الطريق الواضح
الرسالة السابقة
العنوان : الطريق الواضح
القسم: #الديني
الرقم: 36
السؤال:
انا عربي مسلم عايش في اوروبا و فكرت في شيء انه هل ادعوا الشباب والبنات ؟
خصوصا ان الشباب والفتيات المسلمين بمدرستي اقرب للكفر من الايمان والله بعضهم يضع الصلبان
ماذا وكيف افعل؟
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيك . .
ربنا يجزيك الخير علي تفكيرك الإيجابي , وجود الدافع اللي جواك عشان تكون السبب في التزام عدد من زملائك , أسئل الله العلي العظيم أن يتقبل منك , و أن يفتح علي يديك فتحا مبينا . .
الدعوة إلي الله هي بحر واسع لن ينتهي , و تحتاج إلي نفس طويل و صبر جميل , وهدوء في التعامل , و حكمة في التصرف , والا فالأفضل لمن يفتقد الصفات ديه انه ميشتغلش فيها . .
و كم من دعاة إلي الله أسائو إلي رسالتهم , وإلي دعوتهم بسوء تصرفهم , ونقص خبرتهم , و قلة صبرهم , فإنت ان مكانش بالفعل عندك الاستعداد الكافي , والتعامل الحكيم , فممكن تنتظر فترة لغاية لما تكون جاهز . .
و غالبا الخطوات المتخذة عشان تعين مسلم غير ملتزم علي طريق الإلتزام , هي نفسها الخطوات المطلوبة عشان تعرف شخص غير مسلم بالإسلام , اغلب الخطوات هي هي , ولو انت مشيت عليها هتشوف نتيجة رائعة . .
وقبل ما نتكلم عن الخطوات , لازم ننبه لفخ كبير ممكن انت تقع فيه و انت مش واخد بالك . .
وهو دعوة "الفتيات" إلي الإسلام (غير المسلمات) , او إلي الإلتزام (المسلمات) . .
لو الشخص شغال في الدعوة في منصة عامة (خطبة , صفحة علي الفيسبوك , فيديوهات لايف) , فمفيش مشكلة تكون للنوعين , الذكر و الأنثي باعتبار ان مفيش احتكاك مباشر بالفعل بينك و بين الفتيات . .
لكن أي نوع من أنواع التواصل الشخصي (face to face) فلازم تاخذ حذرك ألف مرة و انت بتتواصل مع الفتيات , عشان متصنعش ازمة كبيرة , خاصة بالإعجاب المتبادل . .
احنا بشر , و مفيش حد فينا في عفة سيدنا يوسف ,و سيدنا يوسف عليه السلام هرب من امرأة العزيز لما شعر باقتراب الفتنة , فهل يا تري من المنطقي ان شاب يتواصل بشكل شخصي و مستمر مع فتيات غير مسلمات ,او مسلمات غير ملتزمات , حتي لو هيدعوهم للإسلام ؟ ؟
ماذا لو وقع في قلبك حبها او وقع في قلبها حبك , ماذا لو هي اسلمت و انت اشفقت عليها , وانت عارف انك مش متاح تتجوزها ؟ طب ماذا لو انت اتجوزت بالفعل و بعدها اعجبت واحدة تانية ؟ ؟
الموضوع مفيهوش هزار وضرره رهيب , لأنك – رغما عنك – عاطفتك و هرموناتك قد يدفعوك لتحويل مسار الحديث معاها , خاصة لما تشعر بالشفقة عليها , او هي تشعر بالإعجاب بيك . .
اي تواصل بينك و بين بنت غير مسلمة او غير ملتزمة , هو نوع من الخداع الذاتي , انت بتحاول تقنع نفسك انك بتدعو الي الله , بس انت عارف من جواك انك مستمتع بالتواصل معاها , الكلام او الضحك او الهزار , او حتي النظرات الصامتة . .
والأزمة ان لو بنت ارتبطت عاطفيا بيك , فهي تظن ان انت هو الاسلام و الاسلام هو انت , فلما انت تسيبها – و لازم هتسيبها لظروف كتير – هي مش بس هترتد عن الإسلام , ده كمان هتنشر في كل مكان ان اللي بيدعو الي الاسلام ما هم الا حثالة من البشر , اللي بيكسرو بقلب البنات . .
طب انت هتعرف تضحك علي العالم كله , يا تري هتعرف تخدع الملكين اللي بيكتبو الحسنات و السيئات ؟ هتعرف تكذب علي رب العالمين ؟ ؟
اي تواصل شخصي يكون بينك و بين شباب بس , اي بنت تيجي تسالك عن الاسلام اديها فلاشة فيها كتب و فيديوهات ,او عرفها عنوان مركز اسلامي قريب هي تروح و تسأل , اياك اياك تحس بالشفقة او الرغبة في تعليمها الإسلام , انت بتدفع نفسه للهلاك
متنساش ان ربنا ذكر في سورة فاطر (أَفَمَنْ زُيِّنَ لَهُ سُوءُ عَمَلِهِ فَرَآَهُ حَسَنًا) يعني الناس اللي بيعملو كوارث وهم يظنو ان ديه طاعة او دعوة إلي الله , اياك تروح المساحة ديه
-----------------------------------------------------------------------------------------
و هنا هقولك عدد من الخطوات امشي عليها , و اترك الباقي علي المولي تبارك و تعالي . .
-
بداية مفيش أهم من "القدوة" , هي بالفعل النسبة الأكبر من الدعوة إلي الله , وده اللي يتحقق مع كلمة أحد الصالحين – أظن هو سيدنا علي - : (عمل رجل في ألف رجل , خير من قول الف رجل لرجل ) . .
يعني مهما تقول و تعيد و تزيد , فبالفعل مفيش أهم من وجود قدوة عملية قدامهم , ينفذ الإسلام بشكل حرفي , ويشوفوه بعينيهم , انهم يشوفو منك كل اللي انت عايز توصله ليهم
و القدوة المقصود بيها في 3 مجالات بالتحديد :
أولا المجال الديني : يعني الالتزام بالصلاة و الصيام و القرآن و غض البصر و غيره
ثانيا الاخلاق : يعني ميسمعوش منك كلام غير سليم , او يشوفو منك تصرف غير مناسب , ويكون خلقك القرآن زي ما كان الرسول صلي الله عليه وسلم
ثالثا المجال الحياتي : يعني اصلا يشوفوك انسان متفوق و ناجح في دراستك و حياتك , انسان اجتماعي بشوش مبتسم , إنسان يهتم بنظافته الشخصية و شياكة ملابسه , لا بخيل ولا مسرف , لا متهور ولا متردد , إنسان الناس بتحبه وهو بيحب الناس
ثق فيا لما اقولك , ان بس بظهورك بالمظهر اللي يجمع التفوق في المجالات التلاتة (الديني , الاخلاقي , الحياتي) , فانت كدة نقلت ابلغ صورة احنا عايزين ننقلها عن الإسلام
-------------------------------------------------------------------------
-
تاني خطوة - وهو لا تقل أهمية عن الأولي – وهي احتفاظك بعلاقة طيبة بل وقوية مع الجميع
لازم يكون عندك فن انك تكون قريب من كل اللي حواليك , مسلمين او غير مسلمين , ملتزمين او غير ملتزمين , وأكبر غلطة تعملها انك تصنف الناس حسب دينهم او التزامهم , انت من جواك ممكن يكون فيه محبة قلبية تختلف من فرد للتاني , لكن كتعامل لابد يكون الجميع سواسية كأسنان المشط .
قوة علاقتك بالمحيط من حولك , هي اللي هتصنع جسور التواصل بينكم , هي اللي هتجعل الشخص – سواء غير المسلم او غير الملتزم – يطرح عليك سؤال محيره , هو صحيح الإسلام بيأمركم بقتل غير المسلمين ؟ صحيح ام تعليم البنات حرام ؟ صحيح ان فيه كبت جنسي للشباب ؟ صحيح ان الراجل ممكن يضرب مراته عادي ؟
لما حد يستريحلك و يثق فيك , هيلقي عليك الاسئلة اللي بيسمعها في الميديا الغربية , واللي بتصنع تشكيل كامل في ذهنه , وبالتالي انت هيكون عندك القدرة علي قل الصورة الصحيحة , وتصحيح الأكاذيب المنتشرة .
لكن بالطبع قوة علاقتك مع الجميع يكون فيها استنثناء للبنات , مش عشان ننشر الإسلام هنعمل ارتكاب لذنب تاني في الاختلاط الغير سليم مع الإناث
-----------------------------------------------------------------------------
-
لابد من الأساس تكون إنسان إجتماعي , اياك تخجل من كونك عربي او مسلم , إياك ده يمنعك من انك تتعرف علي كل محيط الناس اللي حواليك , لو قابلت نوعية من الناس فيهم شوية برود , فلازم تتأكد ان أغلب الناس ودودة , و هيستقبولك بشكل لطيف
حذاري من التقوقع اللي بيقع فيه اغلب العرب اللي عايشين في اوروبا و أمريكا , ان الشخص هناك اول ما يوصل يعيش مع عرب , يشتغل مع عرب , ياكل مع عرب , و يظل سنين طويلة ملوش اي احتكاك او تعامل مع المجتمع من حواليه , طبعا ده غلط , وتمسكك بدينك مش معناه ان ميكونش فيه اختلاط ايجابي مع المجتمع من حواليك
-----------------------------------------------------------------------------
-
لابد يكون عندك حد ادني من العلم الشرعي , خاصة في الشبهات المثارة علي الإسلام , لازم تكون عارف اسس دينك , عشان متقابلش موقف محرج , من شخص يسألك علي سؤال : هو ازاي الرسول (صلي الله عليه و سلم) اتجوز عدد كبير من النساء , وانت مش عارف ملابسات اللي حصل , ومش عارف تفاصيل الزيجات , وايه اللي حصل في كل موقف , و الحكمة من الأمر . .
والحقيقة اني مش هاقدر اعذرك ابدا عن عدم حصولك علي المعلومات الوافية , انت عايش في 2019 . حيث الحصول علي المعلومة هو من أسهل المهام , تخيل لو انت كنت عايش في منتصف القرن الماضي , حيث صعوبة الوصول للمعلومات , لكن فعليا انت في 5 دقايق ممكن تجيب اجابة عن اي سؤال في العالم . .
بل انك ممكن بالفعل تحمل عدد من الكتب – بالعربي او بالانجليزي – فيها كل الشبهات المثارة في الإسلام , وتكون علي إطلاع كامل بيها و الردود عليها , وده ممكن ياخد منك يومين بالكتير . .
فصدقني لما اقولك , ملكش اي عذر في عدم المعرفة , الشبكة العنكبوتية جعلت العالم كله بين ايديك , و تقدر فعليا تجيب اي حاجة انت عايزها في دقايق
-----------------------------------------------------------------------------
-
فن طرح الأولويات
لازم يكون عندك حكمة في التعامل مع الأولوبات , وايه يتقال قبل ايه . .
يعني بداية مش من المناسب انك اصلا تفتح الكلام مع حد , مالم تكون تربط بيه علاقة قوية بالفعل , ويكون فيه حبل من الود المتصل , عشان الكلام يوصل لمكانه السليم , فيه حكمة بتقول : ما خرج من القلب يصل الي القلب , وما خرج من اللسان , لا يتعدي الآذان
و كمان لازم تكون عارف ايه اللي تبدأ فيه بالكلام مع الإنسان اللي قدامك . .
فلو كان شخص غير مسلم , فانت معندكش أهم من قضية التوحيد , وانه يؤمن أن الله لا إله غيره , وان الرسول صلي الله عليه و سلم هو رسوله و نبيه , وأن عيسي عليه السلام هو روح الله القاها إلي مريم البتول . .
لو كان الشخص ده مدمن خمر , لو كان معتاد الزني , لو كان شديد البخل , فمش من الذكاء انك تكلمه في حرمة الخمر , او فاحشة الزنا , او وجوبية الزكاة , وهو اساسا مش مؤمن بالإسلام , خليه الأول يقول الشهادة , وبعدها الباقي هييجي بالتدريج . .
نفس الحال لما تقابل شخص مسلم غير ملتزم , فلازم تكون الأولويات موجودة في بالك بشكل سليم , مفيش أهم بداية من إنك تصحح العقيدة لو فيها أي خلل , يليها الصلاة , ثم باقي اركان الإسلام . .
لكن انك تفتح موضوع لاحق , في حين فيه مشكلة سابقة أهم منها , ده شئ غير سليم
لكن بالتوازي مينفعش انك تعمل تزييف او تغيير او اجتزاء في الإسلام , يعني لو قالك هي الخمر حلال ؟ قوله هي حرام , بس خلينا نبدأ بالشهادة , و هنتكلم في الخمر بعدين
----------------------------------------------------------------------------------
-
حط في بالك قاعدة مهمة : كسب الاشخاص خير من كسب المواقف , انك تكسب الإنسان اللي قدامك , ويحبك بالفعل , احسن بكتير ما تنتصر في موقف ما , و تظهر اللي قدامك بموقف المهزوم , والاستثناء لما يكون فيه شخص بيحاربك بشراسة و عايز يظهر الإسلام علي غير حقيقته , وقتها لازم تنتصر للموقف اللي قدامك
---------------------------------------------------------------------------------------
لو انت بالفعل قدرت تمشي علي الخطوات ديه و غيرها , ثق ان المولي تبارك و تعالي هيجعلك سبب في التزام و اسلام العديد , ربنا يجعل هذا الأمر في ميزان حسناتك