بوادر الإنحراف
الرسالة السابقة
العنوان : بوادر الإنحراف
القسم: #الاجتماعي
الرقم: 102
السؤال:
انا متزوجة من 16 سنة اكتشفت إن زوجي عايش قصة حب مع واحدة فتحتلها بيتي وعاملتها زي اخوتي
كانت الصدمة كبيرة عليا وكنت هروح فيها لوﻻ ما فاضل من العمر بقية .. فات علي الموضوع ده اكتر من سنة وانا لا عارفه اعيش وﻻ قادرة انسي وﻻ قلبي قادر يسامح رغم اعتذاره
كنت أشعر بوجود خطأ من سنين طويلة عندما ﻻحظت بعض التجاوزات مثل انتظارها في البلكونة في مواعيد رجوعه من الشغل وتعمد نشرها للملابس في نفس ميعاد عودته من عمله
ما يؤلمني اني وجدته ينظر الي بلكونتها واجهته عدة مرات كان ينكر فيها وكان يقول لي أنه ينظر الي بلكونتي انا وليس هي
و من فترة وجدت هذه السيدة صديقة على الفيس بوك عنده لم أشعر بالراحة وشعرت أن هناك شيئا اخطر لا اعرفه وبصمت مني وانا في حالة ذهول قلت له انا مش قادرة استحمل اكتر من كده وانا امسك الموبايل في يدي فخانه ذكائه واعترف لي وقالي أنها هي من كانت تطارده وانها تكرهني وتحقد علي
في هذا اليوم الحزين بكي قلبي بكاء مرير لم يشعر به أحد اول مرة في حياتي امكث علي سريري ست ساعات ﻻ أستطيع النوم من الساعة الثالثة حتى الساعة التاسعة صباحا ولم يغمض لي جفن وانا افكر فيما آلت إليه العلاقة وهل وقع في المحظور ؟؟؟؟!!!! شعرت بطعنة في ظهري من اقرب الناس لي
بعدها اخذني التفكير تري فيما كانو يتحدثون ومنذ متي بدأت العلاقة واذ بي اكتشف بالتفكير وبربط الاحداث وبعض اعترافاته القليله المبعثرة انها علاقة سنين مع الأسف
بدأت مكالمات اخويه علي حد تعبيره ثم اكملها الشيطان لتصل الي الكلام في كل شيء. ... كل شيء
طلبت منه الطلاق فقال انه مستحيل يضحي بانسانة مثلي عشان شوية صور وشوية مكالمات !!!!!!!
وأنه يحبني أنا ويريد أسرته وبيته وأولاده ولن يضحي بنا وانه من غير المعقول ان اهدم البيت لهذه الأسباب التافهة ولو كل ست خربت بيتها عشان كلم واحده مكنش في بيت عمران أبداً وان كل الرجاله كده وهوه احسن الوحشين
اعتذر لي وطلب السماح وقال أنه عرف قيمتي وانه لن يخذلني مرة أخري ..... ولكني ما عدت اثق فيه وﻻ في وعوده وﻻ في كلامه
قمنا بتغير المسكن وابتعدنا عن المكان القديم لكننا في نفس البلد وفي ظل وجود الهواتف والنت ﻻ اعرف وﻻ اثق في إمكانية عودة العلاقة ام ﻻ
حالياً اعامله بما يرضي الله ارعي شئون البيت والاوﻻد وﻻ اقصر في خدمته وﻻ في رغباته حسبه لله وحده ..... لكن المشاعر .... شيء آخر
حزينة على اللي اخلصتله عمري كله وطلع مايستاهلش حزينة على اللي خاف امره يتكشف أمام الناس ولم يخف من الله حزينة على إني مجبرة اعيش حياة أنا مش مرتاحه فيها
وياتري انا هقدر أكمل بحالتي النفسية دي وﻻ قريب هقع وانهار
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي يا فندم . .
انتي مريتي بأزمة كبيرة , لكن من كرم ربنا ان زوجك كان لسة عنده بقايا من عقل , جعلته يفرمل نفسه في اللحظات الأخيرة قبل وقوع اي كارثة , وقبل ما يتفاقم الأمر لأبعاد أكبر من كدة .
انا مش بأقلل من حجم اللي حصل , لكن لو تابعتي الصفحة عندنا , هتلاقي ان ربنا كرمك و كرمه انه توقف في مرحلة معينة , قبل ما يحصل تجاوزات غير مقبولة ,وان ردود افعاله معاكي كانت افضل – نوعا ما – من أزواج تانيين بيركبهم العند , ويقول لمراته اعلي ما في خيلك اركبيه , واخبطي راسك في اتخن حيط . .
المشكلة كبيرة لكن ليها حل ان شاء الله . .
------------------------------------------------------------------------------
والأزمة كالمعتاد بدأت من التجاوز غير المقبول بين ذكر و أنثي , وده اللي قلناه لغاية لما بُح صوتنا علي الصفحة , ازاي ان اي تفتح و تبسط في الكلام بين واحد وواحدة , غالبا ما بيؤدي لنتائج خطيرة و آثار مدمرة , و ازاي ان الاستهتار في وضع الحدود بيدمر الاستقرار الزوجي , وان الحكمة القديمة صحيحة , إن : رفع الكلفة يزيد الألفة . .
لكن من الوصف التفصيلي اللي انتي كتبتيه , احنا حاسين ان عقله رجع لراسه , وان زوجك اتعلم الدرس بشكل كبير , وان حرصه علي استمرار حياته الزوجية , و تجنب الطلاق هو حرص حقيقي و جاد .
و من هنا ممكن نقول ان لابد من إعطائه فرصة للتكفير عن ذنبه , ولترميم الصدع اللي اصاب البيت الزوجي من حماقته السابقة , وطالما هو أبدي بالفعل استعداد كامل إصلاح الماضي , فانتي حاولي تساعديه . .
و إصلاح الأمر ممكن يكون عن طريق عدد من النقاط :
-
أولا ابدئي بإصلاح حالتك النفسية , لازم من جواكي تبدأي تخففي شوية من الآثار النفسية السلبية اللي حصلت من الأزمة ديه , لازم تتعاملي مع اللي حصل مش انه نهاية العالم , خاصة ان زي ما قلتلك محصلش السيناريو الأسوء , اللي كان ممكن يكون اكتر بشاعة
ياريت تقريها و تنفذي الجزء العملي اللي في نهايتها
-
من الحاجات اللي بتسهل الأمر شوية , انك تتخيلي سيناريوهات أسوء كانت ممكن تحصل , لكن كرم ربنا جعل انها متحصلش , لما تتخيلي انه كان اتجوزها , او ارتكب معاها علاقة ,او كان اتفضح قدام جوزها , او لو كان تعامله معاكي شديد القسوة و العناد, لما تتخيلي السيناريوهات اللي محلتش ديه , هتعرفي ان كرم ربنا كان عليكي كبير , وان الأزمة اللي حصلت – حتي لو كانت كبيرة – فهي قابلة للإصلاح بشكل ما
-
من المهم ابعاد الأطفال تماما عن الازمة , انهم ميعرفوش عنها اي شئ , لأن هما في سن محتاجين يستمدو قوتهم و خبراتهم و علمهم من الأب و الأم , فمن المهم ان بالفعل ميكونوش علي إطلاع علي أي جزء من المشكلة , ولو عرفتي انهم حسو ان فيه مشكلة بس مش عارفين التفاصيل , فممكن بالاتفاق مع زوجك انكم ترتبو كلام محدد يتقال , بس من غير ما يكون فيه كذب : ( ده كان فيه مشكلة معينة مع حد معرفة بس خلاص المشكلة اتحلت خلاص ) , ومن غير ما تقولي المزيد من التفاصيل
-
من جميل انك سترتي عليه ومحدش عرف بالازمة الا اقل القليل , من المعروف ان المشكلة العائلية طالما هي لازالت بين ارجاء البيت الزوجي فهي قابلة للحل , لكن اول ما تتخطي حدود البيت فبتتفاقم بشكل كبير , وهيكون من شبه المستحيل حلها , وارجو انك تحافظي علي الستر ده لنهاية الموضوع
- من تعامله معاكي , انا حاسس ان ده كان درس مؤلم له , وانه اتعلم منه بشكل كبير , وان اللي حصل كان زلة شيطانية من امرأه تفتقد للحد الأدني من الخلق و القيم – ربنا يهديها – و ده بالطبع لا يقلل من حجم جريمته ,بس علي الأقل يخلينا نعرف تعاطيه كان عامل ازاي مع الأزمة
- و بالتالي أغلب الظن انه مش هيرجع تاني للطريق المعوج , خاصة لو انتي استمريتي في التعامل الحذر معاه , عشان يعرف انك لسة مش مطمنة ليه تماما
- متتعامليش معاه باطمئنان 100 % , وفي نفس الوقت متسمحيش للشك انه يدمر حياتك , اعملي نوع من الموازنة بين ده و ده , و مع مرور الشهور هتظهر ليكي الصورة الكاملة , وهيبان مدي اخلاصه و تغيره
- قد يكون من المناسب عدم فتح الموضوع مرة تانية معاه , طالما مش شايفة بالفعل اي بوادر انحرافات او تواصل معاها او مع غيرها , مش من المناسب ان يتم "إذلال" الشخص اللي غلط باستمرار بالغلط اللي عمله , عشان ميحصلش نوع من الملل من كتر العتاب في غير محله , خاصة انه بالفعل قد يكون تاب و اتغير
- ده غير ان كثر العتاب هيصنع مشاكل من الفراغ , و هيبدأ يخليه يتعامل معاكي بنوع من الحدة و العصبية , ولسان حاله بيقول : خلاص بقي مش شغلانة هي
-
لو عرفتي ان هي تواصلت معاه تاني , فممكن تهدديها بفضحها قدام جوزها , عشان تتلم و تعرف انها ماشية في طريق مظلم , ممكن يوصلها لنهاية سوداء , وتخليها تخاف
-
لو حسيتي بعد فترة انه بالفعل اتغير ايجابا , وانه بقي انسان كويس, ساعتها سامحيه و انسي اللي فات , واعتبري ان اللي حصل كانت ازمة سابقة , وربنا غفور رحيم