يرزقك نعمة التمسك بالصلاة ؟ الدعاء شئ مش قليل , وحاجة مش ثانوية او هامشية , الدعاء سلاح قوي , واداة فعالة بس محتاجة حضور قلبي , واستمرارية دائمة

​

• حالا اعملي تحميل لبرنامج الاذن في موبايل , ويكون صوته عالي , بحيث اول ما موعد الصلاة يدخل , يفكرك ان سيبي اللي في ايدك وقولي حالا صلي

​

• تأجيل الصلاة هي اول خطوة في ضياعها , ابدأي اتعودي علي انك تصلي اول ما الأذان يأذن , بحيث لما يكون فيه شوية تقصير يبقي في تأخير الصلاة , مش ضياعها  بالكامل

​

• اعرفي ان اولادك مش هيحصلهم اي حاجة لو سبتيهم دقايق في اليوم , يعني لو سبتيهم دقايق عشان تتوضي و تصلي , ايوة هيعيطو شوية بس مش نهاية العالم , كدة كدة العيال بتعيط من غير سبب اساسا

​

• يجوز انك تمسكي ابنك و انتي بتصلي لو فيه ضرورة , او تطبطبي عليه , ممكن بسهولة تشغلي التليفيزيون او اليوتيوب ليهم وانتي بتصلي عشان يسكتو شوية

​

• محتاجة  تعملي شوية تنظيم في وقتك , انتي مش اول ام معاها اطفال , اومال الي معاهم توائم يعملو ايه ؟ و بعضهم بيكون اصلا بيشتغل طول اليوم , فشوية تنظيم في الوقت هتلاقي الدنيا اظبطت

​

• ظبطي مواعيد نومك علي مواعيد الصلاة , عشان مفيش صلاة تروح منك اثناء النوم

​

• مش لازم دلوقتي تحرصي علي صلاة السنة , او الخشوع في الصلاة , ابدئي بس الاول في انك تلتزمي بيها , وتدريجيا هتطوري نفسك

​​

• اتصلي بصديقة مقربة منك , او واحدة من قريباتك , وقوليلها تتابعك في موضوع الصلاة بشكل يومي , مش لازم حتي اتصال صوت , ممكن علي الواتس سريعا تتطمن عليكي و تشوف عملتي ايه في الصلاة

​

• ابدأي اعملي لنفسك عقاب لو ملتزمتيش بالصلاة , يعني اعملي عهد بينك و بين نفسك انك تتصدقي مثلا بمبلغ 10 جنيه عن كل صلاة هتروح منك , هتلاقي ان يوميا بقي فيه مبلغ كبير , وده هيساعدك الي حد ما علي التمسك بالصلاة

​

• اعملي مكان في البيت مخصص بس للصلاة , حتي لو تفرشي مصلية وتحطي مصحف و ديكور بسيط كان ده المصلي الخاص في البيت , ده هيفرق معاكي ايجابا

​

• املي يومك بسماع القرآن , شغلي اليوتيوب علي عبد الباسط او المنشاوي طول اليوم و انتي بتطبخي او بتعملي اي حاجة تاني , كتر سماع القرآن هتصنع عندك حالة ايمانية جميلة تساعدك علي الصلاة

​​

• اشغلي لسانك بذكر الله طول اليوم , قولي اي ذكر ييجي علي بالك , كتر الذكر بيفرق كتير في رقة القلب و حبك للصلاة

​

• لما تصلي , ادعي ربنا بقوة في السجود , ادعي ربنا بحرقة قلب انه يحببك في الصلاة , ورددي دايما الدعاء : اللهم حبب الينا الإيمان و زينه في قلوبنا

 

 

لو انتي مشيتي بالفعل علي الخطوات ديه , هتلاقي نفسك اتغيرتي تدريجيا , وبقيتي متمسكة بالصلاة عن حب اكتر منها عن انها واجب عليكي

 

ربنا يوفقك يا رب ويتقبل منا ومنكم