اللا - زواج
الرسالة السابقة
العنوان : اللا - زواج
القسم: #الاجتماعي
الرقم: 100
السؤال:
معلش حضراتكم سؤال كده علي الهامش يعني هو ينفع الواحد يكمل حياته من غير جواز لو مش عاوز يتحمل مسؤولية ويعيش حر نفسه من غير ما واحدة تنكد عليه أغلب فترات حياته ولا لا . دا سؤال دايما بيخطر علي بالي وعايزله إجابة بعد اذنكم
و معلش هو انا برضو سألت السؤال دا لأن في اعتقادي أن الجواز . خصوصا في الظروف اللي احنا فيها دي . 90% منه هم و نكد و مسؤولية فعلي ايه الواحد يلبس نفسه في المعاناة الأبدية دي و انا مستني إجابة حضراتكم وشكرا ليكو مقدما
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أول شئ يتبادر الى ذهننا لما نذكر كلمة "الزواج" عند البعض تلقائيا يترجموها الى: "لا للمسؤلية .. لا لتقييد الحرية"
ايوة للأسف هو ده الفكر المسيطر عند بعض الأفراد فى مجتمعات كتير وعلى رأسهم مجتمعنا.
الزواج مش امر صعب أو شاق، لكن الانسان هو اللى بيخدع نفسه بالكلمات دى ويتجاهل الاحتياجات الفطرية اللى ربنا خلقها عنده , فمبدأيا مسألة الاعتزاز بالحرية اللى بيزعم انه هيفقدها اذا تزوج ده ستار زائف يبرر من خلاله رفضه للفطرة اللى ربنا خلقه بيها.
او يمكن يكون سبب رفضه لفكرة الزواج ليست الفطرة ولكن بسبب خوفه من فشل الزواج نتيجة مروره بتجربة فاشلة قبل كده او حتى سمع عن زيجات فشلت او انتهت بالطلاق فأصبح خايف على نفسه يكرر نفس المأساة مع ان كل انسان مختلف عن التانى مش بس فى طبعه لكن كمان فى رزقه فسبحان مقسم الارزاق .
فالزواج لازم ينتج بعد اقتناع من الطرفين ببعض ووجود قدر كبير من التفاهم بينهم، لذلك لابد اولا قبل الاقدام على خطوة الزواج انهم يتأكدوا ان فعلا في تفاهم متبادل بينهم لان ده هيقلل كتير اوى من المشاكل بعدين، ولازم كل حد منهم يحدد نظرته للزواج ازاى واهدافه ايه منه.
لان الزواج زيه زى اى مشروع ومقومات انجاز او تحقيق المشروع ده لابد انه يتوافر له عدة شروط:-
-
الإقتناع بالهدف
-
الرغبة فى تحقيق الهدف
-
الإخلاص
-
الصدق مع الطرف الاخر
-
التعاون الايجابى
-
التوافق فى القيم الروحية والخلقية
----------------------------------------------------------------------------
ولو الشروط دى توافرت فى الزواج هيصبح زواج ناجح جدا، وانا اقصد ناجح هنا مش معناه انه مش هيكون فيه مشاكل . .
لا طبعا اى حاجة فى الحياة عموما لها مميزات ولها برضو عيوب ولكن نجاح الزواج هو الاستمرار فيه مع الرضا والقبول بكل الظروف طالما الزوجين متفاهمين وعلى قدر من الثقة ببعض يقدروا يواجهوا مع بعض اصعب التحديات والهموم بعد عون ربنا طبعا . .
الحياة مش وردية لكن متقلبة احيانا تبقى صافية وجميلة واحيانا تبقى متعبة ، فيحتاج فيها الانسان لوجود "ونس" شريك معاه الحياة يشاركه احتياجاته الجسدية والنفسية بما يرضى الله .
زى ما قال رسول الله -صلى الله عليه وسلم "الزواج من سنتى فمن رغب عن سنتى فليس منى" وحديث اخر " يا معشر الشباب من استطاع منكم الباءة فليتزوج" يعنى اللى يقدر يتزوج و يتحمل مسؤلية الزواج يسارع للزواج ويسير على نهج السنة النبوية الشريفة .
الحياة عموما متعبة مش الزواج اللى بيتعبها ، الزواج لما يكتفى بالشروط اللى ذكرناها هينجح، ولما ينجح هتبقى الحياة مش هنقول سعيدة لان السعادة الحقيقة الدائمة فى الجنة بس، لذلك اهل الجنة لما يدخلوها هيقولوا ( الحمد لله الذى أذهب عنا الحزن) واية اخرى ( فأما الذين سعدوا ففى الجنة)
ايوة الدنيا فيها صعب كتير لكن كمان فيها فرح كتير ، فمينفعش الانسان ينظر الى الجانب السلبى ويعمى عنيه عن الايجابى، لان النظرة دى مش متزنة ابدا وغير عادلة ومنافية للفطرة .
لو كنت مستنى الجواز يبقى كله هنا وسعادة وفرح يبقى هتعيش عازب مدى الحياة، بالظبط معناها لو عايز صديق مثالى يبقى هتعيش وحيد مدى الحياة ..
زى ما رسول الله قال للزوج : "لا يفرك مؤمن مؤمنة فإذا كره منها خلق رضى منها اخر"
لأن الحياة او الانسان مش مثالى ولابد من وجود العيوب ولكن لازم تتقبل قدر من العيوب علشان تتعايش معاها، الزواج جميل لما يبقى بدايته صح، لذلك حسن الاختيار من البداية مهم جدا.
--------------------------------------------------------------------
و ان كنت انت شايف عدد من "أضرار" الزواج ,فعلي الناحية التانية انت مش قادر تشوف "كوارث" عدم الزواج .
ان كان للزواج عدد من الفوائد السريعة المباشرة (اشباع الغريزة , الاستقرار النفسي و العاطفي) , فهو له عدد من الفوائد بالغة الأهمية , و اللي موجودة علي المدي الطويل .
و المميزات اللي علي المدي الطويل , انت مش هتقدر تحس بيها الا لما تكبر و تعدي سن الـ 40 او الـ 50 , و مهما شرحتها لك و انت شاب صغير , فمش هتقدر تخيلها بالشكل الكافي . .
علي رأسهم يقع ما يسمي : الحصول علي ونس لما تكبر و تعجز . .
انت كشاب دلوقتي , ممكن تكون مش محتاج حاجة زي كدة , لانك ممكن تمشي في الشارع تقول يا ارض اتهدي ما عليكي قدي , لكن لما يتقدم بيك السن , و تبدأ تفقد قواك الجسدية و النفسية تدريجيا , هتلاقي قد ايه انت هش , وضعيف , ومحتاج لأقل كلمة حلوة , او لمسة حنان .
و يمكن ده السبب اللي بيخلي ملايين المواطنين الاوروبيين و الامريكان يقبلو علي الزواج , مع ان عندهم "العلاقات الجنسية" مفتوحة تماما , و ممكن تعمل كل اللي انت عايزه مع اي واحدة . .
بس هما عارفين ان استمرارك في الحياة , مرتبط بوجود شريك للحياة معاك , ايده في ايدك لغاية لما الواحد يصل لنهاية عمره , و كمان يكون عنده اولاد من نسله يسألو عليه و يطمنو عليه , ويكونو معاه في السراء و الضراء . .
انت بالفعل مش متخيل بشاعة انك تعيش لوحدك و انت عجوز , شعور قاتل كالجحيم , حتي لو توافرت ليك كل الرعاية الطبية المطلوبة , حتي لو عندك خدم من كل الاصناف , حتي لو عندك مال الدنيا .
كون انك تحس من جواك ان محدش مهتم بحياتك عن موتك , بل الأسوء انك تحس ان ممكن يكون فيه ورثة منتظرين موتك عشان يورثو , ده هيصنع عندك حالة مستمرة من العذاب . .
كونك انك بتعيش كل اللحظات الحلوة لوحدك , سفر أو نجاح أو تفوق , متتخيلش قد ايه الشعور مؤلم . .
هتلاقي بعد سنين انك فقدت طعم كل شئ في الوجود , لا اكل ولا سفر ولا عربية ولا فلوس ولا اي حاجة , و هتسأل نفسك هو امتي هيأتي قضاء الله عشان استريح من الجحيم المستمر ده .
ثق ان الزواج علي الرغم من العقبات اللي فيه , اهون بكتير من جحيم الوحدة لما تكبر .