البديل المناسب
الرسالة السابقة
العنوان : البديل المناسب
القسم: #الاجتماعي
الرقم: 88
السؤال:
انا 22 سنة , ابن عمتى اخد فترة يقرب منى وصارحنى انه بيحبنى وكان عايز يعرف رأيى لو اتقدملى معرفتش أقوله غير أن لو أهلى شايفينه مناسب هفكر فى الموضوع مع العلم أن مستواه متوسط وكان بتاع بنات المهم بعدها اتخرجت واتقدملى وكنت آخر حيره لانه بتاع بنات ومستواه التعليمى أقل لكن ماديا كويس وعيشتهم مقدرش استحملها لأنهم بخلا شويه لكن كنت حاسه بحاجه محيرانى
المهم انا رفضت وبعدها بفترة هو خطب ولقيتنى زعلت حسيت انى ظلمته أو مش هلاقى حد يحبنى زيه وفى نفس الوقت مش عارفة نفسى بحبه ولا لا نظرا لأن مكنتش بكلم ولاد ومعنديش تجارب لو انا بحبه اعمل ايه
هل أنا ظلمته انا آخر نيله معرفش أتعامل فى المواضيع العاطفية واصلا معهرفش اعرف ازاي لو الشخص اللي قدامي بيحبني
كنا عارفين بعض من واحنا عيال وبعدين مشوفتوش تانى تقريبا فى الاول بدأها من ناحية انه مش قادر ينسى زكريات زمان ومش ناسينى وزكريات طفوله وكده خلانى اتاثرت
اه وعلى فكره هو اللى قالى انه عرف بنات قبلى وكلامنا كله كان على الفيس بس
ولأن كان والدى الله يرحمه كان تعبان فكان دايما بيساعدنا وبيسال على ابويا لأنه بيشتغل ممرض
وعلى فكره الموضوع ده لما بدأ كان من 3 سنين وهو فضل مستنينى الفتره دى مع انى معشمتوش بحاجه وكان بيكلمنى كل فترة بس من غير ما يتعدى حدوده فى الآخر يعنى
وأهله ناس كويسين وجدعان دايما معانا وكده
أسفه على الإطالة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله . .
الحل باختصار : اللي عملتيه صح برفض الارتباط بيه , الزواج بينكم مكتوب عليه الفشل من قبل ما يبدأ , ومتحسيش بالندم ولا الحزن ولا اي حاجة , لانك مش غلطانة في اي خطوة . .
والتفاصيل هنا . .
-------------------------------------------------------------------------------------
بداية مفيش زواج بيتم بناءه علي الشفقة , مفيش اي ارتباط ناجح بيتبني علي مبدأ : مش عايزه اظلمه , ده يبقي محكوم عليه بالفشل تماما . .
فيه رواية كلاسيكية جميلة للكاتب النمساوي "ستيفن زفايج" , اسمها "حذار من الشفقة" , بتحكي ازاي ان اي ارتباط مبني علي الشفقة علي الطرق الاخر هو انتحار عاطفي بلا شك . .
فمتحطيش في بالك الشعور ده , وبالتالي احذفي من راسك اي احساس بـ : مكانش لازم اظلمه , ده هو هيتكسر من غيري , ده هو هيحبط لو رفضته . . كل الكلام ده غير منطقي , الواحد ممكن يضحي بحاجات معينة عشان ميحرجش الانسان اللي قدامه ,بس مش بالزواج , وفي حالة ان البنت حست ان اللي قدامها مش مناسب ليها , لازم ترفض و بمنتهي القوة , تجبنا لاي مصير مظلم في المستقبل . .
و من الافكار الغير مناسبة اللي ممكن تيجي في بالك : انا محدش هيحبني زيه ابدا , طبعا ده كلام غير سليم , هل انتي اطلعتي علي الغيب ؟ هل عرفتي المستقبل يخبئ ليكي ايه ؟
مبدأ إنك تقفلي المستقبل بناء علي توقع معين هو مبدأ غلط , وثقي ان ربنا هيعوضك من هو خير منه .
كمان اتأكدي ان حب الطفولة بيتنسي , لما انتي وهو كل واحد يستقل بحياته بشكل سليم , متحطيش في بالك اوهام متعلقة انك هتظلي تفتكريه للابد و كدة , الكلام ده بيحصل في الروايات الرومانسية ,مش في الحياة الطبيعية
---------------------------------------------------------------------------------------
بالنسلة لسؤالك , اعرف منين ان فلان بيحبني ولا لأ . .
ده سؤال مهم فعلا , وكنا اجبنا عنه بالتفصيل في اكتر من رسالة
الموضوع مش صعب , محتاج منك شوية تركيز و اهتمام , والأهم انك تضعي الأمور في نصابها , يعني تظبطي المعايير اللي علي اساسها تعملي تقييم للشخص , اقري الرسايل فوق و هتفهمي قصدي .
و نصيحة ابعدي عن اسلوب التواصل مع الشباب عشان تشوفي مين كويس و مين وحش , ده اسلوب غير مناسب , وغير صحيح , انتي من جواكي عندك نقاء و عفة , ومكانش عندك اختلاط قبل كدة بالشباب , وديه ميزة كبيرة مش هتعرفي قيمتها الا لما تتجوزي , ارجوكي متنحدريش للاسلوب الغير صحيح اللي بتمارسه كتير من البنات , لانه هيهد اي زواج ناجح في المستقبل . .
اغلب الرسايل في القسم الاجتماعي بيكون سببها اتساع دائرة المعارف لدي كل من الولد والبنت من الجنس الاخر ,و ده بالفعل هو اول مسمار في نعش الحياة الزوجية المستقرة , اقري الرسايل و هتشوفي كلام يشيب الشعر .
-----------------------------------------------------------------------------------
كمان نقطة انه كان يعرف عدد من البنات قبلك , ديه علامة سلبية جدا عنده , ومن أهم الاشارات اللي تقنعك انه مش مناسب ليكي , لانه رغما عنه لو كان اتجوزك , كان هيقارن بينك و بين ذكريات صديقاته اللي في باله , وغالبا الكفة هتميل لصالحهم , ده غير ان اللي بيتعود علي اتساع معارفة من الجنس الاخر قبل الزواج , مش بيبطل ده بعد الزواج , وهيستمر علي نفس النهج المريض .
كل الاشارات بتوضح انه مش مناسب ليكي , انسيه تماما , متتواصليش معاه ,ولو هو حاول يتواصل معاكي صديه فورا و هزقيه عشان يتقفل الباب ده تماما , ومتحسيش باي ندم انك رفضتيه
وفي النهاية عايز اختم بقصة جميلة . .
الصحابية الجليلة "أم سلمة" رضي الله عنها لما توفي زوجها ابي سلمة , بكت عليه بكاء شديد , الرسول صلي الله عليه و سلم نصحها بالصبر , وعلمها انها تقول الدعاء " اللهم أجرني في مصيبتي و اخلفني خيرا منها"
السيدة ام سلمة تعجبت , هل هناك خيرا من ابي سلمة ؟ معقولة ربنا هيخلف علي بزوج افضل من ابي سلمة ؟ ؟
فالمولي تبارك و تعالي استجاب لدعاءها و تزوجت بالفعل من هو خير من ابي سلمة , وهو الرسول صلي الله عليه و سلم . .
و ده يعرفنا ان مفيش حد يعرف ربنا يخبئ ليكي ايه في المستقبل , وان ممكن تكوني انتي شايفة ان المستقبل مظلم و كئيب , بينما خلال شهور او سنوات هيأتي ليكي الزوج اللي تنسي معاه كل الاحزان اللي فاتت . .