توزيع الإهتمام
الرسالة السابقة
العنوان : توزيع الإهتمام
القسم: #الاجتماعي
الرقم: 85
السؤال:
في مشكلة عايزة حلها عندي بنت اختي 7سنين
البت بتكون كويسة وحنينة جدا وفجاه تتخانق مع للي حوليها يعني اقرب مثال امبارح ضربت امها واخواتها وقعدت تشتم فيهم وتعيط وبعديها نامت وصحيت اتأسفت وعيطت
وبعد شوية عملت نفس الحركة وضربتني وشتمتي علي العلم اكبر منها 13سنة وبعدها لشوية اتأسفت وعيط دي اية الحل معاها
مع العلم عندها اخين اصغر منها و احيانا باباها و مامتها بيضربوها بعصبية
ده غير ان بقالهم فترة ملخومين عشان جدها و جدتها في المستشفي فالبيت كله متعصب عشانهم
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي . .
الصورة اللي انتي رسمتيها عن عنف الطفلة ديه , ممكن يتفسر بحاجة من تلات تفسيرات محتملة . .
- التفسير الأول – وهو الأقل إحتمالية – إن يكون عندها أحد أنواع إضطرابات فرط الحركة ADHD , واللي ممكن يتم ترجمته للعنف مع محيط الأسرة , وزي ما قلتلك هو إحتماله نادر لأن جميع اشكال إضطراب فرط الحركة بيكون متلازمة كاملة , وبيبان علي الطفل فورا علامات تانية , منها ان تركيزه و انتباهه بيكون أقل شوية , وأظن ده مش حالتها
- كمان في نفس التفسير , إن يكون عندها إضطراب مزاجي محدد , يخليها تغير في مشاعرها من لحظة للحظة , بس زي ما قلنا ده احتماله قليل جدا , لأن ده كمان بيكون متلازمة كاملة , مش تصرف أحادي
-
التفسير التاني , إن يكون ده تغير في المود بتاعها , وسلوكها بشكل عام , و التفسير ده كمان احتماله قليل , لأن ده ممكن يكون مناسب أكتر بداية من عمر 13 سنة , وبيكون مع الأولاد أكتر من البنات , لما بيبدأو يقتحمو مرحلة المراهقة , بكل عنفها و شطحاتها
-
التفسير التالت – وهو اللي احنا بنميل إلي- إن ده رد فعل ليها , لكمية من المشاعر السلبية اللي تم اختزانها في الفترة اللي فاتت , وبالتالي هي بتعمل تنفيس عنها باستخدام العنف . .
----------------------------------------------------------------------------------
والمشاعر السلبية اللي ممكن تكون عندها ليها كذا سبب محتمل . .
-
أول و أكبر سبب , إنها بقالها اسابيع طويلة في سجن "البيت – المستشفي - المدرسة" , في حين الطفل اللي في عمرها بيتنقل ما بين خروجات و فسح و العاب و خلافه .
- أكيد ده شئ مش بإيد الأب و الأم اللي – رغما عنهم – مشغولين مع الجد و الجدة في المستشفي , بس غالبا ده السبب الرئيسي , إن هي بعد ما كانت متعودة علي كمية معينة من الفسح و الخروجات , لقت نفسها مسجونة ما بين 3 حاجات اسوء من بعض : البيت – المستشفي – المدرسة , وطبعا ده شئ مش جاي علي هوي الطفلة
-
السبب التاني , هي المشاعر السلبية اللي موجودة أصلا في الأسرة من حواليها , نتيجة مرض الجد و الجدة , يعني هي شايفة أمها و خالاتها يا إما عصبيين يا اما قلقانيين يا إما متضايقين , فطبيعي إن يكون فيه نوع من انتقال عدوي المشاعر السلبية ليها , لأن كل اللي حواليها قلقان و عصبي
-
السبب التالت المحتمل , الغيرة من اخواتها الأصغر منها , أحيانا الطفل بيلجئ للعنف وسيلة لجذب الإنتباه , فبعد ما كانت هي اللي علي الحجر كذا سنة , وكانت هي الكنز اللي كل الاسرة بتسعي إليها , دلوقتي فيه شوية إهمال و مهتمين بالأصغر منها , و ده شئ سلبي للأسف , وبيجعل الطفل يلجئ لوسيلة تجذب الإنتباه , ومنها العنف
-
السبب الرابع المحتمل , هي المدرسة , هي عندها 7 سنين , يعني في أولي او تانية ابتدائي , فهي لازالت حديثة عهد بالمدرسة وقبلها كان اللعب متاح ليها طول الوقت , والمشكلة بتتفاقم لما يكون اسلوب التدريس في المدرسة عقيم و غبي , ولا يتناسب مع أطفال صغار , فيجعلو الطفل يكره المدرسة تماما
-
السبب الخامس المحتمل , هي عصبية الأب و الأم معاها , وكنا اتكلمنا بالتفصيل قبل كدة ازاي ان العصبية معدية للأطفال , فبمجرد ما الأب أو الأم يكون عندهم عصبية , فثقي إن الأطفال هيتعاملو بنفس الطريقة . .
------------------------------------------------------------------------------
طب ماذا عن الحل ؟ ؟
-
أولا لازم العقاب يكون من غير ضرب , ويكون الضرب لأضيق الحدود في التعامل , ياريت تشوفي الرسائل التلاتة ديه , لأن فيها كلام تفصيلي عن كارثة استخدام الضرب باستمرار مع الأطفال
-
النقطة اللي بعدها ان حرام الاطفال يتحملو عقاب جماعي لمرض الجد و الجدة , صحيح إن الكبار مش عايزين يخرجو و لا يتفسحو , لكن الأطفال محتاجين , خاصة إن الموضوع ممكن يطول , فلما كل اسبوع الأطفال تخرج تروح مكان جميل , ده مش هيأذي حد , والجد و الجدة نفسهم هيفرحو لهم
-
لابد من حل مشكلة العصبية عند الأب و الأم من غير نقاش , اي تأخر في حلها معناها غرس الصفة السلبية ديه في الأطفال للأبد
-
النقطة اللي بعدها انها لازم تقلل جدا من معدل مشاهدة اليوتيوب و التليفيزيون و غيره , ده لو كان المحتوي مفيد و هادف فلازم يكون قليل , فما بالك لو كان فيه محتوي سلبي و عنيف .. .
-
كمان لازم يتم فصل المشاعر السلبية اللي ممكن تكون عند أمها و خالاتها عنهم , فلو كان فيه مشاعر الحزن او القلق او العصبية عندكم , ياريت الأطفال ميشوفوش منها حاجة , لأنها هتزرع جواهم الرعب و القلق بشكل كبير
-
لازم يكون فيه توزيع سليم في الرعاية و الاهتمام ما بينها و بين اخواتها , عشان هي متضايقيش و متحسش بالغيرة , ولما اخواتها الصغيرين ينامو , لازم الأم تبقي معاها و تديها حنان و اهتمام مبالغ فيه عشان تعمل شوية تعويض عن الوقت اللي مش بتقعده معاها
جربو الخطوات ديه بالتوازي, و ثقي انك هتشوفي نتيجة ايجابية قريب ان شاء الله