العنوان : الأسُس السَليمة

القسم: #الاجتماعي

الرقم: 98

السؤال:

 

السلام عليكم ورحمة الله وبركاته

 

أنا دخلت الصفحة وعجبني أسلوبكم في الإجابة عن الأسئلة وحل المشكلات، فجزاكم الله خيرا وجعله في ميزان حسناتكم،  أنا عندي 24 سنة مطلقة ولدي طفل عنده عام وثمانية أشهر والده لا يسأل عنه أبدا منذ سنة  من تركي للبيت، ولن اتطرق لذكر أسباب الطلاق فهي كثيرة ولكنه كان أسلم الحلول بعد حدوث محاولات للإصلاح ولكنها لم تجدي، وإهماله للولد كان شئ متوقع فهو شخصية غير سوية وتصرفاته متناقضه

 

سؤالي بقي : هو ازاي أربي ابني تربية سوية بحيث لا يشعر بالنقص لعدم وجود والده بجانبه أو عدم اهتمامه به؟

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله . .

 

أهلا بيكي يا فندم .

 

بعيدا عن أسباب الطلاق ,او عن اللي حصل , فيه عدد من القواعد لو انتي اتبعتيها , هتجدي نتيجة إيجابية ان شاء الله تعالي , في تنشئة ابنك علي أسس سليمة , وبعيدا عن اي أزمات نفسية او اجتماعية ممكن تكون عنده . .

 

و القواعد ديه هنسردها في صورة نقط , حاولي تركزي عليها بقدر الإمكان .

 

• أولا مفيش أهم من زرع الوازع الديني داخل الطفل , هو طفل رضيع حاليا , بس انا باتكلم مستقبلا , اللي هو خلال سنوات هيبدأ يشب علي مبادئ و قواعد , فلازم تكون القواعد الدينية في الصدارة , و يكون خوفه من ربنا اكبر من خوفه من الناس , ويكون حبه لربنا أكبر من حبه لمصلحته , ويكون تمسكه بدينه أقوي من تمسكه باي حاجة تاني

 

•  اتعودي علي احترام عقله , وعلي مشاركته التفكير و القرار , حتي لو كان لسة في سن صغير , وده عشان يصنع جواه نوع من الاهتمام برأيه و عمل تقدير كافي ليه , وبالتالي الاستمرار في حياته بشكل صحي

 

• ازرعي جواه الثقة بالنفس , خليه دايما متأكد وواثق من إمكانيات نفسه و قدراتها , وإنه قادر علي تخطي الصعاب و النجاح في الحياة

 

• اياكي تضعي جواه بذرة كراهية ابيه , اياكي تخليه يرضع الضغينة علي ابوه اللي حتي لو كان غلطان 100% في عملية الطلاق , فممكن يكون تواجده جنب ابنه في احد مراحل حياته شئ مهم

 

• علميه انه لازم ياخد حقه و ميسيبهوش  , علميه ان الطيبة مهمة , بس مش معناها ان الواحد يتضرب علي قفاه , علميه ان كرامته اغلي عنده من اي حاجة تاني , وان او حد داسله علي طرف ميسبهوش لغاية لما ياخد حقه

 

• و بالتوازي , علميه العفو عند المقدرة , وان اللي يعتذرله يقبل اعتذاره , وان لما يكون هو في موضع قوة اياه يظلم اي كائن , سواء انسان او حيوان , علميه ان "من عفا وأصلح  فأجره علي الله"

 

• ازرعي جواه الغيرة بكميتها الطبيعية , انه مينفعش يقبل علي نفسه انه يكون ديوث , او انه يصاحب بنات و يوافق علي مراته المستقبلية انها تكون من نفس النوع , وفي نفس الوقت ميوصلش للمرحلة المَرَضية من الغيرة , اللي مبنية علي الشك, او معتمدة علي الوهم .

 

• عرفيه ان المدرسة مهمة ايوة , بس مش كل حاجة , وان المعرفة العلمية و الخبرة العملية ممكن تكون اهم من الشهادات , وان الاهتمام بالدراسة بس هو طريق صناعة انسان فاشل , لازم بالتوازي يكون بيفكر و يلعب و يخطط و يتفسح و يهتم بجسمه و عقله و خلقه و دينه

 

• حذريه من الكذب , وازاي ان الانسان الكاذب هو منبوذ و فاشل في كل حياته , ومع اول كذبه يكبذها عليكي خاصميه فورا (لمدة معينة) , عشان يعرف انه شئ مش سهل

 

• استخدمي معاه اسلوب التربية بالقدوة , خليه يشوف فيكي الصفة الجميلة اللي عايزة تزرعيها فيه , قبل ما تكلميه عليه , وبالطبع ميشوفش منك اي شئ انتي تنهيه عنه

 

• ازرعي جواه الكرم , وعرفيه ان مفتاح قلوب الناس انه يفتح لهم قلبه , وانه يكون اهتمامه بالفلوس اقل بكتير من اهتمامه بيهم هم

 

• حاولى بقدر الامكان ان الطفل يشوف والده حتى لو على فترات بعيدة، لكن ما يتحرمش منه نهائى، بلاش توتر بينكم اثناء زيارته لابنه لو بيزوره، حافظى على هدوءك وبلاش تبدى انزعاجك وغضبك لما تشوفى طليقك لان الطفل هيلاحظ ده جدا وكل لما يكبر كل ما هيبتدى وعيه يزيد ويأثر ده تأثير سلبى عليه فى حياته بعدين

 

• لو مافيش زيارات كتير او اهمال الوالد ، معلش تعالى على نفسك انتى علشان ابنك وحاولى حتى تخلى الطفل يسمع صوت والده بالتليفون او حتى يشوف صوره وتحكيله عنه لكن ما تلغيش وجوده من حياته لأنه محتاجله..

 

• دايما هيحتاج لوجود ذكورى جمبه يعنى ايه؟ يعنى هيحتاج لراجل جمبه فحاولى تشاركى اخواله او جده او حتى اعمامه فى حياته وتخليه يحس بوجود الراجل فى حياته

 

• مش معنى انك انفصلتى عن زوجك يبقى كده تعملى لابنك كل اللى هو عايزه وطلباته أوامر ، بلاش تدلعيه زيادة بحجة انه محروم من والده فأنا هعوضه، لأن مش بكده هتعوضيه انتى كده بتخسريه

 

• دايما لو جات سيرة والده ما تقوليش عليه الا كل خير ، ما تخليهوش يكرهه وتربى جواه وتعلميه انه يكره بلاش تقسى قلبه، خليه راجل قوى يعرف ياخد حقه فى حدود الادب والاخلاق ويدافع عن حقوقه كلها وما يبقاش ضعيف وسهل ومسلوب الارادة

 

• لو كبر شوية وسأل عن والده وهو ليه عايش بعيد عننا، مفيش مانع تفهميه بأسلوبك انه الطلاق مش نهاية الكون وانه يقدر يتواصل معاه ويشوفه حتى لو فى بيت تانى

 

• اتأكدى ان الاجداد من الطرفين مش هيتكلموا بالسوء على الاب قدام الطفل لانه هيفهم كده حتى لو بلغة الاشارة

 

• اهتمى بطفلك وقربى منه وخصصيله وقت يوميا تقعدى معاه وكل ما يبتدى يكبر تزودى الوقت ده وتتكلمى معاه وتعلميه القيم والمبادئ اللى نفسك تكون موجودة فيه، خليه ينشأ انسان سوى، علشان ما يكررش نفس المأساة لما يكبر مع زوجته، ابتدى اغرسى فيه قيم الصدق والامانة واحكيله حكايات كل يوم يتعلم منها ، عرفيه ربنا وفهميه الدين صح، وادعى ربنا يساعدك فى تربيته ويجعله من الصالحين وافتكرى انها فعلا مسؤلية كبيرة لكن كل ده فى ميزان حسناتك وربنا يعينك