البداية الخاطئة
الرسالة السابقة
العنوان : البداية الخاطئة
القسم: #الاجتماعي
الرقم: 87
السؤال:
السلام عليكم ورحمة الله وبركاته
انا مشكلتي من البداية ان كنت منعزلة جدا من وانا صغيرة ايام الاعداي والثانوي ومكنتش بفكر التفكير ال كل زمايلي بيفكره كانت عندي مشاكل كتير ف الفترة دي بين والدي ووالدتي
واثناء م كنت ف الثانوي تالتة السنة الاولي ال انا عدتها جة ليا ابن عمتي وكنت اول مرة اعمل فيس دخل وكلمني وقالي انه بيحبني طبعا ذي م شرحت ان كنت منطوية جدا مليش غير ف دراستي بس وكنت متدينة جدا رفضت كلامه وقولتله ان دة غلط وحرام وانه بس اخويا مش اكتر وهكذا وهو فضل يحاول معايا كتييييير جدا يقنعني بدة لدرجة كان بيكلم بنات قدامي عشان اغير و اقرب له
وشوية شوية بدأت أتكلم معاه وفضلنا نتكلم مع بعض لحد انهاردة وانا حاليا ف تالتة جامعة خلال الفترة دي حصلت حجات كتير جدا وكنا سعات بنتخانق كتير عشان هو عايز يتكلم ف كلام انا شيفاه غلط وحرام وسعات كنت بسمعه ومعترفه ان دة غلط والله وحجات تانية والله نفسي ربنا يغفرهالي بجد والله مكنتش اعرف ان ممكن الشيطان يوصلنا للضعف الديني بالطريقة دي لكن انا عمري م هبطل ارجع لربنا وعارفة كويس رحمة ربنا
اهلنا عارفين انه عايزني ومحدش كان بيعترض حتي بابا عارف ان بكلمه ف الفون عادي مفيش غير عمة ليا بس كانت بتلف وتدور علينا ومش عيزانا لبعض
وانا هو عاملين نفسنا مش واخدين بالنا رغم احنا عارفين هي بتعمل ايه عشان منبقاش لبعض لان هي بتكرهني بكرهها لوالدتي معرفش ليه ومع كدة جه و اتقدملي فعلا
لكن اول ما اتقدملي الدنيا اتقلبت بابا عمال يرفض ويقول خايف تحصل مشكلة واخسر عمتك فيها والجواز مبيخلاش من المشاكل ومش موافق عليه لشخصه بيقول انه مش طموح وحجات كتير ومنها انه ساكن ف قلب الصعيد وبيقولي فيه ناس كتير بتتقدملك مستوي تعليمي اجتماعي اعلي
انا متضايقة جدا لان كل عيلة بابا وقفت ضدي ومشيو ورا عمتي ومواقف كتير حصلت ولما عايز يتقدملي دلوقتي الكل بيمنعه مش عارفة اعمل ايه اسمع كلام بابا واسيبه وهو الايام هتهديه لكن دة ممكن يتدمر لو انا سبته تاني واعمل ايه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام ورحمة الله وبركاته
الرد السريع هو : انا مش شايف ان فكرة الزواج منه هتكون مناسبة من وجوه عديدة , من ناحية فيه صفات شخصية فيه مش مريحة + فكرة تحدي كل أهلك والزواج منه مش هتكون صح مهما كان شكلها جذاب ورائع . .
و هنا التفاصيل . .
--------------------------------------------------------------------------------------
البداية المعتادة للأخطاء هو التواصل الغير سليم بين واحد وواحدة خارج إطار الزواج , وده اللي شرحناه في أكتر من رسالة , أهمها رسالة : اقتحم حياتي
والغريب ان انتي اصلا من طابعك الخجل و الحياء , واستمريتي فترة طويلة في صد محاولاته التواصل معاكي , طب ليه استسلمتي في النهاية ؟ ليه سمحتيله يقتحم حياتك و يخليكي تحبيه ؟ ؟
بل إن استمراره في التواصل مع واحدة علي خجل و حياء , و عدم مبالاته برفضك المستمر , ديه علامة سلبية مش قليلة , هو عن عمد اقتحم أسوار مساحتك الشخصية , لغاية لما قرب منك بشكل كبير , ده شخص لا يؤتمن عليه . .
معقولة هو مش فاهم ان ده شئ مُحرم شرعا ؟ وشئ مدمر اجتماعيا ؟ طب لما هو جعل قلبك و قلبه متعلقين ببعض , بفرض دلوقتي ان الزواج متمش , مين هيشيل ذنب الحب الموجود في القلبين دول ؟ مين هيشيل ذنب فشل اي زواج مستقبلي ليكي من شخص تاني او ليه هو من واحدة تانية , لان فيه بقايا الحب المترسخ في القلوب ؟
ده كان خطأ كبير منه , وخطأ مماثل منك , مفيش حاجة اسمها الح عليا لغاية لما استسلمت و بقيت بحبه , انتي اللي وافقتي علي التواصل معاه , وكان ممكن تصديه بعنف و اصرار لو انتي عايزة . .
---------------------------------------------------------------------------------
وللأسف انا مش شايف ان عنده من النضوج بما يكفيه انه يكون زوج صالح . .
يعني لما يروح يكلم واحدة تانية قدامك عشان تغيري و تكلميه , بالله عليكي ده تصرف شاب ناضج عايز يتجوز ؟ ولا تصرفات مراهق بيتعامل بالحد الأدني من التعقل و الفكر الرشيد . .
طب اللي يعمل حركة زي ديه , هل هتتطمني لردود افعاله لو حصلت مشكلة ما بينكم بعد الزواج ؟ انه هيتعامل مع المشكلة بطريقة حكيمة و سليمة , مش هيعمل حركة مجنونة ؟ ؟
و لما هو يعمل عدد من التجاوزات , اللي انتي دلوقتي بتدعي ربنا انه يغفرها لكي , ايه اللي يمنعه ان بعد الزواج يعمل تجاوزات مختلفة مع واحدة تانية , طالما انهار بالفعل حاجز الخوف من ربنا قدامه . .
انا شايف ان العلاقة من بدايتها غير سليمة , أكتر من إشارة بتحذرك انك ماشية في طريق غير سليم . .
ربنا سبحانه وتعالي ذكر لنا الطريق في الآية 189 من سورة البقرة (وَلَيْسَ الْبِرُّ بِأَنْ تَأْتُوا الْبُيُوتَ مِنْ ظُهُورِهَا وَلَكِنَّ الْبِرَّ مَنِ اتَّقَى وَأْتُوا الْبُيُوتَ مِنْ أَبْوَابِهَا وَاتَّقُوا اللَّهَ لَعَلَّكُمْ تُفْلِحُونَ)
الي هو بيعمله مش دخول البيت من بابه , هو راح لف من وره , وبدأ بعملية غزو لقلبك عشان تحبيه و تتعلقي بيه , علي اعتبار ان القلب لما تحب فبيطغي علي العقل , وده اللي حصل معاكي للأسف . .
ودلوقتي لما جه يتقدم ليكي , و فيه رفض لسبب معين , فهو مصر علي الدوران من خلف الطريق السليم , وانتي عايزة تكملي معاه المشوار . .
صحيح إن أهلك لا يجوز شرعا إنهم يجوزوكي شخص انتي مش عايزاه , لكن أحيانا بيكون فيه وجهات نظر انتي مش شايفاها
-----------------------------------------------------------------------------------
طب ماذا عن عمتك و موقفها الغريب ؟ ؟
علي وصفك انها متجنية عليكي و ظالماكي , وده موقف غير مقبول منها , وربنا هيحاسبها علي كل حاجة بتعملها . .
بس فيه سؤال , يا تري لو كانت عمتك موافقة عليه , هل برضه كان فكرة الزواج منه هتكون سليمة ؟ ؟
هل لو كان والدك مش رافض , هل الفوارق اللي بينكم اللي والدك ذكرها ليكي , هل مش هتعمل أي تأثير سلبي في الزواج قدام ؟ ؟
مشكلة البنات في سن العشرينات , ان بيكون نظرهم قصير إلي حد ما , بيبصو بس للمرحلة الزمنية القريبة اللي قدامهم , وخيالهم بيقنعهم ان الحياة كلها مستمرة علي نفس النسق الوردي الرائع , من غير ما يعرفو هل ده صح ولا لا . .
خبرتك في الحياة , لا تؤهلك انك تعملي تقييم موضوعي و كامل للشاب ده , عشان تقدري تحكمي عليه سلبا او ايجابا . .
وارد حتي لو عمتك كانت موافقة عليه , ان والدك برضه يرفض , عشان الفوارق اللي هو شايفها , او لاسباب تانية انتي مش شايفاها بس هو شايفها . .
احنا كنا شرحنا بالتفصيل في رسالتين منفصلتين ,ازاي الواحدة تقدر تعمل تقييم لشخص متقدم لها , يا تري هل قريتي الرسالة و طبقتيها عليه ؟
المعايير الدقيقة و اختبارات الزواج
اتعودي انك متبصيش تحت رجليكي و بس , لكن تبصي لقدام , لما يكون عمرك 45 سنة , يا تري عايزة تكوني عايشة سعيدة مع زوج بيحبك و عنده من الحكمة و الفهم الكافي للبقاء علي البيت الزوجي بشكل سليم , ولا تكون مطلقة او متجوزة لكن عايشة بعذاب مستمر مع شخص مش عارف يقيم أسس الحياة الزوجية . .
متحاربيش أهلك عشان شخص انتي عارفة انه مش مناسب ليكي , واقطعي كل خطوط التواصل معاه , ومتقلقيش عليه مش هيتدمر ولا هينهار ولا هينتحر , الرجالة بتنسي بسرعة , وكلها كام شهر و هيشوف واحدة تانية يحبها و ينساكي علي طول , ديه دورة الحياة . .