الحرب المُشتعلة
الرسالة السابقة
العنوان : الحرب المُشتعلة
القسم: #الاجتماعي
الرقم: 101
السؤال:
مش عارفه ابدا الحكاية منين هى طويلة استحملونى
انا اتجوزت شخص مكنتش بحبه بس كان فى حاجة بتربطنى به معرفش ايه هى المهم انى حبته جدا بعد الجواز وهو كان فى حاجات كتير رائعة وكان بيحاول يبقى افضل
لكنه كان ضعيف وبيميل الانحراف و الشرب و البانجو . وانجبت منه وطبعا بدأ يحدث الملل الزوجى وهو كان بيحبنى بردو بس بدأ يضربنى بشدة ويتعمد انه يقلل منى ويرجع يعيط وانا اسامحه لانى كنت عبيطة اوى وطيبة مش فاهمه حاجة . و بحاول اصرف علي البيت من مرتبي لما هو يقصر
بعدين فهمت انها عقدة نقص عنده واكتشفت مشاكل الطفولة عنده وان والدته طول عمرها بتفرق بينه وبين اخواته
المهم فضلت معاملة زوجى تسوء جدا مع الوقت وبنفس الوتيرة غلط وإهانة وبعدين يجى يصالحنى ويعمل المستحيل ويعيط لحد ما ارجع
لحد ما اتعرف على بنت اقل منه فى كل شئ وسلوكها وسلوكه والدته مشبوه وهو عارف المهم هو كان بيحس بنفسه معاها طبعا المهم العلاقة تطورت رغم أنها اتجوزت قريبها وخلفت كمان منه لكنها مش سهلة خالص
المهم انها أقنعته انها تنطلق ويتجوزها وفعلا حصل وطبعا انا عرفت وطلبت الطلاق وفعلا البيت اتخرب وهى وصلت الى هى عايزه وطبعا الضحية الأولى فى الموضوع ده هما ولادى المشكلة انى مش قادرة أنساه رغم اللى حصل ودائما بلتمس له العذر مش عارفه ليه وبحس انى لازم اساعده علشان يتعالج ومش محتاجة اقول انه طلقنى غصب عنه وأنه مش مرتاح لكنه رافض يعترف بالخطأ
هل ممكن أنه يتعالج وازاى اعرف اقنعه بالعلاج لان ولادى محتاجينه جدا ولسه صغيرين وانا كمان محتاجه وبينا عشرة وحب مش قادرة أنساه ودائما حاسة أنه ابنى ومينفعش اتخلى عنه . بس كمان انا زهقت من تصرفاته و بقيت اودي العيال فترة طويلة عنده او عند والدته عشان يصرف عليهم لانه مش بيبعت اي فلوس ولا نفقة .
اسفة الإطالة بس حبيت اوضح أن من ضمن اسباب زواجه بالبنت دى أنه كان عايز يقهرنى ويضايقنى لأنه بلغنى بكل تفاصيل علاقته بها وخطوات زواجه هتم ازاى
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي يا فندم . .
من النادر لما بشوف شخصية يتجمع فيها حاجتين هما علي طرفي النقيض معا , من ناحية هو ضحية أم جاهلة قاسية , واب سلبي , ومعاناة طفولية لا تصدق . .
و من ناحية هو مجرم بكل المقاييس , بداية من انخراطه في سلك الشرب و "المزاج" , وصولا لضربك و اهانتك , وانتهاء بهذه الزيجة المدهشة , من بنت ربنا يعافينا و يهديها . .
الجذور النفسية للطفولة واضحة جدا في تركيبة شخصيته , والأثر النفسي العميق واضح في تعاملاته , و اللي كان انعكاس للجرايم اللي ارتكبت في حقه لما كان طفل صغير , وشاب مراهق , ورجل راشد . .
أكيد انتي مكنتيش تعرفي التفاصيل ديه لما وافقتي علي الزواج , و انا شايف انك عملتي المستطاع في تقويمه و إصلاحه , لكن هنعمل ايه , حطي في بالك دايما الآية ديه من سورة فاطر (فَإِنَّ اللَّهَ يُضِلُّ مَنْ يَشَاءُ وَيَهْدِي مَنْ يَشَاءُ) المولي تبارك و تعالي يختار لهدايته من يشاء , و يمنعها عن من يشاء , ( فَلَا تَذْهَبْ نَفْسُكَ عَلَيْهِمْ حَسَرَاتٍ ) يعني متشعريش بالضيق او الحسرة علي اي شخص , (إِنَّ اللَّهَ عَلِيمٌ بِمَا يَصْنَعُونَ) المولي تبارك وتعالي يري كل افعاله , و ثقي ان ربنا هيحاسبه وهو ارحم به من رحمة الأم لولدها . .
----------------------------------------------------------------------------
و خدي بالك ان وجود اي اضطراب نفسي , لا يبرر ارتكابه لسلسلة الجرايم ديه , خاصة اننا مش قدام حالة فيها "اختفاء للوعي" , زي مثلا بعض مرضي السيكزوفرينيا , واللي كنا ممكن نعذره عليها , احنا بنتكلم في شخص بيتخذ قراراته بوعيه بالكامل , بدليل انه ناجح في شغله , و عمره ما هيصل للنجاح ده مالم يكون محتفظ بوعيه و استقراره العقلي بالكامل . .
وجود عدد من الاضطرابات النفسية ممكن يجعلنا نتفهم المصايب اللي عملها , بس منعذروش عليها , ولا نقول ان ده غصب عنه او مش بايده , والا هنكون بنضحك علي نفسنا . .
و الحقيقة اني اختلف معاكي في استمرار حبك ليه , او في رغبتك في الاستمرار في المعيشة معاه , هو مش شاب مراهق اتخذ قرار هوائي عشان نقول اهو هيكبر و يعقل , ولا هو عنده اضطراب نفسي عميق عشان نقول ده مش بايده , ولا اللي عمله كان خطا واحد مفاجئ اللي نقول انه حاجة طارئة , انا مش شايف ان سلسلة الخطايا اللي اتعملت ديه تنم عن انسان راشد او عقل ناضج , وان اللي زي ده , من غير المناسب الاستمرار معاه لاي سبب . .
و حتي لو انه طلق مراته التانية , ورجع ليكي , فنصيحتي ان انسان بالشكل ده , هي غير مؤهل انه يكون زوج محترم , او اب صالح , وان تأثيره السلبي هيمتد لأولاده عشان يزرع فيهم من صفاته الغير مقبولة . .
هو كشخص علاجه يبدأ باقتناعه ان هو عنده أزمة كبيرة ولا بد لها من علاج , ان مكانش هو من جواه مقتنع بوجود ازمة من صنعه , وان هو لازم يمشي خطوات واسعة لعلاجها , فمفيش اي وسيلة لانقاذه
لو هو اقتنع بده , فلازم يبادر فورا بالذهاب لطبيب نفسي متخصص , عشان يعمل تشخيص كامل له , و يحدد كمية الاضطرابات النفسية اللي عنده , ويبدأ في تفكيكها واحد ورا التاني , عشان يقدر يعالجهم بقدر المستطاع . .
لكن اي مجهود هيبذل في اصلاحه , من غير ما هو يكون مقتنع ان عنده مشكلة , وانه لازم يتغير , هيكون نفخ في "قربة" مقطوعة للاسف . .
---------------------------------------------------------------------------------
نوصل للنقطة المهمة , واللي لازم اتكلم عنها بالتفصيل , و بلهجة حازمة معاكي انتي بالتحديد . .
ان كنتي علي طول الخط احسنتي التصرف معاه بقدر الإمكان , فأنا شايف جريمة علي وشك الحدوث دلوقتي , وهتكوني انتي المتسببة فيها , وهي تدمير الأطفال . .
كون ان هو يهمل – عن عمد او عن غير عمد – في ارسال النفقة للأولاد , فانتي ترمي الاطفال عنده , او عند أمه , فديه كارثة كبيرة , لأن الضحية وقتها هيكونو الأطفال اللي ملهومش اي ذنب في الحرب المشتعلة . .
أطفالك سواء الكبار اللي في سن المراهقة او حديثي السن , محتاجين رعاية و اهتمام مبالغ فيهم , بل لازم كمان يكونو اكثر من المعتاد للتعويض عن أزمة ابيهم المضطرب نفسيا , فلو انتي "رميتيهم" في بيته او بيت امه , تبقي ذبحتيهم حرفيا , وبتحكمي عليهم انهم ينشأو في جو ملوث بالازمات النفسية و المشاكل العديدة , ولما يكبرو هيدعو عليكي دعاء حار . .
اكيد مفيش حد هيقدر ينقذهم حاليا الا انتي , لازم ميبعدوش عنك ابدا , ولاي سبب كان , انتي قلتي انك بتشتغلي و بالتالي ممكن تصرفي عليهم , بل لو وصل الأمر انهم يتعلمو في مدارس حكومية معفنة , او ياكلو يوم و يجوعو يوم , هيكون افضل بكتير ما يعيشو حياة الملوك عند ابوهم او جدتهم . .
اياكي تخلي خلافك مع طليقك يجعلك تتخذي قرار زي ده , فورا يكونو معاكي و لا يفارقوكي الا لما يكبرو و يندمجو في معركة الحياة و يتجوزو . .
و بالنسبة للنفقة , بالطبع الجئي للمحكمة , هو انتي عايزة توفري فلوس جوزك , عشان تستمتع بيها زوجته التانية و اهلها ؟ ؟ انتي بتوفري الفلوس لمين ؟ ؟
متتعامليش مع جوزك علي انه مضطرب نفسيا , حتي لو كان فيه عدد من الاضطرابات لكن ده ممنعوش من اتخاذ قرارات حمقاء عديدة . .
فورا ارفعي قضية نفقة , وخلي المحكمة تحدد المبلغ المناسب لام و اربع اطفال , ويدفعهم رغما عنه , ولو وصل الامر انه يتسجن خليه يتسجن , هو مش فقير ولا معذور , انتي قلتي ان مرتبه كبير بالفعل و الهانم بتخلص عليه . .
في كل الاحوال حتي لو معرفتيش تاخدي اي فلوس منهم , ساعتها خلي اولادك في حضنك و ميبعدوش عنك ابدا , لانك عارفة و متأكدة انهم لو عاشو معاه حياتهم هتدمر