العنوان : الاهتمام الأخير

القسم: #الاجتماعي

الرقم: 91

السؤال:

 

السلام عليكم ورحمة الله تعالى وبركاته انا متجوزة وجوزي كويس وهادي ف طبعه وبيصلي بس انا دايما عندي شكوي منه انه انا اخر اهتماماته عيلته واخواته وبعدين انا

 

كتير طلبت منه كله يكون ماشي بالتوازي وانا عارفه وبحبهم كلهم بس انا مهمة اكاد اكون الاكثر اهميه مش باخدة لنفسي لوحدي بس احب اني اعرف عنه الاول كل قرار نفكر فيه سوا مش بعد مايتشاور معاهم انا اعرف بيه بالصدفه بضايق جدا

 

كل ما اقارن بين اهتمام والدي بينا و حبه كان عامل ازاي و اهتمام جوزي الاقي ان والدي ميتعوضش ابدا

 

وصلت لمرحله بعد 6 سنين جواز اني مبقتش اساله ودايما قاعدة ساكته مفيش حاجه اتكلم معاه فيها غير العيال انا فعلا بحب اهله بس الموضوع فعلا مزعج جدا وخايفه مع الوقت اتغير معاهم زي ماتغيرت معاه  بقي عندي انعدام بالاحساس بالامان لبكرة معاه و مش عارفة اعمل ايه

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

 

الإجابة                    :

 

وعليكم السلام و رحمة الله

 

بداية فيه رسالتين تم نشرهم فيهم نصايح مهمة , لأن الموقف فيهم مشابه الي حد ما لسؤالك . .

 

رسالة الحياة الباردة  , رسالة خلل الأولويات 

 

ياريت تقريهم لأن تطبيق الكلام اللي فيهم , هيساهم بجزء كبير في الحل .

 

----------------------------------------------------------------------------------

 

وبالتوازي ممكن تحاولي تطبقي الخطوات ديه :

 

• لأن جزء كبير من المسؤولية بيقع عليه , فحاولي تعملي تقويم بطريقة ذكية , وإنك تعرفيه مقدار الأذي اللي بتتعرضيله انتي و الأولاد , وتنقلي له الحال اللي انتي بالفعل بتعاني منه , ولو الرسالة اتنقلت بشكل سليم فممكن يبدأ يتغير

 

• حاولي تتحكمي في مشاعرك تجاه أسرته , لأن في النهاية الغلط منه هو مش منهم , يعني هما معملوش تحكم في حياتك ولا حاولو يتدخلو فيها , فلو إنك أظهرتي مشاعر سلبية تجاههم , فهو هيفسر اي كلام هتقوليه انه كراهية لأهله , وده غير سليم

 

• حاولي تصنعي المساحات المشتركة , شوفي ايه اللي بيحبه وانتي ابدئي اهتمي بيه , شوفي ايه المواضيع اللي مهتم بيها و اعرفيها كويس عشان تقدري تفتحي كلام فيها

 

• اتعلمي الانصات اكتر من الكلام , لما هو يتكلم و انتي تسمعي اكتر , ده بيقتل فرص الجدال , وبالتالي الخلافات  , مش قصدي انك تكوني تابعة ملكيش راي في البيت لكن اتعلمي فن الانصات

 

• خليه يعيش معاكي دور المُعلم : وديه حاجة بيحبها كتير من الرجالة , انه يكون دور المعلم او الاستاذ و يقعد يشرحلك حاجة بالتفصيل , وده هيذيب كمية من الثلوج المتراكمة بينكم

 

• استمرارا للنقطة اللي فاتت , ممكن ترضي غروره الشخصي , انه تمدحي فيه حاجة هو عملها , حتي لو كانت هايفة  , بس ده هيصنع عنده نوع من الرضا الداخلي , واللي هينعكس ايجابا علي تعامله معاكي

 

• حاولي تدخلي ليه بالمدخل الديني (باعتباره متدين) عشان يستوعب الغلطة اللي بيعملها في اهماله ليكي و للاولاد , شوفي مدخل مناسب او طريقة كويسة عشان يتعلم خلق الرسول صلي الله عليه و سلم في الشأن ده

 

• حاولي تتوقفي عن الشكوي من : انت مش معانا , انت مهمل في البيت و هكذا , لأنه هيدافع فورا عن نفسه , وهيزداد ايمانه انه كويس ومدي البيت حقه

 

• لازم لازم لازم تعالجي العصبية اللي عندك , لازم من غير تأخير , ثقي انك زي ما شايفه ان هو بيتعبك في نقط كذا كذا , فهو كمان شايف انك بتتعبيه في نقط كذا كذا, وأهمها العصبية , خاصة ان هو اصلا هادي , وبالتالي عصبيتك بتعذبه

 

حاولي تقري رسالة : كابوس العصبية , وتطبقي كل اللي فيها  

       

 

• متعمليش مقارنة بين الاب و الزوج , المقارنة اصلا غير سوية , لان هو لما يعمل مقارنة بين حنان امه ليه و حنانك ليه , كفة امه هتغلب فورا , و برضه ديه مقارنة غير سليمة .

 

 

 

• الإحساس بالإطمئنان و الأمان بيكون بالركون إلي الله مش من اي بشري مهما كان مين , وحتي لو كنتي متزوجة شخص بخلق الصحابة الكرام , فهو ميضمنش ليكي الأمان او الإطمئنان لبكرة , لأن القلوب بين اصبعين من أصابع الرحمن يقلبها كيف يشاء .