العنوان : القاموس الزوجي

القسم: #الاجتماعي

الرقم: 104

السؤال:

 

السلام عليكم

هو المفروض سن الارتباط الأنسب بالنسبة للبنت والولد كام وفرق السن كمان مابينهم قد ايه

  

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله

 

الحقيقة ان مفيش سن محدد , اللي نقدر نقول عليه انه سن مناسب للزواج . .

 

ليه ؟   لأن الزواج مش مرتبط  بسن معين , لكن مرتبط بمجموعة من الصفات و المعايير , اللي لو تواجدت في الولد او البنت , فنقدر نقول انه بقي مهيئ للزواج ايا كان سنه , ولو اختفت , فللأسف مش هيكون جاهز للزواج مهما كان عمره . .

 

صحيح ان متوسط عمر الشباب اللي بيتجوز بيكون 28 , ومتوسط عمر البنات هو 24 , لكن نرجع و نقول مش ده المعيار في تحديد السن المناسب للزواج , لكن هل يا تري الشاب او البنت عنده الصفات المؤهلة للزواج ولا لأ . .

 

طب ايه هي الصفات ؟  , تعالي نتكلم عنها بشكل سريع

 

 

•  
•  

 

• ان أولا – الولد او البنت – يدرك ان الزواج هو التزام  ومسؤولية , مش رحلة ولا فسحة , ان هو  مهام و تبعات , مش سلسلة من الراحة والمتع . .

• لازم من أولها يكون كلا الطرفين شايف الصورة الكاملة , عشان يكون قادر علي التعاطي معاها , وتحمل المسؤولية بشكل مناسب

 

• ان كلا الطرفين يكونو مستعدين للتضحية , بوقت و مجهود , بالراحة في النوم , او الشغل في النهار , بشوية مجهود نفسي و ضغط عصبي , بالتنازل عن جزء من الراحة اللي كانت موجودة وكلا منهما لسة اعزب

 

• ان هما يكونو عارفين المعاد المناسب لإنجاب طفل , وبالتالي يخططو كويس منعا لوصول ضيف مفاجئ في غير موعده , وقد يتسبب في عدد من المشاكل او المضايقات

 

• ان هما يكونو عارفين ان وصول طفل معناه المزيد من التضحيات و التبعات , المادية و المعنوية و النفسية , وكل اطراف الحياة الزوجية اللي بتتأثر بشكل ما بوجود طفل محتاج رعاية و اهتمام بالغين

 

• ان الزوج , يكون فاهم ان فوق دماغه المسؤولية الكاملة عن فتح البيت , وان حتي لو مراته بتشتغل فهي مش مطالبة بالصرف علي البيت , بل ان من حقها انها متشتغلش من البداية , او انها تسيب الشغل مع وصول طفل , ده حقها وهو لازم يراعي ده

 

• ان الزوجة تكون فاهمة ان خدمتها لزوجها و لطفلها و جميع شئون البيت (اكل , غسيل , نضافة) , مش تكرم ولا تفضل منها , لكن تقسيم طبيعي لمهام الزوج و الزوجة , وبالتالي حتي لو زوجها مقدرش يشارك معاها في واجبات البيت , او كان يقدر بس مكسل شوية , فمينفعش انها تعقد مقارنات , او تستلهم خطب قاسم امين و هدي شعراوي , واللي هتهدم السلام الداخلي في الحياة الزوجية

 

• ان الزوج يفهم ان رفع ايده علي مراته معناها انه إنسان حقير مش بيفهم . وان الدين الحنيف لم يشرع الضرب الا في إطار ضيق جدا , هو غالبا ميعرفش عنه شئ , وإن من حق مراته انها ترد الضرب بضرب, وان : اذا ارتفعت الأيادي , تساوت الرتب

 

• ان الزوج كمان يفهم ان إهانة مراته بالشتيمة او السخرية او التقريع هو شئ يدل علي مستوي التربية اللي هو اترباها , وعلي عقده النفسية العديدة , اللي بتجعله يغطي علي فشله الحياتي , بإهانة اللي قدامه

 

• ان الزوجة تفهم ان سكوتها علي ظلم زوجها ليها , هو بمثابة القبول التام علي الحياة معاه في ذل مستمر , و انها لازم فورا تقاوم اي محاولة منه لضربها او اهانتها , طالما ده تم في اطار الظلم

 

• ان الزوجة تفهم ان زوجها مش ماكينة صرف فلوس , وان دوره في البيت اكبر من انه يشتغل و يجيب فلوس , وبالتالي تتوقف عن تحميله ما لا طاقه له به

 

• ان كلا الزوجين يعرفو ان اغلي راس مال عندهم هما اولادهم , اللي لابد يفرغو ليهم كمية لا بأس بها من الوقت و المجهود و الاهتمام , عشان يربوهم بشكل سليم , يلقنونهم الحب الكامل , والحنان المطلوب , و الاسس السليمة في التعامل مع الحياة

 

• ان كلا الزوجين يعرفو ان المشاكل بينهم يتم حلها تحت سقف بيتهم , وان مع خروج اي مشكلة خارج إطار بيتهم , فده معناها بداية المآسي , حتي لو كان لأقرب الناس لهم

 

• ان كلا منهما يتجنب اي مشكلة بينهم او نقاش حاد امام الاطفال , سهل انك تتناقش او حتي تتخانق مع مراتك بعيد عنهم ,  لكن لازم هما ميشوفوش منكم الا كلمة واحدة , واتفاق دائم

 

• ان الزوج يعرف ان اهماله في اعطاء اسرته حقهم في الخروج و الفسح يعتبر جريمة , وان مفيش اي عذر ليه يمنعه عن تنفيذ ده , حتي لو بشكل مبسط

 

• ان الزوج يتعهد قدام ربنا , انه يغلق عينيه و اذنيه و فمه , قدام اي تجاوز او تواصل او هزار مع اي واحدة تانية , وانه كدة بيخرب بيته حرفيا , لو عايز يتجوز تاني فده حقه , بس يكون قادر علي واجبات و تبعات التعدد بشكل سليم

 

• ان كلا منهما يعتمد علي الدين كأساس قويم في رسم العلاقة بين بعضهم البعض , وفي تنشأة أطفالهم بالشكل السليم

 

 

ببساطة ديه هي مفردات القاموس الزوجي , واللي لو كلا الطرفين كان قادر علي تفهمها – او حتي اغلبها – فهو يكون مؤهل للزواج حتي لو عمره 10 سنين , واللي لو اختفت فهيكون مش مؤهل للزواج , حتي لو بلغ من العمر ارذله  .