العنوان : طفلي و التحرش

القسم: #الاجتماعي

الرقم: 105

السؤال:

 

السلام عليكم

 

انتم صفحه مميزه جدا فى حياتنا شكرا لاهتمامكم ومجهودكم معانا

 

انا مشكلتى انى بخاف على ولادى اوى انا عندى بنت خمس سنين وولد سنتين و٩ شهور وبصراحه انا موسوسه من تعامل اى حد معاهم بمعنى اقول لبنتى ماتبوسيش اى حد الاعمك وجدك وابوك من الخد طبعا وديما بوعيهها انها ماتقعدش على رجلين اى راجل وماتخليش حد يمسكك من الولاد العبي براحتك بس ممنوع اللمس وبخاف عليها تنزل لوحدها مع اولاد عمتها الشباب

 

وده عملى مشاكل كتير بس اللى انا عوزاه تم رغم ان زوجى ديما بيقولى حتقعدى البت لكن باامانه موافقنى على كل اللى حكيته ده بس الجديد ان بنتى حتدخل المدرسه السنه دى فى شهر عشره الجاى وانا مروعبه جدا من اى حاجه تحصل معاها خصوصا انها مش بتحيكلى اى حاجه الا بصعوبه بالغه جدا انا نفسي تعيش طفولتها بحريه بس غصب عنى اللى بسمعه وبشوفه مخلينى خايفه اوى ياترى انا صح ولا معقده زياده عن اللزوم

 

ويياريت لو تقولولى نصايح اقدر احصنهها بيها من الناس الوحشه وازاى اتعامل مع ولادى من غير ما اخنق حريتهم ويكرهونى ساعدونى شكرا شكرا 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله  .

 

اهلا بيكي يا فندم  . .

 

في البداية لازم نحييكي علي وعيك الكافي , اللي خلاكي مهتمة بقضية شديدة الأهمية زي : التحرش بالأطفال , و صناعة المساحة الآمنة في التعامل , والسبب في ده ان عدد كبير من الأسر عندهم نوع من الجهل التام , والإهمال الغير معقول في النقطة ديه , و ده اللي بيتسبب لاحقا في مآسي لا حد لها  .

 

فاهتمامك بالنقطة ديه شئ ايجابي جدا , وارجو انك تحرصي عليه للنهاية , وتقفلي ودانك عن اي اراء جاهلة تتعامل باستخفاف مع القضية المصيرية ديه , او يظهر استهزاء باهتمامك , او يقولك انك مزوداها . .

 

و معضلة الخوف من التحرش بالأطفال , انه ممكن يصنع  مشكلتين متناقضتين . .

 

اما ان الأب أو الأم يكون شديد الخوف علي ولاده (ذكور او إناث) , وحريص جدا عليهم , و بالتالي يعمل لهم حماية كاملة عن مآسي المجتمع  و يجعله عايش في قوقعة خاصة بيه , فالطفل – رغما عنه – لما يكبر هيصاب بالصدمة لما يحتك بالمجتمع , اللي هو كان بعيد عنه و عن قذاراته . .

 

أو إن الأب أو الأم يكون شديد الإهمال في تناول مشكلة التحرش , فيكون فيه استهتار في التنبيه علي الطفل في السلوكيات السليمة , فيكون ضحية مشكلة ما , تدمر مستقبله او صحته النفسية للأبد .

 

فلابد يكون فيه نوع من التوازن , بين الحرص الشديد علي الطفل و الخوف عليه , وبين اننا نجعل الطفل يحتك بالحياة و مقوماتها و معاركها الحقيقية , عشان يصلب عوده , ويشتد ساعده . .

 

و ده اللي هنحاول نترجمه في خطوات عملية كالتالي :

 

• أولا اي شخص يقلل من اهمية اللي بتفكري فيه , تعرفي فورا انه اجهل من دابة , وانه لا يستحق حتي عناء انك تردي عليه , ببساطة تجاهليه و متشغليش بالك في البحث عن رد مناسب عشان تقنعيه , و اياكي تتنازلي عن اهتمامك و حرصك و خوفك علي اولادك

•  

• ان لازم يكون خوفك علي بنتك مساوي لخوفك علي ابنك, لأن اعداد كبيرة من المتحرشين دلوقتي مش بيفرق معاهم ده ولد ولا بنت , بل احيانا بيتجهو للولد علي اعتبار ان حرصه اقل , وخوف الاسرة عليه بيكون مختلف , فلازم تاخدي بالك من الولد زي البنت

•  

• ان الطفلة من و هي عمرها 5 سنين , تتعلم سلوكيات مهمة و تتعود عليها , لازم تفهم ان فيه حاجة اسمها "مساحة الخصوصية", اللي اصلا متسمحش لحد ابدا انه يقرب منها , سواء رجل او ست , او طفل او طفلة , قريب او غريب , ولا حتي اقرب الناس لها

•  

• لازم البنت تتعلم من دلوقتي انها مستكتش علي اي غلط , ده شئ لازم يكون بيجري في دمها , انها لما تشوف اي نوع من الغلط تتكلم عنه و متتهاونش عليه , والكلام ده سواء حصل معاها هي , او لو هي شافت المشكلة علي حد تاني

•  

• من المهم ان البنت لو غلطت في اي امر عادي , انك انتي او ابوها متبالغوش في لومها او تعنيفها ,  خاصة لو كانت هي مش واخدة بالها , والسبب في ده ان هي لو اتعودت منكم علي عتاب او ضرب او تعنيف , فهتتجنب انها تقول اي مشكلة تقابلها او تشوفها ليكم , وبالتالي ممكن ان يتم مضايقتها و تخاف تقولكم لتتضرب منكم علي اعتبار ان هي غلطانة

•  

• لازم يتم تعويد الطفل علي الشجاعة في التعبير عن رأيه ,وان هو او هي ميخافش ابدا , بل يكون فيه احترام لوجهة نظره حتي لو ساذجة , و ده عشان يفهم انه لازم يتكلم و يقول اللي يشوفه , مش يسكت و يخبي

•  

• لما الطفل يعترض علي حاجة و يرفض يعملها , حذار من اجباره او الضغط عليه او تعنيفه , لان ده هيكسر جواه عزة النفس , وهيتعود انه يسمع الكلام و هو ساكت , وبالتالي هتكون فرصة ايذاءه اكبر

•  

• لازم يتم تعويد الطفل او الطفلة , ان في اجزاء من جسمك هي اجزاء خاصة , مينفعش ابدا اي حد يشوفها او يلمسها او يتكلم عنها ,مهما كان مين, وياريت اول ما الطفل يكون قادر علي عمل "حمام" لوحده , ان الام تسيبه تماما من غير تدخل منها , ونفس الموضوع لما يكون قادر علي الاستحمام لوحده , وكلما كان السن مبكر كلما كان افضل

•  

• من المهم لما نشوف الطفل بيلمس اعضاءه , اننا منعملش توبيخ او تخويف ليه , لان ده ممكن يعمل انعكاس نفسي سلبي في المستقبل , لكن ان تم صرف انتباهه سريعا عن ده , و اننا نشغله عن الامر ده , وبالطبع اننا نجعل الطفل مرتدي ملابسه كاملة طول الوقت , واول ما يتم الانتهاء من الحمام او الاغتسال , انه يرتدي هدومه فورا من غير انتظار

•  

• حذار من تخويف الطفل بكلمات زي  : متلمسش كذا عشان الكلب ممكن يعضه , او عشان  ممكن حد يقطعه بالسكينة , الكلام ده خطير جدا جدا , وليه اثر سلبي غير محدود , وممكن يتسبب في عجز جنسي كامل للطفل لما يكبر , حتي لو كان الطفل صغير لما اتقاله الكلام ده  , اياكي تقولي اي شئ مماثل لاي سبب .

•  

• مهم جدا ان الطفل ميشوفش اي شكل من اشكال (البوس , الاحضان , المعاكسة , التحرش) علي التليفزيون او اليوتيوب , لازم يكون ده بعيد تماما عن ذاكرته البصرية عشان ميعملش تكرار ليه , او ميتعودش علي الامر ده .

•  

• لازم يكون فيه حزم و صرامة في التعامل مع اي قريب او صديق , خطي حدوده مع الطفل , سواء بالهزار اليدوي او اللفظي (كلام غير مناسب) , من المهم جدا ان يكون رد فعلك عنيف و حاد مع اي شخص زي كدة , حتي لو ادي الامر لقطيعة تامة , والحقيقة ان القطيعة مع انسان سافل زي ده , هو مكسب ليكي من الاساس , اي تهاون او كسوف من ايقاف الشخص ده عند حده , معناه تدمير لمستقبل ابنك او بنتك

•  

• لما تشوفي طفل صغير بيعمل تحرش بابنك او بنتك , فيه احتمال انه يكون بيعمل تقليد للي شافه او سمعه , وبالتالي لازم تعرفي اهله عشان ياخدو بالهم , ولو حسيتي ان الطفل عمل تكرار للامر ده , حاولي تتخذي خطوات حاسمة اكتر عشان ابنك يقطع علاقته بالطفل ده

•  

• لو التحرش تم من طفل اكبر شوية (اكتر من 10 سنين) , يعني باين عليه انه واعي و فاهم , ساعتها اياكي تسكتي , واقلبي الدنيا و عرفي ابوه و امه , واقطعي رجله من البيت , ولو كان في المدرسة بلغي مدير المدرسة , او قسم الشرطة , او الخط الساخن لهيئة الامومة و الطفولة

•  

• مهم يكون فيه قناة تواصل بينك وبين ابنك او بنتك , ويكون فيه ثقة متبادلة , ويكون فيه نوع من "الصداقة" , عشان ييستريحو ليكي , ويحكولك علي اللي بيشوفوه و بيحسو بيه

•  

• بالتوازي , متخليش ولادك عايشين في قوقعة , متعمليش منع ليهم عن انشطة او رحلة او اصحاب , خليهم يحتكو بالحياة وانتي مراقباهم من بعيد

•  

• من عمر 7 سنين , مهم يتم بدأ غرس القيم الدينية السليمة , عشان يكون فيه دافع جوة الطفل  , يمنعه عن جميع المحرمات

•  

• لما طفلك يسالك اسئلة اكبر من سنه (سواء جنسية او متعلقة بالدين او الذات الإلهية) , غلط انه تعنفيه او تزعقيله و مهم انك تحتويه , وتقوليله اجابات بسيطة تتناسب مع عقله