العنوان : الشجار اليومي

القسم: #الاجتماعي

الرقم: 86

السؤال:

 ازاي اقلل المشاحنات بين الاولاد  ؟

انا عندي  بنتي في  ٢اعدادي و ابني في ٥ابتدائي  وابني الصغير في اولي ابتدائي

هم كل مااسبهم مع بعض واخرج مش بيتفقوا ابدا وبيتشاكلوا وبتوصل انهم بيضربوا بعض وانا مش بعرف احدد مين غلط وبزعلهم كلهم وبعاندو بعض

 الولدين بيحبوا الكرتون والبنت بتحب المسلسلات والافلام وانا بزعلها ومش مقتنعه ان الافلام والمسلسلات غلط  عوزين يسمعوا الاغاني وخصوصا المهرجانات

لما اتكلم مع واحد التاني بيدخل في الحوار مثلا انا بسكته وبقول له متدخلش الطرف الثاني بقي بترجمها تحريض عليه ويفضل شايلها الي اقرب موقف مثلا الصغير عارف ان اخته بتضايق لما حد يلمس شعرها يجوا يلعبوا يشدها وتضربه وافضل في تحقيق انا غالبا بطلع غلطانه ومتحيزه علي اي حل

كمان ابني الوسطاني تخين شوية فاخواته بيتريقو عليه وهو بيتضايق

نفسي اختهم تتعامل بشئ من المسؤليه وتخاف عليهم وتخليهم ميخرجوش بس هي بتفكرني اني بحبهم عنها

والمشكلة جوزي رامي كل حاجة علي دماغي ومش عايز يشارك في اي حاجة في تربية الاولاد

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

أهلا بيكي يا فندم  . .

حل مشكلة المشاحنات بين الأطفال هي من الأسئلة اللي بتتسأل بشكل مستمر , والأزمة ان مفيش إجابة سريعة و سهلة و محددة , لأن التعامل مع النفس البشرية بشكل عام هو من المهام بالغة الصعوبة . .

و لما تكون النفس البشرية ديه في سن الطفولة او المراهقة المشكلة بتتفاقم , خاصة مع الضغوط الإقتصادية الملمة بينا كلنا , و اللي بيأثر سلبا علي حقوق الطفل من جودة في التعليم و اكتشاف موهبته و مكان صحي يلعب فيه و هكذا . . .

و الأزمة بتزيد لما يكون أحد الوالدين مهتم و التاني غير مهتم , فلما يكون طرف واحد هو اللي يصلح والتاني سايب المسؤولية , او الأدهي إنه بيهد اللي الطرف الأول يبنيه , فالمشكلة بتكون غير محدودة . .

عامة هكتبلك هنا عدد من النصايح و اللي ممكن يكون ليها أثر إيجابي إن شاء الله , في تخفيف المشاكل بين أطفالك , وفي رفع المستوي العلمي و الأخلاقي عندهم

------------------------------------------------------------------------------------------

• إقامة العدل بينهم

وهي من الأسس الواجب مراعتها , إن لابد من تحقيق العدل التام بينهم , لجعل الأمور تسير في الاتجاه السليم . .

و العدل المطلوب بيكون في أمرين , أولا العدل في المعاملة بينهم و توزيع الحب و الحنان و حسن التعامل أو الأمور المادية , ثانيا لما تحصل مشكلة معينة بينهم , فلابد إنهم يعرفو انك عادلة في الحكم بينهم , ومش هتعملي محاباة لحد علي حساب حد , وده اللي هيجعلهم مطمئنين لحكمك بينهم , حتي لو حد فيهم اتضايق شوية . .

ترسيخ مفهوم العدل بينهم من الحاجات الواجب مراعتها , لنزع اي بغضاء او مشاكل جانبية عندهم .

------------------------------------------------------------------------------------------

• قتل وقت الفراغ عندهم

وهو أكبر عدو ليكي  . .

حاولي بقدر الإمكان ميكونش فيه وقت فراغ كبير عندهم , حاولي إنك تمليه بحاجات مفيدة  , او حتي حاجات مسلية مش مؤذية , لأن لو هما فاضيين هيتعبوكي و يتخانقو مع بعض , ومش هتخلص مشاكلهم

شوفي علي النت العاب ذكاء معينة , او كتب او قصص يقروها , او انشطة يعملوها  , او حاجة رياضية يفرغو فيها نشاطهم ,سواء في ايام المذاكرة او الاجازة , لان حتي ايام الدراسة هما مش هيذاكرو طول اليوم , لابد يكون فيه حاجات في برنامجهم اليومي

------------------------------------------------------------------------------------------

• مبادئ الدين

وهو أمر ضروري لغرس مبادئ القيم و الخلق السليم عندهم , ولصناعة حاجز داخلي جواهم ضد الحرام و الغلط , ابدئي بتعليمهم الصلاة و حضهم عليها , خليهم يقرأو قصص الأنبياء للأطفال , خليهم يشوفو مواد مفيدة علي اليوتيوب في نفس الإطار  , راقبي بيقولو ايه و ايه الالفاظ اللي بيستخدموها  . .

لو بالفعل قدرتي تغرسي القيم الدينية السليمة جواهم , فثقي انك قطعتي شوط كبير من رسالتك تجاههم , وهيدعولك جدا لما يكبرو

و ممكن تبدأي بالصلاة ,عشان تكون شئ أساسي ملازم ليهم طول حياتهم

------------------------------------------------------------------------------------------

• عقاب من يبدأ المشاكل

وده تخليه مبدأ عام عندهم , وتنفذيه فورا ايا كان مين اللي عمله , عشان يعرفو ان اللي هيبدأ بالغلط هيتعاقب .

انا عارف ان صعب انك تحددي مين اللي غلط من غير ما تشوفيهم , في الوقت اللي كل واحد بيقول كلام , بس اجتهدي عشان تعرفي عن طريق كلامهم . .

و العقاب مش دايما معناه الضرب , بل خلينا نقول ان الضرب خليه في الحالات الاستثنائية من العقاب , الأصل في العقاب هو الحرمان من حاجة هو بيحبها لوقت معين , ويكون الطفل عارف العقاب قبل ما يعمل الغلط , عشان لما يغلط و يتحرم من الحاجة اللي بيحبها يكون عارف ان ده فعلا عدل , وانك عملتي اللي عليكي و حذرتيه قبلها  . .

وكمية العقاب او الحرمان تكون متوازنة , لا هي كبيرة وغير محتملة فتكسره , ولا هي سهلة و ميسورة فيتشجع علي الغلط , يكون مقدار متوازن بين ده و ده . .

ولما يتنفذ عقاب في طفل , متتراجعيش عنه , ولا تندمي عليه , ولا تتوقفي عن العقاب قبل ما تمر المدة المحددة , عشان الطفل يكون عارف انك جادة في تنفيذ العقاب من غير هزار . .

ولما يغلط ويتعاقب متعذريش ليه , ولا تتأسفي له , لازم تكوني جادة معاه , عشان يعرف الصح من الغلط .

------------------------------------------------------------------------------------------

• لا تعتمدي علي دور الزوج

للأسف سلبيته في تربية الأطفال شئ سخيف , لكن انتي مفيش قدامك الا انك تنسيه تماما دلوقتي , وتعتمدي علي نفسك بالكامل في تربية الأطفال , وترحمي نفسك و متطلبيش منه خدمات في جانب التربية طالما انتي عارفة انه مش هيعملها

------------------------------------------------------------------------------------------

• تجنبي المشاكل قدامهم

يعني حاولي بقدر الإمكان انك تتجنبي حدوث اي مشادة او جدال او خلاف مع زوجك قدام الأطفال , لان ده ليه تأثير مدمر عليهم . .

فانتي من ناحية متفتحيش اي نقاش او كلام مع زوجك قدامهم لو انتي عارفة انه هيتعصب  , ومن ناحية لو هو بدأ اي مشكلة قدامهم فانتي هدي الكلام تماما , عشان النقاش يختفي و الدنيا تهدي

------------------------------------------------------------------------------------------

• تجنب الصراخ و الزعيق في الاولاد

العصبية معدية , ولو انتي عصبية قدامهم او بتزعقي او بصرخي فيهم , فهما بالتبعية هيكون عندهم نفس المشاكل ديه . .

لازم تدربي نفسك علي هدوء الأعصاب و التعامل الهادي , وتكوني عارفة ازاي تتعاملي معاهم ببرود اعصاب . .

------------------------------------------------------------------------------------------

• تقليل التليفزيون

انا نفسي اقولك انهم اصلا ميتفرجوش عليه  , لأن المحتوي بتاعه ليه تأثير سلبي خطير , وبيقتل كل المواهب الإبداعية و الخيال عند الأطفال . .

لكن ان كان ولابد يتفرجو , فيكون وقت محدود ياريت ميزيدش عن ساعة يوميا , ويكون المحتوي نفسه مختلف , بحيث ميزرعش جواهم مبادئ العنف و القسوة .

------------------------------------------------------------------------------------------

• الثقة بالنفس

وكلامي هنا خاص بابنك التخين شوية  , هو ينقصه بعض من الثقة بالنفس نتيجة إحساسه إنه مش رشيق , فلازم تمشي في 3 خطوات بالتوازي

أولا إنه يفقد بعض من وزنه ويكون اكثر رشاقة , وده عشان صحته الجسدية و النفسية مع بعض , ان ظل في نفس إطار الوزن الزائد فده هيأثر عليه سلبا قدام

ثانيا ان يتم كسر حاجز الخوف من داخله , عشان ميحسش بالرهبة من أحد اقرانه , وبالتالي تتفاقم المشكلة

ثالثا انه يكتسب المزيد من الثقة بالنفس , عشان يعرف انه مش اقل من اي حد من اصدقائه , وان هو مفيهوش عيب معين عشان يتضايق منه

الرسالة التالية