العنوان : الغرفة المُستقلة

القسم: #الاجتماعي

الرقم: 84

السؤال:

 

انا ابني في سنه اولي ابتدائي ومش عارفه افصله عني في النوم مع انه هينام مع اخوه في خمسه ابتدائي كيف  افصله بدون زعل مني وهل لازم يكون له سرير لوحده

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

اهلا بيكي . .

 

احنا كعرب , بيكون عندنا تأخير شوية في موضوع فصل الطفل في النوم عن الأب و الأم , و غالبا بنبدأ نفكر في فصل الطفل في النوم , من بعد سن 5 سنين , بينما أغلب الأسر في أوروبا و أمريكا بتبدأ في تطبيق الكلام ده من عمر 3 سنين . .

 

وكلا من الأطباء النفسيين و الأخصائيين النفسيين , بيتكلمو عن الفوائد اللي بتكون للطفل و الوالدين كمان , لما بيتم فصل الطفل في النوم في عمر مبكر , وكتير منهم أشارو لعمر 4 سنين انه يكون بداية الفصل في النوم  , وان يكون ليه غرفة منفصلة . .

 

وده لأنه بيصنع عند الطفل من وهو صغير عدد من القيم المهمة , منها الاعتماد علي النفس,  ومواجهة الواقع , وتخطي الحواجز النفسية اللي هتقابله في حياته , و مجابهة المخاوف المعتادة للأطفال , والحقيقة ان ده تفكير علمي و سليم , وبالفعل بتظهر نتائجه الإيجابية علي الطفل لما يكبر . .

 

و بالتالي عمر ابنك حاليا (6 او 7 سنين) , هو عمر مناسب جدا عشان يتم تنفيذ الفصل في النوم , و أي انتظار عنه هيدخل في مساحات غير سوية  . .

 

و هنقولك دلوقتي عدد من النصايح , عشان تقدري تخليه ينام في غرفة لوحده او مع أخوه , من غير مشاكل .

 

--------------------------------------------------------------------------------

 

• أولا لازم تحطي في بالك انك لابد هيكون فيه من ناحيته نوع من الضيق والغضب و الاعتراض , الطفل دايما بيبحث عن الشئ اللي بيحبه و بيلبي عنده رغبة الأمان , وهو بالنسبة له الأمان انه ينام في حضن ماما حتي لو العمر كله  , واكيد هيكون معترض علي النوم لوحده , لكن لازم تتعاملي مع الموقف ده , زي تعاملك مع الفطام , في الفطام الطفل بيكون معترض و بيصرخ بشكل مستمر , لكن لازم الأم تدوس علي قلبها شوية و هي عارفة ان ده شئ لابد منه , وإنه في مصلحته حتي لو هو معترض .

 

• اعملي تمهيد للطفل قبلها , يعني متاجيش بين يوم و ليلة و تنقليه النوم عنده هناك , لأ انتي عرفيه ان بداية من شهر يونيو مثلا , انت هتنام في السرير اللي هناك في الغرفة التانية , وياريت يكون قبلها بفترة مناسبة (شهر أو شهرين مش أسبوع ) , ويكون هو عارف ان خلاص باقي كذا يوم علي النقل .

 

• اعملي ربط ذهني عنده ما بين النقل في النوم , وما بين حاجات تانية بيحبها الطفل , زي مثلا : (انك خلاص كبرت مبقتش عيل صغير) , او  (انت لازم يكون ليه غرفة مستقلة) , او (انت بقيت راجل , والرجل بينام في اوضة لوحده),  او (ديه الأوضة بتاعتك , ومحدش ينفع ينام في أوضة حد) . . لما انتي تزرعي جواه مشاعر ايجابية مرتبطة بانتقاله في النوم , هيحس انها خطوة ايجابية عنده , مش عقاب ولا حاجة  .

 

 

 

• ممكن أول شهر في انتقاله لغرفته , انك تفضلي جنبه لغاية لما ينام , بس لو سألك هل هتنامي جنبي متكدبيش عليه , متقوليش ايوة هنام جنبك , عشان لو انتي كدبتي عليه و قولتي ايوة هناك جنبك , فلما يصحي ميلاقيكيش جنبه هيتصدم  , وهيفقد الثقة في كلامك . .

 

• بعد ما الشهر يخلص , ممكن تعملي خطوة تدريجية اكبر , انك تروحي معاه غرفته و تحكيله قصة مثلا قبل النوم , عشان يكون مطمن , لكن متنظريش لغاية لما ينام , يعني تقعدي معاه ربع ساعة و خلاص و تسيبيه هو ينام لوحده او مع اخوه .

 

• ممكن كمان تعملي خطوة ابعد شوية , انك متكونيش معاه علي السرير لكن قاعدة علي كرسي جنب السرير  , بحيث هو ينام وهو عارف انك جنبه , بس تاني لو سالك هتفضلي قاعدة لغاية الصبح متكدبيش , قوليله لغاية لما تنام و اطمن عليك و هامشي , عشان ميفقدش الثقة بكلامك

 

• خلي الغرفة نفسها فيها حاجات مشجعة ليه , كتب و قصص  , او العاب , او صور حاجات بيحبها , ولو ينفع يحصل تعديل في ديكور او دهان الغرفة بحيث يكون بالنسبة له حاجة مشجعة و ايجابية

 

• في نفس النقطة اللي فاتت , حاولي تجيبي بطانية او لحاف او ملاية او مخدات  , عليها رسومات اطفال و حاجات هو بيحبها , بحيث تكون تجربة النوم عنده شئ مبهج فيها الحاجة اللي بيحبها

 

• لو فيه امكانية يكون فيه نور بسيط في الغرفة , مثلا اباجورة او شباك في الشارع , بحيث مينامش في ظلام دامس يخوفه . .

 

• ممكن توعديه بهدية معينة لو ظل منتظم في النوم لوحده شهر كامل , ولما يخلص الشهر لازم طبعا تجيبي الهدية , اياكي تخلفي الوعد ليه والا هيفقد الثقة فيكي . .

 

• في حال انه قدر يواظب علي النوم لوحده لمدة معينة (اسبوع او شهر مثلا) فلازم تحفزيه , وتشكري فيه , وتمدحيه قدام الناس , و تتكلمي عنه قدام قرايبه (وهو سامعك) ازاي ان هو بقي راجل و بقي شجاع و بيعرف ينام لوحده و هكذا , ده بيفرحه جدا و هيخليه يواظب علي النوم لوحده

 

• مهم جدا جدا انك متتراجعيش عن قرار النوم لوحده بعد ما بدأ فيه, وانه مينامش معاكي في غرفتك مهما كانت الأسباب , ومهما عيط و بكي , عشان ميتعودش علي ان اللي عايزه هيتنفذ بالعياط .

 

• كمان لو هو مرض او تعب جدا , مهما جدا انه مينامش في غرفتك حتي لو بشكل مؤقت , لأن كدة العقل الباطن عنده هيقنعه ان المرض هو الطريق انه يرجع ينام عندك , فهيلاقي نفسه لا شعوريا هيشعر بالمرض بشكل مستمر , حتي لو مش بيمثل , فمهم جدا انه حتي لو مرض , يكمل في غرفته زي ما هو , بس انتي ممكن تفضلي معاه فترة اطول , او تعوضيه بحنان اكتر , لكن مينامش في غرفتك لاي سبب .

 

• مهم ضبط مواعيد النوم , بحيث الطفل يصحي بدري فينام بدري , يعني بداية من 9 او 10 يدخل ينام , ميتأخرش عن كدة , وياريت انتي و والده كمان يكون نظام نومكم صحي و تنامو بدري , لانه طالما انتو قاعدين في الصالة هو مش هيوافق ينام

 

لو نفذتي الخطوات ديه بالتوازي , هتلاقي نتيجة ايجابية ان شاء الله  .