العنوان : الإحساس بالقيمة

القسم: #الاجتماعي

الرقم: 92

السؤال:

 

أنا حاسه انى في مشكله.  عاوزه اخد رايكم . انا أنزلت شغل والحمد الله شغل حلو لغايه ثلاثه وعقبال ما اوصل بتبقى اربعه والدنيا ماشيه وعندي بنت عمرها 4  سنين بسيبها في الحضانة

 

بس حاسه انى موضوع صعب عليا. حاسه مش عارفه أكمل وخايفه اسيب اشغل أندم وخصوصا أنه عقد في مكان حلو مع أنه مرتب لسه مش كبير بس مش عارفه استناه فتره وهتعود والدنيا هتضبط ولا اسيب الشغل وارجع لي البيت وقعده و ملل والوحده بدون حتى صديقه وحده حتى تتطمن عليا. 

 

انا محتاجه شغل ماديا و علشان احس بقيمتي في نظر جوزي و اشوف ناس انا لما كنت قاعده في البيت حرفيا مكنتش يكلم حد ولا تلفوني بيرن غير من جوزي وأمي لو حتى مات معنديش أصحاب يجو العزا بتاعي. فعلا معنديش أصحاب

 

مش عارفه اعمل ايه بحول مقصرش في البيت مع جوزي بس يجي ع نفسي وحاسه اني تعبانه هل دي علشان بقالي خمس سنين قاعده في البيت مش يشتغل ولا علشان شغل لسه جديد ولا هتعود والدنيا هتمشي اعمل ايه.

 

جوزي حاسه متضايق بس مش عاوز يقولي اقعدي . أنا نازلة برضاه ومكنش يتوقع أنه هيجلي شغل بس من ساعة ما اشتغلت و انا حاسة بتقصير معاه يعني انام بدري وهو يرجع يتعشي لوحده و كدة

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

أهلا بيكي  .

 

أغلب الإشارات في رسالتك بتوجهنا في إتجاه إنك تسيبي الشغل, ايوة شغل الست مش عيب ولا حرام , لكن لابد يتم تقييمه بمعايير البيت و الأسرة أولا , ولو كان فيه تعارض يبقي مع السلامة الشغل علي طول .

 

وياريت تقرأي الرسالتين دول , لأن فيهم سؤالين قريبين جدا من سؤالك , وبالتالي إجاباتهم هتفيدك . . 

​

شغلي ولا اسرتي   , خطيبي ولا شغلي

​

---------------------------------------------------------------------------------------

​

طب ليه بنقولك سيبي الشغل ؟ ؟

 

عشان كذا سبب  .

 

 

• أولا واضح ان زوجك متضرر من الشغل , كون انه اكتر من مرة يرجع البيت يلاقيكي نايمة فده شئ مش مريح , خاصة لو كان راجع من شغله مش كان بيتفسح مع اصحابه , فحكاية انه يسخن الاكل لنفسه و يخدم نفسه كأنه اعزب , حاجة سلبية .

 

 

• ثانيا , بنتك محتاجاكي , ايوة هي في سن تروح حضانة , بس فيه فرق لما تروح و تيجي في مواعيد مريحة , وتلاقي امها منتظراها وهي رايقة , عن امها راجعة متعصبة من الشغل و مش فاضية تتكلم معاها لان لازم تخلص شغل البيت اللي متعملش لأنها كانت في الشغل

 

اعرفي ان اغلي راس مال عندك هما اولادك , واعرفي ان شغلك – مهما كان بسيط – فهو هياثر سلبا علي مقدار الحنان و الرعاية اللي يكون منك ليها , ده شئ لابد منه و مفيهوش عناد

 

 

• مين قالك ان الشغل دايما بيكون راحة للبال , لو كان دلوقتي لطيف فممكن بعد كام شهر يكون فيه مشاكل او ضغط و تلاقي نفسك مضغوطه فيه , وهو اللي اكيد هينعكس علي تعاملك مع زوجك و اولادك , طب ماذا لو قدام اتظلمتي في الشغل ده ؟ ماذا لو كان فيه نفسنة او اذي بشكل مباشر او غير مباشر  ؟ كل الضغوط ديه هتجعلك عصبية اكتر , وبالتالي ثقي ان زوجك و بنتك هيعانو منك , خاصة انك قلتي بالفعل انه مش مستريح للشغل بتاعك

 

 

• لازم تحاربي الملل لو هتقعدي في البيت , و أصلا من حسن الحظ اننا موجودين في عصر فيه كمية لا تنتهي من الوسائل اللي تحارب الملل , زي التليفيزيون واليوتيوب و الفيسبوك و غيره , انتي بس لو نظمتي لنفسك جدول فيه عدد من الاعمال اليومية , هتلاقي نفسك استغليتي يومك بشكل رائع

 

 

• صناعة الاصدقاء مش بس من الشغل , فين الجيران ؟ فين انك تزوري اسرتك و اسرة زوجك ؟ شوفي لو فيه مسجد قريب و اتعرفي علي البنات هناك , شوفي لو فيه جمعية خيرية و تشاركي معاهم ولو ساعة اسبوعيا , فيه طرق كتير للتواصل مع الناس بس محتاجة منك شوية شجاعة , وتكوني اجتماعية اكتر

 

 

• أخيرا انتي قلتي : عايزة يكون عندي إحساس بقيمتي , يا فندم الإحساس بالقيمة بيكون عن طريق بناء بيت سليم , وتنشئة ابناء لما يكبرو يدعولك و تفتخري بيهم , قيمة الست مش بشغلها ابدا , احيانا الشغل بيكون مناسب ليها و احيانا بيكون بالفعل مش مناسب

 

 

فكري تاني , واعملي استخارة , واختاري الحاجة اللي انتي شايفة انها هتزرع السعادة جوة بيتك