العنوان : فوبيا الطلاق

القسم: #الاجتماعي

الرقم: 103

السؤال:

 

مشكلتي اني اتجوزت و اتطلقت و معايا طفل , كل ده و انا عمري 24 سنة , وده اللي حصل معايا . .

 

• لما تقدم للخطبة ظهر بمظهر الملتزم الخلوق، ونجح في اقناعي بكدا، خطوبة استمرت 9شهور.

 

• بعد الزواج سقط القناع بالتدريج، شخص مش بلتزم بالصلاة بيسمع اغاني وأفلام ومسلسلات وكمان بيتخانق معايا علشان مش بسمع معاه، عايز يخليني اخلع النقاب قدام أخواته الرجال واهزر معاهم، أخواته البنات وبنات أخواته لبسهم مش كويس (وبتحصل تجاوزات مع بعضهم تحرش) عايزين اندمج معاهم في اسلوبهم رغم اني مش بعاملهم وحش بس بحاول اتجنب ما يخل بديني، وهو كان بيقعد مع مرات اخوه ويدخل شقته وأخوه مش موجود وعايز اخوه يدخل عندي وهو مش موجود بس انا رفضت ورفضت كمان موضوع خلع النقاب، طبعا واجهت مشاكل كتييير جدا بسبب رفضي دا لكن اصريت على موقفي على اساس اني لو تنازلت عن مبادئ خلاص انا كدا انا هكون فقدت نفسي وديني ودا بداية الفتنة والانجراف معاهم في نفس القذارة وسوء الاخلاق.

 

• في بداية الزواج كان بيتلكك على كل حاجه ويتخانق معايا على اتفه الأمور ويخاصمني بالأسبوع ويروح الاوضة التانيه 4و7ايام) ومكنش لينا غير اسبوع واحد متزوجين، الصراحة انا استغربت تصرفاته وكنت في حيرة، بس استغربت اكتر أن كيف احنا لسه متزوجين جديد ويقدر يبعد الفترة دي كلها عادي!! لحد في مرة فتحت الباب فجأة ولقيته بيشاهد مشهد إيباحي وبيعمل العادة السرية، ولما حاولت اتكلم معاه اتخانق معايا وفضل يضربني لحد ماأغمي عليا وكنت في الوقت دا انا كنت حامل في الشهر السادس (اكتشفت موضوع العادة والمواقع الإباحية بعد شهر ونص من الزواج ولكن لم أواجه اعتقادا مني اني ممكن احاول انصحه بطريقة غير مباشرة، وكمان علشان خايفه من رد فعله، لكن لقيت نفسي بتدمر نفسيا ومش قادرة اتحمل، فواجهته بأسلوب اننا نلاقي حل مش انتقاد ولا تقليل لكن كان رد فعله انه ضربني لحد ماأغمي عليا ضرب شديد وعلم فيا وقعد يرد بكلام ملهوش علاقة بالموضوع اساسا

 

• كان دايما يهيني ويقلل مني وإساءة بالألفاظ ويقول انا هدمرك انا هكسرك، وفي الوقت دا كنت في سنة رابعة كلية (هي نفس السنه اللي تم فيها الزواج) كان مش عايز يوديني الامتحانات ويقول فيها لما تسقطي وتعيدي السنه ولا مش لازم تجيبي ممتاز يعني فيها لما تجيبي مقبول

 

• خلال الحمل مفيش اي تقدير لأي تعب انا فيه أهم حاجه هدومه تكون مكويه، أكله جاهز، كل حاجه خاصه بيه سواء تعبانه مش تعبانه انا مجرد خدامه وفقط، معرفش عنه أي حاجة ومش مسموحلي بأي سؤال عنه حتى اني اعرف هو ليه اتأخر أو فين، أنا حاجه محطوطه في البيت أخري اكل اشرب وكمان خسارة فيا 6)قبل الولادة طلب مني اني اروح عند اهلي علشان ميتحملش مسؤلية ولادتي، وجاب للبيبي هدوم بالعافيه وحاجة بسيطه بعد طلب منه اكتر من مرة واضطريت خليت ماما كملتلي، أهله بعد ماولدت تاني يوم أمه واخته ومرات اخوه اتخانقوا معايا وخلوني انهارت من البكا كل دا علشان خدوا ابني من جنبي خمس ساعات وقولهم عايزه ارضعه وحشني، هو كان في فترة مابعد الولادة مش بيسأل عليا ابدا ومخاصمني ولا بيسأل حتى على ولده وانا في نفس الشقة يجي من برة يدخل الاوضه ولا كأن في وحدة عاملة عملية قيصرية ولا طفل يسأل عليه وكمان اتخانق مع والدتي وغلط فيها، وانتهت بأنه ضربني بعد 12 يوم من الولادة وانا حالتي اساسا صعبة نفسيا وعضويا

 

• طبعا بالاضافة لكل دا تدخلات أهله البشعة وخناقات معايا ويغلطوا فيا وكمان يسلطوا عليا وهو مايصدق علشان يتخانق معايا، حاولت كتير اضغط على نفسي تعبت جدا من غير اي فايدة بل الأمور بتزيد سوء، فكرت لقيت اني  مش هستمر بحالة المقاومة النفسية دي كتير اكيد هيجي وقت نفسيتي هتدمر، ديني وأخلاقي في الفتن اللي انا فيها دي مش هيستمر وسط الفتن دي، ذريتي اكيد مش هتكون صالحة ابدا في البيئة دي فأخذت قرار الطلاق وكان أفضل الحلول بعد معاناة استمرت سنة ونص، طبعا قرأ كان صعب جدا خاصة أن اخويا كان معارضين بشدة لكن اصريت على قراري فأنا وحدي من يعاني، الناس مش هينفعوني لما افقد ديني وأخلاقي ونفسيتي وصحتي وعمري ماهقدر أربي ذرية كويسه في ظل الظروف دي الاهل والأب بالشكل دا وانا لوحدي في البيئة دي.

 

• طبعا علشان يطلقني المطلوب مني اتنازل عن حاجاتي والمؤخر، وكمان ميصرفش على الولد، واخويا بيطلب مني اني اتنازل علشان اريح دماغي بس انا موافقتش لأن دا حقي وحق ابني وكفايه انه ظلمني في حياتي معاه، رفعت قضايا وتقريبا انا لوحدي في الحكايه دي بس عادي ربنا معايا وكفى. ولسه في موضوع القضايا في الوقت الحالي.

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

سلام عليكم ورحمة الله

 

مش واضح من سؤالك ايه النقطة اللي بتسألي عنها بالتحديد , فأنا هافترض انك بتسألي عن رأينا بشكل عام في اللي حصل و اللي هيحصل , وده اللي ممكن نلخصه في النقط التالية :

 

 

• ان انتي تم خداعك للأسف في مرحلة الخطوبة بالمظهر المتدين , وان كان فيه جزء من اللوم يقع عليكي , في ضروره التأكد - بشكل عملي – من مقدار تمسكه بالدين , ومدي انضباطه الشرعي هو و اسرته , كان لابد تبحثي عن وسائل للتأكد منها قبل الزواج , مش تعملي تقييم علي المظهر المزيف

 

• انتي كان عندك حق تماما في كل الخطوات اللي عملتيها في مقاومة الخلل اللي بيصنعه , مش بس هو متمسك بالمعصية , ده كمان بيدعوكي بكل قوة للموافقة علي المآسي ديه و المشاركة فيها  , و بالطبع اي استسلام منك هيكون بمثابة فتح باب الانحدار تجاه مساحات مظلمة , ربنا يحفظنا واياكم منها

 

• رد فعلك  تجاه جرايمة المستمرة كان أقل من المطلوب, غالبا انتي كان لسة عندك أمل في البداية انه يتغير و يكون انسان سوي , او إنك كنتي بتدوري علي حد بعيدا عن الطلاق , لكن واضح إن هو اللي كان مصر بحماقته المستمرة في هدم البيت تماما

 

• القرآن أمرنا اننا ننتصر علي الظلم اللي يقع علينا (وَالَّذِينَ إِذَا أَصَابَهُمُ الْبَغْيُ هُمْ يَنْتَصِرُونَ) سورة الشوري , وبالتالي كان واجب عليكي من اليوم الأول انك تسعي لرفع الظلم عن نفسك , و علي الاقتصاص منه , خاصة لما وصل لمرحلة الضرب الوحشي و الإهانة الغير معقولة

 

• قرار الطلاق كان صائب تماما , بل خلينا نقول انه كان متأخر , كتير من الناس بيكون عندهم فوبيا الطلاق وكأنه نهاية العالم , من غير ما يكونو عارفين ان فيه كتير من الحالات , بيكون الضرر الواقع من استمرار الزواج اضعاف الضرر اللي هيحصل من الطلاق , فالقرار سليم , وانتي كان عندك حق في مواجهة اي شخص يحاولي يثنيكي عنه , كلهم ايديهم في المياه الباردة

 

• متتنازليش عن اي حق ليكي , استمري في القضية ضده , واياكي يكون عندك شفقة او رحمة في قلبك تجاه انسان بالشكل ده , اعرفي ان وجود اي رحمة في قلبك ده شئ مش من الدين ولا من العقل , الشرع الحنيف امرنا بالاقتصاص من الظالم مش اننا نطبطب عليه , وكل آيات و أحاديث العفو عند المقدرة ملهاش علاقة بالظالم اللي بيطغي علي الناس

 

• لو وصل الأمر لدخوله السجن وافقي بلا تردد , ديه مش قسوة لكن تطهير للمجتمع من النوعيات الموبوءة اللي بتؤذي كل من حولها , وفيه ناس ملهاش علاج الا بالعقاب المؤلم

 

• ركزي حاليا في حياتك و ابنك , واعملي اللي تقدري عليه عشان ينشأ في ظل رعاية دائمة , وبيئية سليمة , نفسيا و اجتماعيا و دينيا

 

• مش هتعرفي تمنعي طليقك انه يشوف ابنه , بس علي الاقل اتأكدي انه مش هيبث فيه افكار سامة , او خلق منبوذ

 

 

ربنا يفك الكرب عنك يا رب , ويعوضك عن معاناتك